FILIPENSES 1 - Mam of Todos Santos -- Guatemala Unicode

Jun kꞌolbebl tuꞌn apóstol Pablo

1Key hermano tuj tnom te Filipos.

Inayena Pablo. Cxeꞌl nsmaꞌna jun uꞌj cyey te kꞌolbebl cyey. At Timoteo wuyena, bix juꞌx te nxiꞌ tsmaꞌnxin jun kꞌolbebl cyey. Keya, t-akꞌanal Cristo Jesús koꞌya, bix waja tuꞌn tpon ja uꞌj lu cyxola, te cyeke akꞌanal cyxol ocslal tuj tnom te Filipos, tuyax te cykilca ocslal, ejeeꞌj kꞌuklec cycꞌuꞌj tiꞌ Cristo Jesús.

2Tuꞌnxit Kman Dios tuya Kaaw Jesucristo tzaj kꞌonte nim cyxtalbil cyey, bix cyuꞌnxit-xin chi cub tena tuj ttz̈yal.

Tej tnaꞌn Pablo Dios cyiꞌj ocslal

3Jaca maj oj nchi ula tuj ncꞌuꞌja, nxiꞌ nkꞌoꞌna chjonte te Dios cyiꞌja.

4Min chin weꞌya naꞌna Dios cyiꞌja, bix oj nbint wuꞌna juꞌwa, ntzalaj wanema,

5cuma jatxe tuj tneel tej cyocslana bix jaꞌlewe nchi oney wiꞌja tuj waakꞌena tiꞌ tpocbaj jbaꞌn tpocbal coꞌpbil ke tiꞌ kil.

6Tej cyocslana jcoꞌpbil ke, akꞌ Dios akꞌanal tuj cyanema tuꞌntzen tcyaj cynaabla baꞌn. Bix ntzkiꞌna ctzketel cynaabla tuꞌn Dios oj tul meltzꞌaj Cristo Jesús.

7Tumel taꞌ lu kenwe lu nchin kꞌon chjonte te Dios cyiꞌja, cuma nim n-oc cyakꞌa we. Ka ntiina tuj tzeeꞌ nuk tuꞌn tyol Dios bix ka tzakpiꞌn kena tuꞌn t-xiꞌ nyeecꞌana cye cawel jtyol Dios tiꞌj coꞌpbil ke jmero jaxxix, pero tzinx nchi oney wiꞌja.

8Bix ttzkiꞌn Dios n-oc cyakꞌa weya, bix ja tzunj tkꞌakꞌbil ncꞌuꞌja cyiꞌja ma takꞌ Cristo Jesús weya.

9Key hermano, oj nchin naꞌna Dios cyiꞌja, nxiꞌ nkanena te Dios tuꞌn ttz̈ꞌiy tkꞌakꞌbil cycꞌuꞌja cyiꞌ cabtl cyermaney ocslal, bix tuꞌn ttz̈ꞌiy cynaabla, bix tuꞌn tel cyniꞌya tiꞌj alcye jaxxix,

10tuꞌntzen cyscyꞌontey alcye baꞌn bix tuꞌn tcyaj cycyeꞌyena jyaaꞌn baꞌn, bix tuꞌn t-xiꞌ cyiiꞌna jun cychunkꞌlala baꞌn, tuꞌn min-al baꞌn toc te yolel jun kaꞌ yol tiꞌj, tuꞌntzen cyela baꞌn tuj cywitz xjal hasta ojxe tul meltzꞌaj Cristo.

11Tuꞌn tipemalj o kiikꞌ te Jesucristo baꞌn t-xiꞌ kiiꞌn jun kchunkꞌlal jiquenxix, bix oj tbint kuꞌn juꞌwa, njaw knimsaꞌn tbi Dios.

Tuꞌnj qꞌuixcꞌaj o tziyꞌx tuꞌn Pablo ajben cuma tuꞌn o kꞌumj mas tpocbal jcoꞌpbil ke tuꞌn Jesús

12Key hermano, lu ken ntiincꞌtz tuj tzeeꞌ tzalu. Pero waja tuꞌn cybintey tuj nwitza jqꞌuixcꞌaj niyꞌx wuꞌna tzalu tuj tzeeꞌ o tzꞌajben te jun baꞌn, cuma o kꞌumj mas tpocbalj coꞌpbil ke tuꞌn Jesús.

13Cykilca ke cysoldado cawel bix juꞌx niyꞌtl kej xjal nchi akꞌanan ttxlaj cawel cytzkiꞌn ntiincꞌtza tuj tzeeꞌ nuk tiꞌj waakꞌena tuj taakꞌen Cristo.

14Bix juꞌx, chꞌixcꞌa yaaꞌn cykilca ocslal tuj ja tnom lu, oj n-oc cycyeꞌyen inayena tuj tzeeꞌ tzalu, mas n-oc ke cycꞌuꞌj tiꞌ Kaaw bix at mas cyanem tuꞌn t-xiꞌ cykꞌumen tyol Dios mintiiꞌ ttz̈i cyiꞌj.

15Nchi kꞌumen tpocbal Cristo, amale atet juntl wik nchi pocban nuk tuꞌn cyxqꞌueybil tiꞌj weya nyol tuꞌn tel cyyol mas baꞌn twitzj weya, cuma at niyꞌ tuj cycꞌuꞌj wiꞌja. Pero at nim ocslal nkꞌumen tyol Dios tujxix tumel.

