HEBREOS 9 - Mam of Todos Santos -- Guatemala Unicode

1Yaltzen tiꞌj tneel trat tuꞌn Dios cyuya xjal at ttxoꞌlan ti tten tuꞌn cynaꞌn xjal Dios. Bix tuꞌntzen cynaꞌn Dios, at jun nintzaj xjan tja Dios cyxol.

2Bix tuj nintzaj tja Dios at caꞌba cwart. Tneel cwart Xjan tbi. Bix tcab cwart maa t-xeeꞌ Masxsen Xjan tbi. Tujtzen tneel cwart at jun jawnex tcublel ten luz bix jun jawnex mes tcublel ten xjan pan.

3Cyxoltzen jcaꞌba cwart at jun nintzaj xbalen tcuꞌx cyxol. Tujxe tzunj xbalen te cwart Masxsen Xjan jatztzen e tena Dios.

4Tiꞌjxetzen xbalen tcwaꞌ jun altar te oro te patbil incienso te Dios. Bix tujtzen cwart mas xjan tocxe jun nintzaj caxa oro ttxꞌotxꞌel. Tujxetzen caxa tcuꞌxa jun xara. Tujtzen xara tcuꞌxa jun txab jpan e tzaj ttz̈iten Dios cye aj Israel tej cynajan tuj tzkij txꞌotxꞌ. Bix juꞌx tcuꞌx tuj caxa tbardón Aarón j-otk tzaj xulen bix j-otk tzaj xmacalin. Bix juꞌx kej caꞌba pisar te xak tcuꞌx tuj caxa jaaꞌ tzꞌiꞌbena jlaaj tcawbil Dios.

5Bix tcub twiꞌ caxa at caꞌba techel jun wik querubín cybi, bix liyꞌpuꞌn cyxiicyꞌ twiꞌ caxa jaaꞌ e tnajsa Dios cyil xjal. Pero ya ktzkiꞌntl ttxoꞌlan te nejl tuj tja Dios. Mintiiꞌ amleꞌn tuꞌn woc tena kbalte mastl cyey ti tten.

6Kane cykilcake binne juꞌwa tuj tja Dios, ocx ke pala jaca kꞌij tuj xjan tneel cwart tuꞌn tbint cyaakꞌen tuj.

7Yaltzen tej xjanxsen cwart tujxe xbalen, nuk ja mas nintzaj pala ocx tuj, bix nuk jun maj jaca jnabkꞌi, bix mlay tzꞌocxxin ka mintiiꞌ tz̈iyꞌ kꞌiꞌn tuꞌnxin. Tejtzen tocxxin tuj, bix e xiꞌ ttz̈itenxin tz̈iyꞌ te alimaj twiꞌ caxa te chojbil jtexin til bix xsunj cye niyꞌtl xjal.

8Cyuya ja lu, jatzen Espíritu Santo nkꞌonte tumel ke ka najbenx tneel cwart, cykilca xjal mintiiꞌ toquel tuj cwart xjanxsen jaaꞌ e ten Dios.

9Ja tzunj lu nkꞌumente katzen kꞌiꞌnx cyreligión xjal cyuꞌn te ootxa tuꞌn cypon tuya Dios, mlay chi pon. Bix ja tzunj lu tzin techlaꞌn te ke ti nbaj jaꞌlewe. At-x xjal nxiꞌ cyoyen chojbil cyil te Dios, bix at-x xjal tzin cynimanx cycostumbre n-el cytxjoꞌn cykꞌab te jun cynimbil tuj cyley, pero min tzꞌajben te txꞌajbil tuj cyanem,

10cuma ka ntxjon jun xjal tiꞌj tisenj tten tuꞌn, nuk tiꞌ t-xumlalxin n-el ttxjoꞌnxin, yaaꞌn tuj tanemxin. Max cyaj tanemxin tisex tten. Juꞌx te cykil oybil, waabjle, cꞌaꞌpjle, bix cykiltl costumbre at, nuk techlal. Mintiiꞌ n-oc tbinchen tiꞌ cyanem xjal. Ajben nuk te techel joocꞌtzen n-ul mero jaxxix.

11Bix o tzul jaxxix. O tzul jun acꞌaj ti tten tuꞌn ktxjet, jaj jxin Scyꞌoꞌn tuꞌn Dios. Bix ja tzunxin te nintzaj pala tiꞌj tbanel at tulel. Cxeꞌl nkꞌumena cyey tiꞌj acꞌaj o tzul tuꞌn ktxjet te junx maj. Tisenj nintzaj pala cyxol judío iyꞌ ajx tuj tneel cwart tuj tja Dios tuꞌn tocpan maa t-xeeꞌ jaaꞌ e ten Dios, juꞌxsente Jesús nuk iyꞌ ajx cykilca bix o pon tuya Dios, pero yaaꞌn tuj jun lugar te twitz txꞌotxꞌ tbinche xjal, sino tuj jun mas jawnex lugar.

