2 TIMOTEO 2 - Mam of Todos Santos -- Guatemala Unicode

Jun tbanelxix soldado te Jesucristo

1Nim xjal o cyaj cyeꞌyente Jesús. Yaltzen tey ncwal, tcuya tzuna tuꞌn ttzaj tipemala tuꞌn Dios, tuꞌn tcub weꞌy twitz Dios, cuma mojleca tuya Jesús.

2Ti jilel kej yol o tzꞌoc tbiꞌna wiꞌj cywitz nim xjal, kbanxse cyej xjal baꞌn toc ke kcꞌuꞌj cyiꞌj tuꞌn tbint-xix cyxnakꞌtzan te cabtl.

3Tziyꞌxse tuꞌna ti jilel qꞌuixcꞌaj qꞌuiyeley tuj taakꞌen Jesús, tisenj weya, bix tisenxix jun soldado niyꞌx tuꞌn tuj taakꞌen tcawel.

4Kej soldado min tzꞌaj cycꞌuꞌj tiꞌ ti jileltl, cuma il tiꞌj n-oc cycꞌojlaꞌn cycawel. Jaxse juꞌx tey, miꞌn tzꞌel tiiꞌna tcꞌuꞌja tiꞌ taakꞌen Jesús.

5Jaxse juꞌx, ka at jun ajkelel tuj jun skach, ka min xbaj t-xnakꞌtzan tiib te ajkelel, bix ka min s-oc tcꞌuꞌj tiꞌj tkaꞌyel cxeꞌl kꞌonte tuj il tuj tsakech, mlay tcama tcotz.

6Jaxse juꞌx cab xjal akꞌanal tuj jun camon akꞌuntl. Ja tzunj mas nim tzꞌakꞌanan, jaxse jaj ckꞌil tej tneel twitz awal.

7Xiꞌmanxse tiꞌj ti tzin tyeecꞌan jyol cyiꞌ soldado bix jyol tiꞌ jun ajkelel bix jyol cyiꞌj akꞌanal tuj camon akꞌuntl, bix Dioste cwel kꞌonte tumel tuꞌn tel tniꞌya cyiꞌj techlala.

8Miꞌn tzꞌel tuj tcꞌuꞌja ka Jesús, Scyꞌoꞌn tuꞌn Dios, xjal texin, jatze eꞌla itzꞌjxin cyiꞌ te tja cawel David. Bix jax Diosxin, cuma e telniꞌyax tej tjatz itzꞌjxin tuj tcyamecyxin. Ja tzunj lu tloqꞌuel jbaꞌn tpocbal kꞌiꞌn wuꞌna.

9Tuꞌn tzunj baꞌn tpocbala niyꞌxsewe takꞌ wuꞌn, hasta nchin cub ẍpet tuya cadena tuj tzeeꞌ tisen jun byol xjal. Pero te Dios tyol, tzakpiꞌnxte tuꞌn tel tpocbal tuj cykil twitz txꞌotxꞌ. Yaaꞌn ẍpoꞌnte tisenj weya.

10Pero cykilj qꞌuixcꞌaj qꞌuiyax wuꞌn, qꞌuiyaxwe wuꞌn cuma tuꞌntzen cybinte jxjal xiꞌnen te ocslal Jesús, tuꞌntzen baꞌn cyiikꞌente jcoꞌpbil o toye Jesús, bix tuꞌntzen cypon tuya Jesús, tuꞌn cyten tuyaxin te junx maj tuj jun lugar axse banel bix tzinxse ntxakakan.

11Te ja tyol jilj lu, jax teja. Tz̈i cyjulu: “Ka ma txiꞌ kkꞌon kiib tuj cyamecy nuk tiꞌjcꞌa Jesús, ko itzꞌjeltzen tuyaxin.

12Ka ma tziyꞌx qꞌuixcꞌaj kuꞌn nuk tiꞌjcꞌaxin, attzen koclel tuyaxin tuj tcawbilxin. Ka min xcyaj kkꞌoꞌn tuj chicꞌaj ka te Jesús ejooꞌ, ja tzunxin cyjel kꞌonte tuj chicꞌaj ka yaaꞌn texin ejooꞌ.

13Pero texin tzinx nbint texin tuꞌn ti jilel tzin tkbaꞌnxin, bix mlay cub tchꞌixbeꞌn texin tyolxin, amale mint bint ke kuꞌn alcyej nxiꞌ kyolen,” tz̈i tyol jilj.

