LOS HECHOS 20 - Mam of Todos Santos -- Guatemala Unicode

Tej tpon Pablo tuj tcwentel Macedonia bix tuj tcwentel Grecia

1Tejtzen tbaj twiꞌ jkꞌoj e jaw, bix e tzaj ttxcoꞌn Pablo ke ocslal te Efeso, tuꞌn t-xiꞌ tkꞌoꞌnxin ke tyolxin baꞌn cye.

Tejtzen tpon baj ke tyolxin, bix e kꞌolbenxin cyuya ocslal, bix e xiꞌxin tuꞌn tiyꞌxxin tuj mar, tuꞌn tponxin tuj ttxꞌotxꞌ Macedonia.

2Tejtzen tponxin tuj Macedonia, bix akꞌ Pablo betel tuj jaca juun tnom. Tuj jaca juun lugar oc tnimsaꞌnxin, bix oc tkꞌoꞌnxin cyipemal ocslal tuya tyolxin. Cwa tetzxin tuj Macedonia, bix e ponxin tuj ttxꞌotxꞌ Grecia.

3Jatztzen Grecia e tema Pablo oxe xjaw. Tejtzen tpon baj oxe xjaw tuj Grecia, bix e cub tniqꞌuen Pablo tiꞌj tuꞌn tocxxin tuj tbarcxin, tuꞌn t-xiꞌxin tuj ttxꞌotxꞌ Siria, te ocne. Pero tejtzen binne ttenxin tuꞌn tocxxin tuj barc, bix e tbixin ka tuꞌn niqꞌuen cyuꞌn judío tuꞌn ttzyet-xin. Entonces bix e cub tchꞌixbeꞌnxin tiꞌj, bix e xiꞌxin tuꞌn tkenxin tuj Macedonia juntl maj, tuꞌn t-xiꞌ tiiꞌn jun barc jaxin.

4Tujtzen tbexin tuꞌn tponxin Macedonia, bix e xiꞌ ẍkluꞌnxin tuꞌn wuuk xjal, ejeeꞌtzen wuuk xjal lu: Sópater te tnom Berea, Aristarco bix Segundo te tnom te Tesalónica, Gayo te tnom te Derbe, bixsen Timoteo, Tíquico, bix Trófimo te txꞌotxꞌ te Asia.

5Yaltzen weya, inayena Lucas, in tin tzuna tuj tnom te Filipos tuj txꞌotxꞌ te Macedonia. Tejtzen tpon Pablo tuj Filipos, bix oc kmojban kiiba juntl maj. Yal tzunj wuuktlxin ocslal bix e xiꞌ cyiiꞌnxin jun barc tuꞌn cyponxin tuj ttxꞌotxꞌ Asia, jatztzen e cyyoxin ejooꞌya tuj tnom te Troas.

6Pero Pablo bix weya bix e cyaj koꞌya cab kꞌij tuj Filipos, te iyꞌsal cyninkꞌij judío oj nchi waaꞌn pan mintiiꞌ tkꞌanel tocx tuꞌn tjaw tz̈ꞌiy. Tejtzen tpon baj ninkꞌij, bix etz koꞌya tuj Filipos tuj barc. E bet barc jweꞌ kꞌij tuꞌn tpon tuj tnom te Troas. Tejtzen kpona, bix e ten koꞌya wuuk kꞌij.

Tej tpon Pablo kꞌolbelte cye ocslal tuj tnom Troas

7Tetzen tneel kꞌij te smant, jkꞌij domingo, keya cyuya ocslal bix oc kchmoon kiiba cyuya te iyꞌsal jun waaꞌn. Bix akꞌ Pablo yolel cyuya ocslal. Ttzkiꞌntlxin ka tuꞌn tetzxin te juntl kꞌij tuj Troas. Entonces bix e yolenxin tuj jun nim yol, tejxe tpon chil akꞌbil.

8Jlugar jaaꞌj oca kchmoon kiiba tuj jun cwart te toxen cxoꞌlen jaaꞌ, bix nimxsen luz txkoꞌn.

9Cyxoltzen xjal tocx junkꞌa xjal kꞌuklcꞌa ttziiꞌ ventan. Eutico tbikꞌa, bix mas e tyole Pablo, bix masx e tzaj twatlkꞌa. Cwax tiyꞌkꞌa tuꞌn watl, bix etz tzꞌakkꞌa ttziiꞌ ventan te toxen cxoꞌlen jaaꞌ maan twitz txꞌotxꞌ. Tuꞌntzen wolp e cymakꞌa.

10Tejtzen tbinte Pablo, bix e cuꞌtzxin, bix e xiꞌ t-xkinan tiibxin tibajkꞌa, bix e tzaj t-xkꞌeꞌnxin jakꞌa, bix e xiꞌ tkbaꞌnxin cye ocslal:

—¡Miꞌn chi jaw seyꞌpaja! Lu te kꞌa iꞌtza―tz̈i Pablo.

