2 CORINTIOS 11 - Mam of Todos Santos -- Guatemala Unicode

1Key ocslal, waja tziyꞌxxit chꞌin cyuꞌna wiꞌja, cuma cjawel nnimsaꞌna chꞌin nbiꞌya. Ka at jun xjal nbint tuꞌn juꞌwa, jatzen jun xjalja nuk ntxꞌujt, pero ntzkiꞌna qꞌuiyax chꞌin cyuꞌna wiꞌja.

2Tisen jun mambaj cxeꞌl tcꞌojlaꞌn tmeel tuꞌn miꞌn cub tzꞌak naj tuj il te mitknaꞌx tmaje, juꞌ tzunj weya. Waja tzꞌoc ncꞌuꞌja cyiꞌja tuꞌn cyela sak twitz Cristo, cuma o takꞌ Dios weya tuꞌn toc cyakꞌa weya.

3Pero najkelen ncꞌuꞌja cyiꞌja cyuꞌnj ẍtakꞌ t-akꞌanal Dios o chi pon cyxola te sbulte cyey. Cꞌulel tuj cycꞌuꞌja tuꞌn tẍtakꞌbil lbaj e cub tiꞌ Eva tuꞌn tel t-xooꞌn tyol Dios. Tuj nwitza kape cyuyaxloy nchi cub sbuꞌn, tuꞌn miꞌntl cheꞌx lpey tiꞌ Cristo tuya cykil cycꞌuꞌja bix tuya jun sakxix cyanema.

4Nipax ncꞌuꞌja cyiꞌja. Kej ẍtakꞌ xnakꞌtzal nchi pon cyxola, tecꞌaxtl cyyol tiꞌj Jesús twitzj weya nyol, bix jacꞌa tej n-octltzen cybiꞌna mas cyyol twitzj weya nyol. Bix n-oc cybiꞌna kej xjal jun wikxitl cynaabl twitzj t-xnakꞌtzbil Espíritu Santo e cyaj nkꞌoꞌna cyuyey. Bix n-oc cybiꞌna jun wikxitl xnakꞌtzbil twitzj baꞌn tpocbal colbil ke e xiꞌ nkbaꞌna cyey nejl.

5Jaj weya nyol cꞌoquelxix cybiꞌna, cuma tuj nwitza yaaꞌn cubnin kena cywitz kej tzin cykbaꞌn jawnex t-xel Jesúske.

6Kape jax min txiꞌ nkꞌumena tuya jun jawnex yol, pero o kꞌoj te weya tuꞌn tel nniꞌya tiꞌj nim, bix nim maj o txiꞌ nyeecꞌana jlu te cyey.

7¿Tuꞌn tikentzen mintiiꞌ baꞌn wajbeꞌneya cyey jaꞌlewe? ¿Kaꞌpa tuj cywitza cubninxse in temana cyxola tuꞌnj wakꞌanana tuya nkꞌaba tuꞌn witzꞌja, tuꞌntzen cyxiꞌ wonena tiꞌj jun cychunkꞌlala mas baꞌn? ¿Chin elelpa cyiiqꞌuena tuꞌn min e nkaniya twiꞌ ncꞌuꞌja cyey tej t-xiꞌ nkbaꞌna tyol Dios cyey?

8¿Kaꞌpa tuj cywitza e wiikꞌa chꞌin onbil weya cyuꞌn cabtl ocslal te nakch tuj cabtl tnom, amale mint in akꞌanana te cye, nuk tuꞌn ntena te kbalte tyol Dios te cyey?

9Tej ntena cyxola, cyiw chꞌin tuꞌn witzꞌja, pero mintiiꞌ onbil weya oc nkanena te mi jun cyey. Tej cypon ke ocslal te Macedonia te cyeyꞌlte weya tej ntena cyxola tuj Corinto, e cyaj cykꞌoꞌn nim onbil weya tuꞌn witzꞌja, tuꞌntzen mintiiꞌ il tiꞌj tuꞌn t-xiꞌ nkꞌoꞌna jun iktz cyibaja tuꞌn woc cycꞌaꞌchina. Bix mintiiꞌ cnkaniya.

10Ttzkiꞌn Cristo jax wuꞌna miꞌn chin kaniya cyey chojbil weya. Tuj cykilca tcwentel Acaya min-al jun cyey baꞌn tjaw tnicꞌan wiꞌja ka nchin kanena pwak.

11Pero ojtzen ncyꞌiya wiikꞌa cypwaka, ¿tzimpa nyeecꞌana ka min tzꞌoc cyakꞌa weya? ¡Min! Ttzkiꞌn Dios n-oc cyakꞌa weya.

