2 CORINTIOS 1 - Mam of Todos Santos -- Guatemala Unicode

Jun kꞌolbebl tuꞌn Pablo cye ocslal aj Corinto

1Key hermano tuj tnom te Corinto.

Inayena Pablo. Dios o scyꞌonte weya tuꞌn wajbena te jun t-xel Cristo Jesús. Nxiꞌ ntzꞌiꞌbena ja uꞌj lu te cyey t-xjal Dios tuj Corinto. Tuꞌnxit tajben jwuꞌja, yaaꞌn nuk te cyey, sino tuyaxa te cykilca ocslal tuj cykilcatl tnom iken tuꞌn txꞌotxꞌ te Acaya. At Hermano Timoteo tzalu wuyena, bix baꞌn tuj twitzj nxiꞌ ntzꞌiꞌbena cyey.

2At-xit t-xtalbil Kman Dios bix Kaaw Jesucristo cyibaja, bix nuket tzaj cykꞌoꞌnxin cyey tuꞌn cytena tuj ttz̈yal.

Jun qꞌuixcꞌaj tiꞌ Pablo pero ja Dios ncyiwsante tcꞌuꞌj

3Jawxit knimsaꞌn tbi Dios, Tman Kaaw Jesucristo. N-oc kꞌaꞌben tcꞌuꞌjxin kiꞌj, bix jaxin ncyiwsante kcꞌuꞌj.

4Oj niyꞌx qꞌuixcꞌaj kuꞌn, Dios ncyiwsante kcꞌuꞌj, tuꞌntzen oj niyꞌx qꞌuixcꞌaj cyuꞌn cabtl ocslal, ejooꞌtzen baꞌn t-xiꞌ cyiwsante cycꞌuꞌj, tisenj n-oc tcyiwsaꞌnte Dios ke kcꞌuꞌj.

5Nim qꞌuixcꞌaj qꞌuiyax kuꞌn oj kxiꞌ lpe tiꞌ Cristo. Katzen nim niyꞌx qꞌuixcꞌaj kuꞌn, jax nim ncyiwsan Dios kcꞌuꞌj tuꞌn Cristo.

6Jatzen weya, o tziyꞌx qꞌuixcꞌaj wuꞌna tuj waakꞌena te kbalte cyey ti tten tuꞌn cycleta. Bix oj toc cycyeꞌyena tiiꞌn o tcyiwsa Dios ncꞌuꞌja tuꞌn tiyꞌx qꞌuixcꞌaj wuꞌna, jax juꞌx cyey ccyiwsetel cycꞌuꞌja, tuꞌntzen oj toc pena cyiꞌja tisen oc pena wiꞌja, qꞌuiyax cyuꞌna.

7Weya kꞌukl ncꞌuꞌja cyiꞌja ka niyꞌx cyuꞌna oj toc pena cyiꞌja. Ntzkiꞌna tisen te Dios ntzaj tcyiwsaꞌn weya ncꞌuꞌj tuꞌn tiyꞌx wuꞌna oj toc pena wiꞌja, jaxsen juꞌx cyey. Ctzaal tcyiwsaꞌn Dios cycꞌuꞌja tuꞌn tiyꞌx cyuꞌna oj toc pena cyiꞌja.

8Key hermano, waja tuꞌn tel cyniꞌya tiꞌj ti ttenj qꞌuixcꞌaj iyꞌx wuꞌna tej ntena tuj txꞌotxꞌ te Asia. Nim qꞌuixcꞌaj oc weya, tejxe tbaj wipena tuꞌn tiyꞌx wuꞌna, bix tuj nwitza tuꞌn ncyima tuꞌnj qꞌuixcꞌaj oc weya.

9El jax tuj nwitza tuꞌn ncyima. Juꞌ e baj weya, tuꞌntzen toc ke ncꞌuꞌja tiꞌ Dios tuꞌn witzꞌja, yaaꞌn nuk wiꞌja. Dios baꞌn tjatz itzꞌjsante ke tuj cyamecy.

10Jaxin e clonte weya tej chꞌitk ncyima, bix n-oc ke ncꞌuꞌja tiꞌjxin tuꞌn tcoꞌpantexin inayena tuꞌn miꞌn chin cyima. Jaxin ccoꞌplte weya tuj cykꞌab xjal tuꞌn miꞌn chin cyima cyuj kꞌij chi ul.

11Bix ka nchi naꞌna Dios wiꞌja, nim tajbel te onbil weya. Ka nim cybaja nchi naꞌna Dios wiꞌja, jax nim xjal baꞌn t-xiꞌ cykꞌoꞌn chjonte te Dios oj tkꞌontexin t-xtalbilxin wibaja.

