LOS HECHOS 9 - Mam of Todos Santos -- Guatemala Unicode

Tej tocslan Saulo(Hch. 22:6-16; 26:12-18)

1Yaltzen te Saulo, nuktzen toc te siyꞌpul bix te byolcꞌa cye ocslal. Attzen jun kꞌij bix e xiꞌxin tuyaj tneel pala cye xjal judío.

2Bix akꞌxin yolel cyiꞌ ocslal otk chi el ok tuj tnom te Damasco. Bixsen e tkane Saulo te tneel pala tuꞌn tcub ttzꞌiꞌbenxin jun uꞌj tuya tajwalelxin te cye ke cawel cyuj camon jaaꞌ te xnakꞌtzabl tyol Dios tuj Damasco, te kanbilte tuꞌn cyonenxin, bix tuꞌn toc tajwalel Saulo cyuꞌnxin tuꞌn tjaw ttzyuꞌn Saulo alj xjal lepch tiꞌ tbe Jesús, xuujle, xinakle, laꞌ al ma cnet tuꞌnxin, tuꞌntzen cyaj tmeltzꞌuꞌnxin juntl maj Jerusalén. Bix e kꞌoj texin juꞌwa, bix e xiꞌxin tuj Damasco.

3Tel-lenxitltzen cabtl kꞌij tuj be, chꞌitktzen tpon canan Saulo cyuya ke tuya jaaꞌj xaꞌninakexin tuj tnom te Damasco. Chꞌinnchꞌexsen tcub tzꞌak nka cyiꞌjxin jun tij tken kꞌij tzinxsen ntxakakan. Otk tzajxe tuj cyaꞌj.

4Ja tzunj tken kꞌij iyꞌ xooꞌn texin twitz txꞌotxꞌ. Lenchltzen e ponxin twitz txꞌotxꞌ. Bix e tbi Saulo jun xjal tjaw yolen. Tz̈i cyjulu:

—Saulo, Saulo, ¿tikentzen nim kaꞌ n-oc tbinchena wiꞌj?―tz̈itzen jun yol tzaj tuj cyaꞌj.

5Bix aj ttzakꞌbeꞌn Saulo:

—Taat, ¿altzen cyey?―tz̈itzen Saulo.

Bix e tzaj ttzakꞌbeꞌn jyol:

—Inayen wej Jesús, jaxj xjal tzin yasena tiꞌj, jaca maj nkꞌojla cyiꞌj kej xjal nchi oc lpe wiꞌj. Inayen wej.

6Pero weyꞌtzen. Tocx tuj tnom. Jatztzen cꞌoquela kbaꞌn tey ti ctbinchay―tz̈itzen Jesús te Saulo.

7Yal tzun kej xin xjal tuya Saulo bixsen e cyajkexin me tuꞌn seyꞌpajlenel, cuma e cybi xinj yol, pero min-al e cyilxin.

8Cytzajlen bajxitltzen yol tuj cyaꞌj, bix e jaw weꞌ Saulo. Pero junx maj otk cyajxin mos̈, amale jaklet texin ttzi twitz. Mix e bina tcyeꞌyenxin. Entonces bixsen iyꞌ cyiiꞌn jxin tuyaxin tkꞌabxin tuꞌn tbet-xin. Juꞌtzen tten cypon bajxin tuj tnom te Damasco.

9Bix e cyaj Saulo mos̈ te oxe kꞌij. Cyuj tzunj oxe kꞌija minxsentiiꞌ chꞌin e xiꞌ tcꞌaꞌnxin bix e xiꞌ twaaꞌnxin.

10Tujtzen tnom te Damasco najla junxin xjal lepch tiꞌ Jesús Ananías tbixin. Ja tzunj xin Ananías tisen tiiꞌ tcub kleeꞌ tuj twitzxin tisen tuj twitziyꞌxin. Jatzen e cub kleeꞌ tuj twitzxin, Dios e tzaj txconte texin tuj twitzxin. Tz̈itzen Dios cyjulu:

—Ananías―tz̈i Dios.

Bix aj ttzakꞌbeꞌn Ananías:

—¿Ti, taat?―tz̈i Ananías.

