HEBREOS 6 - Mam of Todos Santos -- Guatemala Unicode

1Juꞌ tzunj kiyꞌxxix tuꞌn tbint kuꞌn tuꞌntzen tel kniyꞌ tiꞌj cykil tyol Dios, tuꞌntzen koc te tzꞌaklxix. Miꞌn nuk ko oc ten tiꞌj tneel xnakꞌtzbil s-oc kxnakꞌtzaꞌn tej xko ocslan, nuk jax nxiꞌ kmeltzꞌuꞌn. Nuk tuꞌn cykil tyol Dios ko pomela tuꞌntzen ttzket knaabl. Jtneel xnakꞌtzbil s-oc kbiꞌn tej xko ocslan, ejeeꞌ tzunj lu. Il tiꞌj qꞌuelel kxooꞌn jniyꞌ tikꞌch nbint kuꞌn nxiꞌ kꞌonte ke tuj cyamecy te junx maj. Bix tuꞌn toc ke kcꞌuꞌj tiꞌ Dios ko cletel tuꞌn.

2Bix il tiꞌj ko yeecꞌal jun techel bautismo cye niyꞌtl xjal ka ma ko oc tuya Jesús. Bix xnakꞌtzbil tuꞌn tcub kkꞌoꞌn kkꞌab tibaj jun acꞌaj ocslal te techel otktzen tiikꞌ Espíritu Santo. Bix xnakꞌtzbil at jun kꞌij ko jawetz itzꞌj tuya acꞌaj kxumlal tuj cyamecy juntl maj. Bix ka min xiꞌ kocslaꞌn colbil ke ko oqueltzen tuj cyeꞌybil tuꞌn Dios bix ko pontzen tuj qꞌuixcꞌaj te mintiiꞌ tbajlel twiꞌ. Ejeeꞌ tzunj lu tneel xnakꞌtzbil nxiꞌx kmeltzꞌuꞌn.

3Tuꞌntzen ttzket knaabl, bix tuꞌn miꞌn ko ex jilpaj tuj kocslabl, il tiꞌj kkꞌaꞌc kcꞌuꞌj tiꞌ mastl, ka ma takꞌ Dios.

4Nxiꞌ nkbaꞌn ka ma takꞌ Dios cuma kape at juun min ma takꞌ Dios tuꞌn tiikꞌente jaj mastl tuꞌn ttzket, cuma ya ma cyaj cykꞌoꞌn cyocslabl. Cykꞌoꞌnc cycꞌuꞌja tiꞌj tuꞌn miꞌn tzꞌel cyiiqꞌuena cyocslabla, cuma kej xjal o tzꞌel cyniyꞌ tiꞌj jun jaxxix yol tiꞌj coꞌpbil cye, bix e cyiikꞌ jun cychunkꞌlal mintiiꞌ tbajlel, bix e cyiikꞌ Espíritu Santo,

5bix e cub cytz̈iyꞌbeꞌn tbanel tyol Dios, bix e cyiikꞌ tipemal Dios tuꞌn tbint nim techlal cyuꞌn,

6katzen ma tzꞌel cyiiqꞌuen Tcwal Dios, bix ka ma chi aj meltzꞌaj tuj cyreligión te ootxa, ya mlay takꞌ Dios tuꞌn cyaj meltzꞌaj juntl maj. Katzen nchi kꞌumen cywitz xjal ka ya o tzꞌel cyiiqꞌuen Tcwal Dios, juꞌxsen japenina tisen njaw cykꞌoꞌn Jesús twitz cruz juntl maj, bix nchi xmucchan tiꞌjxin cyisen kej e cub byonte Jesús e xmucchanke.

7Tiꞌj tzunj yol ma txiꞌ nkꞌumena cyey cyjel nkbaꞌna jun techel. Cyanem xjal tisen jun txꞌotxꞌ. Jtyol Dios n-ocx tuj cyanem tisen jun jbal ncub twitz txꞌotxꞌ. Katzen ma takꞌ txꞌotxꞌ jun baꞌn awal te cyej xjal nchi akꞌanan twitz txꞌotxꞌ, jatzen jun t-xtalbil Dios. Juꞌtzen japenina awal tisen tzunkej xjal oj cyiikꞌente jyol te coꞌpbil bix chi tzketel.

