2 CORINTIOS 10 - Mam of Todos Santos -- Guatemala Unicode

Jtoclen apóstol Pablo

1Jaꞌlewe inayena, Pablo, cxeꞌl ncubsaꞌna nwitza cyey tuꞌn t-xiꞌ cynimana nyola, bix miꞌn tzꞌoc cybiꞌna cyyol ke ẍtakꞌ t-akꞌanal Dios. Cxeꞌl ncubsaꞌna nwitza cyey tuya jun nnaabla maans, tisenx te Cristo maansxin. Tzin cykbaꞌn jẍtakꞌ t-akꞌanal Dios oj nchin tena cyxola at cytz̈iy wiꞌja tuꞌn t-xiꞌ nkbaꞌna cyey o chi binchana il, bix tzin cykbaꞌn nuk oꞌcx oj nchin tena nakch cyiꞌja nxiꞌ nkꞌoꞌna nyola tuya ilbil cyiꞌja.

2Chin cubsal nwitza cyey tuꞌn t-xiꞌ cynimana nyola bix tuꞌn tel cyxooꞌna cyyol kej ẍtakꞌ, tuꞌntzen mintiiꞌ il tiꞌj tuꞌn cyoc wilena oj npona cyxola, cuma jax wuꞌna at wipemala tuꞌn cyoc wilena. Tzin cykbaꞌn kej ẍtakꞌ nchin akꞌanana tuj taakꞌen Dios nuk tuya tnaabl te twitz txꞌotxꞌ, tz̈ike.

3Jax cyuꞌn nuk jun xjal kena, pero min chin kꞌojla cyiꞌj xjal nchi kꞌojl tiꞌ Dios tuya wexa wilbela tiꞌj, tisen nbint cyuꞌn xjal te twitz txꞌotxꞌ.

4Mlay chin xcyeya cyiꞌke aj kꞌoj tiꞌ Dios tuꞌn wexa wipemala, pero tuya tipemal Dios kꞌoꞌn weya nchin xcyeya cyiꞌj, amale nimet cyipemal at.

5Nchin kꞌojla tiꞌ cynaabl jxjal jawnex cynaabl tuj cywitz bix nchi iyꞌ tibaj tyol Dios. N-oc wipena tiꞌ kaꞌ cynaabl xjal, tuꞌntzen taajtz tiꞌ cynaabl, tuꞌntzen cyoc tjakꞌ tcawbil Cristo.

6Bix ojtzen tel cyxooꞌna cyyol kej ẍtakꞌ t-akꞌanal Dios min cybi nyola, tisen e xiꞌ nkbaꞌna cyey tuꞌn tel cyxooꞌna, inayen tzuna chin kꞌolte cycastiwa kej ocslal min e cybi.

7Cꞌoquel cycꞌuꞌja tiꞌj tiiꞌn cynaabl kej ẍtakꞌ t-akꞌanal Dios. Tuj cywitz jawnexke tuj taakꞌen Cristo, pero nuket tzꞌel cyniyꞌ tiꞌj yaaꞌn ajnintz kena cywitz tuj taakꞌen Cristo.

8Bix yaaꞌn nuk oꞌcx nchin akꞌanana tuj taakꞌen Cristo, sino tuyax at woclena tuꞌn ncawena cyibaja, yaaꞌn tuꞌn cyxiꞌy tuj il, sino tuꞌn wonena cyiꞌja tuꞌn cycywixa tuj cyocslabla. Kane cxeꞌl nkꞌumena cyey o takꞌ Kaaw woclena cyibaja, mintiiꞌtzele nchꞌixewa tiꞌj, cuma yaaꞌntetle ẍtakꞌbil nyola.

9At juun tzin cykbaꞌn ka nuk tuꞌn wuꞌja nchin ila cyiꞌja tuꞌn ttzaj ttz̈i cyiꞌja. Pero miꞌntzen tziyꞌ tuj cycꞌuꞌja nxiꞌ nkbaꞌna at woclena cyibaja nuk oꞌcx ka nakch ntiina cyiꞌja.

10Kej ẍtakꞌ t-akꞌanal Dios cyxola tzin cykbaꞌn cyjulu: “Oj ntzaj tsmaꞌn Pablo uꞌj keya, cyiwxsen tyol bix nimxse tipemal. Pero oj n-ulxin kxol, mintiiꞌxix tzin tyeecꞌanxin ka at nim tipemalxin, bix min tzꞌajben tyolxin,” tz̈ike juꞌwa.

11Pero il tiꞌj qꞌuelel cyniꞌya tiꞌj oj npona cyxola, tuya nim wipemala baꞌn nyolena cyiꞌja, tisenxj tuya nim wipemala nxiꞌ ntzꞌiꞌbena cyey.

12Weya ncyꞌiya bint jaj tisenj nbint cyuꞌnj ẍtakꞌ t-akꞌanal Dios. Tzin cykbaꞌn ka ejeeꞌ mas jawnex akꞌanal te Cristo, bix nchi mlon nuk cyex cynaabl, bix baꞌn n-eꞌla tuj cywitz. Tzin cykbaꞌn jcye cynaabl mas jawnex twitz cynaabl juntl wik. Pero oj nchi oc ten mlol cynaabl juꞌwa, telniyꞌtzen ka min tzꞌel cyniyꞌ tiꞌj.

13Yaltzen weya, min njaw nniman wiiba tuꞌn wexa nnaabla tisenj cye nbint cyuꞌn. Chin yolelwa nuk tiꞌj akꞌuntl o tzaj tkꞌoꞌn Dios weya tuꞌn tbint wuꞌna. Yal tzunj waakꞌena o tzaj tkꞌoꞌn Dios weya, tuyaxa tuꞌn wakꞌanana cyxola tuj Corinto.

14Mlay chin iꞌya tibaj akꞌuntl o tzaj tkꞌoꞌn Dios weya. Nuket min e tzaj tkꞌoꞌn Dios weya tuꞌn wakꞌanana cyxola, mintzeletiiꞌ woclena tiꞌj tuꞌn npona te akꞌanal cyxola. Inayena tneel t-akꞌanal Dios tuꞌn npona maa Corinto te kbalte tpocbal Cristo cyey.

15Min in ocxa tuj takꞌmal juntl t-akꞌanal Dios. Ncyꞌiwa tuꞌn npon akꞌanal jaaꞌ eteꞌtl t-akꞌanal Dios, sino nuk oꞌcx nchin ayona tuꞌn cycywixa tuj cyocslabla, tuꞌntzen ntzakpeta cyxola tuꞌn nxiꞌya cyuj jun wikxitl lugar o takꞌ Dios weya

16te kbalte jbaꞌn tpocbal Jesús cyuj juntl tnom jaaꞌ min-al jun xjal o kꞌumen tpocbalxin. Ka nchin akꞌanana jaaꞌ min-ala t-akꞌanal Dios, mintzen o chin ocxa tuj takꞌmal juntl tuꞌn tel wiiꞌna toclen.

17Cykꞌoꞌnc cycꞌuꞌja tiꞌj ti toc tuꞌn tyol Dios cyiꞌj xjal n-oc cyniman cyiib: “Jun xjal mintiiꞌ tuꞌn tjaw tnimsan tiib, sino oꞌcx kyoꞌ oj tkbante Kaaw ka baꞌn ma bint kuꞌn,” tz̈i tyol Dios.

18Baꞌnte jun xjal, yaaꞌn tuꞌnj jax nkbante, sino ka baꞌn tuj twitz Kaaw.