HEBREOS 10 - Mam of Todos Santos -- Guatemala Unicode

1Juꞌ tzunj tzinen taꞌ tley Moisés mlay chi cyaj xjal jiquenxix tuꞌn. Cyej xjal n-oc ke cycꞌuꞌj tiꞌj tley Moisés tuꞌn cyoc lkꞌe tiꞌ Dios, mlay, cuma nuk oꞌcx jun techel. Tisen oj taj jun xjal tzyet t-xlequemal jun xjal twitzj tuꞌnxix ttzyet jacꞌa xjal. Tley Moisés te ootxa nuk oꞌcx jun xlequemal tiꞌj coꞌpbil at tulel mas yajxe tuꞌn Jesús. Jchojbil il nxiꞌ tkꞌoꞌn tley Moisés, il tiꞌj tuꞌn t-xiꞌ oyet jaca jnabkꞌi. Juꞌ tzunj mlay cyaj jiquen te junx maj cyej xjal n-oc ke cycꞌuꞌj tiꞌ jun chojbil cyil nuk te juun jnabkꞌi.

2Nukettzen e bint tuꞌnj chojbil cyil ttz̈qꞌuel alimaj tuꞌn cycyaj sakxix bix jiquenxix cynaabl xjal te junx maj, ya minttzele e chjet te juntl maj, cuma mintiiꞌ il tiꞌj. Bix nukettzen e cyaj ke xjal jiquenxix, minttzele naꞌn tuꞌn cycꞌuꞌj at-x cyil.

3Pero min e bint tuꞌn cycyaj xjal jiquenxix. Jaj e bint tuꞌnj ley nuk tuꞌn tul tuj cycꞌuꞌj xjal jaca jnabkꞌi cykil cyil.

4Cuma mintiiꞌ tipemal ttz̈qꞌuel toro bix ttz̈qꞌuel chiva tuꞌn tel il tuꞌn,

5juꞌ tzunj, tej chꞌitk tul Tcwal Dios twitz txꞌotxꞌ, e xiꞌ tkbaꞌnxin te Dios: “Tcyꞌiy twabl bix oybil cytz̈qꞌuel alimaj te chojbil il. Juꞌ tzunj o tbinchay jun xumlalbaj te weya tuꞌn tcub te chojbil il te junx maj.

6Min ncub tuj twitza ke alimaj paten tzꞌeynakke te chojbil cyil xjal.

7Juꞌ tzunj nxiꞌ nkbaꞌn tey: Taat, lu kenwe lu tuꞌn tbint wuꞌn ti taja, tuꞌntzen tbint cykil tyola wiꞌj tuj tyola,” tz̈i Tcwal Dios te Dios.

8Key hermano judío, kꞌoꞌnc cycꞌuꞌja tiꞌj yol e xiꞌ tkbaꞌn Tcwal Dios te Dios. E xiꞌ tkbaꞌnxin tcyꞌi Dios twabl il te alimaj, bix yaaꞌn baꞌn oybil te alimaj tuj twitz, bix tcyꞌi tzꞌeynak twiꞌ altar te kꞌilbil il, amale tleyet Dios otk tkba tuꞌn tbint cykilj lu cyuꞌn xjal. ¿Tuꞌn tiken tz̈i Tcwal Dios yaaꞌn baꞌn jlu tuj twitz Dios?

9At tzakꞌbeblte tej t-xiꞌ tkbaꞌn julu: “Taat, lu kenwe lu tuꞌn tbint wuꞌn ti taja,” tz̈i Tcwal Dios. Tzinen taꞌ n-el tiiꞌnxin jchojbil il te alimaj tuꞌntzen tocx juntl chojbil il, jaj texin.

10Ja tzunja taj Dios. Taj Dios tuꞌn koc te texin, bix ja lu nuk tuꞌn t-xiꞌlen tkꞌon tiib Tcwalxin tuj cyamecy te chojbil kil te junx maj.

11Bix juntl tumel. Cxeꞌl nkꞌumena chꞌin tiꞌj te junx maj. Cykil kej pala cyxol judío waꞌlecxke twitz altar te oylecxte chojbil cyil xjal jaca kꞌij, amale minttiiꞌ n-oca tuꞌn tel cyil xjal. Waꞌlecxke, cuma min pon baj twiꞌ cyaakꞌen te oylte chojbil il.

12Yaltzen tej Scyꞌoꞌn tuꞌn Dios, jun maj bix te junx maj e xiꞌ toyen tiib te chojbil il, bix e cub ke tuj tmankꞌab Dios. Waꞌlecx ke pala, pero te Jesús, kꞌuklte. Kꞌukltexin, cuma o pon baj twiꞌ taakꞌenxin te oylte chojbil il.

13Lu ate nayonxin ojxe tcamanxin cyiꞌ kej iicꞌl texin, tuꞌntzen cycyaj tjakꞌ tkenxin.

