EFESIOS 6 - Mam of Todos Santos -- Guatemala Unicode

1Yaltzen ejeeꞌy cwal, cxeꞌl cybiꞌna cymana, tuꞌntzen t-xiꞌ cyyeecꞌana cynimbila twitz Kaaw, tuꞌntzen cytena tujxix tumel.

2Jtneel tcawbil Dios tuj Laaj Mandamyent tuya jun cotz tuꞌn Dios ka nbint cyuꞌn xjal, ja tzunja lu: “Cxeꞌl cynimana cymana bix cytxuy.

3Ka ma bint cyuꞌna juꞌwa, chi temela tuj ttz̈yal twitz txꞌotxꞌ, bix nim tken cytyema at,” tz̈i Laaj Mandamyent.

4Yaltzen cyey mambaj bix txuybaj, yaaꞌn tumel tuꞌn cyoc tena cyakwusalte ke cycwala tuya jun cawbil yaaꞌn tuj tumel, sino cytz̈ꞌis̈ecke tuya jun cawbilcye tujxix tumel, bix chi xeꞌl cyxnakꞌtzaꞌna tuꞌn cyxiꞌ lpe tiꞌ Kaaw.

5Yaltzen cyey akꞌanal tjakꞌ tcawbil jun patrón, cxeꞌl cybiꞌna cypatróna tiꞌ cyaakꞌena. Chi nimela twitz cypatróna, bix chi akꞌanala tuya cykil cycꞌuꞌja tisenxsen nchi akꞌanana tjakꞌ tcawbil Cristo.

6Chi akꞌanala baꞌn yaaꞌn nuk oꞌcx oj at cypatróna te cyeyꞌlte cyey, sino seyꞌx chi ocaley, tisexsen nchi akꞌanana twitz Cristo. Chi akꞌanala tuya cykil cycꞌuꞌja, cuma juꞌ taj Dios tuꞌn cyakꞌanana.

7Cykꞌoꞌnc cyipey tiꞌj tuꞌn cyajbena te cypatróna, tisenxsen nchi akꞌanana tuya Kaaw bix yaaꞌn nuk jaj nchi akꞌanana cyuya xjal.

8Cytzkiꞌntla alcye jun kꞌij jaca juun xjal ctcaman jun tcotz tkꞌaꞌ Kaaw laꞌ alcye akꞌuntl otk bint tuꞌn, atle tpatrón, minlen-al tpatrón.

9Yaltzen ke cyey patrón, jax juꞌx baꞌnx cyseꞌy cynaabla cye cy-akꞌanala. Cykꞌoncj cyiw cynaabla cyiꞌ ke cy-akꞌanala. Cꞌulel tuj cycꞌuꞌja yaaꞌn nuk oꞌcxcꞌa ke cy-akꞌanala eteꞌ tjakꞌ tcawbil Kaaw at tuj cyaꞌj, sino cyuyaxa eteꞌy tjakꞌ tcawbilxin. Chi elela junx cyuya cy-akꞌanala twitzxin, cuma tuj twitzxin min-al jun mas nintzaj twitz juntl.

Juꞌtzen tten tuꞌn t-xiꞌ cyyeecꞌana cynimbila cyxola.

Kej macbil ntzaj tkꞌoꞌn Dios ke tuꞌn kkꞌojl cyuya kej biman

10Tuꞌntzen tpon baj twiꞌ nyola cyey, key hermano, cxeꞌl nkbaꞌna cyey ti tten tuꞌn cyxcyey tibaj kaꞌ. At cymojbabl cyiiba tuya Kaaw. Nimxsen tipemalxin at. Bix cuma at cymojbabl cyiiba tuyaxin, juꞌ tzunj at tipemalxin te cyey tuꞌn cyxcyey tibaj kaꞌ. Tzꞌajbentzen tipemalxin cyey.

11Tisen jun soldado te twitz txꞌotxꞌ ikenxsen tbanel t-xbalen bix tmacbil tuj kꞌoj, jaxsen juꞌx cyey. Jax cyikem cyey jtbanel tipemal Kaaw tuꞌn tajben cyey tuꞌntzen cyweꞌxixa twitz taaw kaꞌ oj cyoca tuj niyꞌbebl tuꞌn, tuꞌn tbint kaꞌ cyuꞌna.

12Oj kkꞌojl, yaaꞌn cyuya xjal, sino cyuya kej biman, jawnexsen cyipemal. Min chicꞌajke, bix nim cybaj. Ejeeꞌtzen bimanja eteꞌ twitz cyaꞌj tuj klolj. Bix nchi cawen tuꞌn tbint kaꞌ twitz txꞌotxꞌ, bix nimxsen pomnina baj cyilbil tiꞌj tuꞌn cycaman cyibaj xjal twitz txꞌotxꞌ.

13Juꞌ tzunj il tiꞌj binne cytena tuyaj tipemal Kaaw tzin tkꞌoꞌn Dios cyey. Katzen binne cytena juꞌwa, baꞌntzen cypantey oj tpon jun kꞌij nojne tuya kaꞌ cyiꞌja. Mintzen otk chi iyꞌ tzꞌaka oj tbaj twiꞌ cykꞌoja tuya kaꞌ.

