APOCALIPSIS 18 - Mam of Todos Santos -- Guatemala Unicode

Oj tcub xitj jnintzaj tnom Babilonia

1Tbajlenxitltzen jlu, e wila juntl tsanjel Dios ncuꞌtz tuj cyaꞌj. At nim tipemal, bix e cub spiꞌyen twitz txꞌotxꞌ tuꞌn tspiꞌyenal.

2Bix e jaw ts̈iꞌn tuya jun yol cyiw:

—Ma cub xitj, ma cub xitj jnintzaj tnom Babilonia. Ma tzꞌoc nuk oꞌcx te jun cynajbil biman bix tisen jun cynajbilkejil cykilca wik chꞌit kaꞌ.

3Tuya cykil cycꞌuꞌj ma chi oc lpe cykilca tnom tiꞌj yaaꞌn baꞌn tuya, tisen oj n-oc takꞌ kꞌeꞌn te jun bolo. Ma chi oc lpe tiꞌj kaꞌ ke cawel twitz txꞌotxꞌ tuya, bix ke qꞌueyel ma chi oc kꞌina tuꞌnj cycꞌaꞌs̈ tiꞌj. Pero jaꞌlewe ma cub xitj―tz̈i ángel.

4Bix e xiꞌ nbiꞌna juntl tkꞌajkꞌajel yol e tzaj tuj cyaꞌj. E tzaj tkbaꞌn:

—Key nxjala, cyetza cyxol kej xjal te tnom lu, tuꞌntzen miꞌn cybinchana il junx cyuya, bix tuꞌn miꞌn cytena cyuya oj tcub cycastiwa.

5Ma chmet-xix ke til ja tnom lu maa japan baj tuj cyaꞌj, bix ma tzul tuj tcꞌuꞌj Dios tuꞌn t-xiꞌ tkꞌoꞌn castiwa te t-xel―tz̈i Dios cye ttanem.

6Bix e xiꞌ tkbaꞌn Dios:

—Cykꞌonxa t-xel te ja tnom lu tisenx ma tzaj tkꞌoꞌn kaꞌ cyey. Cykꞌonxa caꞌba maj t-xel cybinchben kaꞌ. Tuj jvaso jaaꞌ e cuꞌxa tkꞌoꞌn jcꞌaꞌbj jkaꞌ, cybinchama cab maj t-xel, bix cykꞌonxa te tcꞌa.

7Cykꞌonxa qꞌuixcꞌaj bix bisbajil te tiꞌ nimbil tiib bix tiꞌ tachbil. Tzin tkbaꞌn tuj tanem: “Jawnex cawel kena, yaaꞌn jun mebe viuda kena. Mlay chin jaw ookꞌa, cuma mintiiꞌ bis wiꞌja,” tz̈i.

8Cuma juꞌtzen ncub tbisen juꞌwa, juꞌ tzunj, cpol jkꞌij oj tcub castiwa tibaj. Tzul cyamecy. Tzul bisbajil. Tzul weyaj. Bix cꞌoquex patet tuj kꞌakꞌ, cuma at nim tipemal Dios kꞌolte castiwa.

9Bix chi ookꞌel ke cawel twitz txꞌotxꞌ oj cylonte otk cub xitj ja tnom lu. El cyiiqꞌuen ja Dios tuyax Babilonia bix ocke te kꞌina tuꞌnj cycꞌaꞌs̈ te. Juꞌ tzunj, oj cylonte njaw tsibel jkꞌakꞌ ncub tpaten ja, nimxsen chi bisel.

10Chi tzaal weꞌ cyeyꞌlte nakch tiꞌj, tuꞌn miꞌn cub tcastiwa cyibaj, bix cxeꞌl cykbaꞌn: “¡Lastim jawnex tnom! ¡Lastim Babilonia nim tipemal nejl! Te junx hora ma cub tcastiwa,” tz̈i cybel.

11Jax juꞌx kej qꞌueyel twitz txꞌotxꞌ nim chi ookꞌel tiꞌj, cuma min-altl tuꞌn tlokꞌonte cycꞌaꞌs̈.