12Pero il tiꞌj tuꞌn miꞌn wiikꞌa cypwaka, tuꞌntzen cyweꞌ jẍtakꞌ xnakꞌtzal cyyolen ka nchi akꞌanana tuj taakꞌen Dios tisenj weya. Cyaj tuꞌn wiikꞌenteya twiꞌ ncꞌuꞌja, tuꞌntzen cyel junx tuj taakꞌen Dios wuyena tuj cywitz xjal.

13Nxiꞌ cykbaꞌn ejeeꞌ t-xel Cristo tisen inayena, pero nuk ten cyuꞌn. Oj nxiꞌ cykbaꞌn smaꞌnke tuꞌn Cristo, ncubtzen cyyaaꞌn ejeeꞌy.

14Miꞌn chi jaw kleeꞌy tiꞌj yaal xjalke, cuma jax juꞌx taaw il n-oc tisen jun t-ángel Dios tuj cyaꞌj te sbulte cye xjal.

15Ka taaw il, ja Satanás, nsbun xjal tuya cyeca tyol, jax juꞌx pjel cyej kej ncheꞌx lpe tiꞌj taaw il. Chi chicꞌajaxel tisenj jaxxix t-akꞌanal Dios, pero ccyiikꞌel cycastiwa, laꞌ niyꞌ chꞌin kaꞌ otk bint cyuꞌn.

Nim qꞌuixcꞌaj iyꞌx tuꞌn Pablo nuk tuꞌnj t-xel Jesús

16Key hermano, cxeꞌl ncubsaꞌn nwitz cyey juntl maj. Miꞌn cub cybisena wiꞌja inayena jun xjal min tzꞌel nniꞌya tiꞌj, amale njawet nnimsan wiiba cywitza. Pero katzen tuj cywitza nuk nchin txꞌujta, cykꞌoꞌnctzen cycꞌuꞌja tiꞌ nyola, tisen o tzꞌoc cybiꞌna cyyol kej ẍtakꞌ t-akꞌanal Dios nuk nchi txꞌujt.

17Yaaꞌn njaw tniman te Kaaw tiib tisen jun xjal nuk ntxꞌujt. Pero yal weya, cxeꞌl nkbaꞌna cyey cykilcaj baꞌn o bint wuꞌna, tisen jun xjal nuk ntxꞌujt.

18Kej ẍtakꞌ akꞌanal tiꞌ tyol Dios njaw cyocsabla cyiib tisen nbint cyuꞌn xjal te twitz txꞌotxꞌ. Juꞌ tzunj jaxse juꞌx weya cxeꞌl nkbaꞌna ka jun jawnex xjal kena, tuꞌntzen jax juꞌx chin oquel cybiꞌna.

19N-eꞌla tuj cywitza nim baꞌn cyuꞌna, pero tuya cykil cycꞌuꞌja n-oc cybiꞌna cyyol kej xjal nuk nchi txꞌujt.

20Cyey o cyiikꞌa kej ẍtakꞌ t-akꞌanal Dios, kej cyaj chi cawel cyibaja, bix n-el cyiiꞌn cypwaka, bix tuꞌn ẍtakꞌbil cyyol nbint cyuꞌn tuꞌn chebe chebe tuꞌn cyajbeꞌna te cye, bix tzin cykbaꞌn mintiiꞌ cyajbela cywitz, bix n-oc cylokan yol cywitza.

21Katzen il tiꞌj tuꞌn jun t-xel Jesús tuꞌn tbint juꞌwa tuꞌn t-xiꞌ tyeecꞌan at nim tipemal, attzele nchꞌixewa tiꞌj, cuma min o bint wuꞌna juꞌwa.

Pero amale mint o bint cykilj lu wuꞌna, pero jaxsele cjawel wiiꞌn chꞌin wiiba, cuma amatzele cykbaꞌte ejeeꞌ jawnex, pero inayena yaaꞌn jun t-akꞌanal Dios mas cubnin kena cywitz.

22Nbaj cyniman cyiibxin cuma aj hebreokexin. Jax juꞌx weya aj hebreo kena. Bix nbaj cyniman cyiibxin cuma tiyꞌjil Israelkexin. Jax juꞌx weya tiyꞌjil Israel kena. Bix tzin cykbaꞌnxin tiyꞌjil Abrahamkexin. Jax juꞌx weya tiyꞌjil Abraham kena.

