APOCALIPSIS 20 - Mam of Todos Santos -- Guatemala Unicode

Kej mil jnabkꞌi

1Tbajlenxitltzen jlu, e wila juntl tsanjel Dios tuj cyaꞌj. E cuꞌtz tuj cyaꞌj, bix kꞌiꞌn tal jaaꞌ tuꞌn te tej ttzi jul mintiiꞌ tumel t-xeeꞌ, bix tuyax jun ma tij cadena tzyuꞌn tuꞌn tuj tkꞌab.

2Bix e cub ttzyuꞌn ja dragón, jatzenj lbaj te ootxa, jatzenj taaw il, jatzenj Satanás. Bix e xiꞌ tẍpoꞌn ja taaw il, tuꞌn tten ẍpoꞌn jun mil jnabkꞌi.

3Bix e cuꞌx t-xooꞌn tuj jul mintiiꞌ tumel t-xeeꞌ, bix e cyaj tlomoꞌn ttzi jul. Bix e cub tkꞌoꞌn jun tlemel ttzi jul, tuꞌntzen miꞌn jatz taaw il tuꞌn tsbuntl cyiꞌ xjal. Pero oj tbaj mil jnabkꞌi, il tiꞌj ctzakpetel, pero yaaꞌn nimtl kꞌij.

4Bix e wila nim kꞌukbil jawnex. Bix kꞌuklke tuj kꞌukbil ke ocslal at tuꞌn cycawen. Cyxoltzen ke ocslal eteꞌ kej otk tzꞌel txꞌomet cywiꞌ tuꞌn tlaj cyocslabl tiꞌ Jesús bix tuꞌn tyol Dios, bix eteꞌ kej min otk chi cub maje twitz jil jil bix twitz tsantjil, bix min otk tzꞌoc techeljil tibaj cywitz bix ka tiꞌ cykꞌab. Otk chi jaw itzꞌj tuj cyamecy juntl maj, bix oc chi cawel tuya Cristo jun mil jnabkꞌi.

5Yaltzen ke niyꞌtl xjal yaaꞌn ocslal, min e jatz itzꞌj juntl maj ojxe tbaj mil jnabkꞌi. Min e jatz itzꞌj tuj tneel maj tej cyjatz itzꞌj ocslal tuj cyamecy.

6At t-xtalbil Dios tibaj kej xjal nchi jatz itzꞌj tneel maj, cuma t-xjal Dioske. Oj cycyim xjal te junx maj, ja tcab cyamecy lu. Mintiiꞌ tipemal cyibaj ke t-xjal Dios lu. Nuk oꞌcx chi oquel te pala tuꞌn cyajben te Dios bix te Cristo, bix chi cawel tuya Cristo jun mil jnabkꞌi.

7Ojtzen tbaj mil jnabkꞌi, cjawetztzen tzakpet taaw il, ja Satanás, tuj jul mintiiꞌ tumel t-xeeꞌ.

8Qꞌuelextzen sbul cykilca tnom eteꞌ twitz txꞌotxꞌ, jtnom te Gog tuyax Magog. Chi oquel tchmon cyiib tuꞌn cykꞌoj tiꞌj Cristo. Nimxsen cybaj aj kꞌoj tiꞌj Cristo, tisentzen ttxa tzꞌaꞌn ttziiꞌ mar mlay bint cyajlaj.

9Bix e baj tzaj tuj cykilca twitz txꞌotxꞌ, bix e baj cytxolban cyiib tiꞌjxe cynajbil ocslal bix tiꞌjxe jtnom n-oc takꞌ te Dios. Pero e cuꞌtz kꞌakꞌ tuj cyaꞌj tuꞌn Dios, biꞌx e cub tzꞌeyꞌ cykilca tuꞌn.

10Bix taaw il, j-e sbun cye, e cuꞌx xooꞌn tuj tnijabel kꞌakꞌ bix azufre, jatztzen eteꞌjil jil tuyax tyolel ẍtakꞌ. Bix chi tel tuj qꞌuixcꞌaj te kꞌij bix te koniyan cykilca tyem te junx maj.

Jun castiwa twitz nintzaj kꞌukbil sak

11Bix e wila jun nintzaj kꞌukbil sak. Bix e wila jkꞌukl tuj. El ok twitz txꞌotxꞌ tuyax twitz cyaꞌj twitzxin. E cub najke.

12Bix e wila ke cyimne, kej jawnex bix kej chꞌin. Waꞌlke twitz Cristo. Bix e jket ke uꞌj. Bix at juntl uꞌj e jket, j-uꞌj jatztzen tzꞌiꞌben cybi xjal at cychunkꞌlal te junx maj. Bix e cykba uꞌj cybinchben xjal. Bix e kꞌoj castiwa cye xjal, teeyle juun laꞌ alcye otk bint tuꞌn.

13E takꞌ mar kej cyimne e cyim tuj. Jax juꞌx e takꞌ cykilca camposant bix cynajbil cyimne ke xjal otk chi cyim. Bix e takꞌ Dios castiwa te cykilca, teeyle juun laꞌ alcye otk bint tuꞌn.

14Bix cyamecy tuyax cynajbil cyimne e cuꞌx xooꞌn tuj tnijabel kꞌakꞌ. Ja tnijabel kꞌakꞌ lu, jatzenj tcab cyamecy lu.

15Alcye kej xjal min e cnet cybi tuj ja uꞌj jaaꞌ tzꞌiꞌbena cybi kej xjal at cychunkꞌlal te junx maj, e cuꞌx xeꞌtke tuj tnijabel kꞌakꞌ.