APOCALIPSIS 6 - Mam of Todos Santos -- Guatemala Unicode

Kej wuuk ẍipbelte

1Bix oc ncyeꞌyena, bix el tiiꞌn Tal Carnel jtneel ẍipbelte cyxol wuuk. Tejtzen tel tiiꞌn, e xiꞌ nbiꞌna tej tjaw ts̈iꞌn tneel wik iꞌtz cyxolj cyaja. Tkꞌajkꞌajel tisenj kꞌancyok. E xiꞌ tkbaꞌn:

—¡Ttzaja bix cyeꞌnc!

2Bix e wila jun tz̈ej sak. Jtjax tibajjil tz̈ej kꞌiꞌn jun xoobl tuꞌn te tkꞌojbil. Bix e jax kꞌoꞌn jun corona tuj twiꞌ. Bix ex tuꞌn t-xcye tibaj cykilca, bix e xcye.

3Tejtzen tel tiiꞌnxin tcab ẍipbelte, e xiꞌ nbiꞌna tcab wik iꞌtz. E xiꞌ tkbaꞌn:

—¡Ttzaja bix cyeꞌnc!

4Bix etz juntl tz̈ej. Cyak tilbil. Jtjax tibajjil e xiꞌ kꞌoꞌn te tuꞌn miꞌn chi ten xjal tuj ttz̈yal, bix tuꞌn tbaj cybyon cyiib xjal cyxolx. Bix e xiꞌ kꞌoꞌn jun ma tij espada te.

5Tejtzen tel tiiꞌnxin toxen ẍipbelte, e xiꞌ nbiꞌna toxen wik iꞌtz. E xiꞌ tkbaꞌn:

—¡Ttzaja bix cyeꞌnc!

Bix e wila jun tz̈ej kꞌek. Jtjax tibajjil jun malbil tuj tkꞌab.

6Bix e xiꞌ nbiꞌna jun tkꞌajkꞌajel n-etz cyxol ke cyaja jwik iꞌtz. E xiꞌ tkbaꞌn tej tjax tibaj tz̈ej kꞌek:

—Bincham tuꞌn tbint tuꞌn jun xjal tuꞌn tlokꞌonte caꞌba libra triwa bix ka kak libra cebada nuk tuꞌnj twiꞌ tcꞌuꞌj ctcama te jun kꞌij. Pero txiꞌ tkbaꞌna tuꞌn cyxilanx xjal loꞌpj te olivos bix uva―tz̈itzen.

7Tejtzen tel tiiꞌn Tal Carnel tcyaaꞌn ẍipbelte, e xiꞌ nbiꞌna tkꞌajkꞌajel tyol tcyaaꞌn jwik iꞌtz. E xiꞌ tkbaꞌn:

—¡Ttzaja bix cyeꞌnc!

8Bix e wila jun tz̈ej spela kꞌent. Jtjax tibajjil toc tbi Cyamecy, bix lepch Cynajbil Cyimne tiꞌj. Jaaꞌjxa iyꞌyake kej caꞌba lu, e cyim xjal cyuꞌn. E xiꞌ kꞌoꞌn cye tuꞌn tcub cybyoꞌn tcyaaꞌn tkiyꞌ xjal tuꞌn kꞌoj, tuꞌn weyaj, tuꞌn yabel, bix cyuꞌn jil twitz txꞌotxꞌ.

9Tejtzen tel tiiꞌn Tal Carnel tjweꞌyan ẍipbelte, e wila cyanem kej xjal otk chi cub byet cuma otk chi ocslan tyol Dios bix cuma otk chi kꞌumen tyol Dios. Tocx cyanem tjakꞌ altar.

10Ejeeꞌ tzunj lu e jaw s̈-in cyiw:

—Jay Kman Dios xjan bix jaxxix, ¿jteꞌtltzen tyem tyoꞌy tuꞌn tcub cykꞌoꞌna cycastiwa xjal twitz txꞌotxꞌ, tuꞌntzen cykꞌoj cye t-xel kcyamecya?―tz̈i ke xjal otk chi cub byet cyuꞌn aj il twitz txꞌotxꞌ.

11E xiꞌ kꞌoꞌn te teeyle juun jun xbalen sak, bix e xiꞌ tkbaj cye tuꞌn cyayon chꞌintl, ojxe cybyet cykilcatl ocslal at tuꞌn tcub byet tisenx cye otk chi cub byet.

12Bix e wila tej tel tiiꞌn Tal Carnel twukakan ẍipbelte. Bix e tzaj jun xcyaklajnab cyiwxsen. Biꞌx oc kꞌij kꞌek tisen jun xbalen kꞌek te bisbajil. Biꞌx oc xjaw cyak tisen tz̈iyꞌ.

13Biꞌx e cuꞌtz tzꞌak ke cheꞌw twitz cyaꞌj. Nuk nluꞌle twitz cyaꞌj tisen yucch jun tken higo tuꞌn nim cykꞌiꞌk bix ntzaj tzꞌak twitz.

14E tzaj tzꞌak cyaꞌj tisen jun uꞌj oj njaw balkꞌet. Bix cykilca ke witz bix cykilca ke chꞌin txꞌotxꞌ tmij mar iyꞌ kꞌiꞌnke tuj cylugar.

15Bix ke cawel twitz txꞌotxꞌ cyuyax cykilca nejenel cye xjal cyuyax capitán cyuyax ke kꞌina cyuyax ke jawnex xjal cyuyax cykilca akꞌanal bix kej xjal yaaꞌn eteꞌ tjakꞌ tcawbil taaw akꞌuntl, cykilca kej lu ocx ewenke cyuj jul bix tiꞌ t-xeeꞌ xak cywiꞌ witz.

16Bix e xiꞌ cykbaꞌn cye xak bix cye witz:

—Cytzaj tzꞌaka kibaja, tuꞌntzen miꞌn chicꞌaj koꞌya twitzj Dios kꞌuklec tuj tkꞌukbil, bix tuꞌntzen miꞌn tzaj tkꞌoj Jtal Carnel kibaja―tz̈i ke xjal.

17E jaw yolenke juꞌwa cuma otk tzul cana jjawnex kꞌij tuꞌn tcub tkꞌoꞌn Dios tkꞌoj tibaj twitz txꞌotxꞌ, bix min-al jun xjal at tipemal tuꞌn tiyꞌx tuꞌn.