12Min-altl tuꞌn tlokꞌonte cycꞌaꞌs̈ oro bix plata bix xak wiꞌyelxix bix perla bix xbalen sakxix bix jawnex, bix xbalen te seda, bix xbalen cyak, bix tzeeꞌ tzin tkꞌoꞌn cꞌocꞌsbil, bix cotz nbint te twitz cye nmak jil, bix tzeeꞌ tbanelxix, bix bronce, bix xcbil, bix xak mármol,

13bix canela, bix cꞌocꞌsbil, bix s̈boꞌs̈, bix remeda, bix juntl wik cꞌocꞌsbil incienso tbi, bix vino, bix aseyt te olivo, bix harina, bix triwa, bix wacẍ, bix carnel, bix tz̈ej, bix carwaj, bix akꞌanal, bix te kꞌopaj.

14Yaltzen key xjal aj Babilonia, cykilcaj baꞌn cyaja ma tzꞌel kꞌiꞌn cyey. Cykilcaj at tajbil cyey bix cykꞌinemala ma cub naj. Mlayx chi cnet juntl maj cyuꞌna.

15Kej xjal e qꞌueyen kej cꞌas̈jel lu, kej oc kꞌina tuꞌnj cyqꞌueyen cyej aj Babilonia, chi tzaal weꞌ nakch tiꞌj tnom, tuꞌntzen miꞌn cub tcastiwa cyibaj. Ookꞌke bix at nim cybis.

16Cxeꞌl cykbaꞌn: “Lastim, lastim, jawnex tnom. Toc t-xbalen sakxix bix jawnex bix cyak, bix e bajxse bint tuya oro tuyax xak wiꞌyelxix tuyax perla tiꞌj.

17Te junx hora ma cub naj cykilca tkꞌinemal.” Ke capitán te barc, cyuyax ke onel tiꞌj, cyuyax ke cykilca nchi akꞌanan tuj mar, el lkꞌeke tiꞌj.

18Tej cylonte tej tjaw tsibel jkꞌakꞌ ncub tpaten tnom, e jaw cys̈iꞌn: “Mintiiꞌtl jun tnom jawnex tisen ja tnom lu,” tz̈ike.

19Bix e jax kuk tuj cywiꞌ, bix e jaw s̈iꞌnke, bix ookꞌke, bix e xiꞌ cykbaꞌn: “Lastim, lastim, jawnex tnom. Cykilca taaw barc tuj mar ocke kꞌina tuꞌnj tkꞌinemal ja tnom lu. Lastim, cuma te junx hora ma cub naj tnom,” tz̈ike.

20Key najl tuj cyaꞌj, bix key ocslal cyuyax t-xel Jesús cyuyax tyolel Dios, chi tzalaja, cuma ma txiꞌ tkꞌoꞌn Dios castiwa tibaj ja tnom lu, cuma nim ma yasen cyiꞌja―tz̈itzen yol e tzaj tuj cyaꞌj.

21Bix at jun tsanjel Dios tuj cyaꞌj nim tipemal e xiꞌ ttzyuꞌn jun ma tij xak tisen jun cyaaꞌ, bix e cub t-xooꞌn tuj mar. Bix e xiꞌ tkbaꞌn:

—Tisenj e cuꞌx xak tjakꞌ mar, juꞌtzen pjel te Babilonia. Cwel xitj tuj jun rato bix cyiw t-xiꞌlen, bix mlayx cnet juntl maj.

22Miꞌntl tzꞌoc arpa bix xux bix trompeta cyuꞌn xjal, bix miꞌn chi bitzetl. Miꞌn chi akꞌanantl xjal, bix miꞌn chi tz̈eeꞌntl xuuj tiꞌ cyaaꞌ.

23Miꞌn tentl tken luz tuꞌn tkꞌon spiꞌyen, bix mintiiꞌtl mejoblenel cꞌoquel tuj. Cwel xitj, cuma kej xin at cycꞌaꞌs̈ najl tuj, e cawenkexin cyibaj cykilcatl xjal, bix cuma e sbun ke aj Babilonia cykilcatl tnom.

24Tuj ja tnom lu ma cnet cytz̈qꞌuel ke tyolel Dios bix ke ocslal bix cykilca xjal o cub cybyet twitz txꞌotxꞌ―tz̈i ángel.