SAN MARCOS 9 - Mam of Todos Santos -- Guatemala Unicode

1Bix jax e xiꞌ tkbaꞌn Jesús:

—Cxeꞌlxix nkbaꞌn cyey ka at juun cyey tcub tzalu miꞌn cyim ojxe toc cycyeꞌyena techel ti tten tipemal tcawbil Dios―tz̈i Jesús cyexin.

Tej tcub meltzꞌaj tcyeꞌnc Jesús(Mt. 17:1-13; Lc. 9:28-36)

2Eltzen wukak kꞌij, bix e xiꞌ Jesús twiꞌ jun nim witz. Nuktzen ja Pedro, tuya Santiago, bixse Juan e xiꞌ tiiꞌnxin tuyaxin. Cywitz tzunxin tej tcub meltzꞌaj tcyeꞌyenc Jesús.

3Yalxse t-xbalen Jesús tzinxse ntxakakan, masxse sak otk tzꞌoca tilbil twitz oj teyꞌx tbaj txjet jun ti jilel.

4Bix tujx naj toc cycyeꞌyenxin nyolen Jesús tuya Elías bix Moisés, caꞌba ktzan tyolel Dios nejl.

5Bix e xiꞌ tkbaꞌn Pedro te Jesús:

—Xnakꞌtzal, axse tbanel jlu koꞌ etoꞌ tzalu. Cjaweltzen kbinchaꞌn oxe niꞌ pach, juntzen tey, juntltzen te Moisés, bixse juntl te te Elías―tz̈itzen Pedro te Jesús.

6Yaaꞌntzen tiiꞌ e xaꞌ tkbaꞌn Pedro jcyjulu, cuma otkxse chi jaw seyꞌpajxin. Ya mintiiꞌtl ul tuj tcꞌuꞌj Pedro tuꞌn ti t-xiꞌlel tkbaꞌnxin.

7Nbajcꞌatzen yolen Pedro, tej ttzaj jlet jun muj. Bix e cyaj bajkexin tuj. Tujtzen muj etza jun yol. Tz̈i cyjulu:

—Jatzen weya Ncwalja n-oc takꞌ weya. Cybimcꞌatzen―tz̈itzen tyol Dios tetz tuj muj.

8Tujx naj tej cycyeꞌyenxin cytxlajxin, ya min-altl tcub cyuyaxin. Nuk jacꞌatl Jesús tjunal tcub.

9Cyajcatztzen meltzꞌajxin twiꞌ witz, bix e xiꞌ tkbaꞌn Jesús cyexin tuꞌn miꞌn jaaꞌ tzꞌoca cykbaꞌnxin ti jilel otk tzꞌoc cycyeꞌyenxin, ojxe tjatz itzꞌj jxjal Smaꞌn tuꞌn Dios.

10Juꞌ tzunj e cwaꞌ cyewenxin ti jilel otk tzꞌoc cycyeꞌyenxin. Pero bix akꞌkexin kanlecte tiyꞌ cyeeylexxin titzen jilel “ojxe tjatz itzꞌj.”

11Bix e xiꞌ cykanenxin te Jesús:

—¿Tikentzele nbyana cyuꞌnj xin txꞌolbal ley ka il tiꞌj tzul meltzꞌaj jxin Elías twitz txꞌotxꞌ nejl twitzj xin Scyꞌoꞌn tuꞌn Dios?―tz̈i tzunkexin te Jesús.

12-13Bix aj ttzakꞌbeꞌn Jesús:

—Jax cyuꞌn txꞌolbal ley. Tzul meltzꞌajte Elías twitzj Scyꞌoꞌn tuꞌn Dios nejl te nincꞌul xjal. Pero cxeꞌlxixse nkbaꞌn cyey tej tul Juan Bautista, juꞌtzen tul-lenxin tisex Elías, tisecꞌaj toc tuꞌn tyol Dios. Bix chꞌinnchꞌetzen tbyet Juan Bautista cyuꞌn xjal. Pero attzen jun kanbil cyey: ¿Ti toc tuꞌn tyol Dios ti pjel tej xjal Smaꞌn tuꞌn Dios? Tz̈itzen cyjulu: “Jxin Smaꞌn tuꞌn Dios qꞌuiyelxse aꞌ tcꞌuꞌjxin, bix qꞌuelel xooꞌnxin cyuꞌn xjal,” tz̈i tyol Dios―tz̈i Jesús cye t-xnakꞌatz.