8Katzen ma takꞌ txꞌotxꞌ nuk chꞌiꞌxcꞌa, juꞌtzen japenina tisen tzunj kej xjal oj tel cyiiqꞌuen yol te coꞌpbil. Tisentzen chꞌiꞌx nuk cwel patet, juꞌx xsunkej xjal n-el cyiiqꞌuen tyol Dios il tiꞌj chi cyjel tjakꞌ tcawbil Dios, bix sbuꞌntltzenke tuꞌn Dios.

Mlay ko yucch ka ma tzꞌoc ke kcꞌuꞌj tiꞌ Cristo

9Jatzen cyey hermano, ma txiꞌ nkbaꞌna cyey tuꞌn miꞌn txiꞌ cybiꞌna cyyol kej nchi xmoxa tuꞌn tcyaj cykꞌoꞌna cyocslabla tiꞌ Jesús. Pero min tzin nkbaꞌna ma cyaj cykꞌoꞌna. Ntzkiꞌnwe nchi binchana jbaꞌn nbint cyuꞌnj xjal ocslal.

10Bix ttzkiꞌn Dios. Bix baꞌnxix te Dios. Mlay tzꞌel tuj tcꞌuꞌjxin cykilj baꞌn o cybinchay bix jun tkꞌakꞌbil cycꞌuꞌja cyiꞌj kej cyermaney. Bix ncyeꞌyen Dios o chi onena cyiꞌke cyuyey tuꞌn cyitzꞌj, bix chi onenxa juꞌxa.

11Pero tisenx seyꞌkey tuj tkꞌakꞌbil cycꞌuꞌja cyiꞌj cyermaney, juꞌxsen waja seyꞌkey tuꞌn tel cyniꞌya tiꞌj jaca juun cyey jawnen chi jawela tuj mas jawnex xnakꞌtzbil, tuꞌn cytzketa, ojxe cycyima, tuꞌntzen cycamana tiꞌj entera cycotza tzin cyyoꞌna.

12Cykꞌoꞌncja chtꞌolkey. Cyiiꞌnxa ti e baj cye kej o chi caman tiꞌj cycotz e tkba Dios. Cye e camanke tiꞌj nuk tuꞌn oc ke cycꞌuꞌj tiꞌ Dios bix tuꞌn minx e baj cygana. Bix juꞌx ke, min tzꞌoc ke kcꞌuꞌj nuket mintiiꞌ il tiꞌj, cuma ctzketel tuꞌn Dios cykil tyol.

13Cyiiꞌnx tisen te Abraham. Oc ke texin tcꞌuꞌj tiꞌ tyol Dios e cyaj tkꞌoꞌn Dios tuyaxin. Min e baj tcꞌuꞌjxin, cuma tuya jun jurament mintiiꞌ tuꞌn tcub tchꞌixbeꞌn tyol e cyaj tkꞌoꞌn Dios tyol tuya Abraham. E cyaj tkꞌoꞌn Dios tyol tuya jun jurament tiꞌ tex tbi, bix mintiiꞌtl biybaj mas jawnex twitz te Dios tuꞌn tajben te jun “tzkinn Dios jurament.”

14E tkba Dios te Abraham cyjulu: “Jax wuꞌna cxeꞌl nkꞌoꞌna nim xtalbil tibaja bix nkꞌaꞌya nim tchmana,” tz̈i Dios.

15Bix oc ke tcꞌuꞌj Abraham tiꞌ tyol Dios bix e tyo tuya chewꞌ tnaabl, bix juꞌtzen e tcamanaxin alcyej otk tkba Dios texin.

