1Te xsunj kꞌij tej tbyet Esteban, bix e tzaj tzyet jun tij kꞌoj cyiꞌ ocslal tuj Jerusalén. Juꞌ tzunj nimxsen ocslal el tz̈itj cyuj juntl lugar tiꞌjxe Jerusalén, bix e baj ponke tuj Judea bix tuj Samaria. Pero cykil ke t-xel Jesús jax e cyjaꞌkexin tuj tnom te Jerusalén.
2Attzen cabtl xjal n-oc takꞌ Dios cye, bix e xiꞌkexin jaaꞌj cyimneca Esteban. Chebexsen e cuꞌx maket-xin. Nimxsen okꞌkexin tiꞌ tcyamecy Esteban.
3Cyxoltzen kꞌojlel cyiꞌ ocslal tocxe junxin xjal nintzaj xjal, Saulo tbixin. Jaan tzunxin oc ten kꞌojlel nim cyiꞌ xjal ocslal. Ocxxin tuj jaca juun jaaꞌ, bix ocxxin tunwen nuk ka ma cnet jun ocslal tuꞌnxin, xuujle, xinakle, bix etz tiiꞌnxin tuꞌn cyocx tuj tzeeꞌ.
Tej tyole Felipe tiꞌj jxin Scyꞌoꞌn tuꞌn Dios jatzen Jesús4Tuꞌn tzunj otk baj bix tuꞌn tzunj cyel-len tz̈itj ocslal, bixsen el tz̈itj mas tyol Dios, cuma kej xjal otk chi el tz̈itj, tzinx nchi yolen xjal tyol Dios jaaꞌxja nchi iꞌya xjal tiꞌj.
5Juꞌxsen e xaꞌ Felipe, jun onl cye xjal cyxol ocslal, tuj Samaria, bixsen akꞌxin yolel tiꞌj jxin Scyꞌoꞌn tuꞌn Dios, jatzen Jesús.
6Bix jax juꞌx te Felipe nimxsen techel e bint tuꞌnxin, bix nimxsen xjal oc cyeyente, bix oc ebinte tyolxin, bix tuꞌnxsen tbiꞌnc, oca weꞌ cycꞌuꞌj xjal tiꞌ tyol Felipe.
7Bix e xiꞌ tyeecꞌan Felipe tipemal Jesús cyibaj biman toc cyiꞌ xjal, bix e baj pjetz ke biman cyiꞌ xjal. Tejtzen cyel biman cyiꞌ xjal, elxsen cywiꞌjil. Bix at xjal mintiiꞌ tanem t-xumlal bix nim cox, bix ul cynaabl xjal tuꞌn tipemal Jesús tuꞌn tyol Felipe.
8Tuꞌn tzunja cykilxsen ke xjal te Samaria axsen e cyjaꞌ cycꞌuꞌj.
9Tuj tzunj tnom te Samaria najla junxin chmambaj Simón tbixin. Nimxsen tyem otk tzꞌex tuꞌnxin t-xnakꞌtzanxin tiꞌ chmambaj bix e baj tyajlaꞌnxin ke xjal. Cykil maj oc ten cycꞌuꞌj xjal tiꞌ tyolxin, bix e seyꞌpaj ke xjal tuꞌnxin tuya ke baꞌn tbinchbenxin, bix e jaw tniman tiibxin ka jaxin jun baꞌnxsen xjal.
10Cykilxsen xjal, nmak xjal-le, ajnintz xjal-le, ocxsen cybiꞌn xjal jaxin tiꞌ ttz̈yal tyolxin, bix nchi yolentzen xjal: “Tej xin Simón at-xsen texin nintzaj tipemal, bix juntl Dios looxin,” tz̈itzen ke xjal.
11Axsen otk tzꞌeꞌla tuj cywitz xjal, lepchx ke xjal tiꞌj junx maj.
12Pero yal te Felipe, oc cybiꞌn xjal tyol Felipe tiꞌj tcawbil Dios tuj cyanem xjal bix tiꞌj Scyꞌoꞌn tuꞌn Dios, jxin Jesús. Bix tejtzen takꞌ Felipe yolel bix kꞌanel, nimxsen xjal oc te ocslal, bix e jaw aꞌ cywiꞌ, xuujle, xinakle.
13Bix jaan Simón e cub tiꞌj, bix e bautizarjxin. Tuꞌnxsen cykil tcꞌuꞌjxin toc tcyeꞌyenxin kej techlal bix tikꞌch e bint tuꞌn Felipe. E jawxsen kleeꞌ Simón cuma j-oc tcyeꞌyenxin jax, yaaꞌn yajlaꞌn tisenj texin e bint tuꞌn.
14Joocꞌtzen eteꞌxcye t-xel Jesús tuj Jerusalén, cybintexin txolen cyocslan xjal te Samaria. Ke cyej xjal te Samaria, yaaꞌn judíoke cye xjal. Bix e xiꞌ chkꞌet Pedro tuya Juan te cyeyꞌlte.
