ROMANOS 10 - Mam of Todos Santos -- Guatemala Unicode

1Key hermano, tuya cykil ncꞌuꞌja waja tuꞌn cyclet ntanema, kej xjal te Israel. Cyiꞌjtzen nchin naꞌna Dios.

2Nchin naꞌna Dios cyiꞌj cuma ntzkiꞌna amale nimet cyaj tuꞌn cyajben te Dios, pero min tzꞌel cyniyꞌ tiꞌj tbe Dios.

3Cycyꞌi tzꞌel cyniyꞌ tiꞌj ja te Dios kꞌolte tuꞌn cyel jiquen twitzxin. Cyaj chi oc jiquen twitzxin nuk tuꞌnj cye nbint cyuꞌn. Juꞌ tzunj o tzꞌel cyxooꞌn jcolbil e tajbe Dios tuꞌn t-xiꞌ tkꞌoꞌn cye.

4O chi tzpet, cuma e kꞌoj ley cye tuꞌn Dios nuk tuꞌn tel cyniyꞌ tiꞌj nuk tuꞌn toc ke cycꞌuꞌj tiꞌ Cristo, baꞌntzen cyoc jiquen twitz Dios.

5Jatxe ootxa e cub ttzꞌiꞌben Moisés ti tten tuꞌn toc jun xjal jiquen tuꞌn ley. E cub ttzꞌiꞌbenxin il tiꞌj cnimal jun xjal cykil ley tuꞌn tel jiquen twitz Dios.

6Pero at juntl tumel tuꞌn koc jiquen twitz Dios, jaj tuꞌn kocslabl tiꞌ Cristo, bix yaaꞌn cyiw tuꞌn tcnet kuꞌn. Tzꞌiꞌben taꞌ ja lu: “Miꞌn cub cybisena at jun il tiꞌj tuꞌn tjapan jun xjal maa tuj cyaꞌj te kꞌilte Cristo tuꞌntzen cycleta.

7Bix miꞌn cub cybisena at jun il tiꞌj tuꞌn tcuꞌx jun xjal maa tuj cynajbil cyimne te kꞌiljawtzte Cristo cyxol cyimne,” tz̈i tyol Dios.

8Jcolbil ke yaaꞌn nakch taꞌ, sino nka taꞌ, tuꞌntzen tcnet. Tzin tkbaꞌn tyol Dios cyjulu: “Nka taꞌ nyola cyuyey. Nkbaj cyxola, bix tocx tuj cyanema,” tz̈i tyol Dios tiꞌj colbil cye xjal. Bix jaxj tyol Dios jweya tzin nkbaꞌn.

9Ja tzunj lu. Ka ma cykbay tuya cytziy cywitz xjal ka ja Jesús Cyaawey, bix ka ma cyocslay tuj cyanema e jatz tiiꞌn Dios jaxin cyxol cyimne, chi cletel tzuna tuꞌn,

10cuma ka ma tzꞌoc ke tcꞌuꞌj jun xjal tiꞌj ti toc tuꞌn Dios tuya cykil tcꞌuꞌj, jiquentzen taꞌ twitzxin, bix ka ma tkba cye xjal ka tuj tcwent Jesús taꞌ, ccleteltzen.

11Jaxte ko cletel ka ma tzꞌoc ke kcꞌuꞌj tiꞌ Cristo, cuma tz̈i tyol Dios cyjulu: “Nuk aljxe xjal n-oc ke tcꞌuꞌj tiꞌ Cristo, miꞌn txiꞌ tuj il,” tz̈i tyol Dios.

12Cꞌoquel cycꞌuꞌja tiꞌj yol “nuk aljxe xjal.” Juꞌ japenina twitz Dios min-al jun xjal mas jawnex twitz juntl xjal, judíole, yaaꞌnle judío, cuma jaxin cawel tibaj cykilca ocslal. Ntzaj tkꞌoꞌnxin t-xtalbilxin te cykilca kej xjal tzin cykanen colbil cye te Kaaw.

13“Nuk aljxe xjal tzin cykanen colbil cye te Kaaw, ccleteltzen,” tz̈i tyol Dios.

14Ja tzunkej xjal judío, min e cykane colbil cye te Kaaw. Kape ctzaal cykanena weya, ¿ti tten tuꞌn cykanen colbil cye texin ka min o tzꞌel cyniyꞌ tiꞌj il tiꞌj tuꞌn toc ke cycꞌuꞌj tiꞌjxin? ¿Bix ti tten tuꞌn tel cyniyꞌ tiꞌj il tiꞌj tuꞌn toc ke cycꞌuꞌj tiꞌjxin ka min o tzꞌoc cybiꞌn tpocbalxin? ¿Bix ti tten tuꞌn toc cybiꞌn tpocbalxin ka min-al kbalte tpocbalxin cye?