Tej tel biman tiꞌj junkꞌa cwal tuꞌn Jesús(Mt. 17:14-21; Lc. 9:37-43)

14Tej tzunj cypon meltzꞌajxin jaaꞌ eteꞌj cabtlxin t-xnakꞌatz Jesús, bix e pon cnetkexin tuya nim xjal otk tzꞌoc cychmon cyiib cyiꞌjxin, bix cabxin txꞌolbal ley nchi rasonen tzunxin cyuya t-xnakꞌatz Jesús.

15Tejtzen toc cycyeꞌyen xjal ja Jesús, cykilxse xjal e xiꞌ kꞌolbelte Jesús. Biꞌxse e jaw kleeꞌ ke xjal tuꞌn nchi tzalaj, cuma cytzkiꞌntltzen xjal cykil baꞌn tbint tuꞌn Jesús.

16Bix e xiꞌ tkanen Jesús cye xjal:

—¿Titzen jilel nxiꞌ cyyolena cyuya nxnakꞌatza?―tz̈i Jesús.

17Juntltzen cye xjal ocx tzakꞌbente:

—Taat Xnakꞌtzal, ma tzul wiiꞌna ncyꞌaala ma tzꞌoc biman tiꞌj, biꞌx ma cyaj me.

18Jaaꞌxja tcwaꞌkꞌa tiꞌj, ntzaj ttzyuꞌn biman jakꞌa, bix ncub xooꞌnkꞌa tuꞌn twitz txꞌotxꞌ, bix n-akꞌ eletz plut tuj ttzikꞌa, bix njawxse kitxꞌitxꞌin t-xeeꞌ twitz tekꞌa, bix ncyaj txꞌilekꞌa. Ma txiꞌ ncubsaꞌn nwitz cye t-xnakꞌatza tuꞌn tel cylojoꞌn biman tiꞌ ncyꞌaal, pero mix nbina cyuꞌn―tz̈i tman cwal.

19Bix aj ttzakꞌbeꞌn Jesús cye xjal:

—¿At-xpatzen xjal min tzꞌoc ke tcꞌuꞌj tiꞌ Dios, bix wiꞌj? Jeyꞌ, ¿jteꞌtzen maj cxeꞌl nyeecꞌan wipemal cyey tuꞌn toc ke cycꞌuꞌja? ¿Jteꞌtltzen maj chi oquel nxnakꞌtzaꞌna tuꞌn tel cyniꞌya tiꞌj? Cyiiꞌntzna jcwala tzalu―tz̈i Jesús.

20Bixse e xiꞌ cyiiꞌn xjal cwal twitz Jesús. Tejtzen toc tcyeꞌyen jbiman toc tiꞌ cwal ja Jesús, bix e tzaj cyim cwal tuꞌn biman, biꞌx e cub tzꞌak cwal twitz txꞌotxꞌ, bix e cub ten balkꞌajel, bix e jaw swaquen ttzikꞌa.

21Bix e xiꞌ tkanen Jesús te tmankꞌa:

—¿Jtootzen tzyet niꞌ kꞌa tuꞌnj lu?―tz̈i Jesús.

Bix aj ttzakꞌbeꞌn tmankꞌa:

—Jatxe niꞌ neeꞌxkꞌa,

22bix nimxse maj o txiꞌ t-xooꞌn biman jakꞌa tuj kꞌakꞌ bix tuj aꞌ tuꞌn tcubkꞌa. Juꞌ tzunj kape jacꞌa bint tuꞌna, kꞌantz chꞌin tcꞌuꞌja kiꞌja. Ko toneca―tz̈i tzunxin te Jesús.

23Bix aj ttzakꞌbeꞌn Jesús texin:

—¿Titzen ttenj “jacꞌape bint tuꞌna?” Cykilca baꞌn tbint te alj ma tzꞌocslante ka baꞌn tbint wuꞌna―tz̈i Jesús.

24Entonces bix e jaw s̈-in tman cwal cyjulu:

—Tzin wocslaꞌnwe. Chin toneca tuꞌn toc wocslaꞌna mas―tz̈itzen tman cwal.

25Toctzen tcyeꞌyen Jesús otk jaw chmet nim xjal, bix oc cawenxin tiꞌ biman:

—Xewbaj, tuꞌna ma tzꞌoca jcwala me bix chquint. Inayentzen cxeꞌl kbante tey tuꞌn tetza tuj tchuꞌl jxjala, bix ya mi nuket juntl maj bix tzꞌoca tiꞌj―tz̈i Jesús te biman.

