1 CORINTIOS 9 - Mam of Todos Santos -- Guatemala Unicode

Toclen jun akꞌanal tuj tyol Dios

1Key hermano, cyiiꞌnx ti tten wuꞌna. Inayena jun t-xel Jesús. Juꞌ tzunj at nim woclena. Pero te weya woclen, mintiiꞌ cnkaniya tiꞌj.

Pero at juun ocslal nkꞌumente yaaꞌn t-xel Jesús kena. Pero jaxte inayena jun t-xel Jesús, cuma o wila Kaaw Jesús, bix o chi ocslana tuꞌnj waakꞌena.

2Amale atet juntl wik xjal nkꞌumente yaaꞌn t-xel Jesús kena te cye, pero te cyey, jaxte inayena t-xel Jesús, cuma wuꞌna o chi oquey tuya Kaaw.

3Jatzen jun yecꞌbil inayena t-xel Jesús.

4Waj chin yola cyuyey tiꞌj jun woclena o cyaj nkꞌoꞌna. Cuma t-xel Jesús kena, juꞌ tzunj at woclena tiꞌ chojbilte weya tuj waakꞌena tuj tyol Dios, tuꞌntzen miꞌn chin akꞌanantla tuj juntl akꞌuntl tuꞌn witzꞌja. At woclena tuꞌn nweꞌya cyjay tuꞌn ttzaj cykꞌoꞌna nwaya bix ncꞌaꞌya.

5Bix yaaꞌn oꞌcx, sino at woclena tuꞌn nmajeya, bix nuket at nxuꞌla ocslal, iletle tiꞌj tuꞌn toc cycꞌojlaꞌna, tisen tzunj cabtl t-xel Jesús cyuya ke titzꞌen Jesús bix tuya Pedro at cyxuꞌl bix tzin cyiikꞌentexin onbilte te cyxuꞌlxin.

6At woclena tuꞌn cychjontey inayena, pero inayena tuya Bernabé nko akꞌanana tuya kkꞌaba tiꞌ juntl kaakꞌena tuꞌn kitzꞌja joocꞌtzen nchi onj cabtl t-xel Jesús cyuꞌna.

7At woclena tuꞌn cycꞌojlantey inayena tisen jun soldado cꞌojlaꞌn tuꞌn gobierno. Yaaꞌn tcwent-x tiꞌ iꞌtzen. Bix jun akꞌanal tiꞌ txꞌotxꞌ at toclen tuꞌn twaaꞌn tiꞌ tawal. Jax juꞌx jun cylel wacẍ at toclen tuꞌn tetz tiiꞌn tal tin wacẍ te tcꞌaꞌ. Bix jax juꞌx jun t-xel Jesús at toclen tuꞌn titzꞌj tiꞌ taakꞌen tuj tyol Dios, cuma ka nakꞌanan jun xjal, at chojbil te.

8Yaaꞌn nuk wexa nyol jlu, sino juꞌ tzin tkbaꞌn tyol Dios.

9Tz̈i tley Moisés cyjulu: “Miꞌn tzꞌoc cykꞌoꞌna paaꞌ tiꞌ ttzi wacẍ, tuꞌn twaaꞌnjil joocꞌtzen nbaj pjunjil triwa,” tz̈i tyol Dios. Pero yaaꞌn nuk tiꞌ wacẍ ja tumel lu,

10sino juꞌ japenina tiꞌ jun akꞌanal tiꞌ tyol Dios. Jun akꞌanal tiꞌ tyol Dios at toclen tuꞌn tiikꞌente twiꞌ tcꞌuꞌj cyekej najbenxin cye. Ktzkiꞌntl jun cjol tuya wacẍ ncjon tiꞌ txꞌotxꞌ, bix xsunj cjtxꞌol at cyoclen tuꞌn cycaman tiꞌ cyjaꞌtxꞌen.