11Entonces bix e jax meltzꞌaj Pablo juntl maj, bix e tzaj tiiꞌnxin chꞌin pan, bix e xiꞌ twaaꞌnxin. Yajcꞌatltzen bix akꞌxxin yolel cyuya ocslal mas tyem, tejxe ttzaj t-xeeꞌ cyaꞌj. Tetzen klax, bix exxin.

12Yaltzen ke ocslal bix iyꞌ cyiiꞌnxin jkꞌa xjal otk jaw itzꞌj. Juꞌ tzunj e temakexin tuya nim cycꞌuꞌjxin.

Tej t-xiꞌ Pablo tuj tnom Troas tuꞌn tpon tuj tnom Mileto

13Pablo e tajbexin tuꞌn t-xiꞌxin tuꞌn tkenxin tuj tnom Asón, tuꞌn ttzyet barc tuꞌnxin jatzewe. Pero keya bix ocx koꞌya junx maj tuj barc tuj Troas, bix e xiꞌ koꞌya tuj Asón te kꞌiltzte Pablo.

14Tejtzen kpona tuj Asón, bix e kyoya Pablo. Tejtzen tponxin, bix etz kiiꞌn xina tuj barc. Bix junxsen e xiꞌ koꞌya tuj tnom te Mitilene.

15Entonces bixsen etz koꞌya tuj Mitilene. Tetzen juntl kꞌij bix e pon koꞌya tuj ttxꞌotxꞌ Quio. Texetzen juntl kꞌij kpona tuj ttxꞌotxꞌ Samos. Te juntl kꞌij bix e pon koꞌya tuj tnom te Mileto.

16Pero otk txiꞌ ktzyuꞌna jun barc mintiiꞌ tuꞌn tweꞌ tuj Efeso, cuma ilx tiꞌ Pablo tuꞌn tpon tuj Jerusalén, bix ya min e tcuyatl Pablo tuꞌn tex ttyem tuj ttxꞌotxꞌ Asia. Juꞌ tzunj e xaꞌ koꞌya txucl tiꞌ Efeso, cuma e tajbe Pablo tuꞌn kpona tuj Jerusalén te iyꞌsal tninkꞌij awal. Pero tuj Mileto e cyjaꞌ koꞌya cab kꞌij.

Mancꞌbil tyol Pablo cye aj Efeso

17Etoꞌ tzuna tuj Mileto, bix e xiꞌ tchkꞌoꞌn Pablo txocbilcye ocslal tiꞌj cawel tuj tja Dios tuj Efeso.

18Tejtzen cyponxin tuj Mileto, bix e xiꞌ tkbaꞌn Pablo cyexin:

—Key wuya, cytzkiꞌn cyey tikꞌchwe nten tej wul tuj Asia, bix tiiꞌn xjal ken.

19Cykil tyem nchin ajbenwe te Dios tuya cykil wanem. Bajx tzꞌoca nkꞌonwe wiib te nmak xjal. In ookꞌ tej cyoc ncyeꞌyen xjal n-el cyxooꞌn tyol Jesús. Bix qꞌuixcꞌaj in tema cyuꞌnj yajlabl oc cykꞌoꞌn judío wiꞌj.

20Pero we, nunca e cyaj nkꞌoꞌnwe nkbante kej nyol il tiꞌj tuꞌn toc cybiꞌna te cyey. Tuj tnom bix cyja xjal in xnakꞌtzanxwe.

21Oc wocsaꞌnxkey, te cyey xjal judío, bix te cyey xjal yaaꞌn judío. Jweya nyola, ja tej tuꞌn tcyaj cykꞌoꞌna jkaꞌ, bix tuꞌn cyxiꞌ lpey tiꞌ tyol Dios, bix tuꞌn tke cycꞌuꞌja tiꞌ Kman Jesús, Scyꞌoꞌn tuꞌn Dios.

22Yaltzen jaꞌlewe, tisen tzunj n-oc cycyeꞌyena, lu nbe tzyuꞌn Jerusalén. Jacꞌa Espíritu Santo smalx te we tuj Jerusalén. Pero oj npon, tila pjel wiꞌj.

23Pero te ja ntzkiꞌntlwe, tuj jaca tnom jaaꞌ o chin iꞌya, o wil qꞌuixcꞌaj bix tuj tzeeꞌ, bix ntzaj tkbaꞌn Espíritu Santo we tzinen ka jax ja nayon wiꞌj tuj Jerusalén.

24Pero min tzajwe ttz̈i wiꞌj. Mintiiꞌwe woclen tiꞌj ka ma chin etz kꞌiꞌn ojxe tbaj twiꞌ nchunkꞌlal. Ja we mas n-oc takꞌ wej, jaj tuꞌn tbint wuꞌn jwaakꞌen o tzaj tkꞌoꞌn Jesús. Jatzen waakꞌen jaj tuꞌn t-xiꞌ nkbaꞌna mas tuj tumel jbaꞌn tpocbal t-xtalbil Dios te twitz txꞌotxꞌ.