26Bix e jaw s̈-in biman, bix e tzaj cyim cwal juntl maj tuꞌn biman, bix el biman tiꞌjkꞌa. Tejtzen tel biman, biꞌxse e cyaj bint ttenkꞌa tisen cyimne. Nim xjal e kbante ka otk cyimkꞌa.

27Pero bix e tzaj ttzyuꞌn Jesús tkꞌabkꞌa, bix e jaw tiiꞌnxin jakꞌa, bix e cub weꞌkꞌa.

28Yajcꞌatltzen bix ocx Jesús tuj jun jaaꞌ. Cycyajtzen Jesús cyjunalx cyuya t-xnakꞌatz, bix akꞌkexin kanlte:

—¿Tikentzen min s-el biman tiꞌj kꞌa cwala kuꞌna?―tz̈i tzunkexin.

29Bix aj ttzakꞌbeꞌn Jesús:

—Ke cyej biman lu mlay chi el cyeja ka mitkx nchi naꞌna xjal Dios tuya cykil tanem―tz̈i Jesús.

Tej tyole Jesús juntl maj tiꞌj tcyamecy(Mt. 17:22-23; Lc. 9:43-45)

30Tejtzen cyetzxin jatzewe, bix iyꞌkexin cyuj tnom te Galilea. Pero tcyꞌixse Jesús oc cyeꞌyet cyuꞌn xjal,

31cuma nxnakꞌtzanxin ke t-xnakꞌatzxin tuj ewjel. Bix e xiꞌ tkbaꞌnxin cye t-xnakꞌatzxin:

—Tej xin Smaꞌn tuꞌn Dios cxeꞌl kꞌoꞌnxin tuj cykꞌab xjal, bix cbyetelxin. Pero tetzen toxen kꞌij cjawetza itzꞌjxin―tz̈i Jesús.

32Pero min el cyniyꞌxin tiꞌj ti jilel e tkba Jesús, pero tuꞌntzen cychꞌixewxin min e xiꞌ cykanenxin te Jesús ti elpenina tyolxin.

Alcye mas jawnex toclen(Mt. 18:1-5; Lc. 9:46-48)

33Bix e ponkexin juntl maj tuj nin tnom te Capernaum. Tejtzen cyponxin tuj jaaꞌ tuꞌn cyweꞌbaxin, bix e xiꞌ tkanen Jesús cye t-xnakꞌatz:

—¿Titzen jilelj cyey xiꞌ cyyolena tuj be?―tz̈i Jesús.

34Pero mintiiꞌ aj cytzakꞌbeꞌnxin tuꞌn cychꞌixewxin, cuma jatzen e xiꞌ cyyolen xinj tuj be alcyexin mas nintzaj cyxolxin.

35Bix e cub ke Jesús, bix e tzaj ttxcoꞌnxin cycablajaj t-xnakꞌatzxin, bix e xiꞌ tkbaꞌnxin cye:

—Cyaj cyey chi oca te nintzaj. Pero cxeꞌlxixse nkbaꞌn cyey, alj ma txiꞌ tcꞌuꞌj tiꞌ juntl xjal, ejeeꞌ tzunja chi oquel te nmak xjal tuj twitz Dios. Al kej cyaj chi cawen, ejeeꞌ tzunja chi cyjel tiꞌjxe―tz̈i Jesús cyexin.

36Bix e tzaj tiiꞌnxin jun neeꞌ cyxol t-xnakꞌatzxin te techel. Njawtzen tchleꞌnxin neeꞌ, bix e xiꞌ tkbaꞌnxin:

37—Alj ma tzꞌoc il tiꞌ jun neeꞌ tisencꞌa juꞌx wiꞌja, juꞌxse tten oj toc il wiꞌj. Bix ojtzen toc il wiꞌj, yaaꞌn nuk wiꞌjcꞌa, sino juꞌxse cꞌoquel il tiꞌ Dios e tzaj tsmaꞌn inayena―tz̈i Jesús.

Alj min nkꞌoj kiꞌj kuya taꞌ(Lc. 9:49-50)

38Bix ocx ttxꞌoman Juan tyol Jesús:

—Xnakꞌtzal, oc kcyeꞌyena jun xinak n-el tlojoꞌn biman cyiꞌ xjal tbi tzuna najben te. Pero otzen kmaya, cuma yaaꞌn toctz kxol―tz̈i Juan te Jesús.