11Juꞌx weya at woclena tuꞌn ncamana tiꞌ waakꞌena. Inayen tzuna tisen jun awaal tiꞌ txꞌotxꞌ, bix ejeeꞌy tzuna tisen txꞌotxꞌ. Jax txꞌotxꞌ ckꞌolte chojbil te awaal. Ja iyaj o cyaj wawaꞌna cyxola, jatzen tyol Dios. Ja jun iyaj mas jawnex twitzj iyaj te kwa. Juꞌ tzunj at woclena tuꞌn ttzaj cyonena ti chin nitzꞌjeleya.

12Jayle tzunj lu woclena o cyaj nkꞌoꞌna. Ntzkiꞌntl at juntl akꞌanal tiꞌ tyol Dios nxiꞌ cyonena. Attzen cyexin cyoclen tuꞌn cyiikꞌentexin onbil cyexin. Yajtzen weya, mas weya woclen at cywitzxin tuꞌn wiikꞌenteya onbil weya. Pero min o nkaniya tuꞌn wiikꞌente cyonbila, sino o chin akꞌananwe cyiw tuꞌn witzꞌja. Juꞌ tzunj mlay tzaj cykbaꞌna nchin kꞌumena tpocbal Cristo nuk tuꞌn pwak wuꞌna.

13Cytzkiꞌntla e tkba Dios cye xjal judío kej nchi akꞌanan tuj tja Dios at cyoclen tuꞌn t-xiꞌ cychyoꞌn cychuꞌlj alimaj e xiꞌ oyet te Dios.

14Juꞌxse e tkba Kaaw cyiꞌj kej nchi akꞌanan tiꞌ kꞌoj tpocbal jyol te coꞌpbil, baꞌn tuꞌn cyitzꞌj tiꞌ cyaakꞌen tuj tyol Dios.

15Pero ja nyola lu ma cub ntzꞌiꞌbena cyey yaaꞌn tuꞌn cychjontey twiꞌ ncꞌuꞌja tiꞌj. ¡Min! Weya, waja tuꞌn ncamante jun chojbil weya mas jawnex twitzj twiꞌ ncꞌuꞌja. Ja tzunj chojbil weya waja, jaj tuꞌn wakꞌanana tiꞌ tyol Dios mintiiꞌ twiꞌ ncꞌuꞌja tiꞌj. Bix ja chojbil te weya ncyꞌiya tuꞌn tel tiiꞌn juntl. Juꞌ tzunj mlay txiꞌ nkaniya mi nuket jun centavo cyey. Mas baꞌn tuꞌn ncyima twitzj tuꞌn nchjeta tiꞌj.

16Il tiꞌj tuꞌn t-xiꞌ nkbaꞌna tpocbal coꞌpbil ke tiꞌ kil. Juꞌ tzunj yaaꞌn tuꞌn tjaw nniman wiiba tiꞌj, cuma ka min xbint wuꞌna, tzul il wiꞌja.

17Ja waakꞌenja te kbalte tyol Dios yaaꞌn tuꞌn wexa nganiya, sino ja Dios oc kꞌonte weya tiꞌj. Nuket inayena e jyontej akꞌuntl lu, jacꞌatzen t-xiꞌ nkaniya twiꞌ ncꞌuꞌja tiꞌj. Pero Dios o kꞌumente, bix juꞌ tzunj nxiꞌ ncuyana.

18¿Titzen jilel t-xel cncamiya? Jaj tuꞌn t-xiꞌ nkbaꞌna tpocbal coꞌpbil ke cyey min chin kanena twiꞌ ncꞌuꞌja cyey tiꞌ waakꞌena tiꞌ tyol Dios. Juꞌ tzunj ncyaj nkꞌoꞌna tuꞌn miꞌn chin chjete.

19Min-al jun xjal nchjonte weya. Juꞌ tzunj min-al jun xjal at toclen tuꞌn tcawen wibaja. Pero amale yaaꞌnt ntiincxa tjakꞌ tcawbil mi nuket jun xjal, ma chin oca te ajbel te cykilca xjal, tuꞌntzen cyxiꞌ lpe nim xjal tiꞌ Cristo.

