HEBREOS 5 - Mam of Todos Santos -- Guatemala Unicode

1¿Altzen baꞌn tajben te jun nintzaj pala? Tuꞌntzen tajben te nintzaj pala, il tiꞌj jun xjal, tuꞌntzen toc yolel cyiꞌ xjal twitz Dios, bix tuꞌn t-xiꞌ cykꞌoꞌn cyoybil xjal te Dios, bix tuꞌn t-xiꞌ cykꞌoꞌn chojbil cyil xjal te Dios.

2Tiꞌ tzunj xjal pala jax tzin tnaꞌn bix at tpasensya oj at cytzpetpajlenel xjal bix oj nchi cub tzꞌak xjal tuj il, cuma jax xsunxin n-el tniyꞌ tiꞌj ti tten tuꞌn mintiiꞌ tipen twitz il, cuma xjalxin.

3Oj t-xiꞌ toyenxin chojbil il twitz Dios, tiꞌj texin til junx tuyaj cye xjal nxiꞌ toyenxin, cuma xjalxxin.

4Bix juntl. Tuꞌntzen tajben te jawnex pala, yaaꞌn nuk oꞌcx jun xjal, sino juꞌx il tiꞌj jun xjal o scyꞌet tuꞌn Dios. Min-al jun baꞌn toc tkꞌon tiib te nintzaj pala tuꞌnx, sino ja te Dios nkꞌumente al cꞌoquelte nintzaj pala, tisenj e tkꞌumexin ja Aarón te nintzaj pala cyxol aj Israel jatxe ootxa.

5Yaltzen tej Scyꞌoꞌn tuꞌn Dios, jatzen xjalja o tzꞌoc te tneel pala, cuma min oc tkꞌon tiib te nintzaj pala, sino ja te Dios e kꞌonte taakꞌen tuj tkꞌab te pala. Ja lu tzin yecꞌj tuꞌn tyol Dios. Cycyeꞌyenc ti toc tuꞌn Dios te Tcwal: “‘Jay ncwala. Jaꞌlewe ma txiꞌ nkꞌoꞌna tey te nintzaja,’ tz̈i Dios te Tcwal,” tz̈i tyol Dios.

6Bix at mastl tumel tuj tyol Dios ootxa te kꞌumbilte yaaꞌn Tcwal Dios e scyꞌonte taakꞌen te pala. Tz̈i Dios te Tcwal cyjulu: “‘Ja tzuna ma scyꞌet wuꞌn te pala te junx maj, bix mas jawnexa tisexj te Melquisedec,’ tz̈i Dios te Tcwal,” tz̈i tyol Dios.

7Bix jatzen Jesús najben te nintzaj kpala cuma ocxin te xjal bix iyꞌx pena tuꞌnxin tisen ejooꞌ. Tejtzen tten Jscyꞌoꞌn tuꞌn Dios tzalu twitz txꞌotxꞌ, tetzen jun koniyan te chꞌitk tcyimxin bix akꞌxin naꞌl Dios bix e xiꞌ ts̈iꞌnxin te Dios tuꞌn takꞌ tiꞌ tanemxin, tuꞌntzen tclet-xin tuꞌn Dios tuj cyamecy. Bix e tbi Dios, cuma otk tnimanxin tyol Dios junx maj. Pero min e tcol Dios jaxin tuꞌn min e cubxin, sino nuk tipemalxin e xiꞌ tkꞌoꞌn Dios tuꞌn iyꞌx tuꞌnxin tuj cyamecy tuꞌn kil.

8Amale Tcwal Dioset-xin, il tiꞌj tuꞌn iyꞌx qꞌuixcꞌaj tuꞌnxin, tuꞌn tyeecꞌantexin ti tten tuꞌn tnimantexin tyol Dios tuj qꞌuixcꞌaj.

9Tejtzen tbaj bint jlu tuꞌnxin, bix juꞌx e tyeecꞌaxin jaxin tzꞌaklxix, bixsen ocxin te Clol xjal, tuꞌntzen tclontexin kej xjal nchi ocslante texin tiꞌj cycastiwa te junx maj.

10Bix oc tchꞌiquen Dios jaxin te nintzaj palaxin, tetzen yolelxin kiꞌj twitz Dios, tisen tzunj xin nintzaj pala Melquisedec e ten nejl twitz Aarón jatxe ootxa.

Kej xjal n-el cyiiqꞌuen tyol Dios, chi xeꞌl tuj castiwa te junx maj

11Key hermano, at nimcꞌatl waja txiꞌ nkbaꞌn cyey, pero cyiw chꞌin tuꞌn tel cyniꞌya tiꞌj, cuma chtꞌol key tuꞌn toc cyxnakꞌtzaꞌna.

12¡Bix kaape ootxa chi oca ocslal! Nimxe jnabkꞌi cyoclena. ¿Tuꞌn tikentzen mix n-eꞌla cyniꞌya tiꞌj tyol Dios? ¿Ti nbaj cyey tiꞌj min tzꞌel cyniꞌya tiꞌj? Lastim key mlay chi oca te xnakꞌtzal tyol Dios tuꞌn min tzꞌel cyniꞌya tiꞌj, sino ilne tiꞌj tuꞌn cyxnakꞌtzetla juntl maj tuj tneel xnakꞌtzbil te cyocslabla. Cyey tisen jun neeꞌkey tzinx chꞌuꞌn minaꞌn takꞌ waaꞌl.

13Jcyey cyten tuj cyocslabla nuk tisen jun neeꞌ tzinx chꞌuꞌn, bix min chi xcyey tiꞌj tuꞌn tbint tej mas jawnex tuj cyocslabla.

14Yaltzen te waabj, nuk ejeeꞌ kej ma xjal nxiꞌ waaꞌnte, yaaꞌn ke neeꞌ. Juꞌtzen japenina tyol Dios mas cyiw. Kej ocslal nchi xnakꞌtzan tiꞌj t-xnakꞌtzbil Dios mas cyiw tuj cyocslabl, ejeeꞌ tisenj jun xjal ya ma xjaltl bix nwaaꞌntl, yaaꞌn nuk tchꞌuꞌ nxiꞌ. Juꞌtzen chi tzketel tiꞌj ti japenina tyol Dios, bix ti tten ttxoꞌlan alcye baꞌn bix alcye kaꞌ. Pero cyey, nuk cytenxa ajnintz cynaabla tiꞌ tyol Dios, bix jatzen kaꞌja cuma baꞌn tuꞌn cyex jilpaja tiꞌj.