Jun seyꞌ bix baꞌn xnakꞌtzal tuj twitz Dios

14Kbanxse ti toc wuꞌn cye xjal, bix tzinenxse kbanx cye twitz Dios tuꞌn miꞌn baj cypetxen cyiib tiꞌj yol tuj tyol Dios. Oj cyakꞌ petxl cyiib juꞌwa, mintiiꞌ baꞌn tajbeꞌna, bix alj ma tzꞌoc ebinte, nuk akꞌbilcye tuj il.

15Pjelxix t-xnakꞌtzaꞌna tiꞌj ti ctemela tuꞌn toca te jun xjal seyꞌ bix baꞌn twitz Dios. Oj tbint tuꞌna juꞌwa, mintiiꞌxix il tiꞌj tjaw chꞌixewey tiꞌj tiiꞌn xnakꞌtzana cye xjal. Xnakꞌtzam tyol Dios cye xjal tuꞌn tcyajxix tzinen tuj cywitz.

16Oj takꞌa xnakꞌtzal xjal, xomel jtikꞌch yolel mintiiꞌ baꞌn tajbeꞌna, bix te twitz txꞌotxꞌ, bix jun wikxitl tten tuya tyol Dios, cuma ja tzunja n-el lakꞌbante cye xjal mas tiꞌ Dios.

17Tisen veneno nxiꞌ leꞌn tuj cychuꞌl xjal, juꞌxse cyten jyola te cyanem xjal. Juꞌtzen tten cyxnakꞌatz Himeneo bix Fileto cye xjal.

18O chi cub tzpet tuj yol jaxxix, cuma eteꞌcꞌa kbalte cye xjal ka yaaꞌn juꞌ ttenj tyol Dios nbyan ka cjawetz itzꞌj kxumlal juntl maj. Cyuꞌn tzunj yol lu nxaꞌ cyxooꞌn cyanem xjal tiꞌ Jesús.

19Pero te Dios tyol o cyajte tloqꞌuel mlay cub xitj. Bix al tzunj ma tzꞌoc ebinte tyolxin, tz̈itzen Dios cyjulu: “Ttzkiꞌnte Kman Dios al kej texin t-xjal,” bix “Al kej ma chi naꞌnte ka ja Dios Cyaaw, il tiꞌj qꞌuelel cypaꞌn cyiib tiꞌj tkaꞌyel,” tz̈i Dios.

20Tuj jun jaaꞌ te jun kꞌina at lak te oro bix te plata. Ejeeꞌ tzunja nintzaj cymunel. Bix jax atte lak te tzeeꞌ bix te txꞌotxꞌ. Ejeeꞌ tzunja yaaꞌn nintzaj cymunel.

21Jaxse juꞌx ka at jun xjal ma ttxꞌaj tiib cyuj tkaꞌyel o byan wuꞌna, baꞌntltzen te tajbel-lel tuj nintzaj taakꞌen Dios, tisen tzunj lak nintzaj tmunel tuj twitz taaw.

22Juꞌ tzunj xomel jkaꞌ tajbela tuj tcwalela. Tetzen t-xelja bincham tzunj baꞌnxix tuj twitz Dios, cꞌoquelxix takꞌ tey, baꞌnx cwel weꞌy twitz Jesús, bix cwel tena tuj ttz̈yal. Jyom tzunja lu cyuyaj xjal jaxxix cyuꞌn twitz Dios.

23Miꞌn tzꞌoc tkꞌoꞌna tcꞌuꞌja tiꞌ tyol jun xjal oj takꞌ petxl tyol. Ttzkiꞌntl tzuna nuk kꞌoj tzin tjyoꞌn.

24Jun onlte Dios, mixben tcub ten tuj kꞌoj. Yaaꞌn juꞌ tewa, sino cwelxix tente tuj baꞌn tuya cykil xjal, tbanelxix tnaabl te xnakꞌtzal, bix nimx tcꞌuꞌj oj toc bint jkaꞌ tiꞌj,

25bix cxeꞌl tkbaꞌn tuyaxix tanem cyej xjal n-oc jyonte tuya kꞌoj. Ojtzen t-xiꞌ tkbaꞌn onlte Dios cyej xjal jyol kꞌoj juꞌwa, kapetzen jacꞌa tzꞌel cyniyꞌ tiꞌ cyil twitz Dios, bix tuꞌn tel cyniyꞌ tiꞌj alcyej yol jax,

26tuꞌn tel cywatl, bix tuꞌn cytzokpaj tuj tkꞌab taaw il, jaaꞌj tzyuꞌnake tuꞌn tcub cybinchaꞌnj ti jilel tajbil taaw il.