15Bix e pon ke Juan tuya Pedro tuj Samaria. Tejtzen cyponxin, toctzen cycyeꞌyenxin ti nbaj, bix e cykanexin te Dios tuꞌn cyiikꞌente xjal te Samaria Espíritu Santo, tisenx kej xjal ocslal judío otk cyiikꞌ Espíritu Santo tuj cyanem.
16E naꞌnkexin Dios, cuma mitkx n-ocxa Espíritu Santo tuj cyanem xjal te Samaria. Otk cyiikꞌcye jawsaj aꞌ te techlal ka otk chi ocslan tiꞌ Jesús. Pero te Espíritu Santo mitknaꞌx cyiikꞌente.
17Entonces bix akꞌke t-xel Jesús kꞌolcꞌa cykꞌab cyibaj ocslal. Tuya tzunj cyajwalelxin, e cyiikꞌa xjal Espíritu Santo tisenx cyej xjal judío.
18Tejtzen toc tcyeꞌyen jxin Simón ke techlal tul cyibaj ocslal, tej cyiikꞌente ocslal Espíritu Santo cyuꞌn t-xel Jesús, bixsen e tajbete Simón juꞌwa. Bix e xiꞌ toyenxin pwak te Juan tuya Pedro.
19Tz̈i tzunxin cyjulu:
—Nuksamkey, cykꞌontz cyipemala we, tuꞌntzen oj tcub nkꞌoꞌn nkꞌab cyibaj xjal, jaxsen cycyiikꞌel Espíritu Santo―tz̈i Simón te Pedro tuya Juan.
20Pero bix aj ttzakꞌbeꞌn Pedro:
—¡Cutxa tuj infierno tuya tpwaka! Jtey ma tzꞌoc tcyeꞌyena, te Dios teja. Yaaꞌn baꞌn tuꞌn tlekꞌette tuꞌn pwak.
21Tey mintiiꞌ tumel tuꞌn toca tajlal ja tajwalel Dios. Min tzꞌel tniꞌya tiꞌj ti nbaj tzalu. Tnaabla bix tanema yaaꞌn jiquen twitz Dios.
22Jtey toclen jaꞌlewe, ja tej tuꞌn tmeltzꞌaj tcꞌuꞌja tiꞌj taja tlokꞌontey tipemal Dios. Tzin tkꞌoꞌn Dios te jun xjal ti jilel taj, pero yaaꞌn tuꞌn pwak. Naꞌm Dios, tuꞌntzen kape jacꞌa najset kaꞌ tbisa tuj tcꞌuꞌja.
23Jacꞌa tej kꞌiꞌnx tey tanem tuꞌn tisenx tanem chmambaj, bix pres tzuna tuꞌnj ila―tz̈i Pedro te Simón.
24Bix aj ttzꞌakꞌbeꞌn Simón:
—Nuksama, naꞌm chꞌin Dios wiꞌj, tuꞌntzen min chixa tuj kꞌakꞌ tisenj toc tuꞌna―tz̈i Simón tej ttzꞌakꞌbeꞌn, cuma tcyꞌixin e xiꞌxin tuj cawbil tuꞌn tbinchbenxin.
25Tbajlentzen cykbaꞌnxin tiꞌ txolen tyol Dios cye xjal te Samaria, jatzen Pedro, Juan, bixsen Felipe bix e meltzꞌajkexin tuj be te Jerusalén juntl maj. Tujtzen be e cyjaꞌ cykꞌoꞌnxin tuj chicꞌaj tbanel tpocbal Jesús cyuj niyꞌ tnom te Samaria. Cwa cyponxin tuj Jerusalén.
Felipe bix jxin te Etiopía26Yaltzen te Felipe bix el jlet jun tsanjel Dios otk tzaj tuj cyaꞌj twitzxin, bix e tkba te Felipe:
—Taat, at jun tbey cxeꞌl tiiꞌna. Cutxa kꞌinx jbe n-ex ttxaꞌn Jerusalén npon tuj tzkij txꞌotxꞌ npon tuj ootxa tnom te Gasa―tz̈i tsanjel Dios te Felipe.
27Bix e tcuya Felipe, bix exxin. Tujtzen be, tisen tiiꞌ toc nojxin twitzj xin nintzaj cꞌojlal pwak tej txꞌotxꞌ te Etiopía. Jxin nintzaj chmol pwak sortelxxin, cuma jun xjal otk binchet-xin te juꞌwa, tuꞌn minx tten t-xuꞌlxin, bix minxtiiꞌ tajxin te xuuj, bix tuꞌn miꞌn tzꞌoc ipanxin tiꞌ nintzaj reina, cuma jaxin cꞌuꞌl pwak tej nintzaj xuuj reina tibaj Etiopía. Jxin nintzaj xjal otk txiꞌ ajxin Jerusalén te naꞌl Dios.
28Otktzen meltzꞌajxin tuj be te ttanemxin. Tocxxin tuj jun carwaj kiten tuꞌn tz̈ej. Kꞌuklcꞌa tzunxin, ncyeꞌyenxin tyol Dios tzꞌiꞌben tuꞌn tyolel Dios Isaías.