25O chin bet cyxola te yolel tiiꞌn jtcawbil Dios. Pero ya tzinen taꞌ tuj nwitz mi nuketpe juntl maj chin n-oc cycyeꞌyena twitz ja txꞌotxꞌa. Mi nuketpe chin ul meltzꞌaj tzalu.

26Juꞌ tzunj cxeꞌl nkbaꞌn cyey jaꞌlewe aljxe xjal tuj ttanem at tuj tbeyel kꞌakꞌ yaaꞌn tuꞌn wewe nculpa.

27Cuma cykilte jax tyol Dios o txiꞌ nkbaꞌnwe cyey. Mintiiꞌwe o cub weꞌwen, bix min o cyaj nkꞌoꞌnwe tkbalte cykil tyol Dios.

28Mancꞌbiltzen nyol cyey. Cycꞌojlamtzen cyiiba, bix cykꞌoꞌnctzen cycꞌuꞌja cyiꞌ ocslal. Tisen jun cylel cꞌojlaꞌn ke cycarnel cyuꞌn, juꞌxsen tten o tzaj tokxena Espíritu Santo te cyey tuꞌn cycꞌojlaꞌna ke ocslal. Ke cyej ocslala te Kman Jesús ke cye, cuma o tchoj texin tuya ttz̈iyꞌxin. Entonces cycꞌojlanxsenke.

29Ilx tiꞌj tuꞌn cyxiꞌ cꞌojlet, cuma ntzkiꞌntlwe oj wex, chi ultltzen xjal te yajlal cye ocslal bix te kꞌilbaxcye, tisen jun skiꞌt cyxol carnel.

30Jax wuꞌn, bix cyxolxa cjawela jlet cab xnakꞌtzal tej nicꞌbel yol. Cxeꞌltzen nkbaꞌn cyey tzul jun kꞌij oj tjaw cyniqꞌuena ẍtakꞌbil tuꞌn tcub cyiꞌ ocslal cyuꞌna tuꞌn cyoc lpe cyiꞌja.

31Juꞌ tzunj cxeꞌl nkbaꞌn cyey tuꞌn t-xiꞌ cycꞌojlan cyiiba. Cytzkiꞌn tzuna tiiꞌn wanem cyiꞌja, bix tiiꞌn ma jawel baj oxe jnabkꞌiwe bix oc wocsaꞌn cycꞌuꞌja tuya tal nwitz tuꞌn miꞌn chi cub yajlaꞌna.

32Jaꞌle tzuna matzen chi cyaj nkꞌoꞌna tuj tkꞌab Dios tuꞌn cyxiꞌ cꞌojleta. Jatzen tyol Dios cxeꞌl kꞌinte cyey, bix cꞌoquel nimsante cyey, cuma nimte tipemal. Te Dios tyol, atte tipemal te chꞌixbelcꞌa cynaabla. Bix te Dios tyol, tzin tkbaꞌnte ka at cykab tcwal Dios.

33Yaltzen weya, matzen chin akꞌanana cyxola, pero bajx t-xaꞌ nkanewa cykꞌinemala. Yal cyej yajlalca xjal, pwakcye cyjyaꞌ.

34Cytzkiꞌntzen cyey tuya nkꞌabwe ẍin itzꞌja, bix e xiꞌ wonewe kej xin wuya.

35In akꞌananxsenwe cyiw. Juꞌtzen e nse weya tuꞌn tcyaj jun techlal te cyey. Jaxsen juꞌx cyey cwel cykꞌoꞌna jun techlal cywitz acꞌaj ocslal ti tten tuꞌn tcub cypaꞌn tikꞌch cye cyuya kej eteꞌ tuj tcyajlal. Tzulcꞌax tyol Kman Jesús tuj cycꞌuꞌja. Tz̈ixin cyjulu: “Mas ttz̈yal chi temela kej kꞌol cotz cywitz chi kꞌilte te juntl,” tz̈i Jesús—juꞌtzen tten tyolen Pablo cyuya nincꞌul tja Dios ke ocslal te Efeso otk chi ul tuj Mileto.

36Tejtzen tpon baj tkbaꞌnte Pablo cykil juꞌwa, bix e cub majexin, bix e naꞌnxin Dios cyuya nincꞌul tja Dios.

37Cykilcakexin ookꞌ, bix e tzaj cyxkeꞌnxin Pablo, bix nim maj el cytzꞌubanxin twitz Pablo.

38Otkxsen chi bisenxin, cuma otk tkba Pablo cyexin ka mi nuket juntl maj tzꞌoc cycyeꞌyenxin twitz txꞌotxꞌ. Cwa t-xiꞌ cyẍkluꞌnxin ja Pablo tuj barc.