1¿Titzen ttenj tuꞌn toc ke kcꞌuꞌj tiꞌ Dios? Cꞌoquel ke kcꞌuꞌj tiꞌ Dios jatzen nko ayonj, min baj kcꞌuꞌj tiꞌj, cykilj o cyaj tkbaꞌn Dios. Amale mint kil, pero kocslaꞌ alcyej e cyaj tkbaꞌn Dios, cuma tuj kwitz, jaxxix.
2-3Icxa tzunj min e kil tej tbint twitz txꞌotxꞌ tuꞌn Dios, pero kocslaꞌ ja Dios binchalte. O bint twitz txꞌotxꞌ bix twitz cyaꞌj nuk tuꞌn tyolxin, bix nuktzen tuꞌn kocslabl tiꞌ tyolxin n-eꞌla kniyꞌ tiꞌj jaxin binchalte.
Ke kxeꞌchel te ootxa, tuꞌn kꞌuklec cycꞌuꞌjxin tiꞌ tyol Dios baꞌn eꞌlakexin tuj twitz Dios. Cyjel nkꞌoꞌna tumel cyey ti tten cyocslabl juun ktzan kxeꞌchel nejl.
4Tisen tzunj te Abel. Tuꞌn tocslabl Abel e xiꞌ tkꞌoꞌnxin toybilxin te alimaj te Dios, bix mas e tzalaj Dios tiꞌj twitz toybil Caín nuk te awal. Tuꞌntzen tocslablxin tiꞌ Dios, jiquen eꞌlaxin tuj twitz Dios, bix e tiikꞌ Dios toybilxin. Bix amale otet cyimxin, tzinx tkbaꞌnxin te ke jaꞌlewe nuk oꞌcx taj Dios tz̈iyꞌ te chojbil il.
5Bix juntl tumel te Enoc. Tuꞌn tocslabl Enoc tiꞌ Dios, baꞌn eꞌlaxin tuj twitz Dios, bix aj tiiꞌn Dios jaxin tuj cyaꞌj. Min e cyimxin. Iꞌtzxin tej tjaw tiiꞌn Dios jaxin tuj cyaꞌj, bix min-altl o tzꞌoc cyeꞌyente texin.
6Katzen min s-oc ke kcꞌuꞌj tiꞌ Dios, min tzalajxin kiꞌj. Ka taj jun xjal tuꞌn tpon lkꞌe twitz Dios, il tiꞌj tocslaꞌ at Dios, bix tzul ttzakꞌbeꞌntexin oj tjyonen tiꞌjxin.
7Juꞌx te Noé jun tumel ja jun xjalj oc ke tcꞌuꞌjxin tiꞌ Dios. E tkba Dios te Noé tuꞌn tjaw tz̈ꞌiy aꞌ twitz txꞌotxꞌ te xitbelte twitz txꞌotxꞌ. Amale bajxit tlaꞌxin jun tpunlel aꞌ titzꞌjlenxin, pero tuꞌn tyol Dios otk cyaj tuyaxin e tocslaxin at tjawlel tz̈ꞌiy aꞌ, bix e jaw tbinchaꞌnxin jun barc tuꞌn tclet-xin bix cyuya ke te tjaxin tibaj aꞌ. Yaltzen niyꞌ ke xjal, min e cyocsla tyol Dios tuꞌn cyclet. Tejtzen tbaj xitj twitz txꞌotxꞌ tuꞌn aꞌ, bix e cyim ke xjal tuj aꞌ, jatzen e chicꞌajaxe otk tzpet kej xjal tuꞌn min e cyocsla tyol Dios. Pero te Noé, tuꞌn oc ke tcꞌuꞌjxin tiꞌ Dios, jaxin e cyaj itzꞌj. Bix tuꞌn tzunj tocslablxin tiꞌ tyol Dios jiquen eꞌlaxin tuj twitz Dios.
