1 CORINTIOS 11 - Mam of Todos Santos -- Guatemala Unicode

1Juꞌ tzunj cyiiꞌnx jun cynaabla tisen weya kꞌiꞌn nnaabla wuꞌna. Cycnomela wiꞌja, tisen weya n-el ncnoꞌna tiꞌj tnaabl Cristo.

Jun xnakꞌtzbil cye xuuj

2Key hermano, nchin tzalaja cyiꞌja, cuma nbint cyuꞌna jnxnakꞌtzbila e cyaj nyeecꞌana cyey.

3Pero waja tuꞌn tel cyniꞌya tiꞌj juntl tumel. Dios cawel tibaj Cristo, bix Cristo cawel tibaj jaca juun xinak, bix jaca juun xinak cawel tibaj t-xuꞌl.

4N-eltzen kniyꞌ tiꞌj ka potzen twiꞌ jun xuuj tuya jun xbalen tuj jun culto, tetzen techel attzen tjakꞌ tcawbil tchmil. Nukettzen ejeeꞌ xinak potzen cywiꞌ oj nchi naꞌn Dios bix oj nchi kꞌumen tyol Dios tuj jun culto, jun chꞌixbajilettzele te cycawel Cristo, cuma nchi yeecꞌattzele xinak eteꞌcx tjakꞌ tcawbil cabtl xinak, yaaꞌn Cristo.

5Yaltzen cye xuuj, ka min tzꞌoc potzet cywiꞌxuj oj cynaꞌnxuj Dios bix oj cykꞌumenxuj tyol Dios tuj jun culto, jun chꞌixbajil te cychmilxuj. Ja tzunj lu tzin tyeecꞌan mintiiꞌ cynimbilxuj, cuma tisentzen juꞌxkexuj cyisenj xuj ma tzoꞌn ttzmal cywiꞌ te yecꞌbilte ejeeꞌtzen xuja tisen xinak.

6Ke cyey xuuj ocslal tuj Corinto, ka cyaja bint tuꞌn miꞌn potzet cywiꞌy, baꞌnttzele tuꞌn tcub matzet ttzmal cywiꞌy tuꞌntzen tcyaj cywiꞌy scꞌoꞌj. Jun chꞌixbajilettzele te cyey, bix ka jun cychꞌixewa tuꞌn tcub matzet ttzmal cywiꞌy, jax juꞌx jun cychꞌixewa oj tel cyiiꞌna potzbil cywiꞌy tuj culto.

7Entonces, key hermano, te cyey xinak yaaꞌn tumel tuꞌn toc potzet cywiꞌy tuj jun culto, cuma at cycawbil xinak tuꞌn Dios tuꞌn cycawen. Yaltzen te cyey xuuj, jcawbil kꞌiꞌn cyuꞌna, cychmila kꞌolte.

8Tuj tneel min el itzꞌj xinak tiꞌ xuuj, sino ja xuuj el itzꞌj tiꞌ xinak.

9Juꞌtzen qꞌuelela kniyꞌ tiꞌj min e cub tbinchaꞌn Dios ja xinak te te xuuj, sino e cub tbinchaꞌn Dios ja xuuj te te xinak.

10Juꞌ tzunj ja xuuj cꞌoquel tpotzen twiꞌ tuj culto te yecꞌbil at tjakꞌ tcawbil tchmil tuꞌntzen t-xiꞌ tyeecꞌan tnimbil cywitz ke nenel cyxol ocslal.

11Pero amale jat xinak ncawen tibaj xuuj, pero t-xol, cycaꞌbel il tiꞌj. Cyxol t-xjal Kaaw, junelne koꞌ. At tajbel xinak bix at tajbel xuuj.

12Jaxte ja tneel xuuj el itzꞌj tiꞌ xinak, pero yaj cykilca xinak o chi el itzꞌj tiꞌ xuuj, bix cycaꞌbel, xinak tuya xuuj, o tzaj tkꞌoꞌn Dios. Juꞌ tzunj il tiꞌj nbaj cyonen cyiib.

13Key hermano, cxeꞌl nkanena cyey ¿tumelpa tuj cywitza oj tnaꞌn jun xuuj Dios yaaꞌn potzen twiꞌ?

