1Tetzen caꞌbatl kꞌij tuꞌn tiyꞌ cyiyꞌsaꞌn xjal te Israel jninkꞌij oc tbi te Iyꞌ Dios Bix E Tcolxin Ke Xjal Te Israel, bix ka ninkꞌij te Pascua, oj nchi akꞌ xjal waaꞌl pan mintiiꞌ tkꞌanel tocx.
Te tzunj caꞌbatl kꞌij te mintknaꞌx tul canan ninkꞌij, bix oc cychmon cyiib ke nintzaj cyawil naꞌl Dios bix ke txꞌolbal ley, te nincꞌul tiꞌj ti tten tuꞌn ttzyet Jesús, bix tuꞌn tbyet-xin. Pero cyaj tzunxin e tzyet Jesús tuj ewjel, cuma cytzkiꞌnxin ka a cyanem xjal tiꞌj Jesús.
2Pero at cab cyexin e kbante:
—Miꞌn jaw ktzyuꞌn Jesús tuj ninkꞌij, cuma ka ma jaw ktzyuꞌnxin tujcꞌa ninkꞌij, chi jawel meltzꞌaj xjal kiꞌj―tz̈i tzunkexin.
Tej tjax koꞌn cꞌocꞌsbil tuj twiꞌ Jesús(Mt. 26:6-13; Jn. 12:1-8)3Yaltzen te Jesús, otktzen txiꞌxin tuj tnom te Betania tja jxin Simón e yaabt tuꞌn lepra, jaj jun wik yabel tisen txꞌaꞌc nuk ntzaj kꞌey cychuꞌl xjal tuꞌn. Nchi waaꞌntzen Jesús ttxaꞌn mes tej tpon junxuj xuuj tuya jun niꞌ cyeca lmet nojne tuya cꞌocꞌsbil cyiꞌ xjal bix wiꞌyelxsen. Bix e jaw tjkoꞌnxuj ttziiꞌ lmet, bix e jax tkoꞌnxuj cꞌocꞌsbil cyiꞌ xjal tuj twiꞌ Jesús, tejxe tel baj t-xeeꞌ lmet.
4Toctzen cycyeꞌyen cab xjal ti otk tse xuuj, bix e jaw yolen chꞌinkexin:
—¿Tikentzen ma pjaꞌ tyajlaꞌn jxuuj lu jtij cꞌocꞌsbila?
5Nuket xiꞌ tqꞌueyenxuj, matle tzꞌoc twiꞌ tisen twiꞌ tcꞌuꞌj xjal te jun jnabkꞌi, bixetle s-ajben twiꞌ te onl cye mebe―tz̈i tzunkexin. Bix akꞌkexin ilec te xuuj.
6Pero bix e xiꞌ tkbaꞌn Jesús cyexin:
—Yaaꞌn ilj xuja. ¿Tikentzen eteꞌqꞌuey yaꞌl texuj? Jtexuj ma tzꞌoc tbinche wiꞌja, baꞌn teja.
7Cuma ke cyej mebewa chi temelx cyeja cyey cyxol. Baꞌntzen toc cykꞌoꞌna ti jilel cye oj cyaja txiꞌ cykꞌoꞌna cye. Pero we, mlay chin tenwe cyxola.
8Tej xuj xuuj lu ma tyeecꞌaxuj cykil tanemxuj wiꞌj. Bix juntl. Tisentzen cyten xjal oj n-oc seet cꞌocꞌsbil cyiꞌj oj nbint cyten tuꞌn cyxiꞌ tuj mukbil, juꞌxse ma tse jxuj xuuja ma tzꞌoc tkoꞌnxuj cꞌocꞌsbil wiꞌj teja minaꞌx ncyima, tetzen jun techel ncyamecy, bix tuꞌn tbaj bint nxumlal tuya cꞌocꞌsbil tuꞌn nmaketa.
9Tzinexix cxeꞌl nkbaꞌn cyey, jaaꞌxja cpomela baj tumel jbaꞌn tpocbal tyol Dios tiꞌj coꞌpbil xjal, il tiꞌj cbyal tpocbal ti ma tbinche jxuj xuuja wiꞌj. Juꞌtzen cnaꞌjalewe―tz̈i Jesús cyexin.
