LOS HECHOS 28 - Mam of Todos Santos -- Guatemala Unicode

Tej tten Pablo tuj txꞌotxꞌ tcwentel Malta

1Cykilca koꞌya uꞌla baꞌn twitz txꞌotxꞌ. Bix tej kpona twitz txꞌotxꞌ, bix el kniꞌya tiꞌj ka jaj txꞌotxꞌ Malta tbi.

2Kej xjal najl tuj txꞌotxꞌa oc cꞌojlet koꞌya cyuꞌn, bix axsen jun cynaabl. Bix akꞌ jbal. Nimxsen takꞌ cheꞌw, bix e cub cykꞌoꞌn xjal kꞌakꞌ, bix e xiꞌ t-xquet koꞌya tiꞌ kꞌakꞌ tuꞌn kmekꞌta.

3Jaan Pablo akꞌ onel te chmol siiꞌ, pero tejtzen takꞌxin kꞌolecxte tuj kꞌakꞌ, bix etz junjil lbaj nim tvenenojil, tuꞌn tcykal kꞌakꞌ, bix oc ttxꞌaꞌnjil tkꞌab Pablo, bix oc tbalkꞌiꞌn tiibjil tiꞌ tkꞌab Pablo.

4Tejtzen toc cycyeꞌyen jxjal te Malta jjil lbaj otk tzꞌoc tbalkꞌiꞌn tiibjil tiꞌ tkꞌab Pablo, bix e xiꞌ cyyolenxin cyxolelaxin:

—Jaxte tej xjal lu jun byol xjalte. Ma tcoꞌpate tiib tuꞌn miꞌn cyim tuj mar, pero jatl tzunj jil lbaja ma tzꞌoc ttxꞌaꞌnte tuꞌn tchjet til tiꞌj o tbiy―tz̈itzen ke xjal t-xiꞌ cybisen tiꞌj.

5Pero nuk oꞌcx el ts̈toꞌn Pablo jajil lbaj tuj kꞌakꞌ, bix mintiiꞌ texin oc ikꞌen.

6Tuꞌn tzunj bix el kleeꞌ tuj cywitz xjal. Nuktzen e cyyotl xjal tuꞌn t-xiꞌ mal Pablo tuꞌn veneno, ma nuk tuꞌn tcyimxin. Pero yajcꞌatl toc cycyeꞌyen xjal mintiiꞌ otk tzꞌoc ikꞌen Pablo. Juꞌ tzunj, akꞌa ke xjal bislx tiꞌj ka jun dios Pablo.

7Nkatzen taꞌ jtxꞌotxꞌ lu taꞌ ttxꞌotxꞌ jxin xjal mas nintzaj tuj txꞌotxꞌ te Malta. Publio tbixin. Ja tzunj xin Publio oyente ttxꞌotxꞌxin keya tuꞌn kposadayina twitz, bix baꞌn e cyjaꞌ koꞌya tuyaxin. Oxe kꞌij e takꞌxin kwaya.

8Yajcꞌatltzen chꞌintl bix e kbiya ka yaab jxin tman Publio tuꞌn cyak bix nim aꞌ tuj tcꞌuꞌjxin. Bixsen e xiꞌ Pablo te kꞌolbel texin. Tbajlen naꞌnxitltzen Pablo Dios tibajxin, bix e cub tkꞌoꞌn Pablo tkꞌab tibajxin. Juꞌtzen uꞌla tnaablxin.

9Tejtzen tbinte, cykil xjal yaab te Malta e xiꞌke jaaꞌ taꞌ Pablo, bix jax uꞌlcye cynaabl.

10Nimxsen otk tzꞌoc ten tiꞌ cyanem xjal, bix nim kcotza e tzaj cyuꞌn xjal. Tejtzen tul canan jkꞌij tuꞌn ttzyet kbeya, bix e tzaj cykꞌoꞌn xjal nim kcotza te tuj kbeya.

Tej tpon Pablo tuj tnom Roma

11Oxe xjaw e ten koꞌya tuj ttxꞌotxꞌ Malta. Attzen jun barc otk tzajxe Alejandría. Otktzen pon tuj Malta bix e ten cykil jbalel tuj Malta. “Kej Yoẍ” tbi barc. Oc tbi juꞌwa cyej caꞌba tcwal junxin dios Zius. Tel tzunj oxe xjaw, bix ocx koꞌya tuj barc.