8Juꞌx te Abraham. E tzaj ttxcoꞌn Dios jaxin tuꞌn texxin tuj ttanemxin, pero mintiiꞌ tumel tuyaxin jaaꞌ tuꞌn tponaxin. Bix cuma oc ke tcꞌuꞌjxin tiꞌ Dios, bix e tcuyaxin tuꞌn tponxin tuj jun nakch tnom, bix e cyaj tkꞌoꞌn Dios jtnom texin te tcotzxin. Amale mint e tiikꞌ najxin, oc ke tcꞌuꞌjxin ka tuꞌn tajben cye tchmanxin laꞌ alcye jun kꞌij.
9Cyiw chꞌin tuꞌn tnajanxin tuj acꞌaj txꞌotxꞌ, pero tuꞌn oc ke tcꞌuꞌjxin tiꞌ Dios, e cyajxin. E tnimsa tcꞌuꞌjxin tuꞌn tnajanxin tuj jun wikxitl tnom t-xol jun wikxitl xjal. Nuk e najanxin tuj juun tjaxin nuk tal ttzꞌumel jil e jaw tibajxin nuk te oybil chꞌin. Juꞌx e baj tuya tcwalxin, Isaac, bix tuya tcwal Isaac, Jacob, cuma j-otk cyaj tkbaꞌn Dios tuyax te cye tcwalxin. Juꞌtzen e temaxin tuj acꞌaj ttxꞌotxꞌxin tisen jun te nakch xjal.
10E tcuyaxin tuꞌn tnajanxin nuk jakꞌch tzalu twitz txꞌotxꞌ nuk te oybil chꞌin, cuma otk tzꞌel tniyꞌxin tiꞌj tuꞌn tponxin tuj jun tnajbilxin binne tuꞌn Dios, bix te junx maj. N-eltzen kniyꞌ tiꞌj, amatzele e tiikꞌet-xin txꞌotxꞌ te Canaán te tcotzxin tuꞌn toc ke tcꞌuꞌjxin tiꞌ Dios, pero mas e xiꞌ tcꞌuꞌjxin tiꞌj jun tnajbilxin te junx maj.
11Juꞌx oc ke tcꞌuꞌj Abraham tiꞌ Dios tuꞌn ttzaj tkꞌoꞌn Dios jun tcwalxin. Amale ya niꞌ tijtlxuj t-xuꞌlxin Sara tbixuj bix bajx tzaaꞌ jun talxuj, bix juꞌx te Abraham niꞌ tijtlxin, e tiikꞌ tzunxin tipemalxin te Dios tuꞌn toc jlet jun tcwalxin, tuꞌn oc ke tcꞌuꞌjxin tiꞌ Dios.
12Amale minttiiꞌt tuꞌn ttzaj jun tcwalxin cuma niꞌ tijtlxin, pero e tzaj, bix tiꞌjtzen tchmanxin ma tz̈ꞌiy cybajxin ya nimtl cybajxin jaꞌlewe mintetpe binnen tajlaj, tisentzen arena ttziiꞌ mar mlay bint tajlaj, bix tisentzen cheꞌw twitz cyaꞌj mlay bint tajlaj.
13Ejeeꞌ tzunkej xjal lu, Abraham, bix Isaac, bix Jacob, e ten jun cychunkꞌlal tuya nim cyocslabl tiꞌ Dios, bix e cyimke. Pero tej cynajanxin, ¿e cyiikꞌpa alcye otk cyaj tkbaꞌn Dios cyexin, ka tuꞌn tcyaj tkꞌoꞌn Dios txꞌotxꞌ te Canaán cyexin? Min. Pero e cyocslaxxin laꞌ alcye jun kꞌij at tcyajlel tkꞌoꞌn Dios. Juꞌtzen e chicꞌajaxexin at cyocslablxin tiꞌ tyol Dios.
Tejtzen cynajanxin tuj Canaán, bix e cykbaxin nuk jun beten xjalkexin bix jun wikxitl xjalkexin.