Tej t-xiꞌ toye Judas tiib tuꞌn t-xiꞌ tkꞌoꞌn ja Jesús(Mt. 26:14-16; Lc. 22:3-6)10Cybajlen yolenxitl tzunxin tja Simón, bix el Judas Iscariote, jun t-xnakꞌatz Jesús t-xol cablajajxin. Bix e xiꞌ Judas te yolel cyuya nintzaj cyawil naꞌl Dios tuꞌn toc tonen Judas ejeeꞌxin tuꞌn ttzyet Jesús.
11Toctzen cybiꞌn tawil naꞌl Dios, e jawxsen tzalajkexin, bixse e bint cyyolxin tuꞌn toc cykꞌoꞌnxin tpwak Judas. Bix akꞌ Judas jyolte ti tten tuꞌn t-xiꞌ tkꞌoꞌn Judas ja Jesús tuj cykꞌab tawil naꞌl Dios.
Tej twaaꞌn Jesús cyuya t-xnakꞌatzxin tuj xjan kꞌij(Mt. 26:17-29; Lc. 22:7-23; Jn. 13:21-30; 1 Co. 11:23-26)12Tetzen tneel kꞌij ninkꞌij Pascua, oj nchi waaꞌn xjal pan mintiiꞌ kꞌanel tocx, bix oj nchi byon xjal juun carnel te juun te naꞌl ja ninkꞌij lu, bixse e xiꞌ tkanen t-xnakꞌatz Jesús te:
—¿Jaaꞌ tumel taja txaꞌ kbinchaꞌqꞌueya jil carnel te tbel kwa bixse tikꞌch jilel ke?―tz̈i tzunkexin te Jesús.
13Toctzen tbiꞌn Jesús cyyolxin, bix e xiꞌ tchkꞌoꞌnxin caꞌba cye t-xnakꞌatzxin, bix e xiꞌ tkbaꞌnxin:
—Cyucxa tuj tnom te Jerusalén. Ojtzen cypona tuj tnom, bix cꞌoquel noj jun xinak cywitza tuya jun xaran aꞌ. Bix chi oquel lpey tiꞌj.
14Ojtzen tocx jxinaka tuj jun jaaꞌ, cykanenxsen te taaw jaaꞌ cyjulu: “Taat, ma tzaj tkanen Xnakꞌtzal: ‘¿Altzen cyej cwart ctzaal tkꞌoꞌna keya tuꞌn tbint kwaya cyuya nxnakꞌatza te ja ninkꞌija?’ tz̈i Jesús,” tz̈i cybela te taaw jaaꞌ.
15Tzultzen tyeecꞌan taaw jaaꞌ jun maꞌ nim cwart cyey bix binnentlte tten te tcab cxoꞌlen jaaꞌ. Cybinchamtzen kwa jatzewe―tz̈i Jesús cye t-xnakꞌatz.
16Bix e xiꞌkexin tuj tnom. Bix juꞌx e baj tisenx e tkba Jesús cyexin, bix akꞌkexin binchal cywaxin te kale.
17Tetzen n-akꞌ cwel klolj, bix e pon Jesús cyuya cycablaaj t-xnakꞌatz te waaꞌl jaaꞌj otk bina cywaxin.
18Maantktzen nchi waaꞌnxin twiꞌ mes, tej t-xiꞌ tkbaꞌn Jesús:
—Tzinexix cxeꞌl nkbaꞌn cyey, attzen jun cyey toctz kxol, nwaaꞌn wuya, cxeꞌl kꞌonte we tuj biybil―tz̈i Jesús cye t-xnakꞌatz.
19Toctzen cybiꞌnxin tyol Jesús, tcubxsen licyꞌpaj ttz̈i cyiꞌjxin, biꞌxse e naj cynaablxin tuꞌn ttz̈i. Bix juun n-ela cyexin akꞌ kanlecte te Jesús:
—¿Inayenpatzen weya, Taat?―tz̈i tzunkexin.
20Bix aj ttzakꞌbeꞌn Jesús cyexin:
—Ja jun cyej cablajaj cyey nwaaꞌn wuyena, jaj jun cyey ncuꞌx muꞌnte tpan junx wuya tuj lak.
21Il tiꞌj ncuya tisenj nbyan tuj tyol Dios tuꞌn nbyeta, pero ay tixse tnaꞌxj cxeꞌl kꞌonte we. ¡Masetlpele baꞌn minxet itzꞌj xjala!―tz̈i Jesús.