12Bix etz koꞌya tuj Malta, bix e pon koꞌya tuj tnom Siracusa tuj txꞌotxꞌ te Sicilia. E ten koꞌya oxe kꞌij.

13Bix etz koꞌya. E bet koꞌya nka ttxaꞌn mlaj txꞌotxꞌ. Cwaxsen kpona tuj txꞌotxꞌ Italia, tuj tnom te Regio. Juntzen kꞌij mas yaj bix e tzaj tzyet jun cykꞌiꞌk te cubne, bix e xiꞌ tlomoꞌn ejooꞌya jawne. Jeyꞌ, te juntl kꞌij bix e pon koꞌya tuj tnom te Puteoli, nakchxsen tiꞌ Regio. Jatztzen e tzaaꞌ koꞌya tuj barc junx maj, cꞌojlaꞌntzen ke pres cyuꞌn soldado.

14Tuj tzunj tnom te Puteoli oca noj cab ocslal kwitza, bix e t-xquet koꞌya tuꞌn ktena jun smant. Tel tzunj wuuk kꞌij, bix e tzyet kbeya tuꞌn kpona Roma.

15Ke ocslal te Roma ya otk cybi ka etoꞌya tuj be tuꞌn kpona. Entonces bix etzke tuj Roma te clul keya te kꞌolbel keya tuj be. At cab e pon maan tuj tnom Mercado te Apio, bix at cabtl jax e ponakej tuj tnom te Oxe Posada. Tejtzen toc kcꞌulban kiiba cyuya caꞌba cloj ocslala, nimxsen oc nimset tcꞌuꞌj Pablo, bix e xiꞌ tkꞌoꞌnxin chjonte te Dios. Junxsen kxiꞌya tuj nin tnom te Roma.

16Tejtzen kpona tuj Roma, bix e xiꞌ tkꞌoꞌn Julio, jxin capitán, ke pres cye ke cawel cyibaj ke cꞌojlal te cars. Pero te Pablo bix e kꞌoj tumel texin tuꞌn ttenxin najal tuj jun jaaꞌ tjunalxin, tuya jun soldado te cꞌojlal texin.

Tej tkbaꞌn Pablo tyol Dios tuj tnom Roma

17Tetzen oxe kꞌij tuj Roma bix e xiꞌ tsmaꞌn Pablo txocbil cyej xjal nintzaj cyxol judío najl tuj Roma, tuꞌn cytzaj chmet, bix e xiꞌ tkbaꞌnxin cyjulu:

—Key te ntanem, mintiiꞌ junwe wil ma cub nbinchen tiꞌ ktanem judío, mitetpe tiꞌ cycostumbre ke ootxa xjal. Pero tzunj lu, ke xjal judío tuj Jerusalén e jaw tzyunte we tisencꞌa jun kaꞌ xjal ken, bix e n-oc kꞌoꞌn tuj cykꞌab cawel te Roma.

18Entonces bixsen e cyjoy aj Roma wila, pero mintiiꞌ wil e cnet cyuꞌn. Juꞌ tzunj, mintzen in cuba, bix jax min in tzakpeta.

19Pero mi tuꞌnj juꞌwa minx e cycuya ke judío. Min el baꞌn tuj cywitz. Juꞌ tzunj, e nkana najsbil tuꞌn ja nintzaj cawel te Roma toclel ebinte nyol, tuꞌntzen ka at bix ka mintiiꞌ wil. Juꞌ tzunj, ma chin ul tzalu, amale minttiiꞌwa naꞌn wuꞌn cyiꞌ nxjal.

20Ma chi tzaj ntxcoꞌna tzalu tuꞌn toc cybiꞌna ti nten cyey, tuꞌntzen tel cyniꞌya tiꞌj ti waj cywitza tzalu. Lu ken nchin n-oc cycyeꞌyena ẍpon tuya cadena tisen jun pres. Bix niyꞌx wuꞌna ja lu nuk tiꞌj nyol tiꞌj Scyꞌoꞌn tuꞌn Dios o tzulte cyuya xjal te Israel―tz̈itzen Pablo cye nintzaj xjal judío najl tuj Roma.

21Bix aj cytzakꞌbeꞌnxin:

—Taat, bajx kiikꞌeke mi nuketpe jun uꞌj kaꞌ tiꞌja cyuꞌnj xjal judío eteꞌ tuj ttxꞌotxꞌ Judea. Bix mi nuketpe jun xjal o tzul aj kbal kaꞌ yol tiꞌja. Mintiiꞌte yol kaꞌ tey tiꞌj.