14-17Juꞌ tzunj, key hermano, chi ajbenxit jcymacbila tzin tkꞌoꞌn Dios cyey, tisen nchi ajben cymacbil soldado tuj kꞌoj tuꞌn cycaman. Jun soldado n-oc tsinch tcꞌuꞌj tuꞌntzen tbint tkꞌojl. N-oc xcbil ttziiꞌ t-xuucꞌ tuꞌn miꞌn tzꞌocx twiꞌ espada tuj. Toc t-xaab tbanel tuꞌn miꞌn cub tuj kꞌoj. Kꞌiꞌn jun makbil tuꞌnxin tuꞌn miꞌn tzakꞌxin cyuꞌn tbakꞌ scopet oj cyoc xeꞌt tiꞌ tanemxin. Cjawex tpasbil tisen joꞌs̈ tuyax te maksbil twitz te colbil twitz tuꞌn miꞌn tzakꞌ cyuꞌn tbakꞌ scopet. Bix kꞌiꞌn tspada tuꞌn tuꞌntzen t-xcye tuj kꞌoj. Ejeeꞌ tzunj lu najben cye soldado tuꞌn cykꞌojl cyuya enemiwa.

Yaltzen cyey cymacbil oj cykꞌojla cyuya biman, ejeeꞌ tzunj lu. Jaj nchi yolena jaxxix. Bix jaj kꞌiꞌn cyuꞌna jun cynaabla jiquenxix. Bix jaj n-el cyniꞌya tiꞌj tzul Kaaw te cawel twitz txꞌotxꞌ tuꞌn tten twitz txꞌotxꞌ tuj ttz̈yal. Bix jaj n-oc ke cycꞌuꞌja tiꞌ Dios, tuꞌn tweꞌ jcyniyꞌbebl biman n-oc cyxooꞌn cyiꞌja tisen tbakꞌ scopet. Bix jaj cytzkiꞌntla o tcol Dios ejeeꞌy tuj tkꞌab taaw il. Bix jaj tyol Dios najben cyey tuꞌn cyxcyey tiꞌj niyꞌbebl ntzaj cyiꞌja tuꞌn taaw il. Ejeeꞌ tzunj lu te cymacbila tuꞌn tajben cyey tuj cykꞌoja cyuya ke biman.

18Tuj cykilca ti nbaj, chi naꞌla Dios, bix tuya tonbil Espíritu Santo te cyey. Oj cynaꞌna Dios, nchi binchama tisenxsen nchi itzꞌleꞌna cyiiba, bix cypaꞌxixa tuj kꞌoj. Bix yaaꞌn nuk cyiꞌjquey chi naꞌla Dios, sino tuyax tiꞌ cykilca ocslal.

19Ojtzen cynaꞌna Dios, key hermano, tuyax wiꞌja, tuꞌntzen at nim tipemal nyola oj t-xiꞌ nkꞌumena cye xjal j-eꞌwen nejl pero ya o chicꞌajax tuꞌn Dios. Bix waja tuꞌn cynaꞌna Dios wiꞌja tuꞌntzen mintiiꞌ ttz̈i wiꞌja oj t-xiꞌ nkꞌumena.

20Bix tuꞌnj o txiꞌ nkꞌumena tiꞌj o tyeecꞌan Dios weya, juꞌ tzunj ntiina tuj tzeeꞌ. Juꞌ tzunj chi naꞌna Dios wiꞌja tuꞌntzen ttzaj tkꞌoꞌn Dios t-xtalbil wibaja, tuꞌntzen mintiiꞌ ttz̈i wiꞌja te kbalte tyol Dios mas.

Jun kꞌolbebl tuꞌn Pablo te mancꞌbil yol

21Yaltzen weya, miꞌn txiꞌ nkbaꞌna tuj ja wuꞌja lu ti nbaj weya, cuma jxin Tíquico cpomel cyxola, bix oj tponxin, ja tzunxin pjel kꞌumentexin cyey ti nbaj weya tzalu. Nim n-oc takꞌ Tíquico weya, bix nim najbenxin weya tuj taakꞌen Kaaw.

22Ttzkiꞌnxin cykilca ti nbaj wiꞌja, bix juꞌ tzunj cxeꞌl nsmaꞌna xina cyuyey, tuꞌntzen t-xiꞌ tkꞌumenxin cyey tiiꞌn ntena bix tiiꞌn cyten wuyena. Oj cybintey tiiꞌn etoꞌya tzalu, bixsen chi jaw tzalaja.

23Key hermano, chi tenxita tuj ttz̈yal tzin tkꞌoꞌn Kman Dios tuya Kaaw Jesucristo cyey, bix cyuꞌnxit-xin at tkꞌakꞌbil cycꞌuꞌja tiꞌ niyꞌtl ke hermano tuꞌnj cyocslabla tiꞌ Dios bix tiꞌ Kaaw.

24Tenxit t-xtalbil Dios cyibaj cykilcakey jn-oc takꞌ Kaaw Jesucristo cyey tuya jun tkꞌakꞌbil cycꞌuꞌja jax.

Oꞌcx nyolja.