1 PEDRO 1 - Mam of Todos Santos -- Guatemala Unicode

Jun kꞌolbebl tuꞌn apóstol Pedro

1Inayena Pedro, jun t-xel Jesucristo. Nxiꞌ ntzꞌiꞌbena ja uꞌj lu te cyey ocslal cyuj departamento te Ponto, Galacia, Capadocia, Asia, bix Bitinia. Ma chi el tz̈itja. Cyisen jun wikxitl xjalkey twitz txꞌotxꞌ.

2Jatxe tuj tneel ttzkiꞌn Kman Dios alcyej xjal at cꞌoquel te ttanem. Ma tzꞌel tpaꞌn Espíritu Santo ejeeꞌy cyiꞌ niyꞌtl xjal tuꞌn cyoca te ttanem Dios. Ma chi jaw scyꞌoꞌna tuꞌn toc cybiꞌna Jesucristo, bix tuꞌn cycleta tuꞌnj tcyamecy tej t-xiꞌ toyen ttz̈qꞌuel te chojbil kil. Tzajxit nim t-xtalbil Dios cyibaja, bix nimxit chi temela tuj ttz̈yal.

At kꞌukbabl kcꞌuꞌj tiꞌj kkab mintiiꞌ tbajlel

3Knimsaꞌwaxittzen tbi Dios, ja tman Kaaw Jesucristo. Nimxsen ma tzaj tkꞌoꞌn Dios lastim ke, cuma ma tzaj tkꞌoꞌn jun acꞌaj kchunkꞌlal. Cuma e jatz itzꞌj Jesucristo tuj cyamecy, juꞌ tzunj ko tzalajel cuma laꞌ alcye jun kꞌij ko temel tuyaxin te junx maj.

4Ckiikꞌel jun kkab mintiiꞌ tbajlel bix mlay txiꞌ tuj il bix mlay tzkij. Ja kkab lu cꞌuꞌn tuꞌn Dios tuj cyaꞌj te ke.

5Cuma ma tzꞌoc ke cycꞌuꞌja tiꞌ Dios, ctzaaltzen tonen Dios ejeeꞌy tuꞌn tipemal tuꞌn tiyꞌx cyuꞌna ojxe cyiikꞌentey cycotza. Bix tuj mancꞌbil kꞌij ccyiikꞌela jcolbil ma baj tnincꞌuꞌn Dios cyey.

6Juꞌ tzunj, chi tzalajxa, amale atet maj il tiꞌj jaꞌlewe tuꞌn tiyꞌx qꞌuixcꞌaj cyuꞌna jun rato.

7Cyocslabla tisen oro. Il tiꞌj tuꞌn tocx oro tuj kꞌakꞌ, tuꞌntzen tyeecꞌaj ka oro. Katzen il tiꞌj tuꞌn tocx oro tuj kꞌakꞌ, amale pjelet oro laꞌ alcye jun kꞌij, mas il tiꞌj tuꞌn toc pena cyiꞌja, tuꞌntzen tyeecꞌaj ka jaxxix cyocslabla tiꞌ Dios. Amale nimxsen cꞌajbel oro, pero mas cꞌajbel cyocslabla. Bix oj tul meltzꞌaj Jesucristo, ka ma chicꞌaj jaxxix cyocslabla, chi elela baꞌn tuj twitz, bix cjawel tnimsaꞌn ejeeꞌy, bix ctzaal tkꞌoꞌn nimbil cyey.

8Bajx cyiley Jesucristo, pero n-oc takꞌxin cyey. Bix amale mint n-oc cycyeꞌyena jaxin jaꞌlewe, pero nimxsen nchi tzalaja tiꞌjxin tuya jun cytzalajebla mlay kbaj, cuma n-oc ke cycꞌuꞌja tiꞌjxin,

9bix cuma tuꞌnj ja cyocslabla tiꞌjxin, chi cletel tzuna.

10Jatxe ootxa, kej tyolel Dios e cykꞌume tiꞌj jun xtalbil at tuꞌn tul, jaj colbil ma cyiikꞌa. Pero min el cyniyꞌ tiꞌj colbil, bix nim e cub tenke ximal tiꞌj.

11Tuꞌnj Espíritu Santo e kꞌoj tuꞌn Cristo, e cykꞌume at tuꞌn tul jun xjal laꞌ alcye jun kꞌij scyꞌoꞌn tuꞌn Dios, bix at tuꞌn tiyꞌx nim qꞌuixcꞌaj tuꞌn ja xjal lu, bix at tuꞌn toc te cawel tibaj cykilca. Bix nim e cyajbe tuꞌn tel cyniyꞌ tiꞌj alcyej xjal scyꞌoꞌn tuꞌn Dios, bix alcyej kꞌij tuꞌn tul.

