1 TIMOTEO 2 - Mam of Todos Santos -- Guatemala Unicode

Jun xnakꞌtzbil tiꞌj ti tten tuꞌn knaꞌn Dios

1Nkbaꞌxsen tey ti ctemela tuj tja Dios. Tneelxixsen cxeꞌl nkbaꞌn tey tuꞌn t-xiꞌ tkbaꞌna cye xjal cxeꞌlxix cycubsaꞌn cywitz te Dios tiꞌ cabtl xjal, yaaꞌn nuk tiꞌjcꞌa cnaꞌla Dios, bix cxeꞌl cykꞌoꞌn chjonte te Dios tiꞌj tikꞌch tzin tkꞌoꞌn Dios te cykil xjal.

2Bix cxeꞌl cykanen te Dios cyibaj xjal cawel bix cykilca kej tocsen cyajwalel, tuꞌntzen tbint cycawen, tuꞌntzen kten tuj ttz̈yal bix tuj txubtx, tuꞌntzen kcub yutꞌe twitz Dios.

3Jatzente baꞌnja, bix baꞌntzen tuj twitz Dios, Clol ke.

4Bix taj tzunxin tuꞌn cykil xjal clet tuj tkꞌab il, bix tuꞌn tel cyniyꞌ tiꞌj alcyej jaxxix, yaaꞌn nuk ejooꞌcꞌa.

5Junxte Dios at, bix junxte xjal at te mojbalec cye xjal tuya Dios. Ja Jesús, Scyꞌoꞌn tuꞌn Dios,

6cuma tej tpon tumel jaxte Jesús e xiꞌ kꞌonte tiib tuj cyamecy tuꞌn tclet cykil xjal tuj tkꞌab il. Tej mintknaꞌx tpon tumel tuꞌn tcyim Jesús, min cytzkiꞌn xjal ka taj Dios tuꞌn cyclet cykil xjal tuj il.

7Ejeeꞌtzen cye yol jlu jaxxix, bix jawnex, bix ke cyej yol lu yaaꞌn nuk te cye kej xjal judío, sino te cykil xjal twitz txꞌotxꞌ. Bix tuꞌntzen tkbaj ja yola te cykil xjal, otzen chin oc tchꞌiquen Dios te tsanjel bix te tyolel Jesús. Jwe nxiꞌ nkbaꞌna jaxte, yaaꞌn ẍtakꞌbilte.

8Yaltzen jaꞌlewe wajtzen nuket jakꞌch chi cwaꞌ ten xinak naꞌl Dios. Pero wajwe chi naꞌlxix xinak Dios tuya jun cyanem sakxix, yaaꞌn nchi kꞌojl.

9Bix kej xuuj, tuꞌn cybaj bint tuya cyxbalen, pero tujxix tumel, yaaꞌn te cynimbil cyiib cywitz xjal. Bix miꞌn txiꞌ cyiiꞌn nim amleꞌn te tbinchaj cyiib, tuꞌn tbaj xebat cywiꞌ, tuꞌn tocx tuj cyẍquin, ma cycwenchj te oro ma te perla, bix ma nintzaj cyxbalen.

10Tetzen t-xelj amleꞌn cxeꞌl tiiꞌnj tbinchaj cyiib, ja tzunj tuꞌn tbintl jtbanel cyuꞌn. Bix jatzen te baꞌnj te cyej xuuj cyaj chi nimante Dios.

11Kej xuuj, oj cyxiꞌ tuj tja Dios, cꞌoquelxix cybiꞌn, bix nuk chi cwel yutꞌe, yaaꞌn cwel cyyeecꞌan cyiib ka cutzen baꞌn cyuꞌn.

12Ncyꞌiwa tuꞌn tel tiiꞌn xuuj tipemal xinak tuj xnakꞌtzaꞌn, bix ncyꞌiwa tuꞌn cycawen xuuj cyibaj xinak. Cuma caꞌba tten.

13Tneel, cuma ja te Adán, xinak, e cub tbinchen Dios nejl. Tcabxitltzen tcub bintte Eva, xuuj.

14Tcabtzen, jatzen xuuj e jkonte tbe il, cuma ja te xuuj e cub yajlet tuꞌn Satanás, yaaꞌnte Adán.

15Juꞌ tzunj, e xaꞌ kꞌoꞌn cye xuuj cycastiwa tuꞌn toc cytz̈ꞌis̈ente cye cyal. Pero amale e kꞌojet cycastiwa, chi cletel, ka juchxix cycꞌuꞌj tiꞌ Dios, ka tuꞌn cykil cyanem, bix ka sakxix cyanem.