14Cuma e cykbaxin nuk jun beten xjalkexin, jaxsen jun tumel te ke tuj cywitzxin yaaꞌn Canaán jun mancꞌbil cylugarxin, sino e xiꞌ cycꞌuꞌjxin tiꞌj juntl cylugarxin te mancꞌbil cynajbilxin.
15Bix jax min e cub cybisenxin tuꞌn cymeltzꞌajxin tuj txꞌotxꞌ te Mesopotamia, jaaꞌ itzꞌja Abraham. Bixettzen e cub cybisenxin juꞌwa, baꞌntettzenle eꞌla e ponkexin jaaꞌ otk tzꞌitzꞌja Abraham.
16Pero min. Jaj e cub cybisen cyexin ja jun mancꞌbil cynajbilxin mas baꞌn, yaaꞌn jun txꞌotxꞌ tzalu twitz txꞌotxꞌ. Cuma e cub cybisenxin juꞌwa, min el tiqꞌuen Dios tuꞌn toc te Cydiosxin, sino e tcuya Dios tuꞌn cyponxin tuya, bix e tbincha Dios jun cytanemxin jawnex te cyexin.
17Bix juntl maj e xiꞌ tyeecꞌan Abraham tocslabl te Dios. Jatzen toc xinj tuj niyꞌbebl tuꞌn Dios. Bix e tzaj tkbaꞌn Dios texin tuꞌn t-xiꞌ tkꞌoꞌnxin oꞌcxcꞌa junx tcwalxin Isaac te oybil te Dios, tuꞌn tchicꞌajax ka at tuꞌn tnimantexin tyol Dios hasta tejxe tbint jlu. Bix e xiꞌ tkꞌoꞌnxin tcwalxin.
18Amatzele otket tzꞌel tniyꞌxin tiꞌj tuꞌn ttz̈ꞌiy tiyꞌjilxin nuk tuꞌn Isaac, bix cucx e tcuyaxin.
19Oc ke tcꞌuꞌjxin ka e xiꞌ toyenxin tcwalxin, tuꞌn tipemal Dios at tjawlel itzꞌj tcwalxin tuj cyamecy. Amatzele mint e cyim Isaac, tuj twitz Abraham tisex otk cyim, bix tej min e cyim Isaac, tuj twitz Abraham tisex otk jaw itzꞌj tuj cyamecy. Elxin baꞌn tuj niyꞌbeblte tuꞌn Dios cuma oc ke tcꞌuꞌjxin tiꞌ tipemal Dios bix e tbixin tyol.
20Juꞌx te Isaac oc ke tcꞌuꞌj tiꞌ Dios. Tuꞌn oc ke tcꞌuꞌjxin tiꞌ Dios, e xiꞌ tkbaꞌnxin te tcwalxin Jacob bix te tcwalxin Esaú tiꞌj otk cyaj tkbaꞌn Dios texin bix ti pjel laꞌ alcye jun kꞌij.
21Juꞌx te Jacob oc ke tcꞌuꞌj tiꞌ Dios. Tuꞌn oc ke tcꞌuꞌjxin tiꞌ Dios el tniyꞌxin tiꞌj ti at tbajlel mas yaj cye tchmanxin, bix tej chꞌitk tcyimxin e xiꞌ tkꞌumenxin ti at tbajlel te cycaꞌbel tcyꞌaal tcwalxin José. Bix jun maj tej tpon José tuyaxin, tuꞌn tijlel e cub tkꞌoꞌnxin tibaj twitzxin twiꞌ tbardónxin, bix tuꞌn tocslablxin e xiꞌ tkꞌoꞌnxin chjonte te Dios, cuma ttzkiꞌntlxin at tajlel meltzꞌaj tbakelxin maan tuj jtxꞌotxꞌ otk cyaj tkbaꞌn Dios te tiyꞌjilxin Abraham.