11Bix e tzaj tkbaꞌn Dios te Ananías:

—At jun tsanlala ma txiꞌy tiꞌj. Cutxa tuj jbe “Jiquen Be” tbi. Tuj tzunj beꞌwa najla Judas. Kanenxse te Judas junxin xjal ma tziyꞌ tuyaxin, Saulo tbi. Jatza itzꞌja tuj tnom te Tarso. Lu Saulo nnaꞌn Dios jaꞌlecuwe.

12Matzen cub kleeꞌ tey tuj twitz. Jaxsen juꞌx tewa, jax tuj twitz. Matzen cub kleeꞌ tuj twitz Saulo. Yal tuj twitzxin, xiꞌnen t-xiꞌ lkꞌey tiꞌjxin, bix tuj twitz otk cub tkꞌoꞌna tkꞌaba tibaj, tuꞌn tbint tcyeꞌyen juntl maj, cuma mos̈―tz̈i Dios te Ananías tuj twitz.

13Tejtzen toc tbiꞌn Ananías juꞌwa, bix e xiꞌ tkbaꞌn Ananías:

—Nuksama, taat, nimxsen tkaꞌyel o nbiꞌya tiꞌj xjal Saulo. Nimxsen biꞌyen o baj te cyiꞌj xjal ocslal tuj Jerusalén.

14Yaltzen jaꞌlewe tzultzen tuj tnom te Damasco tuya tajwalel cyuꞌn cawel bix tuꞌn nintzaj pala tuꞌntzen kxiꞌ kꞌiꞌn keya pres, ejooꞌya ocslal tyola―tz̈i Ananías te Dios.

15Pero bix e xiꞌ tkbaꞌn Dios:

—Junawe, pero cutxa, cuma tej Saulo mayꞌxsen tzaj nscyꞌoꞌn te kbalte nyol te coꞌpbil cye xjal tuj juntl wik tnom, cye nim cawel, bixsen cye xjal te Israel.

16Juꞌ tewa, nimxsen qꞌuixcꞌaj o takꞌ cye ocslal. Pero we, ma txiꞌ nyeecꞌan te nejl cykilj qꞌuixcꞌaj qꞌuiyela tuꞌnj tkꞌon tiib wuya―tz̈itzen Dios te Ananías, tuꞌn tcub chewaxxin.

17Entonces bix e tcuya Ananías, bix e xiꞌxin taꞌj jaaꞌ jaaꞌ otk cneta tposada Saulo. Jatztzen e cwaꞌ tkꞌoꞌn Ananías tkꞌab tibaj Saulo, bix e xiꞌ tkbaꞌnxin:

—Tey Hermano Saulo, jxin Kman Jesús, jaxj xin tey e til tuj be, ma chin tzaj tchkꞌoꞌnxin tiꞌja tuꞌntzen tbint tcyeꞌyena juntl maj, bix tuꞌntzen nim tipemala tuꞌn Espíritu Santo tuꞌn tiyꞌ tilbila tiꞌj―tz̈i Ananías te Saulo.

18Bix tujxsen naj tel tzꞌak tuj twitz Saulo jun tzꞌis tisen ttzꞌumel quis̈, bix akꞌxin cyeꞌyel juntl maj. Bix e jaw weꞌxin, bix e bautizarjxin.

19Bix akꞌ Saulo waaꞌl juntl maj. Juꞌtzen tten tul tipen Saulo juntl maj. Bix e xiꞌxin cyuya ocslal.

Tej tpocban Saulo tuj Damasco

Bixsen cabtl kꞌij attzen Saulo cyuyaj xjal oc lpe tiꞌ Jesús tuj Damasco.

20Tneeltzen ke tkꞌijxin bix akꞌ Saulo yolel cyuj camon jaaꞌ te xnakꞌtzal tyol Dios ka ja Jesús jaxin Tcwal Dios.

21Cykil xsun kej oc ebinte nimxsen e jaw kleeꞌke, bix e xiꞌ cyyolen cyxolelex:

—¿Yaaꞌmpatzen jaj xjal lu oc ten yaaꞌlcye ocslal tuj Jerusalén? ¿Bix yaaꞌmpatzen jaxja ma tzaj tzalu te jyol mas ocslal, tuꞌn cyxiꞌ tiiꞌn te pres cywitz nintzaj pala tuj Jerusalén?―tz̈itzen ke ocslal tuj Damasco.

