1 TESALONICENSES 3 - Mam of Todos Santos -- Guatemala Unicode

1Cuma oc mayoꞌn kena tuꞌn npona cyuyey, bix cuma mlay tziyꞌx kuꞌna tuꞌn miꞌn tzꞌel kniꞌya tiꞌj ti cytena, juꞌ tzunj e cub kximana tuꞌn t-xiꞌ ksmaꞌna Timoteo cyuyey, bix tuꞌn ncyaja njunala tuj Atenas.

2Jun t-akꞌanal Dios hermano Timoteo, bix nakꞌananxin junx kuyena tuꞌn t-xiꞌ kkꞌumena jbaꞌn tpocbal Cristo. E xiꞌ ksmaꞌna jaxin cyuyey, tuꞌntzen cycywixa tuj cyocslabla, bix tuꞌn tcyiwset cycꞌuꞌja tuꞌnxin.

3E xiꞌ ksmaꞌna jaxin tuꞌn miꞌn baj cycꞌuꞌja tuꞌnj qꞌuixcꞌaj n-oc cyiꞌja nuk tuꞌnj cyocslabla. Qꞌuelel cyniꞌya tiꞌj il tiꞌj tuꞌn tiyꞌx qꞌuixcꞌaj kuꞌn, cuma ocslal koꞌ.

4Ya o tzꞌel cyniꞌya tiꞌj lu, cuma tej ktena cyxola, e xiꞌ kkbaꞌna cyey qꞌuelel cyiiqꞌuen xjal ejooꞌ nuk tuꞌnj kocslabl tiꞌj Cristo. Bix juꞌtzen o baja, tisenj o cyila.

5Tej nbintiya niyꞌ qꞌuixcꞌaj cyiꞌja, min iyꞌx wuꞌna tuꞌn min tzꞌel nniꞌya tiꞌj ti tten cyocslabla, bix juꞌ tzunj e xiꞌ nsmaꞌna Timoteo te cyeyꞌlte cyey. Oc niyꞌbebl cyiꞌja tuꞌn taaw il tuꞌntzen tcyaj cycyeꞌyena cyocslabla, bix e wajbeꞌya tuꞌn tel nniꞌya tiꞌj ka kꞌiꞌnx cyocslabla, bix ka nuk kajxa akꞌanan koꞌya cyxola.

6Pero ya mintl nko labta cyiꞌja, cuma ma tzul meltzꞌaj Timoteo, bix ma tzaj tkbaꞌnxin baꞌn cyocslabla bix n-oc kakꞌa cyey. Ma tzaj tkbaꞌnxin nko tzaj cynaꞌna tuya tzalajebl, bix cyaja tuꞌn toc cycyeꞌyena kwitza. Jax juꞌx keya, kaja tuꞌn toc kcyeꞌyena cywitza.

7Juꞌ tzunj, key hermano, ma cyiwset kcꞌuꞌja cyuꞌna tuꞌn tiyꞌx jqꞌuixcꞌaj bix pena kuꞌna, cuma ma kbiꞌya ma cywix cyocslabla.

8Ma tzꞌel kbisa bix at tzalajebl tuj kchunkꞌlala cuma kꞌiꞌnxix cyocslabla tiꞌ Kaaw.

9Min cnet kuꞌna tuꞌn t-xiꞌ kkꞌoꞌna chjonte te Dios cyiꞌja, bix mintiiꞌ yol tuꞌn t-xiꞌ kkbaꞌna ktzalajebla twitz Dios cyiꞌja.

10Te kꞌij bix te koniyan nxiꞌ kkubsaꞌna kwitza texin tuꞌn ttzaj tkꞌoꞌnxin tuꞌn toc kcyeꞌyena cywitza, bix tuꞌn t-xiꞌ kkꞌoꞌna jxnakꞌtzbil cyey min e xiꞌ kkꞌoꞌna cyey nejl, tuꞌntzen tzꞌakl cyocslabla.

11Jket-xittzen kbeꞌya tuꞌn Kman Dios tuyax Kaaw Jesucristo, tuꞌntzen kpona cyuyey juntl maj.

12Bix takꞌxit-xin cyey tuꞌn tz̈ꞌiyne tz̈ꞌiy tkꞌakꞌbil cycꞌuꞌja cyxolxa, bix tuꞌn toc cyakꞌ cykil xjal cyey, tisen n-oc cyakꞌa keya.

13Bix tzajxit tkꞌoꞌnxin cyey tuꞌn cycyaja cyiw tuj cyocslabla, tuꞌntzen mintiiꞌ cypaltela twitz Kman Dios bix tuꞌn cytena sakxix oj tul meltzꞌaj Kaaw Jesucristo cyuya cykilcaj t-xjalxin.