22Juꞌx te José oc ke tcꞌuꞌj tiꞌ Dios. Tej mintknaꞌx tcyimxin, e xiꞌ tkbaꞌnxin cye ke xjal te ttanemxin tuꞌntzen taj meltzꞌaj tbakelxin tuj Canaán, cuma oc ke tcꞌuꞌjxin tiꞌ tyol Dios laꞌ alcye jun kꞌij tuꞌn cyex xjal aj Israel tuj Egipto tuꞌn cypon tuj Canaán.
23Juꞌx cye tman Moisés oc ke cycꞌuꞌj tiꞌ Dios. Tuꞌn oc ke cycꞌuꞌjxin tiꞌ Dios e cybixin tyol Dios mas twitzj tyol gobierno te Egipto. E tkba gobierno tuꞌn cybaj byet cykilca ke neeꞌ xinak itzꞌj cyxol aj Israel tuj Egipto. Juꞌ tzunj, tej titzꞌj Moisés, bix xinak tzunxin, bix niꞌ cyeca xsunxin tej ttzaj itzꞌjxin, bixse el ewet-xin oxe xjaw cyuꞌn tmanxin.
24Juꞌxsen te Moisés tej ttz̈ꞌiyxin oc ke tcꞌuꞌjxin tiꞌ Dios. Tej tpon tumel tuꞌn t-xiꞌ tbisenxin tiꞌj jaaꞌ cꞌaalaxin tuj twitzxin, bix aj tkꞌon tiibxin cyuya ke t-xjalxin te Israel. Tcyꞌixin oc tkꞌon tiibxin cyuya xjal te Egipto. Juꞌ tzunj tcyꞌixin ocxin te tal tmeel cawel tuj Egipto.
25Cuma el tniyꞌxin tiꞌj mas at tuꞌn tcamanxin tej tiyꞌx qꞌuixcꞌaj tuꞌnxin cyuyake te ttanemxin twitzj tuꞌn tcub ttz̈iybeꞌnxin il tuj Egipto, juꞌtzen e tajbexin tuꞌn toc tkꞌon tiibxin cyuya ke t-xjal Dios. El tniyꞌxin tiꞌj nuk te jun rato tzꞌajbenxixtl il.
26Tisej tej Scyꞌoꞌn tuꞌn Dios laꞌ alcye jun kꞌij at tiyꞌlel takꞌ qꞌuixcꞌaj tuꞌnxin nuk tuꞌn t-xiꞌxin tuj jiquen, jax juꞌx tuj twitz Moisés mas kꞌinemal tuꞌn tiyꞌx takꞌ qꞌuixcꞌaj tuꞌnxin nuk tuꞌn t-xiꞌxin tuj jiquen twitzj tuꞌn tiikꞌentexin cykil kꞌinemal tuj Egipto, cuma e xiꞌ twitzxin tiꞌj alcyej tkꞌaꞌ Dios texin laꞌ alcye jun kꞌij.
27Tuꞌn oc ke tcꞌuꞌjxin tiꞌ Dios etzxin tuj Egipto. Amale e tajbet cawel tibaj Egipto tuꞌn tweꞌxin cyuya ke ttanemxin tuj Egipto, min e cub ttz̈i tkꞌoj cawel tiꞌjxin, sino oc tipenxin, cuma ttzkiꞌnxin at Dios tuyaxin, amale mint chicꞌaj Dios.
28Juꞌx oc ke tcꞌuꞌjxin tiꞌ tyol Dios tej ttzaj tkꞌumen Dios texin at tuꞌn tcub tbyoꞌn Dios cykilca ke tneel cycyꞌaal cyxol xjal te Egipto. Juꞌ tzunj e tkbaxin cye xjal aj Israel tuꞌn toc cysuuꞌn ttz̈qꞌuel carnel ttziiꞌ cyja, cuma ja Dios otk kꞌumente texin ejeeꞌ xinak tneel xinak tocx cyxol tcwal jun xjal at cybyetel tuꞌn tsanjel Dios at ttzajlel tuj cyaꞌj te byolcye ka mintiiꞌ tz̈iyꞌ ttziiꞌ cyja. Tuꞌntzen tbint tuꞌnxin juꞌwa, juꞌtzen iꞌya tiyꞌsaꞌnxin tneel ninkꞌij te Pascua.