20Oj ntiina cyxol xjal judío, yaaꞌn nuk cꞌoquex ntxꞌomena cyley. Amale minttiiꞌ il tiꞌj tuꞌn ncuyanteya cyley, pero tzinx n-oc nkꞌon wiiba cyuya judío, tuꞌntzen toc cybiꞌn nyola bix tuꞌn cyocslan tiꞌ Cristo. Jax amale atet woclena tuꞌn miꞌn tzꞌoc nbiꞌna tley Moisés, pero oj ntiina cyxol kej xjal n-oc cybiꞌn tley Moisés, jax n-oc nbiꞌnwe, tuꞌntzen miꞌn chin n-el cyiiqꞌuen bix n-octzen cybiꞌn jweya nyol.

21Bix juꞌx oj ntiina cyuya kej xjal yaaꞌn eteꞌcx tjakꞌ tley Moisés, jax yaaꞌn nuk n-ocx ntxꞌomena cyley, tuꞌntzen cyocslante. Pero amale tzint n-ocx nkꞌon wiiba cyxol, ka at jun cycostumbre kaꞌ tiꞌ tyol Dios, mas il tiꞌj tuꞌn ntiina tjakꞌ tcawbil Dios cywitz, cuma lepch kena tiꞌ Cristo.

22Bix oj ntiina cyxolj ocslal yaaꞌn cyiw eteꞌ tuj cyocslabl, mlay txiꞌ nchyoꞌna chiꞌpj oꞌyen cye sant cywitz, tuꞌn miꞌn cub nbajsaꞌna cycꞌuꞌj, bix chebe qꞌuelel cyniyꞌ tiꞌj. Alcyexja xjal ntiina cyuya, n-oc nkꞌon wiiba cyuya, tuꞌntzen tcub cyiꞌj wuꞌna tuꞌn cyocslante tyol Dios.

23Cykil woclena ncyaj nkꞌoꞌna, tuꞌntzen ttz̈ꞌiy tpocbal at coꞌpbil cye xjal tuꞌn Jesús.

24Entonces, key hermano, juꞌx cyey il tiꞌj tuꞌn toc cyipena tuꞌn cyoc lpey tiꞌ Cristo tuya cykil cycꞌuꞌja. Cwel nkꞌoꞌna jun techel cyey. Tuj jun ajkelbil at nim xjal najkelen. Pero junx ncaman tiꞌ ajkelbil bix ncaman jun tcotz. Nukettzen juꞌke cyey tisen jun camal ncaman tiꞌ tajkelbil. Cyiiꞌnxa jun cynaabla baꞌn tuꞌn baꞌn ẍi eꞌley twitz Dios oj toc tcyeꞌyen Dios cynaabl.

25Il tiꞌj cycꞌojlaꞌ cyiiba tuꞌn cycamana cycotza tuꞌn Dios, tisen kej pelotel cycꞌojlan cyiib tuꞌntzen cycaman cycotz tiꞌ cysakech. Pero ke kẍal pelot n-oc cyipen tuꞌn cycaman tiꞌ jun cycotz jun rato nbaj twiꞌ. Pero ejooꞌ ocslal kaj koꞌx lpe tiꞌj Cristo tuꞌn kcaman tiꞌ jun kcotz mintiiꞌ tbajlel.

26Juꞌ tzunj n-oc wipena tuꞌn ncamana, yaaꞌn juꞌ tisen jun kꞌojlel nbuꞌn nuk tuj cykꞌiꞌk bix min tzꞌoc tkꞌoꞌn tiꞌ juntl, bix yaaꞌn juꞌ tisen jun ajkelel najkelen nuk jakꞌch n-exa txelpaj, sino juꞌ tisen jun ajkelel najkelen jiquen.

27Nxumlala taj nuk tikꞌch kaꞌ bix taj cawen wibaja. Pero min txiꞌ nkꞌon wiiba te nxumlala, sino inayena nchin cawena tibaj nxumlala, tuꞌntzen ncamana tibaj yaaꞌn baꞌn. Jun chꞌixbajilettzele te weya ka min ma nnimana jnxiꞌ nkꞌumena cye ocslal biꞌx cxeꞌl t-xooꞌn Dios inayena tuꞌn wila.