SANTIAGO 3 - Mam of Todos Santos -- Guatemala Unicode

Kej yol n-etz tuj ktzi

1Key ocslal, ka yaaꞌn baꞌn cytena, miꞌn txiꞌ cyxnakꞌtzaꞌna juntl, cuma ka yaaꞌn junx taꞌ kxnakꞌtzbil tuya kbinchben, mastzen ctzaal tkꞌoꞌn Dios kcastiwa cywitz niyꞌtl xjal.

2Tzinen taꞌ cykilca koꞌ at kil. Bix mas nko binchan il tuꞌn kyol twitzj tuꞌnj kꞌiꞌn tuꞌn cykilcatl kxumlal. Ka at jun xjal min tzpet tiꞌ tyol n-etz tuj ttzi, jatzen xjalja tzꞌaklxix, bix yaaꞌn cyiw tuꞌn t-xcye tibaj cykil t-xumlal, tuꞌn miꞌn bint kaꞌ tuꞌn.

3Cycyeyenc kej tz̈ej. Oj njax jun xjal tibajjil, nxcyexin tiꞌjjil nuk tuꞌnj xcbil tocx tuj ttzijil. Tuꞌnj xcbil tocx tuj ttzi tz̈ej, ncawentzen tiꞌ cykil t-xumlaljil.

4Jax juꞌx jun barc. Amale ma tijet, bix amale cyiwet jcykꞌiꞌk n-oc tiꞌj, pero nxcye jun xjal tiꞌ barc tuꞌn jun niyꞌ nuꞌẍ timón. Il tiꞌj cxeꞌl barc jaaꞌ taj xjal tuꞌn t-xiꞌ tiiꞌn.

5Juꞌtzen tten ktzi. Tal nuꞌẍ twitz kxumlal, pero nim nbint tuꞌn, tisen jun kꞌakꞌ nuk chꞌin njaw itzꞌj nbaj tzꞌeyꞌ cykilca tzeeꞌ twiꞌ jun witz tuꞌn.

6Nim kaꞌ nbint tuꞌn chꞌin kꞌakꞌ, bix jax juꞌx ktzi. Nim kaꞌ nbint tuꞌn. Biꞌxsen nxiꞌ kxumlal tuj il tuꞌnj nbint tuꞌn ktzi, cuma tuꞌn kyol ntzpet cykilca kxumlal. Jkaꞌ nbint tuꞌn, tuya taaw il ntzaaꞌ.

7Cykilca wik alimaj, cykilca wik chꞌit, cykilca wik lbaj, bix cykilca wik quis̈, tjakꞌtzen cycawbil xjal eteꞌ.

8Pero kej yol nchi etz tuj cytzi xjal, mintzen-al baꞌn tcawen tibaj. Tcyꞌi ktzi tniman ejooꞌ. Tisen n-ocx veneno tuj kchuꞌl tuꞌn kxiꞌ tuj il tuꞌn, jax najben kyol tuꞌn t-xiꞌ cytzalajebl cabtl tuj il tuꞌn.

9Amale najbent ktzi tuꞌn tjaw knimsaꞌn tbi Kman Dios, pero tuꞌnx ktzi nko sbun xjal o cub bint tisenx te Dios.

10Tujx ktzi n-etza yol kaꞌ. Key ocslal, yaaꞌn tumel jlu.

11Nxiꞌ nkanena cyey, ¿njatzpa aꞌ tz̈iꞌ bix aꞌ yaaꞌn tz̈iꞌ tuj junx twiꞌ aꞌ?

12Key ocslal, ¿jacꞌapa bint tuꞌn tel twitz olivo tiꞌj jun tzeeꞌ higo? ¿Bix jacꞌapa bint tuꞌn tel twitz higo tiꞌj jun wiꞌ uva? Mlay. Bix jax juꞌx tuj junx twiꞌ aꞌ mlay jatz aꞌ cꞌa bix aꞌ tz̈iꞌ. Juꞌ tzunj, miꞌn tzꞌajben cytziy tuꞌn tyolen kaꞌ tuya baꞌn.

Jun knaabl ntzaj tkꞌoꞌn Dios

13¿Atpa ocslal cyxola at cynaabl bix n-el cyniyꞌ tiꞌj? Tuꞌn tel cyniꞌya tiꞌj ka at cynaabl, cycyeꞌyenxa ka nxiꞌ cyiiꞌn jun cychunkꞌlal baꞌn. Ka nchi yeecꞌan tuꞌnj cybinchben ka maanske, attzen cynaabl.

14Pero ka nchiꞌlec cycꞌuꞌja cyiꞌ juntl bix ka nuk nchi jyona cyexa cyajbila bix njaw cyniman cyiiba, miꞌn txiꞌ cykbaꞌna at cynaabla, cuma nuk nchi ẍtakꞌena.

15Oj nbint tuꞌn jun xjal juꞌwa, ja tnaabl lu yaaꞌn te Dios, sino te twitz txꞌotxꞌ. Nuk n-oc lpe ja xjal lu tiꞌj tajbil t-xumlal. Tisen cynaabl biman tnaabl,

16cuma jaaꞌj nchiꞌlec cycꞌuꞌj xjal cyiꞌ juntl bix jaaꞌj nuk nchi jyon cyex cyajbil, yaaꞌntzen eteꞌ xjal tuj tumel, bix nuk nchi binchan cykilca kaꞌ.

17Pero jxjal at tnaabl ntzaj tkꞌoꞌn Dios, jatzen xjalja sak taꞌ tanem, bix n-oc tipen tiꞌj tuꞌn tten tuj ttz̈yal cyuya xjal, bix nyeecꞌan jun tanem baꞌn cywitz xjal, bix nxiꞌ tbiꞌn cyyol juntl, bix n-oc tkꞌoꞌn lastim cye xjal. At baꞌn tbinchben, bix yaaꞌn caꞌba twiꞌ tanem, bix yaaꞌn xmeletzꞌ.

18Kej xjal at cynaabl, tuj ttz̈yal bix tuj tumelxix n-oc cyipen tiꞌj tuꞌn t-xiꞌ cyiiꞌn cychunkꞌlal juntl xjal jiquen.