29Juꞌx oc ke cycꞌuꞌj tiꞌ Dios kej xjal aj Israel. Tej cyex jxin kxeꞌchel tuj Egipto, e ponke ttziiꞌ Cyak Mar. Dios aj paꞌnte mar, tuꞌn cyiyꞌx xjal tuj be tzkij, bix iyꞌxke, cuma oc ke cycꞌuꞌjxin at tuꞌn ttzyunte Dios aꞌ tuꞌn tcyaj be t-xol. Jatzen ke aj Egipto bix e xiꞌ lpeke te tzyulcye xjal Israel, pero n-ajtz tjuptzꞌintl Dios aꞌ cyibaj, bix nchi jaw jikꞌbantl.
30Bix mas yaj, tej cypon aj Israel tuj Canaán tuꞌn cyxcye cyibaj ke kaꞌ xjal tisen otk tkba Dios cyexin, tuꞌn oc ke cycꞌuꞌjxin e cybi j-e tkba Dios, jaj tuꞌn cyoc tenxin sutel wuuk kꞌij tiꞌj tapya toc tiꞌj entera tnom te Jericó tuj Canaán. Tetzen twuukan kꞌij bix aꞌc tyuchꞌen Dios jtapya toc tiꞌ tnom, tuꞌntzen cyocxxin tuj Jericó te byolcye cykil aj tnom.
31Tejtzen tcub xitj tnom te Jericó, nuk jacꞌa xuj Rahab e cyaj itzꞌj cyuyax ke te tjaxuj. Jatzen jun xuj mero aj paj nejl, pero tuꞌntzen oc ke tcꞌuꞌjxuj tiꞌ tyol Dios e cyaj iꞌtzxuj, cuma e tocslaxuj at tuꞌn t-xitj ttanemxuj tuꞌn Dios. Juꞌ tzunj, te mitknaꞌx tocx yuchj tapya tiꞌ Jericó, ya min oc tkꞌon tiibxuj cyuya ke kaꞌ xjal aj Jericó, sino juꞌ oc tkꞌon tiibxuj cyuya ke xjal baꞌn te Israel, bix e cub tewenxuj tuj tjaxuj cab ox xjal te Israel otk x-aj cyeꞌyel tuj ewjel ti nbaj tuj Jericó, tuꞌntzen miꞌn chi cubxin cyuꞌn aj Jericó, bix tuꞌntzen cypon meltzꞌajkexin cyuya ke cyuyaxin te byolcye Jericó mas yaj.
32Bueno, cykilca tzunkej xjal lu e yeecꞌanke oc ke cycꞌuꞌj tiꞌ Dios tej cynimante ti otk tkba Dios. Pero at mastl xjal oc ke cycꞌuꞌj tiꞌ Dios, ¿pero jaaꞌle ko oca te kꞌumlte cykil e baj cye xjal ootxa? Mlayle ko xcye kkꞌumente jun kꞌij ti e baj te Gedeón, te Barac, te Sansón, te Jefte, te David, te Samuel, bix ke txꞌolbal tyol Dios.
