1 JUAN 5 - Mam of Todos Santos -- Guatemala Unicode

Tuꞌn kocslabl tzin ncub tiꞌ il at twitz txꞌotxꞌ kuꞌn

1Alcyej xjal tzin tkbaꞌn ja te Jesús ja Scyꞌoꞌn tuꞌn Dios te cawel tibaj cykilca, tcwaltzen Dios ja xjal lu. Bix ka jax tuꞌn ka n-oc takꞌ Dios te, jax cꞌoquel takꞌ Tcwal te.

2¿Bix ti tten qꞌuelel kniyꞌ tiꞌj ka ma tzꞌoc cyakꞌ tcwal Dios ke? Ka ma tzꞌoc takꞌ Dios te bix ka nko binchan tley Dios, qꞌueleltzen kniyꞌ tiꞌj n-oc cyakꞌ ocslal ke.

3Bix il tiꞌj qꞌuelel cyniꞌya tiꞌj ka kaj tzꞌoc takꞌ Dios ke, il tiꞌj cbinel tley kuꞌn. Pero yaaꞌn cyiwxix tuꞌn tbint tley.

4Yaaꞌn cyiw, cuma alcyej xjal tcwal Dios, attzen tipen tuꞌn tcub tiꞌj cykilcaj yaaꞌn baꞌn twitz txꞌotxꞌ tuꞌn. Bix tuꞌn tbint tley Dios kuꞌn, at kocslabl tiꞌ Cristo.

5¿Bix alj xjal ncub tiꞌj kaꞌ twitz txꞌotxꞌ tuꞌn? Nuk jaj xjal ma txiꞌ tocslaꞌn ka ja te Jesús Tcwal Dios.

Ja Espíritu Santo nyole jaxxix tiꞌj tcwal Dios

6Ja Jesucristo lu el itzꞌj tiꞌ ttxu tisex tten itzꞌj jun xjal, bix lwewa el ttz̈qꞌuel tej tcyim. Yaaꞌn nuk ul itzꞌj. Jax juꞌx e cyim, te yecꞌbil oc Tcwal Dios te jun xjal.

7Bix jax juꞌx tzin tkbaꞌn Espíritu Santo ka Tcwal Dios ja Jesús, bix ktzkiꞌn mlay ẍtakꞌen Espíritu Santo.

8Juꞌ tzunj, at oxe tumel tzin cykbaꞌn oc Tcwal Dios te xjal. At Espíritu Santo, at titzꞌjlen Jesús, bix at tcyimlen Jesús. Junx taꞌ cyyecꞌbil cyoxel.

9Oj nchi yolen xjal tiꞌj jma cyil tuya tbakꞌ cywitz, tzintzen kocslaꞌn cyyol. Tejtzen ttzaj yolen Dios tiꞌ Tcwal, ¿yaaꞌmpatzen mas il tiꞌj tuꞌn t-xiꞌ kocslaꞌn tyol, cuma mas jawnex? Bix ma tkba Dios ja Jesús Tcwal.

10Alcyej xjal nxiꞌ tocslaꞌn ka Tcwal Dios ja Jesús, tzin tkbaꞌn tanem nxiꞌ tocslaꞌn tiꞌ yol jaxxix. Pero alcyej xjal min txiꞌ tocslaꞌn ja yol lu, tzin tkbaꞌn ẍtakꞌ Dios, cuma min txiꞌ tocslaꞌn jma tzaj tkbaꞌn Dios tiꞌ Tcwal.

11Bix jma tzaj tkbaꞌn Dios tiꞌj Tcwal, cyjulu: Ma tzaj tkꞌoꞌn Dios kchunkꞌlal te junx maj, bix nuk tuꞌnj Tcwal ma tzaaꞌ tkꞌoꞌn.

12Alcyej xjal o tiikꞌ Tcwal Dios, attzen tchunkꞌlal te junx maj. Pero alcyej xjal min o tiikꞌ Tcwal Dios, mintiiꞌ tchunkꞌlal te junx maj.

Tej t-xiꞌ tkꞌoꞌn Juan juntl maj cynaabl ocslal

13Key ma chi ocslana tiꞌj Tcwal Dios, ma txiꞌ ntzꞌiꞌbena ja uꞌj lu te cyey, tuꞌntzen tel cyniꞌya tiꞌj at cychunkꞌlala te junx maj.

14Bix alcyej nxiꞌ kkanen twitz Dios, bix ka junx taꞌ tkanbil tuyaj tajbil Dios, ktzkiꞌn nko tzaj tbiꞌn.

15Bix ka ma tzaj tbiꞌn kkanbil junx taꞌ tuya tajbil, jax juꞌx ktzkiꞌn ckiikꞌel jma txiꞌ kkanen.

16Ka ma cyila oj nbinchan jun ocslal jun il, pero yaaꞌn ja il tuꞌn tel tpaꞌn ocslal tiꞌj tchunkꞌlal te junx maj, baꞌn tuꞌn t-xiꞌ cycubsaꞌna cywitza te Dios tiꞌj ocslal nbinchan il, tuꞌntzen tnajset til tuꞌn Dios. Pero at jun il tuꞌn t-xiꞌ tiiꞌn jun ocslal tuj cyamecy te junx maj, jaj tuꞌn n-el tiiqꞌuen ja Cristo. Ka at jun ocslal nbinchan ja il lu, miꞌn txiꞌ cycubsaꞌna cywitza te Dios tiꞌj tuꞌn tnajset ja til lu.

17Cykilcaj yaaꞌn tuj tumel, jatzen ilja tuj twitz Dios. Pero nuk jaj il lu nxiꞌ tiiꞌn jun xjal tuj cyamecy te junx maj.

18Ktzkiꞌn kej xjal ma chi oc te tcwal Dios yaaꞌn binchal ilke. Cꞌojlaꞌn koꞌ tuꞌn Tcwal Dios, bix juꞌ tzunj mlay cub kiꞌj tuꞌn taaw il.

19Ktzkiꞌn ka te Dios koꞌ, bix cykilca xjal twitz txꞌotxꞌ at tjakꞌ tcawbil taaw il.

20Bix ktzkiꞌn ul Tcwal Dios twitz txꞌotxꞌ, bix ma tzaj tkꞌoꞌn knaabl, tuꞌntzen ktzkiꞌn ja, jaj Tcwal Dios jaxxix. Bix at kmojbabl kiib tuya jaxxix Tcwal Dios, Jesucristo. Jatzente Dios jaxxix, ja Kꞌolte kchunkꞌlal te junx maj.

21Key wuya nim n-oc cyakꞌa weya, miꞌn chi naꞌna Dios cywitz sant.

Oꞌcx nyolja.