22Maantktzen nchi waaꞌnxin, tej tjaw ttzyuꞌn Jesús jun pan, bix e xiꞌ tkanenxin xtalbil te Dios tiꞌ pan. Bix akꞌxin piẍlcate, bix e xiꞌ tkꞌoꞌnxin cye t-xnakꞌatzxin, bix e xiꞌ tkbaꞌnxin:
—Cywaaꞌnx xsunj piẍen pana, cuma ja tzunj pana techlal nxumlala cwel yuchj―tz̈i Jesús.
23Cybajtzen waaꞌnxin pan, bix e tzaj ttzyuꞌnxin jun nim malbil nojne tuya vino, bix e xiꞌ tkanenxin xtalbil tiꞌ vino te Dios. Bix e xiꞌ tkꞌoꞌnxin malbil te jaca juun t-xnakꞌatzxin tuꞌn tel cycꞌaꞌn tiꞌ vino. Bix cykilcakexin el cꞌante.
24Bix e xiꞌ tkbaꞌn Jesús cyexin:
—Jatzen weya techel ntz̈qꞌuelja, qꞌuelel kojl tiꞌ nim xjal oj ncyima. Tuꞌntzen ntz̈qꞌuela cwela weꞌ jun acꞌaj tyol Dios cyuya xjal. Tuꞌntzen weya cyamecy cwel weꞌ te ja acꞌaj tumel tuꞌn ti tten oj cylonte xjal cywitz tuya Dios.
25Tzinexse cxeꞌl nkbaꞌn cyey mi nuket juntl maj t-xiꞌ ncꞌaꞌnj vinowa tiꞌj lux ken iniꞌtzen texej kꞌij oj woca te cawel tibaj twitz txꞌotxꞌ tuya Nmana Dios ncyimlenxitle, maxetzen cxeꞌl ncꞌaꞌntl vino―tz̈i Jesús cye t-xnakꞌatz.
Tej t-xiꞌ tkbaꞌn Jesús te Pedro jay cwel eꞌwente we oxe maj(Mt. 26:30-35; Lc. 22:31-34; Jn. 13:36-38)26Cybajlen waaꞌnxitl tzunxin, bix akꞌkexin bitzel. Cybajtzen bitzenxin, bix e xiꞌkexin tcꞌuꞌj witz te Olivos te koniyan.
27Bix e xiꞌ tkbaꞌn Jesús cye t-xnakꞌatz:
—Cykilcakey chi cyjel cyeꞌyente we. Juꞌtzen toc cyuꞌn tyol Dios. Tz̈itzen cyjulu: “Cwel nbyoꞌn cylel, bixse chi elel tz̈itj tcarnel,” tz̈i Dios tuj uꞌj. Juꞌxse we oj ncyim. Chi elel tz̈itja wiꞌj.
28Pero ojtzen njatz itzꞌj, chin xeꞌl nejl cywitza tuj Galilea―tz̈i Jesús cye t-xnakꞌatz.
29Bix aj tkbaꞌn Pedro:
—Taat, amale cykilcat ke kuya cyjel cyeꞌyente tey, pero we mlay cyaj ncyeꞌyen wey―tz̈i Pedro te Jesús.
30Bix aj ttzakꞌben Jesús:
—Tzinexix cxeꞌl nkbaꞌn tey, tex ja koniyan lu, te mintknaꞌx tookꞌ eyꞌ te tcab maj, qꞌuelel tiiꞌn tiiba wiꞌj oxe maj―tz̈i Jesús.
31Pero cyiwx oca tkꞌon tiib Pedro:
—Amale mat chin cyim junx tuyey, miꞌn tzꞌel wiiꞌn wiib tuyey―tz̈i Pedro. Juylexsen toc cyuꞌnj cabtlxin t-xnakꞌatz Jesús.
Tej tnaꞌn Jesús Dios tuj Getsemaní(Mt. 26:36-46; Lc. 22:39-46)32Yajcꞌatzen chꞌintl bix tex koniyan, bix e cuꞌxkexin tuj jun lugar jaaꞌ taꞌ nim tken abech bix t-xol tzeeꞌ tken olivo, Getsemaní tbi lugar, t-xeeꞌj witz te Olivos. Bix e xiꞌ tkbaꞌn Jesús cye t-xnakꞌatz:
—Chi kequetzen cyey tzalu; matzen chixwe yolel tuya Dios―tz̈i Jesús cyexin.