16Ojtzen taj jun xjal tuꞌn tcyaj tyol mas jaxxix cywitz juntl xjal tuꞌn tcub cyiꞌj, nxiꞌ tkꞌoꞌn tipemal tyol tuꞌn tocx tipen tiꞌ tipemal juntl xjal mas nintzaj twitzxin. Tisetzen tkbaꞌn jun xjal, “Jaxxixwe wuꞌn, tzkinn Dios jurament,” ya otktzen cyaj tyol tuj tzinen juꞌwa, bix mintzentiiꞌ baꞌn cycub ten txololol tuꞌn.

17Yaltzen te Dios, min-al juntl xjal mas nintzaj twitzxin tuꞌn tocx tkꞌoꞌn tipemal tyolxin. Cycyeꞌyenc tej tcyaj tkꞌoꞌn Dios tyol te Abraham, tuꞌn t-xiꞌ tkꞌoꞌn mas tipemal tyolxin tuꞌn tcyaj mas jaxxix tyolxin, nuk oꞌcx tuꞌn Dios e tzaj tipemal tyol te Abraham. “Jaxwe wuꞌn” tz̈i Dios te Abraham. Tiꞌj tzunj jurament lu e cyaj tuj tzinen ja Dios mlay tchꞌixbe tyol te kxeꞌchel Abraham cyuya ke tchman. Il tiꞌj tuꞌn tbint tuꞌnxin. Bix tej tcyaj tkꞌoꞌn Dios tuya Abraham ja yol tiꞌj xtalbil, jax yol te ke jaꞌlewe.

18Juꞌtzen n-el kniyꞌ tiꞌj te tyol Dios o cyaj tkꞌoꞌn ke tuꞌn tkꞌonte xtalbil kibaj, jax. Tneel e cyaj tyolxin, bix n-el kniyꞌ tiꞌj mlay ẍtakꞌen Dios. Tcab, e xiꞌ tkꞌoꞌnxin tipemal tiꞌ tyolxin tuya jun jawnex jurament. Nuktzen kyoꞌ tiꞌj t-xtalbilxin o cyaj tkꞌoꞌnxin ke, ejooꞌ ma ko clet tuj il.

19Bix tej kyoꞌ jatzen jun kchunkꞌlal tuya Dios te junx maj. Bix jatzen Jesús o binchante jaxxix tej kyoꞌ, cuma ya o ponxin nejl kwitz tuya Dios. Jatzen mojbalecte ke tuya Dios. Jatzen e jkonte jun be kwitz tuꞌn kocx twitz Dios. At jun tumel. Cytzkiꞌna tuj nintzaj tja Dios cyxol judío at jun nintzaj xbalen tcub maksbil ttziꞌj cwart xjanxsen jaaꞌ e ten Dios, tuꞌn miꞌn chi ocx xjal twitz Dios. Pero tejtzen tcyim Jesús, e cub t-xiten Dios jnintzaj xbalen. Jatzen jun techel ya baꞌn kocx twitz Dios, yaaꞌntzen tisen nejl. Ya jaꞌlewe mintzentiiꞌ maksbil kwitz tcub tuꞌn Dios tuꞌn miꞌn ko ocx.

20Cytzkiꞌna tuj cyreligión judío te ootxa, nuk ja nintzaj pala cyxol judío oc tuj xjan cwart tujxe xbalen jaaꞌ e ten Dios, bix nuk jun maj jaca jnabkꞌi. Pero tejtzen tcub rotj jxbalen tcub maksbil cywitz xjal, bixsen e pon baj twiꞌ tuꞌn tocxtl tzunj nintzaj pala twitz Dios te yolel kiꞌj, cuma ya jatzen Jesús o pon twitz Dios tuj cyaꞌj te yolel kiꞌj te junx maj. Ja tzunxin o tzꞌoc te kpala te junx maj, bix jaxin o jkonte be kwitz tuꞌn kocx twitz Dios. Jawnex bix te junx maj toclen Jesús te jawnex pala jaꞌlewe, tisex te Melquisedec jun nintzaj bix te junx maj pala jatxe ootxa.