14Juꞌxsen Jesús, tuꞌn nuk jun oybil bix te junx maj, o ko cyjaꞌ baꞌn twitz Dios, bix juꞌx cykil kej xjal cykꞌon cyiib tuya Dios.

15N-eltzen kniyꞌ tiꞌj jaxxix ja yol lu cuma nkꞌontzen Espíritu Santo tipemal tuya tyol. E xiꞌ tkbaꞌn Dios tuj tyolxin tuꞌn Espíritu Santo cyjulu:

16“Cwel nkꞌoꞌn jun trat cyiꞌ xjal laꞌ alcye jun kꞌij, bix juꞌtzen nseꞌya. Cꞌoquex nkꞌoꞌna nleya tuj cyanem, bix cꞌoquex ntzꞌiꞌbena ti waja tuj cynaabl,” tz̈i Dios.

17Bix juntl e xiꞌ tkbaꞌn Dios: “Mlay tzaj nnaꞌna cyil xjal bix yaaꞌn baꞌn o cybincha,” tz̈i Dios.

18Juꞌwa, cuma o cub najset kil te junx maj, mintiiꞌtl il tiꞌj tuꞌn t-xiꞌ oyet mastl chojbil kil. O bint.

19Juꞌtzen ttena, key hermano, nuk tuꞌn ttz̈qꞌuel Jesús at tuꞌn koc twitz Dios tuj xjan lugar jaaꞌ taꞌ texin at koquel jaꞌlewe tuya Dios. Juꞌ tzunj cꞌoquelxix ke kcꞌuꞌj tuꞌn kocx.

20Te nejl, e jaw jun nintzaj xbalen cywitz xjal tuꞌn miꞌn chi ocx jaaꞌ e tema Dios. Pero tuꞌnj tcyimlen Jesús, o cub rotj jmaksbil be twitz Dios te junx maj. Ya baꞌn kpon tuj lugar jaaꞌ taꞌ Dios, cuma o jket jun acꞌaj kbe, bix jatzen Jesús kbe.

21Bix jaxin nintzaj pala twitz Dios cyiꞌ cykil t-xjal Dios.

22Juꞌ tzunj, key hermano, cuma baꞌn kocx tuya Dios bix cuma at kpala twitz Dios, ko lkꞌex twitz Dios tuya cykil kcꞌuꞌj bix kꞌuklxix kcꞌuꞌj tiꞌ Dios, bix miꞌn tzaj knaꞌn kil, cuma o ko txjet tiꞌ kil tuꞌn Jesús tisenj kxumlal ntxjet tuya tzꞌil tuꞌn aꞌ sakxix.

23Kkꞌaꞌc kipen tuꞌn ktenx tuj kocslabl, bix tuꞌn miꞌn cub kiꞌj tuꞌn kaj meltzꞌajtl tuj kreligión te ootxa. Kiꞌx kocslabl o ko clet te junx maj. Cꞌoquel ke kcꞌuꞌj tiꞌj Dios, cuma mlay tzꞌexxin tibaj tyolxin.

24Bix cwel kbisen tiꞌj ti tten tuꞌn kcyiwsante kiib kxol tuꞌn cꞌoquel kꞌakꞌen kcꞌuꞌj te kuya bix tuꞌn kbinchante baꞌn.

Jawnexsen jun ttz̈i ka ma ko cub tzꞌak tuj tkꞌab Dios Iꞌtz

25Miꞌn cyaj cycolena tuꞌn miꞌn cub cyjunen cyiiba bix tuꞌn miꞌn cykꞌolbe cyiiba, tisen juuntl cyxola cycyꞌi cub cyjunen cyiib cyuya ocslal. Il tiꞌj tuꞌn tcub cyjunen cyiiba tuꞌn tbaj cyonen cyiiba tuj cyocslabla, bix ilxsen tiꞌj tuꞌn tbaj cyonen cyiiba mas jaꞌlewe twitzj nejl, cuma tzajnen tzaj lkꞌe jkꞌij oj tul meltzꞌaj Jesús te kꞌol castiwa cyibaj kej xjal cycyꞌi Tcwal Dios.

26Katzen ncyaj kcyeꞌyen mancꞌbil chojbil kil, ya mintzentiiꞌtl. Amale otket kocslaj jaxxix, yaj chojbil il tuꞌn Jesús ya mintiiꞌtl baꞌn tajbeꞌna ke, cuma jkil tzin kbinchaꞌn, jaj n-el kxooꞌn chjol kil, ja Jesús.

27Ka n-el kxooꞌnte, oꞌcxsen kyoꞌ jun cawbil jawnex bix tuj ilxsen tuꞌn Dios, bix tuꞌn kpon tuj jun kꞌakꞌ njulen jaaꞌ chi pomela kej xjal iicꞌbelte Dios.

28Jax tzul jun jawnex castiwa cuma cyeꞌnja ti e baj cye xjal e ten tuj tley Moisés. Tej tel t-xooꞌn jun xjal jtley, bix ka at caꞌba oxe tstiwa tiꞌj, junxse maj biꞌx cwel byet mintiiꞌ lastim te xjal.