16Ejeeꞌtzen ocslalj nchi akꞌanan tujxix tumel cuma n-oc wakꞌa cye, bix cytzkiꞌn o tzaj tkꞌoꞌn Dios waakꞌena te tyolel tiꞌj coꞌpbil ke.

17Pero jatzen cabtl yaaꞌn tujxix tumel nchi kꞌumen tpocbal Cristo yaaꞌn tuꞌn n-oc takꞌxin cye, sino tuꞌn cyxqꞌueybil tuꞌn tiyꞌ nejl cyyol nwitza bix tuꞌn toc cykꞌoꞌn tchyonel tiꞌ wanema. Nchi binchan jlu nuk tuꞌnj lu kena ntiincꞌtz tuj tzeeꞌwe.

18Pero mintiiꞌwe waj te. Ka tuj tumel bix ka nuk tuꞌn cyxqꞌueybil, pero tkꞌumj tyol Cristo, bix nchin tzalaja tiꞌj.

Bix juꞌx nchin tzalaja

19cuma ntzkiꞌna tuꞌn cynabla Dios wiꞌja Espíritu Santo onen tiꞌ Jesucristo jax juꞌx cꞌonel wiꞌja tuꞌntzen cykilca qꞌuelel baꞌn wiꞌja.

20Oj tpon kꞌij chin pomela cywitz cawel te txꞌolbal wiiba, ka tuꞌn wex tzakpeta bix ka tuꞌn ncub byeta, nuket miꞌn tzꞌel nxooꞌna Cristo tuꞌn witzꞌja. Tuya cykil ncꞌuꞌja waja tuꞌn tjaw nnimsaꞌna tbi Cristo tuj stis cywitz cawel, tisex tten wuꞌna, ka tuꞌn witzꞌja bix ka tuꞌn ncyima.

21Tuj nwitza yaaꞌn il tiꞌj ka tuꞌn witzꞌja bix ka tuꞌn ncyima, cuma ka ma chin itzꞌja at woclena tuꞌn wajbena mas te Cristo twitz txꞌotxꞌ, bix ka ma chin cyima jax at woclena tuꞌn npona tuya Cristo.

22Cycaꞌbel jbeꞌwa baꞌn tuj nwitza. Ojattzen ttzaj kꞌoꞌn weya tuꞌn nscyꞌonteya alcye mas baꞌn, jacꞌa mlay tuꞌn nscyꞌonteya alcye cyxol. Ka iꞌtzxe kena, cbinel mas akꞌuntl baꞌn tzalu wuꞌna.

23Pero katzen ma chin aja tuꞌn npona tuya Cristo, mas baꞌn twitzj ntiina tzalu twitz txꞌotxꞌ. Juꞌ tzunj cyiw chꞌin tuꞌn tel nniꞌya tiꞌj alcye mas baꞌn. Tuꞌn npona tuya Cristo masxsele baꞌn te weya,

24pero te cyey mas baꞌn tuꞌn at kena cyuyey tzalu twitz txꞌotxꞌ.

25Bix cuma il tiꞌj tuꞌn wajbeꞌna cyey, jax tuj nwitza chin cyjela cyxola tzalu twitz txꞌotxꞌ, tuꞌntzen cyxiꞌ wonena tuꞌn cytzketa bix tuꞌn cytzalaja tuj cyocslabla,

26bix tuꞌntzen t-xiꞌ cykꞌoꞌna chjonte te Cristo Jesús wiꞌja oj npona cyxola juntl maj.

27Key hermano, waja tuꞌn npona cyeyꞌl cyey. Pero matzen oca matzen miꞌna, pero at jun waja txiꞌ ntzꞌiꞌbena cyey ilxix tiꞌj. Waja tuꞌnxix t-xiꞌ cyiiꞌna cychunkꞌlala tujxix tumel, cuma ejeeꞌy ocslal lepchec tiꞌ Cristo. Nbiꞌxita ka waꞌlxix key tuj cyocslabla, bix junx cyanema, bix junx cynaabla, bix junx n-oc tilel cyuꞌna tuꞌn t-xiꞌ cytz̈itpuꞌna tyol Dios tiꞌj coꞌpbil ke.

28Bix nukxit mintiiꞌ cytz̈i kej xjal nchi kꞌojlec cyiꞌja. Ka waꞌlxix key tuj cyocslabla cywitz kej cycyꞌi Jesús, jatzen jun techel te cyej mintiiꞌ cytxolan bix ya tuꞌn cyxiꞌ tuj castiwa, bix jun techel ejeeꞌy at cytxolena bix otzen chi cleta tuꞌn Dios.

29O tzaj kꞌoꞌn cyey, yaaꞌn nuk tuꞌn cyocslana tiꞌ Cristo, sino tuyax qꞌuiyax qꞌuixcꞌaj cyuꞌna tiꞌj.

30Juꞌtzen e baj wiꞌja tej ntiina cyxola. E cyila jqꞌuixcꞌaj in iꞌyena wiꞌja nejl, bix o cybiy ntiina tuj tzeeꞌ juntl maj jaꞌlewe.