33Bix e xiꞌ tiiꞌnxin Pedro, Santiago, bixse Juan tuyaxin. Bix akꞌ cwel talelxin.
34Bix e xiꞌ tkbaꞌnxin te cyoxel t-xnakꞌatzxin:
—Mayꞌxsen tzꞌoc jun bis tiꞌ wanem. Mlayxsen npawe. Chi tencꞌatzen cyey tzalu. Cyimaltzen chꞌin cywatla―tz̈i Jesús cye Pedro.
35Bix el lkꞌe Jesús chꞌintl cyiꞌjxin, bix e cub mutzkꞌajxin twitz Dios, biꞌx e pon tibaj twitzxin twitz txꞌotxꞌ. Bix e xiꞌ tcubsaꞌnxin twitzxin te Dios ka ilxix tiꞌj tuꞌn tiyꞌx qꞌuixcꞌaja tuꞌnxin, bix ka min, tuꞌn tel tiiꞌn Dios.
36Bixsen e xiꞌ tkanenxin cyjulu te Dios:
—Ntaat, cykil baꞌn tuꞌna. Chin tcoꞌpa tzuna tuj ja tcꞌayela. Pero yaaꞌn tej weya waj bint cbinel, sino ja tej alcye tey taj bint, jatzen wej waj―tz̈i Jesús te Dios.
37Tbajtzen yolenxin tuya Dios, bix e pon meltzꞌajxin cyiꞌ Pedro. Nchi wutanxin tej tpon Jesús cyiꞌjxin. Bix e xiꞌ tkbaꞌnxin te Pedro:
—Simón, ¿nwutanpa tzuna? Mitetpe jun hora ma tpay watl―tz̈i Jesús te Pedro.
38Bix e xiꞌ tkbaꞌn Jesús te cyoxel t-xnakꞌatz:
—Cyiimalxix chꞌin cywatla, bix chi naꞌn Dios, tuꞌn miꞌn chi cub tzꞌaka tuj oj cyel oka. Cyey cycꞌuꞌj cyiwte te binchal jun ti jilel baꞌn, pero yaaꞌn cyiw cychuꞌla te binchal tej ti taj cycꞌuꞌja―tz̈i Jesús cyexin.
39Bix el Jesús cyiꞌ t-xnakꞌatz juntl maj te yolel tuya Dios. Ejeeꞌ xsunj tyolxin te tneel maj, ejeeꞌ xsunj e xiꞌ tkbaꞌnxin te Dios te tcab maj.
40Tejtzen tpon meltzꞌajxin, nchi wutan t-xnakꞌatzxin juntl maj cyoxelxin, cuma ntzajxe mtzꞌe cywitzxin tuꞌn nim watl. Ya mintiiꞌtl aj cytzakꞌbeꞌnxin te Jesús.
41Tbajlen yolenxitltzen Jesús te toxen maj tuya Dios, tpon meltzꞌajxin cyuya t-xnakꞌatzxin, bix e xiꞌ tkbaꞌnxin:
—¡Jeyꞌ! ¿nchi wutanxpa tzuna? Ya oꞌcx xsunj. Matzen pon tumel tuꞌn t-xiꞌ kꞌoꞌn jxjal Smaꞌn tuꞌn Dios tuj cykꞌab aj il.
42Chi weꞌwa. Lu jxin ma txiꞌ kꞌonte we tzula. Koꞌka clul texin―tz̈i Jesús.
Tej ttzyet Jesús(Mt. 26:47-56; Lc. 22:47-53; Jn. 18:2-11)43Maantkxsen nyolen Jesús, tej tpon Judas, jun t-xnakꞌatz Jesús t-xolj tcablajajxin, tuya nim xjal binnen tten tuya espada bix tuya tzeeꞌ. Chkꞌoꞌn tzunkexin cyuꞌn nintzaj cyawil naꞌl Dios, cyuꞌn txꞌolbal ley, bix cyuꞌn nintzaj xjal.
44Otktzen txiꞌ tkbaꞌn Judas jun techel cye tzuyel ti tten oj ttzyet Jesús. Juꞌtzen toc tuꞌn Judas cyjulu: “Al tzunj ma tzꞌel ntzꞌuꞌben twitz, ja tzunj. Cytzyumtzen, bix cyiiꞌnxsen,” tz̈i Judas tej t-xiꞌ tkbaꞌn cye tzuyel tej mintknaꞌx cypon canaxin taꞌ Jesús.