14Tuꞌn ttzaj cytzakꞌbeꞌna, cycyeꞌyencꞌa ti tten cyxol xjal. ¿Tumelpa oj tcub tz̈ꞌiy ttzmal twiꞌ jun xinak? Yaaꞌn tumel.

15Yaltzen te jun xuuj, tumel oj tcub tz̈ꞌiy ttzmal twiꞌ, cuma juꞌ ttena. Ja tzunj ttzmal twiꞌxuj nmak najben te t-xel potzbil twiꞌxuj, te techel xuujxuj bix at-xuj tjakꞌ tcawbil tchmilxuj. Jatzen jun techel at jun xuuj tuj tumel oj potzen twiꞌ tuj jun culto.

16Juꞌ nxiꞌ nkꞌumena cyey, pero ka at jun cyxola yaaꞌn tumel nyola tuj twitz, qꞌuelel tniyꞌ tiꞌj juꞌ tzin nkꞌumena cyxol cykilca ocslal bix juꞌ nbint cyuj tja Dios tuj cykilca tnom.

At jun palt tuj santa cena cyxol aj Corinto, tz̈i apóstol Pablo

17Jax at jun palt tuj santa cena niyꞌ cyiyꞌsaꞌna tuj cycultey. Oj nchi chmeta tuꞌn tiyꞌ cyiyꞌsaꞌna santa cena, mlay txiꞌ nkbaꞌna baꞌn nbint cyuꞌna, cuma ma nbiꞌya at mas kaꞌ n-eꞌla twitzj at baꞌn.

18Mlay txiꞌ nkbaꞌna baꞌn nbint cyuꞌna, cuma ma nbiꞌya oj nchi chmeta ejeeꞌy ocslal te waaꞌl bix te iyꞌsalte santa cena, ncub cypaꞌn cyiib teeylex juun cloj cytena. Tuj nwitza jax jyol o nbiꞌya.

19Te cyey il tiꞌj tuꞌn ncub cypaꞌn cyiiba juꞌwa, tuꞌntzen tchicꞌajax alcye cyey mas jawnex cyxola.

20Juꞌ tzunj oj ncub cychmon cyiiba, yaaꞌn tej tuꞌn ttzaj cynaꞌna tcyimlen Kaaw, sino nuk ja tej tuꞌn tchicꞌajax alcye cyey tneel.

21Il tiꞌj cxeꞌl cypaꞌna waabj t-xol cykilca oj nchi chmeta te waaꞌl te iyꞌsalte santa cena, pero yaaꞌn juꞌ tten cyuꞌna. Pero jtzin cyseꞌna, nchi waaꞌna tecꞌax, teeylex juun tuya twa. Min cyyoy oj nchi pon baj ke cyuyey tuꞌn cywaaꞌna junx. Juꞌ tzunj at juun min nchi noj, bix at juuntl nchi nojxsen tuya cywa bix cycꞌa vino hasta ojxe nchi oc bola.

22¿Titzen tten jun santa cena juꞌwa? Cxeꞌl nkꞌumena cyey mas baꞌn biꞌx chi waaꞌla bix chi wcꞌala cyjay twitzj jatzen nchi noja tuj santa cena. Jnbaj cyey jaꞌlewe oj nchi chmeta jun chꞌixbajil te cykil ocslal, bix ncub cykꞌoꞌna cychꞌixew kej mebe mlay pon cyiiꞌn waabj cyxola. ¿Ocpale cxeꞌl nkbaꞌna baꞌnj ma bint cyuꞌna? ¡Mlay! Yaaꞌn jax cyuꞌna nbint cyuꞌna cykilj nxnakꞌtzbila e cyaj nkbaꞌna cyey nejl.