22Pero jaxte nuk jakꞌch nchi yolena cye xjal kaꞌ tiꞌ cyocslabl xjal lepch tiꞌ Jesús, bix ja tey jun xjal juꞌwa. Pero kaja kbiya ti tten cyocslabl. Kbantz chꞌinke ke―tz̈i tzunkexin.

23Pero tuꞌntzen toc cybiꞌnxin tyol Pablo, bixsen e cub cykꞌoꞌnxin juntl kꞌij tuꞌn toc cychmon cyiibxin tuya Pablo. Tejtzen tpon jkꞌij, nimxsen xjal judío e pon tuj jaaꞌ jaaꞌ taꞌ Pablo. Te tzunj kꞌija, te klax hasta texa koniyan, e txꞌolba Pablo cyexin ti tten tcawbil Dios tibaj twitz txꞌotxꞌ, bix e baj ttxꞌolbaꞌnxin ti elpenina tley Moisés, bix ti elpenina cyyol ke tyolel Dios nejl. Cyiꞌj tzunj yol otk cyaj ttzꞌiꞌben Moisés bix kej tyolel Dios, e tyeecꞌatzen Pablo ka tiꞌ Jesús otk chi yolena. Juꞌtzen tajbe Pablo tuꞌn tcub cyiꞌjxin.

24Cab tzunxin kꞌolbel oc ebinte tyol Pablo, pero cabtl tzunxin min.

25Cyxolela xsunxin min e cubkexin tuj tumel, bix nim tyol juun bix cabtl. Cwa cyakꞌ eletztl. Pero te mitknaꞌx cyetz xjal, bix e xiꞌ tyolen Pablo juntl maj cye xjal. Tz̈ixin cyjulu:

—Tej te Dios tyol, juꞌ eꞌlate tisenj otk tyola jxin tyolel Dios Isaías.

26Juꞌtzen toc tuꞌn Dios te Isaías: “Isaías, cutxa bix yolen cyuya xjal te Israel ja nyol lu: ‘Pero cꞌoquel cybiꞌna, pero mlay tzꞌel cyniꞌya tiꞌj nyol. Pero cꞌoquel cycyeꞌyena, pero mlay tzꞌoc cycꞌuꞌja tiꞌj.’

27Ja tzunja cxeꞌl tkbaꞌna cye xjal, Isaías. Kbanx ja lu, cuma cyiwxsen cyanem jxjala, bix cycyꞌix tzꞌoc cybiꞌn nyol, bix ncub cymutzꞌbaꞌn cywitz tiꞌj jax yol. Min tziyꞌx tuj cywiꞌ, cuma cycyꞌi cybi. Min tzakꞌ cywitz tiꞌj, cuma cycyꞌi tzꞌel cyniyꞌ tiꞌj. Cyiw cyten, cuma cycyꞌi chi meltzꞌaj tuj cyil tuꞌn tcub nnajsaꞌn cyil,” tz̈i Dios te Isaías.

28Key xjal judío te ntanem, ke xjal judío tzinenxix ma tzꞌel cyxooꞌn tyol Dios. Qꞌuelelcꞌatzen cyniꞌya tiꞌj, te Dios ma txiꞌ toyen texin tyolxin te coꞌpbil cyej xjal yaaꞌn judío. Min ma cyiikꞌ ke xjal judío tcoꞌpbil Dios, pero ke xjal yaaꞌn judío ccyiikꞌel tyol Dios te coꞌpbil cye—jutzen toc tuꞌnxin cye xjal judío.

29Tejtzen tbaj yolen Pablo juꞌwa, bix aj ke judío cyja. Pero cyxoltzen e jaw nim yol cyiꞌj tyol Pablo.

30Pablo e najanxin caꞌba jnabkꞌi tuj Roma. Jaxxin e chjon tej jaaꞌ jaaꞌ e najanaxin, bix e tcuyaxin nuk laꞌ aljxe xjal ul kꞌolbel texin.

31Mintiiꞌ texin il tiꞌj tuꞌn ley te Roma tuꞌn t-xiꞌ tyolenxin tyol Dios cye xjal. Nuk e yolenx texin tiꞌ Jesús, jxin Scyꞌoꞌn tuꞌn Dios. Min-al jun e cub wabante texin tiꞌj.