45Juꞌ tzunj bix e xiꞌ lkꞌe Judas tiꞌ Jesús, bix e xiꞌ tkbaꞌn Judas te Jesús:
—Xnakꞌtzal―tz̈i Judas, bix el ttzꞌuꞌbenxin twitz Jesús.
46Entonces bix e xiꞌ cykꞌabxin te tzyultzte Jesús.
47Pero attzen junxin t-xnakꞌatz Jesús tcub, bix e jatz tiiꞌnxin tspadaxin, bix el ttxꞌomanxin jun tẍquin junxin tkꞌopaj tneel cyawil naꞌl Dios.
48Bix e xiꞌ tkanen Jesús cye xjal tzuyel:
—¿Tikentzen ma chi tzaaꞌy tuya espada bix tuya tzeeꞌ te tzyul weya, jacꞌa xsunj xobel kena?
49Cykilca kej kꞌij lu ma chin tena cyxola te xnakꞌtzal cyey tuj nin tja Dios, pero mintlpe in cytzuya. Pero yaltzen jaꞌlewe tetzen koniyan ma chi tzaja tzyul we. Pero cykil tzunj nbaja tetzen tuꞌn tjapan baj twiꞌj tyol Dios o cyaj tzꞌiꞌbet―tz̈i Jesús.
50Cykilca ke t-xnakꞌatz Jesús e cyaj cyeꞌyen texin, bix e baj pjel okkexin.
Junkꞌa xjal el ok51Pero attzen junkꞌa xjal nuk oc lpe tiꞌ Jesús tej t-xiꞌ cyiiꞌn xjal jaxin tuj tnom. Yal tzunj kꞌa xjal nuk jun sábana toc tiꞌjkꞌa. Bix e cytzuy xjal jakꞌa.
52Pero ttzyet tzunkꞌa, bix e xiꞌ ttzokpan kꞌaj sábana toc tiꞌjkꞌa. Ẍbikl tzunkꞌa tej t-xiꞌ tzokpajkꞌa.
Tej tpon kꞌiꞌn Jesús cywitz aj cawel(Mt. 26:57-68; Lc. 22:54-55, 63-71; Jn. 18:12-14, 19-24)53Yaltzen te Jesús, bix e xiꞌ cyiiꞌn xjal jaxin twitz tneel cyawil ke naꞌl Dios, cyuya cykil ke tcab cyawil naꞌl Dios, cyuyatzen cykilca ke nintzaj xjal, bix cykilca ke txꞌolbal ley. Ejeeꞌtzen xinja jun cloj at te nin cawel cyxol xjal te Israel.
54Nakchtzen e xaꞌ lpete Pedro tiꞌ Jesús, tejxe tpon Jesús cyuꞌn tzuyel maan tuj tja tneel cyawil naꞌl Dios. Bix e cyaj ten Pedro twitz peꞌn, bix e cub kexin tiꞌ kꞌakꞌ te mekꞌl tiibxin cyuya ke cꞌojlal te nin tja Dios.
55Pero tunwentzen nchi jyona jxin nin cawel cyxol xjal te Israel bix ke tcab cyawil naꞌl Dios cab tstiwa tiꞌ til Jesús tuꞌn tbyet-xin, pero min e cnet cyuꞌnxin.
56Amale nimet xjal oc tkꞌon tiib te tstiwa, pero min el cyyol xjal junelna.
57At juun xjal e jaw weꞌ bix e jaw cymeltzꞌuꞌnxin tyol Jesús cyjulu:
58—O tzꞌocxe kbiꞌn keya tyol jxin lu: “Cwel nxitaj nin tja Dios e bint cyuꞌn xjala. Tetzen toxen kꞌij oj tbint juntl tja Dios wuꞌn, yaaꞌn cyuꞌn xjal,” tz̈itzen xina―tz̈itzen ke tstiwa cye cawel.
59Pero juꞌx kej xjal e kbante ja yol lu min e maje cyyol.
60Juꞌ tzunj e jawa weꞌ tneel cyawil naꞌl Dios cyxol xjal, bix e xiꞌ tkanenxin te Jesús:
—¿Mimpatiiꞌ cꞌaal ttzakꞌbeꞌna cyiꞌj yola? ¿Ti toc tuꞌna tiꞌj cyyol xjal lu?―tz̈i tneel cawel te Jesús.