12Tuꞌnj Espíritu Santo, e tyeecꞌaj cyexin j-e cykꞌume at tuꞌn tbaj, yaaꞌn tuꞌn tbaj te cye, sino mas yaj te ke. Bix ma kꞌumj tpocbalel ja colbil lu cyey cyuꞌn kbalte tyol Dios. O chi kꞌumenxin tuꞌnj tipemal Espíritu Santo o tzaj smaꞌn tuj cyaꞌj, bix tpocbalel cycolbila, jax juꞌx ke t-ángel Dios tuj cyaꞌj cyaj tuꞌn tel cyniyꞌ tiꞌj.

Ma ko txquet tuꞌn Dios tuꞌn koc te ttanem

13Juꞌ tzunj, nuk binne cytena tuꞌn cybinchantiya tajbil Dios, bix cytzyum cyiiba twitz tkaꞌyel. Bix miꞌn baj cycꞌuꞌja tiꞌj xtalbil ctzaal kꞌoꞌn cyey oj tul meltzꞌaj Jesucristo. Nuk chi ayonxa tiꞌj tuya cykil cycꞌuꞌja.

14Cuma tcwal Dioskey, juꞌ tzunj cybima tyol. Miꞌn txiꞌ cycuyana tajbil cyxumlala yaaꞌn baꞌn, tisenj e cysey tej min el cyniꞌya tiꞌj tajbil Dios.

15E ttxoc Dios ejeeꞌy tuꞌn cyoca te ttanem Dios. Juꞌ tzunj, chi tena sakxix, tisen te Dios sakxix.

16Tzin tkbaꞌn tyol Dios cyjulu: “Chi tena sakxix, cuma sakxix kena,” tz̈i Dios tuj tyol.

17N-oc cykꞌoꞌna Dios te cymana. Pero jax juꞌx ja Cymana Dios cꞌoquel te Juez tibaj taakꞌen cykilca xjal. Bix oj cyoc xjal tuj xkelbil twitzxin, miꞌn txiꞌ tcyeꞌyenxin ka jawnex jun xjal bix ka ajnintz. Juꞌ tzunj, cyyeecꞌanx nim cynimbila twitzxin tzalu twitz txꞌotxꞌ joocꞌtzen nchi ayona tuꞌn cypona tuya Dios, bix tuꞌn tten baꞌn cykilca cybinchbena.

18Jcychunkꞌlala e xiꞌ cyiiꞌna nejl, otk cyxnakꞌtza cyiyꞌjila cyey, pero mintiiꞌ cꞌajbela. Ma chi coꞌpja tuj ja cychunkꞌlala lu, bix cytzkiꞌna twiꞌj cycolbila yaaꞌn oro bix yaaꞌn pwak te plata at tbajlel.

19Chi lokꞌeta tuyaj jawnex tcyamecy Cristo tej tel tz̈itj ttz̈qꞌuel tiꞌj, tisen oj nxiꞌ oyet jun tal carnel mintiiꞌ tpalt bix sakxix.

20Tej mitknaꞌx tbint twitz txꞌotxꞌ, otk baj tnincꞌuꞌn Dios tuꞌn cycleta tuꞌn Cristo, pero maa jaꞌlewe ma tzaj yeecꞌan Cristo twitz txꞌotxꞌ tuꞌn t-xiꞌ tcoꞌpan ejeeꞌy.

21Nuk tuꞌn Cristo nbint cyuꞌna tuꞌn cyocslana tiꞌ Dios e jatz titzꞌjsaꞌn Dios ja Cristo tuj cyamecy, bix ma tzaj tkꞌoꞌn Dios texin tuꞌn toc te mas jawnex tibaj cykilca. Nuk tuꞌn Cristo baꞌn tuꞌn cyoc lpey tiꞌ Dios, bix baꞌn tuꞌn cyayona tiꞌj tuꞌn cytena tuya Dios.

22Tuꞌnj Espíritu Santo, ma tzꞌoc cybiꞌna jaxxix yol, bix ma chi oca sakxix. Ya ma kꞌoj cyipemala tuꞌn tocxix cyakꞌ ke ocslal cyey. Juꞌ tzunj, cꞌoquel cyakꞌ ke ocslal cyuyey cyey tuya cykil cycꞌuꞌja.

23Ma kꞌoj jun acꞌaj cychunkꞌlala. Min e tzaj ja acꞌaj cychunkꞌlala lu tiꞌj cyiyꞌjila tej cyul itzꞌja, cuma yaaꞌn te junx maj ja cychunkꞌlala lu oj n-ul itzꞌj jun xjal, sino ma tzaj acꞌaj cychunkꞌlala lu tuꞌn tyol Dios nim tipemal mintiiꞌ tbajlel.

24Tzin tkbaꞌn tyol Dios cyjulu: “Cykilca xjal tisen cꞌul, bix cybinchben bix cynimbil cyiib jawnex tisen txmaquel cꞌul, bix tisen oj ntzkijtl cꞌul bix txmaquel n-el tzꞌak, juꞌx xsunj pjel cye xjal tuyaj ma bint cyuꞌn.

25Pero tyol Dios ctemel te junx maj,” tz̈i tyol Dios. Bix ja tzunj tyol Dios lu e kꞌumj cyey tej tpon tpocbal colbil cyey cyxola.