12Bix yaaꞌn ocpanxin twitz Dios tuya tz̈iyꞌ te chiva bix te wacẍ neeꞌ tisenj cye nintzaj pala n-ocpan cyuꞌn, sino tuya texte ttz̈qꞌuel. Bix yaaꞌn chꞌima maj ocxin tuya Dios, tisen kej te twitz txꞌotxꞌ, sino nuk jun maj, tuꞌntzen tlokꞌontexin ejooꞌ tuj tkꞌab il te junx maj.

13Nejl, tej toc tz̈itet ttz̈qꞌuel chiva bix ttz̈qꞌuel toro cyiꞌj xjal, ajben tuꞌn tchewset cyil xjal, pero nuk te techel. Bix tej toc tz̈itet cyiꞌj xjal ttzaꞌl neeꞌ wacẍ otk baj patet twiꞌ xjan altar, ajben te txꞌajbil ttzꞌilel jun xjal tej toc tmocoꞌn jun anem, pero nuk te techel.

14Katzen ajben cytz̈qꞌuel alimaj cye xjal nejl te txꞌajbil cye xjal, yaltzen jaꞌlewe mas jawnex tipemal ttz̈qꞌuel Jscyꞌoꞌn tuꞌn Dios te txꞌajbil ke. Mas tipemal ttz̈qꞌuel Jesús te chojbil il, cuma e xiꞌ tkꞌoꞌnxin te Dios jun tchunkꞌlalxin te junx maj, bix cuma mintiiꞌ tilxin. Jatzen ttz̈qꞌuel Jesús ntxjonte knaabl tuꞌn jiquen taꞌ knaabl, bix tuꞌntzen kajben te Dios Iꞌtzxix twitzj tej kajben tuj ley ootxa ya cyimnen taꞌ.

15Tuꞌntzen tcyimlen Jesús, o chjeten niyꞌ tikꞌch cyil xjal e baj bint tuj tcwent tneel trat te Dios ootxa, bix tuꞌn tcyimlenxin otzen cyaj jun cyoclen tuꞌn cyiikꞌente chunkꞌlal te junx maj tetzen cyej xjal tzin cybiꞌn ntxcon Dios cyiꞌj tuj acꞌaj trat te Dios.

16Pero at juntl tajbel tcyimlen Jesús. Tuꞌntzen at tipen j-acꞌaj trat tuya Dios cyiꞌ xjal, ilxix tiꞌj tuꞌn toc tz̈iyꞌ tiꞌj. Icxa tzunj cyxol xjal. Ojtzen tcyim jun xjal, ke tcwal ckꞌilte cykab tuya jun tuꞌl tyol cyman.

17Pero at tumel kuya mlay kꞌoj naj cye ka iꞌtzx cyman. Ojxe tcyim cyman, bixsen tcyjel cye tcwal. N-eltzen kniyꞌ tiꞌj tuꞌn at tipen jun tuꞌl yol tiꞌj tkab, il tiꞌj ojxe tcyim binchal jtuꞌl yol. Ka mixe jun cyim, mintiiꞌ cykab tcwal. Juꞌxsen tten tuya acꞌaj trat tuya Dios cyiꞌ xjal. Pero nuk tcyimlen Jesús baꞌn el twitz Dios. Nuket min e cyim Jesús, mintetletiiꞌ tipen j-acꞌaj trat Dios kiꞌj, tuꞌntzen kiikꞌente jun kkab tuꞌn Dios.

18Ja lu nyeecꞌan ke katzen mintiiꞌ tz̈iyꞌ, mintiiꞌ chewsbil il, bix mintiiꞌ tipen jun trat. Juꞌ tzunj, tuꞌn tcyaj bint tneel trat te Dios ootxa, oc tkꞌoꞌn Moisés tz̈iyꞌ tiꞌj. Il tiꞌj e cyim jun alimaj te kꞌol tipemal tneel trat nejl.