61Pero min akꞌ Jesús. Mintiiꞌ aj ttzakꞌbeꞌnxin. Bix e xiꞌ tkanen tneel cawel te Jesús juntl maj:
—¿Japa teja Scyꞌoꞌn tuꞌn Dios, Tcwal Dios cyꞌiwlaꞌn?―tz̈i tzunxin te Jesús.
62Bix aj ttzakꞌbeꞌn Jesús te tneel cyawil naꞌl Dios:
—Inayentzen weja. Bix cylaꞌ tzuna inayena, Jsmaꞌn tuꞌn Dios, kꞌuklec tuj tmankꞌab Dios nim tipemal tuj cyaꞌj bix cylaꞌ tzuna oj ntzaj twitz txꞌotxꞌ tuj muj twitz cyaꞌj―tz̈i Jesús te cawel.
63Entonces toc tbiꞌn tneel cyawil naꞌl Dios tyol Jesús, bix el ttzakenxin tiꞌjxin tuꞌn tkꞌojxin tiꞌ tyol Jesús, cuma kaꞌj yol tisenj te Jesús tuj cywitz xjal. Bix e xiꞌ tkbaꞌn tneel cyawil naꞌl Dios:
—¿Titzen kaj te mas tstiwa?
64Ejeeꞌ xsuna ma chi oc ebinte lu tzunxin njuben yol tiꞌ Diosa ka junxxin tuya Dios. ¿Ti toc cyuꞌna?―tz̈i tzunxin.
Cykilca xjal e jaw yolen ka tuꞌnxxin bix e tbyettzen.
65Attzen naj cab xjal oc tzubente tiꞌjxin, bix oc makset twitzxin. Bix akꞌ ke xjal pjulec texin, bixse oc cykanen xjal texin:
—Katzen Diosa, tzakꞌcꞌax tuꞌna al s-oc pjunte tey―tz̈i ke xjal texin.
Cyuyaxse ke cꞌojlal tja Dios oc pjunte twitz Jesús.
Tej tel tiiꞌn tiib Pedro tiꞌj Jesús(Mt. 26:69-75; Lc. 22:55-62; Jn. 18:15-18, 25-29)66Yaltzen te Pedro, tcub xsunxin peꞌn, bix e pon juntxin xuuj tkꞌopaj tneel cyawil naꞌl Dios.
67Tejtzen toc tcyeꞌyentxin Pedro nmekꞌenxin tiibxin tiꞌ kꞌakꞌ, bix oc tenatxin cyeyꞌlecte Pedro, bix e xiꞌ tkbaꞌntxin:
—Tuyax tey niyꞌ tuya Jesús, aj Nazaret―tz̈i tzuntxin te Pedro.
68Pero bix elx tiiꞌn tiibxin:
—Min. Min ntzkiꞌnwe twitzxin. Mitetpe n-el nniyꞌ tiꞌj aliꞌj nyoleney―tz̈i Pedro. Bix el lkꞌexin peꞌn. Bix e jaw okꞌ junjil cooꞌ.
69Bix oc noj jtxin kꞌopaj tiꞌ Pedro juntl maj, bix e xiꞌ tkbaꞌntxin cye cabtl xjal:
—Jatzen juntl xinja lepchec tiꞌ Jesús―tz̈i tzuntxin.
70Pero elx tiiꞌn tiibxin juntl maj.
Yajcꞌatzen chꞌintl bix oc cyumlaꞌn jxjal eteꞌcꞌa peꞌn ja Pedro:
—Jaanxix tey lepchec tiꞌ Jesús. Aj Galilea tey, cuma tiꞌ yolena―tz̈i tzunkexin te Pedro.
71Bix akꞌ Pedro kꞌilbel tiib:
—Tzkinn Dios yaaꞌn jaan kenwe. Min ntzkiꞌnwe twitzj xjal nchi yolena tiꞌja―tz̈i Pedro.
72Tujxse tjaw okꞌ cooꞌ te tcab maj, bix ul tuj tcꞌuꞌj Pedro ti otk tkba Jesús texin: “Te mintknaꞌx tookꞌ eyꞌ te tcab maj, qꞌuelel tiiꞌn tiiba wiꞌj oxe maj,” tz̈i Jesús te Pedro te jyaꞌx. Tjket-xsen jun tookꞌxin tuꞌn bis.
Who We AreWhat We EelieveWhat We Do
2025 by iamachristian.org,Inc All rights reserved.