29Bix e xiꞌ tkbaꞌn Espíritu Santo te Felipe:
—Kꞌoꞌnc tipena tiꞌj tuꞌn tpon cnet jcarwaja tuꞌna. Mojbaꞌnctzen tiiba tuyaj xjal tocx tuja―tz̈i tsanjel Dios te Felipe.
30Bix e xiꞌ ajkelen Felipe ttxlaj carwaj, bix e bet-xin ttxlaj, bix e tbixin jxin tocx tuj carwaj ncyeꞌyenxin tyol Dios otk cyaj ttzꞌiꞌben ktzan tyolel Dios Isaías. Bix e xiꞌ tkanen Felipe te aj Etiopía:
—Taat, nuksama, ¿pero tzimpa n-el tniꞌya tiꞌj nxiꞌ tcyeꞌyena?―tz̈i Felipe.
31Bix aj ttzakꞌbeꞌn nintzaj cꞌojlal pwak:
—Mlay tzꞌel nniyꞌ tiꞌj. ¿Ti tten oj tel nniyꞌ tiꞌj? ¡Aj cyiw yolke! Waja tuꞌn al jun tzaj kꞌonte jun tumel we tuꞌn tel nniyꞌ tiꞌj―tz̈i jxin xjal te Felipe. Bix e jax ttxcoꞌnxin Felipe tuyaxin tuj carwaj.
32Kej tyol Isaías nxiꞌ tcyeꞌyen jxin xjal te Etiopía, ejeeꞌ tzunj lu: “E xiꞌ kꞌiꞌnxin tuj biybil tisen jun carnel tuj biybil chiꞌpj. Bix tisen jun carnel mutzꞌl twitz oj ncub byet, jaxsen juꞌx texin min e jket ttzixin te coꞌpel tiibxin.
33Tisen texin nukxsen yalnex tiꞌjxin, min e bint tstisenxin. Jatzen cykaꞌyel xjal e ten cyuj tyema, minxsen-al jun baꞌn tcub yolente, cuma nimxsen cykaꞌyel xjal,” tz̈itzen tyol Dios tuj uꞌj tjaw ts̈-in jxin xjal te Etiopía.
34Bix aj tkbaꞌnxin te Felipe:
—Weya te we, ¿tixsenle jilel? Kbantz we tiꞌjxpe Isaías nyolena, ma tiꞌ juntl xjalj―tz̈i aj Etiopía txiꞌ tkanen.
35Bix aj ttzakꞌbeꞌn Felipe:
—Juꞌtzen tten tyolen Isaías tiꞌj jxin Scyꞌoꞌn te coꞌpl twitz txꞌotxꞌ, jatzen Jesús―tz̈i Felipe, bix akꞌxin kꞌumlxte tyol Isaías, bix cabtl tpocbal tuj tyol Dios. Bix e xiꞌ ttxꞌolbaꞌn Felipe tej xin cꞌojlal pwak te Etiopía jbaꞌn tpocbal Jesús.
36Bix ocslan jxin nintzaj cꞌojlal pwak. Tejtzen xiꞌninkexin tuj jun lugar at aꞌ tuj, bix e tkba jxin nintzaj xjal:
—Cyeꞌyentz tey. Atte aꞌ tzalu. ¿Mlaypala chin cuꞌx weya tuꞌna tuj aꞌ?―tz̈i tzunj xin tij nintzaj xjal.
37Bix e xiꞌ tkbaꞌn Felipe:
—Ka ma tbiy tuya cykil tanema, min-alte baꞌn tel kꞌinte―tz̈itzen Felipe.
Bix aj ttzakꞌbeꞌn nintzaj xjal:
—Weya tuj nwitz, jxin Jesús, jatzen texin Tcwal Dios―tz̈i tzunxin.
38Entonces bix e xiꞌ tkbaꞌnxin cye tcꞌojlalxin tuꞌn tweꞌ tcarwajxin. Bix e cuꞌx jxin tij nintzaj xjal te Etiopía tuj aꞌ tuya Felipe, bixsen e jaw tiiꞌn Felipe aꞌ twiꞌxin.
39Tejtzen cyjatzxin tuj aꞌ, bix e tzaj Espíritu Santo kꞌilxte Felipe, bix tujx naj t-xiꞌxin tuj juntl lugar. Yal jxin aj Etiopía, e cyajxin tjunalxin. Min oc tcyeꞌyentlxin twitz Felipe juntl maj. Pero amale otket cub naj Felipe, pero tej xin xjal e tzyet-x texin tbe tuj ttz̈yal, cuma ya ocslaltl tzunxin.
40Yaltzen te Felipe, jatza e jawa jlet-xin tuj tnom te Azoto. Jatztzen e tzaaꞌ tzyet tbexin tuꞌn tponxin tuj tnom te Cesarea. Tujtzen tbexin iyꞌxin tuj jaca tnom te kbalte jbaꞌn tpocbal Jesús.
Who We AreWhat We EelieveWhat We Do
2025 by iamachristian.org,Inc All rights reserved.