23Tzin cykbaꞌnxin nchi ajbenxin te Cristo, pero weya mas nchin ajbena te Cristo. Amale txꞌuꞌj xjalet kena tuj cywitza, pero cjawelx wiin wiiba mas. O chin akꞌanana bix o tziyꞌx qꞌuixcꞌaj wuꞌna tuj taakꞌen Cristo mas twitzj cyexin. Mas o chin oca tuj tzeeꞌ nuk tiꞌ tyol Dios. Mlay bint tajlaj jteꞌ maj o chin pjeta cyuꞌn xjal. Bix nim maj o tzꞌel wiꞌja tuꞌn ncyima.

24Jweꞌ maj e xiꞌ tzꞌuꞌn wiꞌja cyuꞌn judío. Winaklaaj tuya beljaj tzꞌuꞌn e xiꞌ wiꞌja jaca maj.

25Bix oxe maj in pjeta tuya tzeeꞌ cyuꞌn xjal te Roma. Bix jun maj oc tz̈itj ke xjal te xol xak wiꞌja tuꞌn ncuba. Tuj taakꞌen Cristo oxe maj in xiꞌya tuj aꞌ tej tcub xitj barc tuj mar, bix at jun maj in cyaja jun kꞌij tuya jun akꞌbil tuj aꞌ. Twitz tzlom in beteya tuꞌn njawela ttziiꞌ aꞌ.

26Bix tej wiꞌya cyuj tnom te kbalte tpocbal Jesús, at jaaꞌ in iꞌya cyuj nimaꞌ xobajilxsen tuꞌn wiꞌya cyuj. Bix chꞌima maj el wiꞌja cyuꞌn alakꞌ tuj be. Bix tuj cykilca tnom in yasja cyuꞌn xjal judío, bix juꞌx cyuꞌn ke xjal yaaꞌn judío. Nim oc kꞌojl ke xjal wiꞌja cyuj tnom, bix juꞌx tiyꞌ tuj cꞌul bix tuj mar oc qꞌuixcꞌaj weya. Bix at maj ejeeꞌ ocslal yaaꞌn jaxxix n-el cyiiꞌn tipemal waakꞌena.

27Nimxsen in sicta tuj taakꞌen Dios. At maj min in wutana. At maj in cyima tuꞌn weyaj bix tuꞌn takꞌ aꞌ wiꞌja, cuma mintiiꞌ nwaya e cnet bix mintiiꞌ aꞌ. At maj at takꞌ cheꞌw wiꞌja, bix yaaꞌn nimxix nxbalena kꞌiꞌn wuꞌna.

28Bix yaaꞌn nuk oꞌcx iyꞌx qꞌuixcꞌaj tuꞌn nxumlala. Jax juꞌx tuꞌn tkꞌakꞌbil ncꞌuꞌja nipax wanema jaca kꞌij cyiꞌ ocslal tuj cykilca tnom.

29Ka at juun ocslal yaaꞌn cyiw eteꞌ tuj cyocslabl, biꞌx nchin bisena tiꞌj. Bix ka at jun ocslal ma cub tzꞌak tuj il tuꞌn t-xmoxbil juntl ocslal, tzultzen nkꞌoja tiꞌj.

30Key hermano, at il tiꞌj tuꞌn tjaw nnimsan chꞌin wiiba. Pero nuk nchin yolena tiꞌj tikꞌch qꞌuixcꞌaj o tziyꞌx wuꞌna tuj taakꞌen Dios, tuꞌn tchicꞌajax yaaꞌn jawnex kena.

31Kman Dios, Tman Kaaw Jesús, niman tbixin kuꞌn te junx maj, ttzkiꞌnxin alcyej tzin nkbaꞌna tiꞌj o baj wiꞌja yaaꞌn nẍtakꞌbila.

32Bix jax juꞌx ttzkiꞌn Dios tiꞌ jun chꞌixbajil e baj weya tuj tnom te Damasco. Tej ntena tuj Damasco, at junxin gobernador otk tzꞌocx tkꞌoꞌn jxin rey Aretas. Tcyꞌixin tuꞌn wakꞌanana tuj taakꞌen Dios. Juꞌ tzunj ja tzunj xin gobernador e cub kꞌonte soldado tuj cykilca ttziiꞌ tapya toc tiꞌ tnom te xmuklte weya, tuꞌntzen ntzyeta cyuꞌnxin tej wetza tuj Damasco.

33Tuꞌntzen wetza tuj tnom, tuj ewjel in ex kꞌoꞌna cyuꞌn wuyena tuj jun ventan te tapya nakchxsen tjawen, bixsen e cuꞌx cyxtunen inayena tiꞌjxe tapya tuj jun chiꞌl, bix juꞌtzen in eꞌleya libre tuj tkꞌab gobernador.