LOS HECHOS 11 - Mam of Todos Santos -- Guatemala Unicode

Tumel tuꞌn Pedro cye ocslal tuj Jerusalén

1Tpontzen tpocbal tuj Judea ka otk cyiikꞌ jxjal yaaꞌn judío tyol Dios bix otk cybi xjal Dios, bixsen ke ocslal bixsen ke t-xel Jesús twitz txꞌotxꞌ oc ebinte ja lu.

2Pero tej tpon meltzꞌaj Pedro tuj Jerusalén, at cab ocslal judío e yolen tiꞌ Pedro tiken otk tbinche xinj juꞌwa.

3Al tzun kej xjal oc ebin tej juꞌwa, bix e xiꞌ cykbaꞌn te Pedro:

—¿Tikentzen e cyjaꞌ ten tey tuj tja jun xjal yaaꞌn judío, jun yaaꞌn t-xjal Dios? Yaaꞌn tumel junx maj. Pero tey, e waaꞌn tey cyuya xjal. Ttzkiꞌn tzuna junxsen maj kaꞌ kwaaꞌn tuya jun xjal yaaꞌn judío―tz̈itzen ke xjal.

4Pero bix akꞌ Pedro kbalxte tikꞌch jilel bix tikꞌch otk baj. Tz̈i tzunxin cyjulu:

5—Key taat, in tinwe tuj tnom te Jope. Jun kꞌij nchin naꞌn Dios, bix oc ncyeꞌyen tisen tuj nwitziyꞌ. E cuꞌtz jun xbalen tisen jun sábana ma tij, ẍpoꞌn cycyaal ttxꞌuꞌc, bix e cꞌuꞌl jaaꞌj in tincꞌa.

6Tejtzen tcꞌuꞌl, bix ocxix ncyeꞌyen, bix ocx ncyeꞌyen tuj. At jil alimaj chꞌit, lbaj, bix at juntl wikjil talen cꞌul chyoljil, tuya kej jil kaꞌ txiꞌ cychyoꞌn xjal judío.

7Bix e nbi jun yol e tzaj tkbaꞌn we: “Pedro, byom tzun kej alimaja, bix chyoꞌnxke,” tz̈itzen Dios.

8Pero bix aj ntzakꞌbeꞌn: “Nuksam xsuna, Taat. Bajxsen t-xaꞌ nwaaꞌnwe waabj kaꞌ txiꞌ waaꞌt te cyej xjal judío,” ntz̈i tzuna.

9Pero bix e tzaj tkbaꞌn jyol tuj cyaꞌj juntl maj: “Waaꞌnx, cuma tej o cub tbinchaꞌn Dios jsak, yaaꞌn kaꞌte,” tz̈i tzunj yol we.

10Oxe maj e yolen koꞌya juꞌwa. Yajtltzen bix e jax kꞌiꞌn xbalen cyuya alimaj juntl maj tuj cyaꞌj.

11Cybintztzen. Te xsunj tpon baj jyol e cub kleeꞌ tuj nwitza, bix e pon oxexin xjal jaaꞌj taꞌ kposadaya. Otktzen cheꞌx chkꞌet te txcolte weya tuꞌntzen waajtz meltzꞌaja cyuya tuj tnom te Cesarea.

12Bix e tzaj tkbaꞌn Espíritu Santo weya tuꞌn nxiꞌya cyuya, bix tuꞌn miꞌn baj ncꞌuꞌja tiꞌj yaaꞌn judío ke xjal. Bix jax ejeeꞌ tzunj wukak ocslal lu e xiꞌ wuyena. Tej kpona, bix ocx koꞌya tuj tja jxjal otk txconte weya.

13Ja tzunj xin xjal Cornelio tbi. Bix e tzaj tkbaꞌnxin keya ti tten tpon jlet jun tsanjel Dios tuj cyaꞌj tjaxin. Otk tkba texin cyjulu: “Chkꞌonx cabtl xjal tuj tnom te Jope te txcolte Simón, jaxj xin n-oc te Pedro.

14Ja tzunj xin Pedro kbalte tey bix cye te tjay tikꞌch pjel cyey tuꞌn cycoꞌpja tuj cyila,” tz̈itzen tsanjel Dios te Cornelio.

15Entonces bix in akꞌ yolel cyuyaxin. Maatkxsen nchi yolenwe cyuyaxin, bix ul Espíritu Santo cyuyaxin, tisenx tten tul-len ke kuya tuj tneel.

16Tejtzen toc ncyeꞌyen juꞌwa, bix ul tuj ncꞌuꞌj kej tyol Kman Jesús otk tzaj tkbaꞌn ke: “Jxin Juan Bautista e bautizaran xjal, pero cyey ccyiikꞌey Espíritu Santo,” tz̈i Jesús ke jun maj―tz̈i Pedro.

17—Key taat o cyiikꞌ cyexin Jesús te Cyaawxin, bix te Scyꞌoꞌn tuꞌn Dios, tisenxj kewa. Bix juꞌ tzunj o txaꞌ tkꞌoꞌn Dios Espíritu Santo cyexin. Katzen ma txiꞌ tkꞌoꞌn Dios cye xjal tisenxj ke, ¿titzen jilel ken weya tuꞌn woc meltzꞌaja tiꞌ Dios?―tz̈i Pedro cyej xjal min e cycuya tuꞌn cyocx xjal yaaꞌn judío te ocslal.

