APOCALIPSIS 4 - Mam of Todos Santos -- Guatemala Unicode

Njaw nimset tbi Dios tuj cyaꞌj

1Tbajlenxitltzen tkbaꞌn Kaaw jlu, oc ncyeꞌyena, bix e wila jun ttzi jaaꞌ otk tjket tuj cyaꞌj. Bix e xiꞌ nbiꞌna juntl maj tkꞌajkꞌajel tyol cyiwxix jxjal otk kꞌajt nejl bix tisen jun xux tkꞌajkꞌajel tyol. Bix e tzaj tkbaꞌn weya:

—Tjatza tzalu tuj cyaꞌj, bix cxeꞌl nyeecꞌana tey ti pjel laꞌ alcye jun kꞌij―tz̈i Kaaw weya.

2Tujx najtl tej nxiꞌ kꞌiꞌna tuj cyaꞌj tuꞌn Espíritu Santo, bix e wila jun jawnex kꞌukbil tuj cyaꞌj, bix jax Dios kꞌukl tuj kꞌukbil.

3Ntxakakanxin tisenj xak diamante, bix tcyeꞌncxin tisenj cyak xak cornalina. Bix jun arc toc tiꞌjxe tkꞌukbilxin. Chaꞌx tilbil arc tisenj xak esmeralda.

4Bix ttxlaj tkꞌukbil Dios toc winakcyajatl kꞌukbil. Bix e wila kꞌukl winakcyaja tij cyuj toc cyxbalen sakxix. Tjax cycorona te oro tuj cywiꞌ.

5Bix tuj tkꞌukbil Dios nchi etz koptzꞌaj tken kꞌancyok tuyax nim tkꞌajkꞌajel s̈itz̈ꞌ bix tuyax nim njucucun kꞌancyok. Bix twitz tkꞌukbil Dios ntxakakan wuuk cantil, jatzen japeninaj wuuk espíritu te Dios.

6Bix twitzj kꞌukbil at jun chkꞌajlaj tcub spiꞌyaxsen tisen mar bix tisen viiyre.

Tiꞌjalexsen tkꞌukbil Dios te juun plaj eteꞌcꞌa cyaja wik iꞌtzke. Nimxsen tbakꞌ cywitz toc cywitz. Jax juꞌx tzalcyiꞌj at nim tbakꞌ cywitz.

7Jtneel wik tcyeꞌnc tisen jun león. Jatzen tcab wik tcyeꞌnc tisen jun tal wacẍ. Jatzen toxen wik at twitz tisenj twitz jun xinak. Jatzen tcyaaꞌn wik tisen jun ikel eyꞌ npurpaj.

8Kej cyaja wik lu, teeylex juun toquele wukak t-xiicyꞌ, bix at nim tbakꞌ cywitz toc tiꞌjele tiꞌ cyxiicyꞌ bix tjakꞌ cyxiicyꞌ. Bix cykil kꞌij bix cykil koniyan nchi bitzen cyjulu: “Xjante, xjante, xjante Kman Dios tuya cykil tipemal. At ootxa, bix at jaꞌlewe, bix tzul,” tz̈ike.

9Cykilca maj oj njaw cynimsaꞌn tbi Dios, jaj Dios kꞌukl tuj jawnex tkꞌukbil mlay cyim, bix oj nxiꞌ cykꞌoꞌn cynimbil te bix tzin nxiꞌ cykꞌoꞌn chjonte te,

10jax juꞌx kej winakcyaja tij nchi cub maje twitz Dios kꞌukl tuj tkꞌukbil, tuꞌntzen tjaw cynimsaꞌn tbi Dios iꞌtz te junx maj, bix ncub cykꞌoꞌn cycorona te oro twitz tkꞌukbil. Bix nxiꞌ cykbaꞌn cyjulu:

11“Jay Kaawa bix Kdiosa, at nim toclena tuꞌn tjaw nimset tbiy, bix tuꞌn tkꞌoj nimbil tey, bix tuꞌn tkbaj cyuꞌn xjal at cykil tipemala, cuma jay e binchante cykilca, bix cuma nuk tuꞌnj tajbila at cykilca bix e cub tbinchaꞌna,” tz̈i ke tij.