FILIPENSES 4 - Mam of Todos Santos -- Guatemala Unicode

Tej tkbante Pablo cye ocslal tuꞌn cytzalaj tiꞌ Kaaw

1Juꞌ tzunj, key hermano n-oc cyakꞌa weya, cykꞌoꞌnc cyipena tiꞌj tuꞌn cyweꞌxixa tiꞌ Kaaw, cuma at mastl twitzja at twitz txꞌotxꞌ. Cyiꞌja nchin tzalaja. Ejeeꞌy tisen jun ncotza tuꞌn waakꞌena e bint wuꞌna cyxola.

2Pero cyxola at caꞌba xuuj ocslal nchi kꞌojl, jaj Evodia tuya Síntique. Key hermano, nchin cubsan nwitz cyexuj tuꞌn cycub yutꞌexuj bix tuꞌn cycub tenxuj tuj tumel, cuma ocslalkexuj.

3Nchin cubsan nwitz cyexuj, bix jax juꞌx cyey jiquenxix tuj taakꞌen Dios, tuꞌn toc cyipena tuꞌn cyonena cyiꞌj ke caꞌba xuuj kꞌojlel tuꞌn cytenxuj tuj ttz̈yal, cuma nejl akꞌanan tzunkexuj cyiw wuyena tej ntena tuj cytanema tuꞌn nkꞌumenteya tpocbal Jesús tuya Clemente bix cyuya cabtl ocslal. Mlay bint tzꞌibj cykilca cybi tzalu tuj wuꞌja, pero tzꞌiꞌben tuꞌn Dios tuj tuꞌj jaaꞌ taꞌ cybi kej xjal at cychunkꞌlal te junx maj.

4Chi tzalajaxita cykilcakey tiꞌj Kaaw. Bix juntl maj nxiꞌ nkꞌumena cyey, ¡chi tzalaja!

5Tuꞌn tchicꞌajax jun baꞌn cynaabla cywitz cykil xjal.

At Kaaw nka te onlte ke.

6Juꞌ tzunj miꞌn baj cycꞌuꞌja tiꞌj ti pjel cyey. Ka at jun il eteꞌy, cykanenx te Dios. Pero tuj cykilca nbaj cyiꞌja, cykꞌonx chjonte te Dios tiꞌj tuj cyanema.

7Ka nbint cyuꞌna juꞌwa, a ttz̈yal ctemel cyanema, bix cynaabla qꞌuelel junx tuya tnaabl Cristo Jesús. Nintzajxsen ja tzunj ttz̈yal tzin tkꞌoꞌn Dios cyey tuꞌn tel cyajkelbila tuj cyanema.

Cwel cybisena tiꞌj alcyej jiquen bix sakxix

8Mancꞌbiltzen nyola te cyey hermano, jaj tuꞌn t-xiꞌ cyjyoꞌna alcyej jaxxix bix cykilcaj baꞌn tuꞌn tnimj. Cwel cybisena tiꞌj alcyej jiquen bix sakxix bix baꞌn. Bix cwel cybisena jun baꞌn te juntl cyuyey. Bix cwel cybisena tiꞌj alcyej jawnex bix ti tten tuꞌn tjaw cynimsaꞌna Dios.

9Juꞌtzen tzin nseꞌn weya bix juꞌtzen nxaꞌ nkꞌumena. Cyiiꞌnxa ti tten nbint wuꞌna bix alcye o cyxnakꞌtzay wiꞌja, bix ka nbint cyuꞌna juꞌwa, chi temela tuj ttz̈yal tzin tkꞌoꞌn Dios.

Tej ttzaj cyonen kej ocslal aj Filipos ja Pablo

10Key hermano, jun nim tzalajebl te weya tej tul jun onbil weya cyuꞌna. Nxiꞌ nkꞌoꞌna chjonte te Kaaw cuma o chin tzaj cyonena. Ntzkiꞌna e cyajbey tuꞌn ttzaj cyonena inayena nejl, pero mix e binne tuꞌn cyoney wiꞌja. Pero jaꞌlewe matzen chin cyoney.

11Pero min tzin nkbaꞌna at palt te witzꞌjela. Ma chin nikꞌeta tuꞌn ntzalaja ka at npwaka bix ka mintiiꞌ npwaka.

12Niyꞌx wuꞌna ka at nim witzꞌjela bix ka mintiiꞌ, ka nojne ncꞌuꞌja bix ka towl. Bix nuk tiꞌxja baj wiꞌja, seya mebe kena bix ka kꞌina kena, pero tuj txubtx ntiina.

13Cykilca qꞌuiyax wuꞌna, cuma ja Cristo n-onen te weya. Jaxin ntzaj kꞌonte wipemala.

14Pero amale niyꞌxet cykilca wuꞌna, chjonte cyey nchin tzaj cyonena tuj tzeeꞌ tzalu.

15Bix jax cucx o chi onena wiꞌja, jatxe tej wakꞌa kbalte tpocbal Jesús cyxola, hasta jaꞌlewe. Cytzkiꞌna tuj kꞌij tej wexa tuj cytanema tuj lugar te Macedonia, nuk ejeeꞌy ona wiꞌja. Min-al juntl cloj ocslal tuj juntl tnom ona wiꞌja. Oꞌcx ejeeꞌy.

16Aa, n-ul tuj ncꞌuꞌja in tenxa tuj lugar te Macedonia, tuj tnom te Tesalónica, bix e tzaj cyonena inayena tuj jun il in temiya, bix yaaꞌn nuk jun maj e tzaj cyonena inayena tej ntena tuj Tesalónica.

17Pero yaaꞌn tuꞌn n-elwe ncꞌuꞌja tiꞌ cyoybila. Jawe waj tuꞌn cyiikꞌentey jun baꞌn cycotza tuꞌn Dios tuꞌnj ntzaj cyonena inayena.

18Pero te weya, ya at nimwe npwak tuꞌn witzꞌja, cuma o tzul tiiꞌn Epafrodito cykilca e tzaj cykꞌoꞌna te weya tzalu. Bix jun cyonbila tisen jun cꞌocꞌsbil njaw twitz Dios bix tisen jun cyoybila twitz Dios.

19Juꞌ tzunj cchjolte Dios nim t-xel cyey. Jaxin kꞌolte cykil il tiꞌj te cyey, cuma texin nimxsen tkꞌinemalxin at, bix tuꞌn kmojbabl kiib tuya Cristo Jesús, Dios ntzaj kꞌonte ke.

20¡Axsen tbanel Kman Dios, bix nimjxit tbixin te junx maj. Juꞌxit tzuna!

Jun kꞌolbebl tuꞌn Pablo te mancꞌbil yol

21Cykꞌoꞌnxa jun kꞌolbebl wuꞌna cye cykil t-xjal Cristo Jesús jatzewe. Bix juꞌx kej hermano eteꞌ wuyena tzalu jax at jun kꞌolbebl cyuꞌn te cykilcakey.

22Bix juꞌx te cykilca ocslal tuj ja tnom lu bix kej ocslal nchi akꞌanan tuj jaaꞌ te cawel nxiꞌ kkꞌoꞌna jun kꞌolbeblcye te cykilca.

23At-xit t-xtalbil Kaaw Jesucristo cyibaja. Oꞌcx nyolja.