Jun xnakꞌtzbil tiꞌj santa cena

23Cxeꞌl nnaꞌna cyey jaj e tzaj tkꞌumen Dios weya bix e cyaj nxnakꞌtzaꞌna cyey nejl tiꞌj tixix tten jsanta cena. Texj koniyan tej t-xiꞌ qꞌueyet Kaaw Jesús tuꞌn tcub byet, e jaw tiiꞌnxin jun pan,

24bix e xiꞌ tkꞌoꞌnxin chjonte te Dios tiꞌ pan, bix e cub tpiẍenxin, bix e xiꞌ tkbaꞌnxin cye tuyaxin cyjulu: “Cyiiꞌnx bix cywaaꞌnx ja lu. Jatzen techel nxumlalja. Tisenj pan lu ma baj piẍen, jaxse juꞌx nxumlala pjel toket te colbil cyey. Cywaaꞌnx ja lu te nabl weya,” tz̈i Jesús cye tuyaxin.

25Tbajlenxitl waaꞌn, e jaw tiiꞌnxin jun vaso vino, bix e xiꞌ tkbaꞌnxin: “Jvino lu techel ntz̈qꞌuela qꞌuelel wiꞌja te kꞌol tipemal jun acꞌaj trat tuya Dios cyiꞌ xjal. Jaca maj oj cycꞌana tiꞌj, cybinchama te nabl weya,” tz̈i Jesús.

26Entonces, key hermano, jaca maj nchi waaꞌna bix nchi cꞌana santa cena, ntzaj cynaꞌna tcyimlen Kaaw kiꞌj, hasta ojxe tul meltzꞌajxin juntl maj twitz txꞌotxꞌ.

27Juꞌ tzunj, oj ncub bint santa cena cyuꞌna bix min tzꞌoc cycꞌuꞌja tiꞌj ti japenina tcyimlen Kaaw, n-eltzen cyiiqꞌuena tcyimlen Kaaw.

28Juꞌ tzunj teeylex juun il tiꞌj qꞌuelel cyniꞌya tiꞌj ti niyꞌ tuj cycꞌuꞌja oj cypona te nimlte santa cena, ka cyaja txiꞌ cynaꞌna tcyimlen Jesús cyiꞌja, bix ka junxitl niyꞌ tuj cycꞌuꞌja. Katzen jaxxix cyaja tuꞌn t-xiꞌ cynaꞌna tcyimlen Jesús, baꞌn tuꞌn t-xiꞌ cywaaꞌna santa cena.

29Pero ka min tzꞌoc cycꞌuꞌja tiꞌj tcyimlen Kaaw oj cywaaꞌna santa cena, sino ka junxitl niyꞌ tuj cycꞌuꞌja, at cyila tocsan tiꞌj twitz Dios, bix tzultzen jun cycastiwey tuꞌn Dios.

30Juꞌ tzunj at nim ocslal yaab cyxola bix at juuntl bajnen cyipen, bix at juuntl o chi cyim.

31Entonces, key hermano, ka ma cyaj cykꞌoꞌna jkaꞌ nbint cyuꞌna oj nchi binchana tiꞌ santa cena, mintiiꞌ il tiꞌj tuꞌn cyoca tuj castiwa tuꞌn Dios tiꞌj.

32Pero ka ma tzaj tkꞌoꞌn Dios jun cycastiwey, yaaꞌn tuꞌn cyxiꞌy tuj castiwa te junx maj tisen oj cyxiꞌ xjal yaaꞌn ocslal tuj castiwa tuꞌn Dios, sino tuꞌn cyxiꞌy tuj tumel.

33Entonces, tuꞌntzen tjapan baj twiꞌ nyola tiꞌj santa cena, cxeꞌl nkbaꞌna cyey oj nchi chmeta waaꞌl te nablte tcyimlen Jesús, cyyoꞌy ojxe cypon baja cykil ocslal, tuꞌntzen cywaaꞌna junx tuj tumel.

34Jsanta cena yaaꞌn tuꞌn cynoja. Ka at juun cyey takꞌ weyaj cye, mas baꞌn tuꞌn cywaaꞌna nejl cyjay, tuꞌntzen cynimantey tcyimlen Jesús tuj tumel, tuꞌntzen miꞌn tzꞌoc jun cycastiwey tuꞌn Dios.

Bueno, at juntl cykanbila o tzaj cykanena weya. Laꞌ alcye jun kꞌij, oj npona cyxola, cxeꞌltzen nkꞌumena cyey.