Tej tcub tchiꞌxbeꞌn Pablo tuꞌn t-xiꞌ mas yaj tuj tnom Corinto

12Key hermano, jaxxix jweya nyol bix juꞌ tzin tkbaꞌn ncꞌuꞌja o txiꞌ wiiꞌna nchunkꞌlala tuj tumel bix yaaꞌn e cub yaaꞌnkey. Min in xiꞌ lpeya tiꞌ tnaabl te twitz txꞌotxꞌ, sino o tzꞌoc ke ncꞌuꞌja tiꞌ Dios tuꞌn ttzaj tonenxin inayena, tuꞌntzen t-xiꞌ wiiꞌna nchunkꞌlala jiquenxix. O txiꞌ wiiꞌna nchunkꞌlala tuj tumel cywitz cykil xjal, pero ejeeꞌtzen cyey, mas cytzkiꞌna nnaabla cywitz cykilcatl xjal.

13Cytzkiꞌntla jiquen nnaabla, cuma kej wuꞌja nxiꞌ ntzꞌiꞌbena cyey tzinen cyaꞌ. Jnyola nxiꞌ tuj wuꞌja yaaꞌn caꞌba tten tuꞌn cycub tzpeta tuꞌn. Cutz̈it tel cyniꞌya tiꞌj nyola te junx maj. Weya nyol, yaaꞌn squetcꞌajnin taꞌ tuꞌn cyxiꞌy tuj il tuꞌn.

14Nuk alx juun cyey n-el cyniꞌya tiꞌj nyola. Ojat tel cyniꞌya tiꞌj waja tuꞌn cytzalaja wiꞌja, tisenj chin tzalajela cyiꞌja tej kꞌij oj tul meltzꞌaj Kaaw Jesús te cyeyꞌlte ka baꞌn waakꞌena cyxola.

15Tuj tneel tuj nwitza at tuꞌn cytzalaja oj toc cycyeꞌyena inayena. At npomlela cyuyena caꞌba maj te onlte cyey.

16Otk cub nnincꞌuꞌna tuꞌn wiꞌya cyxola tuj Corinto, tuꞌntzen wula mas yaj tuj Macedonia. Mas yajxe at npomlela cyxola juntl maj. Bix jax juꞌx otk cub nnincꞌuꞌna tuꞌn ttzaj cykꞌoꞌna onbil weya tuꞌn nxiꞌya maa tuj Judea.

17Juꞌtzen otk cub nbisena tiꞌj nejl, pero e cub nchiꞌxbeꞌntla j-e wajbeꞌya tuj tneel. Juꞌ tzunj at juun cyey tzin cykbaꞌna yaaꞌn jaxxix toclen nyola. Tuj cywitza ncub nchꞌixbeꞌna nyola tisen kej xjal yaaꞌn ocslal.

18Pero ttzkiꞌn Dios taj ncꞌuꞌja tuꞌn tbint wuꞌna alcyej cxeꞌl nkbaꞌna tuꞌn tbint wuꞌna,

19cuma il tiꞌj tuꞌn nxiꞌ lpeya tiꞌ tnaabl jxjal tzin nkꞌumena. Tej ntena cyxola tuya Silvano bix tuya Timoteo, e xiꞌ nkꞌumena tpocbal Tcwal Dios, Cristo Jesús, bix cytzkiꞌna bajx tkbaꞌ Cristo tuꞌn tbint jun tiiꞌ tuꞌnxin bix mint elpe bajxin twitz.

20Ktzkiꞌntltzen elpe baj Cristo tiꞌ tyol, cuma tuꞌnxin elpe baj Dios cykilcaj otk cyaj tkbaꞌn cye xjal. Juꞌ tzunj oj t-xiꞌ kkbaꞌn “Amen” te Dios te yecꞌbil njaw knimsaꞌn tbixin, tuꞌn Cristo tzin kkbaꞌn juꞌwa.

21O takꞌ Dios weya bix te cyey tuꞌntzen kten cyiw tuj kmojbabl kiib tuya Cristo. Ja Dios lu e scyꞌonte weya tuꞌn woca tuj taakꞌen.

22Tex Dios e tzaj tkꞌoꞌn Espíritu Santo ke te techel t-xjal Dios koꞌ.

23E cub nnincꞌuꞌna tuꞌn npona cyxola, pero mas yaj e cub nchꞌixbeꞌna nyola, cuma nuket in iꞌya cyxola, iletltzele tiꞌj tuꞌn cyoc wilena. Pero ttzkiꞌn Dios min e wajbeꞌya tuꞌn cyoc wilena. Juꞌ tzunj e nchꞌixbeꞌya tuꞌn miꞌn chin iꞌya cyxola tuj Corinto.

24Katzen nchi oc wilena, yaaꞌn tuꞌnj yaaꞌn kena taaw cyocslabla. Oꞌcx tuꞌn cyxiꞌ wonena tuꞌn cytzalaja. Yal tej cyocslabla tiꞌ Dios, cyiw taꞌ.