1 CORINTIOS 8 - Mam of Todos Santos -- Guatemala Unicode

Jun tumel tiꞌj tchuꞌl alimaj oꞌyen cye cydios cyimne

1Bueno, key hermano, o tzaj cykanena tiꞌj cychuꞌl alimaj n-ocx oyet te cycotz sant, ka baꞌn tuꞌn t-xiꞌ cychyoꞌna, bix ka min. Attzen juun cyey nkꞌumente baꞌn, bix at juuntl cyey nkꞌumente yaaꞌn baꞌn. At juun cyey o chi jaw tz̈ꞌiya tuꞌn t-xiꞌ cychyoꞌna, bix at juuntl cyey o chi jaw tz̈ꞌiya tuꞌn miꞌn txiꞌ cychyoꞌna. Cxeꞌltzen nkꞌumena cyey yaaꞌn baꞌn juꞌwa. Ja te Dios taj tuꞌn toc takꞌ cyuyey cyey, yaaꞌn kꞌoj.

2Ka at jun xjal nkꞌumente mas baꞌn tuꞌn, tzꞌoc tcwent tiꞌj, cuma kape min tzꞌel tniyꞌ tiꞌ cykilca.

3Pero jxjal n-oc takꞌ Dios te, jatzen xjalja n-el baꞌn twitz Dios.

4Yaltzen tiꞌj ka baꞌn tuꞌn t-xiꞌ cychyoꞌna tchuꞌl alimaj oꞌyen cye sant, cxeꞌltzen nkꞌumena cyey cyjulu. Ya ktzkiꞌntl kej sant nchi oc maje xjal cywitz, yaaꞌn dioske. Nuk tbinche xjal. Oꞌcx jun Dios iꞌtzxix at, min-al juntl.

5Tuj cywitz xjal yaaꞌn ocslal, at nim dios twitz txꞌotxꞌ bix twitz cyaꞌj, bix ncub cybinchaꞌn cysant tuꞌntzen cynaꞌn cydios cywitz.

6Yaltzen ke, ktzkiꞌntl oꞌcx jun Dios at, bix jaxin Kman Dios, bix te texin cykilca at. Bix oꞌcx jun Kaaw at, ja Kaaw Jesucristo. Bix tuꞌnxin e binne cykilca. Kuyax e bint tuꞌnxin.

7Pero at juun ocslal cyxola minaꞌx tel cyniyꞌ tiꞌj oꞌcx jun Dios at. Tzinx tzaj cynaꞌn cycostumbre te nejl. Juꞌ tzunj jchiꞌpj nxiꞌ oyet cye sant cyꞌiwlaꞌn tuꞌn sant tuj cywitz. Juꞌ tzunj, amale ocslaletke, oj t-xiꞌ cychyoꞌn tzunj chiꞌpj cyꞌiwlaꞌn cyuꞌn sant tuj cywitz, tuj cywitz nchi chucj, cuma tuj cywitz nchi naꞌn dios cywitz sant. Pero ejeeꞌ tzunj ocslal mas cyiw eteꞌ tuj cyocslabl, n-el cyniyꞌ tiꞌj jun sant yaaꞌn Dios, bix juꞌ tzunj mintiiꞌ pjel tuꞌn, amale mat txiꞌ cychyoꞌn jchiꞌpj n-ocx oyet te sant.

8Ka ma txiꞌ kchyoꞌn jchiꞌpj, bix ka min, yaaꞌn tuꞌnja ko elel baꞌn twitz Dios.

9Pero at juntl tumel. Ejeeꞌy cyiw eteꞌ tuj cyocslabla, cycꞌojlanx cyiiba oj t-xiꞌ cykꞌumena baꞌn tuꞌn t-xiꞌ cychyoꞌna jchiꞌpj oꞌyen cye sant, tuꞌntzen miꞌn cheꞌx tuj il kej ocslal yaaꞌn cyiw tuj cyocslabl. Oj nxiꞌ cychyoꞌna jchiꞌpj oꞌyen cye sant, amale yaaꞌnt kaꞌ tuꞌn t-xiꞌ cychyoꞌna, pero jcabtl ocslal yaaꞌn cyiw eteꞌ tuj cyocslabl ncub baj cycꞌuꞌj tiꞌj.

10Oj t-xiꞌ tchyoꞌn jun ocslal cyiw tuj tocslabl jchiꞌpj oꞌyen te sant tuj jun tja sant, bix chꞌinnchꞌe oj toc tcyeꞌyen juntl ocslal yaaꞌn cyiw taꞌ tuj tocslabl, yaaꞌn baꞌn jlu, cuma tuꞌn tyecꞌbil, cxeꞌl tchyoꞌn juntl jchiꞌpj oꞌyen te sant, amale nbajet tcꞌuꞌj tiꞌj.

11Mas baꞌn miꞌn cub tyeecꞌan jun twitz juntl, cuma yaaꞌn nuk tiꞌ jun xjal cyiw taꞌ tuj tocslabl e cymaꞌ Cristo, sino tuyax tiꞌj yaaꞌn cyiw e cymaꞌ. Juꞌ tzunj, yaaꞌn tumel tuꞌn t-xiꞌ cytzpetsaꞌna juntl cyermaney biꞌx nxiꞌ tuj il.

12Ka n-oc cytzpetsaꞌna juntl ocslal, jax nchi binchana il tiꞌ Cristo.

13Juꞌ tzunj tuj ncwenta, ka nxiꞌ nchyoꞌna chiꞌpj oꞌyen cye sant biꞌx nxiꞌ juntl ocslal tuj il wuꞌna, bajx t-xaꞌ nchyoꞌna chiꞌpj oꞌyen cywitz sant, tuꞌntzen cycyaj wermaniya jiquen tuj cyocslabl.