22Pero te Saulo tzinx nkbaꞌnxin tyol Dios tuya mas tilbilxin tiꞌj, mix e bina tmojtzaj tyolxin cyuꞌn xjal judío tuj Damasco, kej oc ten jyolec texin. Kej tyol Saulo tiꞌ Jesús, ka jaxin mero Scyꞌoꞌn tuꞌn Dios, jaxsen otk tzꞌeꞌla tuj cywitz xjal. Ya min-al juntl iyꞌx tuꞌn.

Tej ttzokpaj Saulo cywitz judío

23Cabtltzen kꞌij mas yaj, tuꞌntzen tchiꞌlel cycꞌuꞌj jxjal judío yaaꞌn ocslal, bix e jaw cychmon cyiibxin te nincꞌul tiꞌj tuꞌn tcub Saulo.

24Pero bix e pon tumel te Saulo. Ke tajkꞌoj Saulo e cub ten cꞌojlal jakꞌch n-exa be bix n-octza be tuj nim tnom, te kꞌijl bix te koniyan, tuꞌn ttzyet-xin.

25Pero bix e baj cynicꞌuꞌn cye ocslal tiꞌj, bix e cuꞌx cykꞌoꞌnxin Saulo tuj jun tij chiꞌl tetzen koniyan, bix e cuꞌx xtunet-xin twitzj penwen tocsen tiꞌ tnom. Ocxsen e tema tuꞌn tzokpaj Saulo tuj tnom te Damasco.

26Tejtzen tpon Saulo tuj Jerusalén, bix akꞌxin jyolte tuꞌn toc tmojban tiibxin cyuya ocslal. Pero cykil ke ocslal e cub ttz̈i cyiꞌj. Min el jax tuj cywitzxin ka jaxxix otk tzꞌoc Saulo te ocslal. Eꞌla tuj cywitz xjal nuk tuꞌn cycub yajlaꞌn tuꞌn Saulo.

27Pero cyxoltzen ocslal tocxe junxin Bernabé tbi, jaj xin e tzaj tuj txꞌotxꞌ te Chipre, jaxj xin otk txiꞌ tqꞌueyen ttxꞌotxꞌ te onl cye mebe. Ja tzunj xin Bernabé oc ke tcꞌuꞌj tiꞌ Saulo, bix e xiꞌ tiiꞌnxin ja Saulo cywitz t-xel Jesús, bix oc ten Bernabé kbalte cye t-xel Jesús ti tten toc noj Jesús twitz Saulo tuj be te Damasco, bix ti tten toc yolen Jesús tiꞌjxin, bix ti tten tyolenxin tiꞌ Jesús tuj Damasco tuꞌn cykil tcꞌuꞌjxin.

28Bix e cyiikꞌ t-xel Jesús jaxin tisen jun cyuyaxin, bix iyꞌxin cyuyaxin kbalte tyol Jesús tuj cykil Jerusalén tuyaxsen nim cycꞌuꞌjxin.

29Pero tejtzen tyolen Saulo cyuya xjal judío yaaꞌn ocslal, bix ja cyyolj griego, bix e tzaj kꞌojlkexin, bix e cub cyniqꞌuenxin tuꞌn tcub Saulo.

30Tejtzen tel cyniyꞌ ocslal tiꞌj, bix iyꞌ kꞌiꞌnxin tuꞌn tponxin tuj tnom te Cesarea bix iyꞌ smet-xin tuꞌn tponxin tuj tnom te Tarso, jaaꞌ itzꞌjaxin.

31Juꞌtzen tten tcub chꞌin tuj ttz̈yal. Jatzen Saulo tneel oc ten yaalcye ocslal. Entonces cykiltzen ke tja Dios te ttxꞌotxꞌ Judea, te Galilea, bixsen te Samaria eteꞌtzen tuj ttz̈yal, bix otktzen tzꞌoc mas cyipemal. Bix e tz̈ꞌiy ke ocslal mas ti tten tuꞌn toc cybiꞌn Espíritu Santo bix ti tten tuꞌn cyiikꞌente kꞌukbil cycꞌuꞌj.