33Kej xjal lu bix cabtl xjal, tuꞌn cyocslabl, tecꞌalex taakꞌen juun bix e xcyeke cyibaj ke tnom, bix at juun e cawenke baꞌn, bix at juuntl e cycꞌam kej otk cyaj tkbaꞌn Dios, bix at juuntl oc cymaksiꞌn ttzi león tuꞌn miꞌn tzꞌoc cytxꞌaꞌnjil ejeeꞌxin,
34bix at juuntl etzke tuj kꞌakꞌ mintiiꞌ otk baj tzꞌeyꞌ cyexin tej cyocxxin tuj kꞌakꞌ cyuꞌn kaꞌ xjal, bix at juuntl e cletke cywitz ke byol xjal, bix at juuntl mas ocx cyipen twitzj tuj tneel tej mintiiꞌtl cyipen, bix at juuntl e xcyeke tuj kꞌoj cyibaj soldado te juntl wik tnom otk chi ul te alkꞌalbil cytxꞌotxꞌ. Cykilj luwe e bint cyuꞌn tuꞌn oc ke cycꞌuꞌj tiꞌ Dios. Bix yaaꞌn oꞌcx lu. At mastl e bint cyuꞌn.
35At cab xuuj bix oc cycyeꞌyentl cywitz kej cyal e jaw itzꞌjke bix otk chi cyim. At cabtl xjal ocke tuj qꞌuixcꞌaj nuk tiꞌ tyol Dios hasta e cyimxke tiꞌj. Min el cyxooꞌnxin cyocslablxin tiꞌ Dios tuꞌn cyclet-xin tuj cykꞌab ke byol xjal, cuma cytzkiꞌntlxin at juntl chunkꞌlal mas baꞌn bix te junx maj tuya Dios.
36Bix at cabtl iyꞌx qꞌuixcꞌaj cyuꞌn xmucchabl, bix at cabtl e xiꞌ tzꞌuꞌn cyiꞌj, bix at juuntl ocx ẍpetke tuya cadena tuj tzeeꞌ cyuꞌn cawel.
37At cabtl bix e cub byetke tuya xak, bix at cabtl e cub keset cymij tuya sierra, bix tuya twiꞌ cchil, bix e kꞌumj te cabtl ka tuꞌn t-xiꞌ cytzakpiꞌn cyocslabl tiꞌ Dios miꞌntzen chi cub byet pero min e xiꞌ cytzakpiꞌnxin bix e cubkexin, bix cabtl bix el okke nuk tuꞌn oc ke cycꞌuꞌjxin tiꞌ Dios bix nuk jakꞌch e betekexin. Mintiiꞌ cyiꞌjxin, nuk ttzꞌumel carnel bix ttzꞌumel chiva oc cyiꞌjxin. Niyꞌ mebexsenke. Nim bisbajil bix nim qꞌuixcꞌaj iyꞌx cyuꞌnxin, cuma ke kaꞌ xjal te twitz txꞌotxꞌ el cyiiqꞌuen ke t-xjal Dios,
38amale yaaꞌnt tbaꞌnke cywitz ke t-xjal Dios. Bix cuma el cyiiqꞌuen ke xjal ke ocslal, bix e bet ke ocslal tiyꞌ t-xol witz bix tiyꞌ jaaꞌ mintiiꞌ aꞌ bix mintiiꞌ cꞌul, bix e wutankexin tiyꞌ t-xeeꞌ xak bix tiyꞌ tuj t-xpaaꞌxil xak tuꞌn chi ewenxin, cuma min jaaꞌ baꞌn cyweꞌbaxin.
39Bueno, cykilj t-xjal Dios lu tuꞌn oc ke cycꞌuꞌjxin tiꞌ Dios elkexin baꞌn tuj twitz Dios. Pero joocꞌtzen eteꞌxke twitz txꞌotxꞌ, min e camankexin tiꞌ cycotzxin otk cyaj tkbaꞌn Dios.
40¿Tiken? Cuma tuj twitz Dios mas baꞌn tuꞌn junx chi elcꞌaxin kuya laꞌ alcye jun kꞌij, tuꞌn kcaman junx cyuyaxin tiꞌj o takꞌ Dios ke.
Who We AreWhat We EelieveWhat We Do
2025 by iamachristian.org,Inc All rights reserved.