15¿Bix ti tten tuꞌn tex jun te kbalte ka min-al e xiꞌ chkꞌonte? tz̈ikey. Pero cxeꞌl nkbaꞌna cyey kej kbalte tpocbalxin o kꞌoj cye tuꞌn Dios. Tz̈i tyol Dios cyjulu: “Nim tzalajebl at tiꞌj cypomlen kej kbalte tyol Dios, kej nchi kbaꞌn ti tten tuꞌn cycub xjal tuj ttz̈yal tuya Dios,” tz̈i tyol Dios te yecꞌbil e xiꞌ tsmaꞌn Dios ke tyolel.

16Pero amale e kbajet baꞌn tpocbal cye aj Israel, pero yaaꞌn nim e cyniman jbaꞌn tpocbal. E xiꞌ tkbaꞌn Isaías tuj tyol Dios cyjulu: “Kman Dios, tisencꞌa min-al jun xjal o nimante jtyola o ko kꞌumena,” tz̈i Isaías te yecꞌbil el cyxooꞌn aj Israel tyol Dios.

17Jaxte il tiꞌj cꞌoquel cybiꞌn xjal alcyej tzin tkbaꞌn Dios tuꞌntzen toc ke cycꞌuꞌj tiꞌj tzin tkbaꞌnxin, bix jaxte il tiꞌj cpomel tyol Dios cyxol tuꞌntzen toc cybiꞌn.

18Pero cxeꞌl nkanena cyey, ¿mimpatzen o tzꞌoc cybiꞌn kej aj Israel? Cxeꞌl nkbaꞌna cyey o tzꞌoc cybiꞌn. Cꞌoquel cycꞌuꞌja tiꞌj ti toc tuꞌn tyol Dios. Tz̈i cyjulu: “Jcyyol kbalte tyol Dios o ponte tuj cykilca lugar tuj cykilca twitz txꞌotxꞌ,” tz̈i tyol Dios.

19¿Pero elpa cyniyꞌ aj Israel tiꞌj j-oc cybiꞌn? Cxeꞌl nkbaꞌna cyey el cyniyꞌ tiꞌj, cuma ¿eltlpa cyniyꞌ kej xjal yaaꞌn judío tiꞌj, ejeeꞌj xjal min el cyniyꞌ tiꞌj tuj cywitz judío? El cyniyꞌ tiꞌj. Cꞌoquel cycꞌuꞌja tiꞌj ti toc tuꞌn Moisés tuj tyol Dios: “Tz̈i Dios cye aj Israel cyjulu: ‘At jun wik xjal yaaꞌn nxjala. Tuj cywitza min tzꞌel cyniyꞌ tiꞌj. Pero chi oquel te nxjala, bix cchyol cycꞌuꞌja tuꞌn, bix cjawel cykꞌoja tiꞌj,’ tz̈i Dios cye aj Israel,” tz̈i Moisés.

20Mas yaj e xiꞌ tkbaꞌn Isaías cyjulu tuj tzinenxix: “Key aj Israel, cxeꞌl nkbaꞌna cyey ti toc tuꞌn Dios cyiꞌj kej xjal yaaꞌn te Israel. Tz̈i Dios cyjulu: ‘Kej xjal min e jyonke wiꞌja nejl, otzen chin cneta cyuꞌn. Kej xjal min oc cyipen tuꞌn tel cyniyꞌ wiꞌja, ya jaꞌlewe n-eltzen cyniyꞌ wiꞌja,’ tz̈i Dios,” e tkba Isaías.

21Pero cyiꞌj aj Israel, e tkba Dios te Isaías cyjulu: “Tuj cykil tyem bix tuya cykil ncꞌuꞌja o ntxoca kej aj Israel tuꞌn cyxiꞌ lpe wiꞌja, pero min o cyniman. Min o cykey tuyaj waja,” tz̈i Dios.

Juꞌ tzunj qꞌuelel kniyꞌ tiꞌj kej aj Israel min e cykanen colbil cye te Kaaw. Yaaꞌn tuꞌnj min oc cybiꞌn j-e tkba Dios bix yaaꞌn tuꞌnj min el cyniyꞌ tiꞌj e tkbaxin, sino cuma el cyxooꞌn j-e tkbaxin.