29Katzen at nim castiwa tiꞌj jun xjal el t-xooꞌn nuk jaj tley Moisés, yaj tzunj xjal n-el t-xooꞌn Tcwal Dios, mas jawnex til xjal tiꞌj, bix mas jawnex tcastiwa. Juꞌtzen nbyaꞌna jtuj kꞌakꞌ. Tcyimlen Jesús jatzen jtkꞌuklel j-acꞌaj trat tuya Dios kiꞌj tuꞌn koc te t-xjalxin. Oj tel tiqꞌuen jun xjal colbil te tuꞌn tcyimlen Tcwal Dios bix cꞌaal meltzꞌaj tuꞌn toc ke tcꞌuꞌj tiꞌ ttz̈qꞌuel alimaj tuꞌn ttxjet til, kaꞌxsen, cuma ncub twaꞌben jxjala Tcwal Dios, bix njaw tiꞌ Espíritu Santo.

30Juꞌ tzunj at castiwa tuꞌn Dios. Ktzkiꞌn jax Dios nkꞌumente tuj tyolxin: “Inayena kꞌolte castiwa. Bix laꞌ alcye jun kꞌij cxeꞌl nkꞌoꞌna cycastiwa jaca juun kaꞌ xjal tiꞌ til,” tz̈i Dios. Bix tuj juntl tyol Dios tz̈i cyjulu: “Ja Dios cꞌoquel cyeꞌnte ke t-xjal alcye baꞌn bix alcye kaꞌ,” tz̈i tyol Dios.

31Key hermano, ¡cycꞌojlanx cyiiba! Jawnexsen jun ttz̈i ka ma chi cub tzꞌaka tuj tkꞌab Dios Iꞌtz oj tul meltzꞌaj.

32Juꞌ tzunj miꞌn cub cybisena tiꞌj tuꞌn tcyaj cykꞌoꞌna cyocslabla tiꞌ Tcwal Dios, sino cꞌulelxix tuj cycꞌuꞌja tej cyoca te ocslal. Tuj tzunj kꞌij nejl iyꞌx cyuꞌna nim qꞌuixcꞌaj nuk tuꞌn cyocslabla tiꞌ Tcwal Dios.

33Te nejl, at juun xjal cyxola oc ilet bix oc yaset cywitz nim xjal nuk tuꞌn min el cyxooꞌna cyocslabla tiꞌ Tcwal Dios, bix iyꞌx cyuꞌna. Bix e xiꞌ cyonena kej iyꞌx qꞌuixcꞌaj cyuꞌn.

34E xiꞌ cykꞌoꞌna jun tkꞌakꞌbil cycꞌuꞌja cyiꞌ ocslal otk chi oc tuj tzeeꞌ tuꞌn tlaj cyocslabl. Bix min e baj cycꞌuꞌja tej tel cyiiꞌn xjal niyꞌ tikꞌch cyey tuꞌn tlaj cyocslabla. Bix e xiꞌ cykꞌoꞌna tujxix tumel, cuma el cyniꞌya tiꞌj at jun mas baꞌn tuya Dios tuj cyaꞌj bix te junx maj twitzj n-el alkꞌet cyiꞌja nuk te cab kꞌij.

35Cykilj lu iyꞌx cyuꞌna nejl tuꞌn tlaj cyocslabla tiꞌ Tcwal Dios. ¿Tuꞌn tiken cyaja t-xiꞌ cytzakpiꞌn jaꞌlewe? ¡Min! Miꞌn txiꞌ cytzakpiꞌna cyocslabla, cuma nuk tuꞌn cyocslabla ccyiikꞌela jun cycotza o cyaj tkbaꞌn Dios.

36Il tiꞌj tuꞌn tiyꞌx kuꞌn tuꞌn tbint kuꞌn ti taj Dios, jaj tuꞌn miꞌn ko aj meltzꞌaj, tuꞌntzen kcaman kcotz e cyaj tkbaꞌn Dios.

37Cycyeꞌyenc ti toc tuꞌn Dios tuj tyolxin: “Jxjal Scyꞌoꞌn wuꞌna o kꞌumj tuꞌn tul, tzul. Mlay weꞌ. Tzul.

38Bix tej xjal jiquen nwitza, jatzen junx maj n-oc ke tcꞌuꞌj tiꞌj Nscyꞌoꞌn, bix ccaman tchunkꞌlal te junx maj. Pero ka ma cyaj tcolen tocslabl, ya mintiiꞌ waj te,” tz̈i Dios tuj tyol.

39Jatzen ke, nuket yaaꞌn ejooꞌ cyjel kcolen kocslabl, tuꞌn kxiꞌ tuj il, sino nuket ejooꞌ tisen kej kꞌiꞌnxix cyuꞌn tuꞌntzen toc ke cycꞌuꞌj tiꞌ Dios, tuꞌntzen cyclet.