Tej tul tnaabl Eneas

32Jatzen t-xel Jesús Pedro nbet tzunxin tuj jaca juun tnom te kꞌolbelcye ocslal. Attzen jun kꞌij bix e xiꞌxin kꞌolbelcye ocslal tej tnom te Lida.

33Tuj tzunj tnom lu bix oc noj junxin xjal Eneas tbixin twitz Pedro. Ja tzunj xin Eneas mintiiꞌ tanem t-xumlalxin, bix otk tenxin twiꞌ wetbil wajxak jnabkꞌi.

34Bix e xiꞌ tkbaꞌn Pedro:

—Eneas, tzul tey tnaabl tuꞌn Jesús. ¡Weꞌwey! Binchancꞌa twetbila, cuma ya mintiiꞌtl baꞌn tajbena tey―tz̈i Pedro te Eneas.

Tujx naj tul tnaabl Eneas, bix e jaw weꞌxin.

35Cykil xsun kej xjal najl tuj tnom te Lida e cyil nbet Eneas. Juꞌx kej xjal najl tuj jun lugar chkꞌajlaj Sarón tbi e cyil nbet Eneas. Bix nim e cyaj cycostumbre te ootxa, bix akꞌ xeꞌl lpeke tiꞌ Jesús.

Tej tuj cyamecy Dorcas

36Joocꞌtzen nbaj juꞌwa, tuj tzunj juntl tnom te Jope attzen junxuj ocslal Tabita tbixuj tuj yol te judío, bixsen tuj cyyol xjal griego Dorcas tbixuj. Cyecaxsen tnaablxuj, bix nimxsen e tbinchexuj cye xjal mebe.

37Pero tuj tzunj tyem lu, bixsen e yebt Dorcas, bix e cyimxuj. Bixsen e baj txjet t-xumlalxuj. Pero min e maket, sino juꞌ e jax t-xumlalxuj tuj jun cwart te tcab cxoꞌlen tjaxuj.

38Pero tej mitknaꞌx tcyimxuj, bix e xiꞌ chket caꞌba sanjel tuj tnom te Lida te txcolte Pedro tuꞌn tul tuj Jope te kꞌanlte Dorcas cuma nka taꞌ Lida tiꞌ tnom Jope. Bix otktzen tzꞌabij ka at Pedro jatzewe. Bix e xiꞌ cykbaꞌn sanjel te Pedro:

—Taat, nuksama, quixtey chꞌina tuj tnom te Jope, cuma chꞌix tbaj jxuj ocslal Dorcas―tz̈i tzunkexin t-xiꞌ cykꞌumenxin te Pedro.

39Entonces bix e xiꞌ Pedro cyuyaxin. Tejtzen tponxin, bix e xiꞌ kꞌit-xin tuj cwart jaaꞌ tocxe Dorcas, pero ya otk cyimxuj. Nimxsen xuuj viuda nookꞌ tiꞌjxuj. Otktzen chi ul cyiiꞌnxuj al cyekꞌch ke t-xbalen Dorcas e xiꞌ cye viuda, te yecꞌbil tnaablxuj tej iꞌtzxxuj.

40Pero bix etz tchkꞌoꞌn Pedro cykil xjal peꞌn, bix e cub majexin te naꞌl Dios. Ncyeꞌyenc tzunxin tiꞌj cyimne, bix e xiꞌ tkbaꞌnxin cyjulu:

—Tabita, weꞌwey―tz̈i Pedro.

Bix e jaw tjkoꞌnxuj ke twitzxuj. Tejtzen toc tcyeꞌyenxuj Pedro, bix e jaw kexuj.

41Bix e tzaj ttzyuꞌn Pedro tkꞌabxuj, bix e jaw tiiꞌnxin jaxuj. Bixsen ocx ttxcoꞌnxin ke ocslal, bixsen ke viuda, bix oc tyeecꞌaxin Dorcas iꞌtztlxuj.

42Exsen baj tpocbal tuj tnom te Jope. Nimxsen xjal ocslante Jesús tuꞌnj tpocbal.

43Bixsen e ten Pedro nim kꞌij tuj tnom te Jope. Jatztzen e temaxin tja junxin xjal kesl tzꞌuꞌn.