39Bix e tbi Jesús tyol Juan, bix aj ttzakꞌbeꞌnxin:

—Min, miꞌn tzꞌoc cymyoꞌna, cuma juꞌ tkꞌon teja tiib kuya. Alj xjal ma bint jun ti jilel tuꞌn, tuꞌn tipemal nbiꞌya, mlay yolente kaꞌ wiꞌj, cuma yaaꞌn toc chilsal we.

40Alj min tzꞌoc kꞌojl kiꞌj, kuyatzen taꞌ.

41Alj tkꞌon tiib kuya, ctyeecꞌate tiib, amale nuket jun vas aꞌ tzaj tkꞌoꞌn te cyey, ejeeꞌy lepch tiꞌj Scyꞌoꞌn tuꞌn Dios. Cxeꞌlxixse nkbaꞌn cyey, jaante ctiikꞌel t-xel te Dios.

¡Ayxsen tej xjal ncub tkꞌoꞌn tzpetsabl tuj tbe juntl!(Mt. 18:6-9; Lc. 17:1-2)

42Ko nbajsaꞌ xsunj nyol nxiꞌ nkbaꞌn cyey. Ka at jun xjal ma tzꞌoc ten yajlalecte juntl xjal tuꞌn tcub tzꞌak tuj il, bix mintknaꞌx tcywix tuj tyol Dios, tisen ja neeꞌ luwe, baꞌntetpetzenle oj tcub ẍpet jun nim cyaaꞌ tkul tuꞌn t-xiꞌ xeꞌt tuj mar, twitzj oj toc ten ocsal tcꞌuꞌj juntl xjal.

43-44Yaltzen ka tuꞌnx ma cwaꞌ tzꞌak tuj il, cxeꞌltzen nkꞌoꞌn juntl tumel cyey. Oj tcub tzꞌaka tuj il, jatzen tbeyel kꞌakꞌ. Juꞌ tzunj ka at jun il ma tzaj tiꞌja, cyiwx tclaꞌ tiiba twitz. Baꞌn tcub tpaꞌn chꞌina takꞌ tuꞌn tcleta te il twitzj oj t-xiꞌ tkꞌon tiiba tuj il bix cxeꞌla tuj kꞌakꞌ. Baꞌntetpele oj tel txꞌomet jun tkꞌaba oj taja tzꞌajben tey tuꞌn t-xiꞌy tuj il tuꞌn tpona tuj cyaꞌj twitzj oj t-xiꞌy tuj kꞌakꞌ tuya cycaꞌbel tkꞌaba.

45-46Juꞌxse tten tuya tkena ka ja kꞌilx tey tuj il. Baꞌntetpele oj tel txꞌomet tkena sictzen tocxa tuj cyaꞌj. Mas baꞌn oj ttena twitz txꞌotxꞌ coxa twitzj oj tpona tuya cycaꞌbel tkena tuj kꞌakꞌ.

47Bix ka njyona il tuya tbakꞌ twitza, baꞌntetpele oj tetz sictzen tocxa tuj cyaꞌj. Cuma mas baꞌn oj ttena tuya junx tbakꞌ twitza twitz txꞌotxꞌ twitzj oj t-xiꞌy tuya cycaꞌbel tbakꞌ twitza tuj kꞌakꞌ,

48jaaꞌj minteyꞌxse nyubtzꞌaj kꞌakꞌ.

49Pero cxeꞌlxixse nkbaꞌn cyey, cykilcakey chi elel kꞌiꞌna tuj niyꞌ tisen tuj jun kꞌakꞌ, tuꞌn cytxjeta tuj cyila, bix tuꞌntzen cytena yaaꞌn nuk jun tisenj chiꞌpj atzꞌemiꞌ.

50Baꞌnte atzꞌen. Pero ka ma tzꞌoc te tzaaꞌ, ya mlay cub meltzꞌaj ttz̈yal juntl maj, bix ya mintiiꞌtl baꞌn tajbena. Tej atzꞌen tisencꞌaxsen a tnaabl cyuyey. J-atzꞌen mintiiꞌ baꞌn tajbeꞌna ka mintiiꞌ ttz̈yal, juꞌxse cyey yuwinkey ka yaaꞌn baꞌn cynaabla twitz juntl xjal bix twitz Dios. Juꞌ tzunj, baꞌnxkey. Tisen tzunj oj tcub tena tuj tbanel tuya juntl xjal, jatzen baꞌn tnaablja―tz̈i Jesús cye t-xnakꞌatz.