1 TIMOTEO 5 - Mam of Todos Santos -- Guatemala Unicode

Jbaꞌn tuꞌn kbinchante cyiꞌj mastl ocslal

1Cwalxa. Juꞌ tzunj oj tcub tilen jun tij til, miꞌn tzꞌoc tilena. Chebe cxeꞌl tkbaꞌna te tisen tmana. Bix kej xjal cwalx, juꞌ chi tseꞌy tisen jun te tjay.

2Cꞌoquel tcꞌojlaꞌna kej xuj tij tisex ttxuy. Bix kej txin cwalx, tisen jun taneba. Miꞌn tzꞌoc tena chilsalec cyetxin.

3Yal tzunkej xuuj viuda, ka jaxxix ka viudakexuj, bix min-al baꞌn toc cꞌojlancye, ke xjaltzen te tja Dios baꞌn toc cꞌojlancye.

4Pero ka at viuda at tal bix ma at ke tchman, entonces cynaꞌxixse cwal bix cbineltzen cyuꞌn tuꞌn toc cycꞌojlaꞌn cytxu ma cyyaaꞌ, tuꞌntzen tchjet tz̈ꞌis̈bencye tuꞌn cytxu. Ja tzunja baꞌn tuj twitz Dios.

5Ka jun xuuj viuda jaxxix ka viuda, min-alx jun iꞌtztlte, bix nuk Dios tzin tyoꞌnxuj tuꞌn tcyajlal, bix min cyaj tnaꞌnxuj Dios te kꞌijl bix te koniyan tuꞌn tcyajlal, baꞌntzen toc cycꞌojlaꞌn xjal te tja Dios jaxuj.

6Pero jun viuda nuk n-extl tkꞌij te jyoj titlte taj ma nuk tikꞌchtl tzin tlokꞌoꞌn tiꞌ pwak, jatzen viudaj mixben tcꞌojlaj tuꞌn tja Dios.

7Kbanxse cykil ja lu cye xjal tuꞌntzen tbint cyuꞌn, tuꞌntzen min-al yolen cyiꞌ xjal.

8Cuma alj ocslal min tzꞌoc tcꞌojlaꞌn ke te tja, mix nbina tuꞌn tisej te Dios taj, bix masxse iyꞌnan twitz jun xjal yaaꞌn ocslal, cuma n-ocxtlpe cycꞌojlaꞌncye ke te cyja.

9T-xoltzen tajlal cybi jxuj viuda nchi onj tuꞌn tja Dios, nuk oꞌcxcꞌa kej xuj te oxcꞌal jnabkꞌi ma masj, bix baꞌnx otk chi cub tenxuj tuya junx cychmilxuj.

10Ja tloj jun viuda itzkiꞌn twitz tuꞌnj baꞌn o cub tbinche, tisen tzunj: ka baꞌnxix o tzꞌoc ttz̈ꞌis̈en ke tal, ka baꞌn tnaabl cyuyaj xjal e pon tja, ka o tzꞌoc tcꞌojlaꞌn tuya cykil tcꞌuꞌj kej xjal ocslal, ka o tzꞌoc tcꞌojlaꞌn kej xjal tuj tcyajlal e tema, bix ma ti jileltl tbanel o bint cyuꞌn.

11Pero yaltzen cyej xuj viuda cwalx, miꞌn tzꞌoc tkꞌoꞌn ke xuja te tajlal, cuma laꞌ ti taj cycꞌuꞌjxuj, cwel cybinchexuj. Chebetzen ccyajbeꞌxuj cychmilxuj juntl maj. Cwatzen oj tel cypaꞌn cyiibxuj tuj cyaakꞌenxuj tuj tja Dios,

12ya otktzen chi cub tzꞌakxuj tuj cyyolxuj twitz Dios.

13Bix juntl, nuk nchi iyꞌ ttziiꞌ jaaꞌ, bix tzin cyiikꞌen cyꞌajel, bix yaaꞌntzen nuk nchi oc te cyꞌaj, sino tuyaxe xtzꞌiml yolke, bix n-ocx cykꞌon cyiib te cawel cyxol xjal, te kbalecx tej yol yaaꞌn tumel tuꞌn tocx cykbaꞌn.