18Tejtzen toc cybiꞌn xjal tyol Pedro, bixsen e baj twiꞌ cyyol xjal, bixsen akꞌ ke xjal tzalajel tiꞌ Dios, bix e jaw yolen ke xjal:

—¡Axsen tbanel! Yaaꞌn nuk keca, sino tuyaxe te cyej xjal yaaꞌn judío ma txiꞌ tkꞌoꞌn Dios xtalbil cyiꞌjxin tuꞌn cymeltzꞌaj tuyaxin, tuꞌn cycaman cychunkꞌlal te junx maj―tz̈itzen ke xjal.

Kej ocslal tuj Antioquía

19Cyuj tzunja tyem lu nimxsen ocslal najl cyuj juntl wik tnom tiꞌjxe Jerusalén, cuma eteꞌc xjal yajlalec cye ocslal tcyimlenxitl Esteban. Attzen cab ocslal ex ok tuj Jerusalén, bix e xiꞌke tuj tnom te Fenicia bix tuj tnom te Antioquía, bix tuj txꞌotxꞌ te Chipre. Bix e cub ten ke xjal pocbal tyol Dios jaaꞌ e ponake, pero nuk cyej xjal judío.

20Pero tuj tzunj txꞌotxꞌ te Chipre bix tuj tnom te Cirene attzen cab ocslal, bix e ponkexin tuj tnom te Antioquía. Bix akꞌkexin pocbal tbanel tpocbal Jesús cye xjal yaaꞌn judío.

21O txiꞌ tkꞌoꞌn Dios nim cyipemalxin, cuma nimxsen xjal yaaꞌn judío e cyaj cykꞌoꞌn cycostumbre nuk tiꞌj Jesús.

22Bix e pon tpocbal cyxol ocslal tuj Jerusalén ti nbaj tuj Chipre bix tuj Cirene, bix at acꞌaj ocslal tuj tnom te Antioquía. Bixsen e xiꞌ cychkꞌoꞌn ocslal jxin Bernabé maan Antioquía te cyeyꞌlte.

23Tejtzen tpon Bernabé Antioquía, tuyatzen cycaꞌbel tbakꞌ twitzxin toc tcyeꞌyenxin txolen tcoꞌpante Dios kej xjal yaaꞌn judío, yaaꞌn nuk ejeeꞌcꞌacye judío. Juꞌ tzunj e jawxsen tzalajxin, bix akꞌxin ocsalec cycꞌuꞌj xjal tuꞌn miꞌn cyaj cykꞌoꞌn tbe Jesús.

24Bix e ke tcꞌuꞌj Bernabé tiꞌj ti nbaj, cuma jun baꞌn xjal xsunxin. Ebil tyol Espíritu Santoxin, bix kꞌuklecxsen tcꞌuꞌjxin tiꞌ Dios. Bix tuꞌn tzunj tpomlen Bernabé cyuya xjal, nimxsen xjal ocslan.

25Bix etz Bernabé tuj tnom te Antioquía, bix e xiꞌxin tiꞌjxe tnom te Tarso te jyolte Saulo, cuma jatza najla xina.

26Tejtzen tcnet-xin, bix e xiꞌ tiiꞌn Bernabé jaxin tuj Antioquía. Jun jnabkꞌi e tenkexin cyuya ke acꞌaj ocslal tuj Antioquía bix nim e yeecꞌankexin tyol Dios te nim xjal. Tujtzen Antioquía oca cybiꞌn xjal tneel maj te “Cristiano,” jatzen elpeninaj ke lepch tiꞌ t-xnakꞌatz Scyꞌoꞌn tuꞌn Dios.

27Maatkxsen at Bernabé tuya Saulo tuj tnom te Antioquía, cypon cabxin tyolel Dios otk tzajxe Jerusalén. Nchi yolen tzunxin ke yol Espíritu Santo otk takꞌ cyexin.

28Jun tzunxin baꞌn yolen tuꞌn Espíritu Santo Agabo tbixin. Bix e cub weꞌ Agabo cyxol ocslal, bix e cub tenxin kbalte ka tul-lel jun tij weyaj tuj txꞌotxꞌ, bixsen qꞌuiyel aꞌ cycꞌuꞌj xjal ocslal tuj txꞌotxꞌ te Judea. Bix e bajx ja weyaja tej tocx Claudio te nin cawel tibaj cykil twitz txꞌotxꞌ.

Juꞌtzen tten tyol Agabo.

29Tejtzen toc ebin tyol Agabo, bixsen e cub cyniqꞌuen ocslal tiꞌj tuꞌn t-xiꞌ cysmaꞌnxin chꞌin onbil cye xjal ocslal tuj txꞌotxꞌ te Judea, laꞌ jniyꞌ chꞌin baꞌn tkꞌonte xjal.

30Tejtzen tbaj cychmoꞌnxin cykil onbil, bixsen aj cyokxenanxin tiꞌ Bernabé tuya Saulo, tuꞌn t-xiꞌ cykꞌoꞌnxin cye ke tij cyxol ocslal tuj Jerusalén tuj Judea.