19Cynaꞌntztzen tej tkꞌumente Moisés cykil tley Dios cye xjal, e tzaj tiiꞌnxin jun tzbil hisopo tbi tuya jun ttxꞌaka xbalen tlant carnel cyak tilbil, bix e cuꞌx tmuꞌnxin tuj ttz̈qꞌuel wacẍ bix ttz̈qꞌuel chiva smoꞌn tuya aꞌ, bixsen oc ttz̈itenxin tiꞌj jaaꞌ tzꞌiꞌbenc tley Dios twitz xak, bix juꞌx oc ttz̈itenxin tz̈iyꞌ cyiꞌ xjal,

20bix e xiꞌ tkbaꞌnxin cye xjal: “Ja tzunj tz̈iyꞌ lu ncyaj kꞌonte baꞌn jtrat te Dios o cyaj cyuyey tuꞌn t-xiꞌ cynimana,” tz̈i Moisés cye kxeꞌchel tej tcyaj tneel trat te Dios cyuya xjal.

21Juꞌx tiꞌj nintzaj tja Dios, oc ttz̈iten Moisés jtz̈iyꞌ tiꞌ tja Dios tuyax cykilca macbil najben tuj tja Dios cye pala tuꞌn cyniman Dios.

Nuk tuꞌn tcyamecy Cristo n-el kil

22N-eltzen kniyꞌ tiꞌj tuꞌnj ley te ootxa ilxix tiꞌj tuꞌn toc tz̈iyꞌ tiꞌj cykilcaj najben cye xjal tuꞌn cynaꞌn Dios, tetzen techel tuꞌntzen sakxix twitz Dios. Tuj tley Moisés, ka mintiiꞌ tz̈iyꞌ oc tiꞌj cykilca, min e tocsla Dios. Bix ka mintiiꞌ tz̈iyꞌ te chojbil il, min e cub najset il.

23Jatzen tumel jniyꞌ kej tikꞌch ajben te cynaabl Dios il tiꞌj tuꞌn cytxjet twitz Dios tuya tz̈iyꞌ. Pero ja lu nuk te techel tiꞌj ti tten tuj cyaꞌj tuꞌn knaꞌn Dios. Bix cykilj at tuj cyaꞌj il tiꞌj tuꞌn ttxjet tuya jun wik chojbil mas baꞌn twitz kej chojbil ajbenke te twitz txꞌotxꞌ.

24Bix ja tzunj chojbil mas baꞌn jatzen Jesús. Cuma Jscyꞌoꞌn tuꞌn Dios min ocx texin tuj jun xjan jaaꞌ binchaꞌn nuk cyuꞌn xjal, bix nuk jun techel tej jaxxix xjan jaaꞌ at, sino juꞌ o tzꞌocx texin tuj cyaꞌj. Jatztzen taꞌxin twitz Dios te kanl xtalbil kiꞌj.

25Cyxol judío tuj tley Moisés, texe juun jnabkꞌi tzꞌoc jtneel pala tuj Masxsen Xjan cwart jaaꞌ e tema Dios, tuꞌntzen t-xiꞌ toyen tz̈iyꞌ. Yal te Jesús, yaaꞌn texe juun jnabkꞌi n-ocx twitz Dios, cuma junx maj o tzꞌocx. Bix yaaꞌn texin tisenj cyej nintzaj pala e xiꞌ cyoyen tz̈iyꞌ nuk te alimaj, sino tex ttz̈qꞌuel.

26Nukettzen il tiꞌj texe juun jnabkꞌi cxeꞌl toyenxin ttz̈qꞌuelxin te Dios, jaxittzele il tiꞌj tuꞌn tcyimxin jaca jnabkꞌi jatxe titzꞌjlen twitz txꞌotxꞌ. ¡Pero min! O pon baj twiꞌ jtyem bix jley te ootxa, bix ma tzul jun acꞌaj tyem. Jaꞌlewe o tiikꞌ Dios jun toybil te ttz̈qꞌuel Tcwal junx maj bix te junx maj te chojbil cykil il.

27Juꞌtzen e cymaꞌ Jesús jun maj. Bix jax juꞌx jaca juun xjal il tiꞌj tuꞌn tcyim jun maj oj tpon tumel. Tetzen yaj, iltzen tiꞌj tuꞌn cyoc tuj cyeꞌybil tuꞌn Dios.

28Pero te Jesús, min tzꞌoctl texin tuj cyeꞌybil, cuma ox tchojxin tuj castiwa tuꞌn Dios tuꞌn kil. Tneel maj tej tul Jesús, te chjolte cyil xjal. Pero oj tulxin juntl maj, yaaꞌn te chjolte cyil xjal, sino te clolte cyej xjal nchi ayon tiꞌjxin tuya cykil cycꞌuꞌj.