2 CORINTIOS 7 - Mam of Todos Santos -- Guatemala Unicode

1Nim o tkba Dios tuꞌn tkꞌonte ke. Juꞌ tzunj cykꞌoncja cykaꞌyela. Key hermano n-oc cyakꞌa weya, il tiꞌj cyjel cykꞌoꞌna tiꞌj cykil kaꞌ taj cychuꞌla bix miꞌn cheꞌx lpey tiꞌj cynaabla kaꞌ. Ka cyaja tuꞌn cynimana Dios, cykꞌoꞌnc cycꞌuꞌja tiꞌj tuꞌn cyoca sak.

O tzalaj Pablo cyiꞌj aj Corinto tej toc ke cycꞌuꞌj tiꞌ Dios

2Key hermano, juntl maj cxeꞌl ncubsaꞌna nwitza cyey tuꞌn toc kꞌakꞌen cycꞌuꞌja wiꞌja. Mintiiꞌ jun kaꞌ o tzꞌoc nbinchaꞌna tiꞌ jun xjal, bix min o txiꞌ tnaabl jun xjal tuj il wuꞌna, bix min-al jun o cub yaaꞌna tuꞌn tel wiiꞌna tpwak, tisen tzin tkbaꞌn juun.

3Yaaꞌnja wajbila tuꞌn cyoc wilena, cuma cꞌulel tuj cycꞌuꞌja ti e nkbaya cyey nejl. E xiꞌ nkꞌumena cyey nim n-oc cyakꞌa weya. Kale ma chin cyima bix kale chin itzꞌjela, pero we tkꞌakꞌbil ncꞌuꞌj cyiꞌja mlay weꞌ. Nim n-oc ke ncꞌuꞌja cyiꞌja.

4Nim nchin yolena baꞌn cyiꞌja cywitz xjal. Amale niyꞌxet qꞌuixcꞌaj wuꞌna, ma jaw nimset ncꞌuꞌja bix ma chin jaw tzalaja tuꞌnj o nbiꞌya cypocbala.

5Tej wula tzalu tuj Macedonia te ebilte cypocbala, nchin ajkelena cyiꞌja cuma mintiiꞌ cypocbala. Nim qꞌuixcꞌaj oc wiꞌja. At wajkelbila cyiꞌja, bix nim xjal tzalu oc kꞌoj wiꞌja.

6Pero Dios ncub kꞌukbante cycꞌuꞌj j-ocslal nchi bisen. Tuꞌn tkꞌukbante ncꞌuꞌja, jaxin e xiꞌ smante Tito wiꞌja.

7Bix in tzalaja, yaaꞌn nuk tuꞌnj otk tzul Tito wiꞌja, sino juꞌx in tzalaja cuma ulxin tuya baꞌn cypocbala. Tej tten Tito cyuyey, e cywix tcꞌuꞌj cyuꞌna. E tzaj tkbaꞌnxin weya n-oc juch cycꞌuꞌja wiꞌja, bix ultl wilela cyey cuma otk chi oc kꞌojla wiꞌja, bix ya cyajtla tuꞌn cyonena wiꞌja tuya cykil cycꞌuꞌja. Tej nbintiya cypocbala baꞌn, nimxsen in jaw tzalaja cyiꞌja.

8Amale e bisetkey tej t-xiꞌ nkꞌoꞌna ilbil cyey tuj wuꞌja nejl, pero tuj nwitza baꞌn te cyey. In bisena, cuma tuꞌnj wuꞌja e xiꞌ cyey, e jaw bisenkey. Pero nuk jun rato e bisenkey.

9Amale e bisetkey tiꞌj wuꞌja, pero jaꞌlewe nchin tzalaja e xiꞌ nsmaꞌna j-uꞌj cyey, cuma tuꞌnj cybisa e cyaj cykꞌoꞌna cyila. Tuꞌnj cybisa min e xiꞌ xitjkey tuꞌn, sino nuk ajben tuꞌn tcyaj cykꞌoꞌna cyila tisen taj Dios.

10Jkbis baꞌn tuj twitz Dios jaj ka ma cyaj cykꞌoꞌn xjal cyil tuꞌn, tuꞌntzen cyclet. Bix ka tuꞌn cyclet, mlay tzajtl cybis tiꞌj. Pero yal kej xjal te twitz txꞌotxꞌ min cyaj cykꞌoꞌn cyil, oꞌcx tajbel cybis tuꞌn cyxiꞌ tuj il.

11Pero cyey, o chi bisena tisen taj Dios. Juꞌ tzunj tuya cykil cycꞌuꞌja o cyajbey tuꞌn cyweꞌy cykꞌojla wiꞌja. E cyajbey tuꞌn tel nniꞌya tiꞌj min tziyꞌxtl til j-ocslal aj il cyuꞌna. Bix tzin cynaꞌna cychꞌixewa tiꞌj. Bix e tzaj ttz̈i cyiꞌja tuꞌnj ilbil cyey at tuꞌn tpon wuꞌna. Bix cyajtla cyila inayena. Bix cyajtla tuꞌn ntzalaja cyiꞌja, bix o cub cykꞌoꞌna tcastiwa jxjal e binchan jnintzaj tkaꞌyel. Tiꞌj cykilcaj lu o tzꞌel nniꞌya tiꞌj o cyaj cykꞌoꞌna te junx maj j-il otk tziyꞌx cyuꞌna nejl.

12E xiꞌ nsmaꞌna jun wuꞌja cyey cyiw t-xiꞌlen, pero ttzkiꞌn Dios yaaꞌn nuk tuꞌn tcub cykꞌoꞌna j-ocslal aj il tuj castiwa, bix yaaꞌn nuk tuꞌn tajben tej xjal iiqꞌuen tuꞌn til, sino tuꞌn tel cyniꞌya tiꞌj at jun jaxxix cyanema wiꞌja.

13Juꞌ tzunj ya miꞌntl chin bisena, sino nchin tzalaja.

Pero min chin tzalaja nuk oꞌcx cuma o tzaj cynimsaꞌna ncꞌuꞌja, sino jax juꞌx nchin tzalaja cuma ntzalaj Tito cyiꞌja. Nim otk tzꞌajkel tcꞌuꞌjxin cyiꞌja, pero o til mintiiꞌtl cykꞌoja wiꞌja.

14E xiꞌ nkbaꞌna te Tito: “Ctzaal cybiꞌn aj Corinto nyola,” ntz̈iya, bix yaaꞌn chꞌixbajil weya nyol, cuma jax o tzꞌeꞌla nyola. Tisenx e xiꞌ nkbaꞌna cyey nuk oꞌcx alcyej jaxxix, jaxse juꞌx o tzꞌel jaxxix j-e xiꞌ nkbaꞌna te Tito cyiꞌja.

15Oj nchi ula tuj tcꞌuꞌj Tito, nim ntzalaj Tito cyiꞌja, cuma cykilcakey e cybiy tyol bix tuya cykil cycꞌuꞌja e bint cyuꞌna cykilcaj e tkba cyey.

16Bix yaltzen weya, nchin tzalaja cyiꞌja, cuma n-oc ke ncꞌuꞌja cyiꞌja.