14Juꞌ tzunj we tuj nwitz tuꞌn cymaje kej xuuj viuda cwalx juntl maj, e tten cyal, bix e toc cycꞌojlaꞌn cyja. Katzen ma bint cyuꞌnj xuuj viuda juꞌwa, mintzentiiꞌ baꞌn t-xiꞌ cyyolen xjal tiꞌ tja Dios.

15Nxiꞌ nkbaꞌna ja lu cuma at xuuj viuda o cub binchen tej tkaꞌyel, o tzꞌoc cybiꞌn tyol taaw il, Satanás.

16Naꞌmcꞌatzen ka at jun najaj xjal ocslal, bix at jun viuda tuj tja, il tiꞌj cꞌoquel tonen, tuꞌntzen miꞌn tzꞌoc tiken tja Dios, sictzen baꞌn toc tonen tja Dios kej viuda jaxxix min jaaꞌ baꞌn cyoca itzꞌj.

17Kej xjal tij tajwilel nbinxix tnincꞌun tja Dios, baꞌnxixsen cyoc ocslet bix cyoc cꞌojlet, bix ejeeꞌxixj xin tocsen cyaakꞌen te kbal tyol Dios bix te xnakꞌtzal, cuma ncyaj cykꞌoꞌnxin cyaakꞌenxin tuꞌn tyol Dios.

18Juꞌtzen toc tuꞌn tyol Dios tuj kꞌanak stament cyjulu: “Miꞌn tzꞌoc tkꞌoꞌna tzuybil ttzi junjil boys ka npjunjil triwa, tuꞌn baꞌn twaaꞌnjil, tuꞌn at tipenjil te akꞌanal.” Bix juntl: “Tej xjal akꞌanal atte tumel tuꞌn tchjet,” tz̈i tyol Dios.

19Miꞌn tzꞌoc tbiꞌna til jun xjal tij tajwilel tja Dios ka min-al caꞌba ma oxe te tstiwa tiꞌj.

20Pero cyej xjal tajwilel tja Dios otk chicꞌajax otk chi cub tzꞌak tuj cyil, il tiꞌj cxeꞌl tkbaꞌna te cywitz cykil xjal tuꞌn toc ttz̈i cyiꞌj.

21Twitz Dios, twitz Kaaw Jesús, bix cywitz tsanjel Dios tuj cyaꞌj, cxeꞌlxix nkbaꞌn tey tuꞌn tbint jma txiꞌ nkbaꞌn tey, bix miꞌn tzꞌoc tcyeꞌyena ka mas nintzaj jun twitz juntl.

22Tuꞌn toc jun xjal te tajwilel tja Dios, chebe cxeꞌl tjyoꞌna. Miꞌn tzꞌoc tkꞌoꞌn naja. Ka ma tzꞌoc tkꞌoꞌna jun xjal te tajwilel tja Dios, bix cchicꞌajaxel jxjala ka at nim til, tisecꞌatzen baꞌn tilj xjala tuj twitza. Miꞌn tzꞌocx tkꞌon tiiba tjakꞌj luwe.

23Timoteo, nukx yaaba. Juꞌ tzunj yaaꞌn nuk aꞌ cxeꞌl tcꞌaꞌna, sino tuyax chꞌin vino tuꞌn tiyꞌ tchyonel tcꞌuꞌja.

24At xjal ncub bint til tuj chicꞌaj, bix cykil xjal itzkilte ka maxe cwel baj twiꞌ stis twitz Dios. Bix at xjal ncub bint til tuj ewjel. Pero tixja tten tiꞌj, cjawel chicꞌajax oj tcub bajset twiꞌ stis twitz Dios.

25Jaxse juꞌx ttena, jbaꞌn ncub cybinchen xjal, chicꞌajte. Bix amale atet tbanel taakꞌen ncub tbinchen jun xjal tuj ewjel, mlayx bint tewj te junx maj. Juꞌ tzunj miꞌn baj bint naj tuꞌna tiꞌ tnaabl jun xjal.