APOCALIPSIS 17 - Mam of Todos Santos -- Guatemala Unicode

1Bix ul wuyena jun cyej wuuk ángel cyxol kej kꞌiꞌn wuuk lak cyuꞌn, bix e tzaj tkbaꞌn weya:

—Juꞌ tzaja tzalu. Cxeꞌl nyeecꞌana tey jcastiwa cwel tibaj jxuuj aj paj, jxuuj kꞌukl cyibaj nim aꞌ.

2Tuya cykil cycꞌuꞌj, ke cawel twitz txꞌotxꞌ ma chi oc lpe tiꞌj jyaaꞌn baꞌn e tkba ja xuuj lu, bix ke xjal najl twitz txꞌotxꞌ ma chi oc lpe tiꞌj kaꞌ, tisen oj n-oc tzꞌeyꞌxix tcꞌuꞌj jun bolo tiꞌj kꞌeꞌn―tz̈i ángel weya.

3Bix e xiꞌ tiiꞌn ángel wanema tuj jun lugar min-al xjal najl tuj. Bix e wila jun xuuj kꞌukljawx tibaj jun jil cyak tilbiljil. Nimxsen yol kaꞌ tiꞌj Dios tzꞌiꞌben tiꞌjjil, bix at wuuk twiꞌjil tuyax laaj tcachejil.

4Toc t-xbalen xuuj puro tbanelxix bix wiꞌyelxix. E cyaj tbint tuya oro cyuyax nintzaj xak cyuyax perla. Tzyuꞌn jun vaso te oro tuꞌn. Nojnexsen tvaso tuyaj kaꞌ bix jpajbaj e bint tuꞌnxuj.

5Tzꞌiꞌben jun biybaj tibaj twitzxuj, pero jun biybaj mintiiꞌ tumel ti japenina. Tz̈i cyjulu: “Jnintzaj tnom Babilonia, jaaꞌ taꞌ cytxu aj paj, bix jaaꞌ n-itzꞌja kej kaꞌ nbint twitz txꞌotxꞌ.”

6E wila otk tzꞌoc xuuj tisencꞌa jun bolo, cuma otk txiꞌ tcꞌaꞌnxuj cytz̈qꞌuel kej otk chi cyim tuꞌnxuj tuꞌn tlaj cyocslabl tiꞌ Jesús. Tej nlontiya jaxuj, nim in jaw kleeꞌya.

7Bix e tzaj tkbaꞌn ángel weya:

—¿Tikentzen njaw kleeꞌya? Cxeꞌl nkbaꞌna tey tiꞌj ti japenina jxuj xuuj tuyax jil ikl texuj bix at wuuk twiꞌxuj tuyax laaj tcachexuj.

8Jjil e tila, jatzenj jil e ten nejl pero mintiiꞌtl jaꞌlewe. Chꞌixcꞌa tpon tumel tuꞌn tjatz tuj jul mintiiꞌ tumel t-xeeꞌ bix tuꞌn t-xiꞌjil tuj il te junx maj. Yaltzen kej xjal twitz txꞌotxꞌ, kej yaaꞌn tzꞌiꞌben cybi jatxe tej tbint twitz txꞌotxꞌ tuj uꞌj te chunkꞌlal te junx maj, chi jawel kleeꞌ oj toc cycyeꞌyen jajil, cuma e tenjil pero min-altljil bix tzuljil juntl maj.

9Alcyekej at cynaabl, cꞌoquel cycꞌuꞌja tiꞌj jlu. Kej wuuk wiꞌybaj, jatzen japeninaj kej wuuk witz cwel ke xuuj cyibaj.

10Ejeeꞌ tzunj lu tzin cyechlaꞌn wuuk cawel. Jweꞌ cawel ma chi el. Jun at-x jaꞌlewe. Jatzen juntl, minaꞌx tul. Ojtzen tul, ilxix tiꞌj tuꞌn tten, pero yaaꞌn nim kꞌij.

11Yaltzenj jil e ten nejl bix min-altl jaꞌlewe, ja tzunja twajxakan cawel. Jax jun cyxol kej wuuk, bix cxeꞌl tuj il te junx maj.

12Yaltzen kej laaj cache e tila, tzintzen cyechlaꞌn laaj cawel. Minaꞌx cyoc te cawel. Pero oj tul jletjil tzul, chi cawel tuyajil jun niꞌ rato.

13Junx cynaabl kej laaj cawel lu, jatzenj tuꞌn t-xiꞌ cykꞌoꞌn cycawbil tej jil ul jlet.

14Kej cawel lu chi kꞌojlel tiꞌj Tal Carnel. Pero cwel cyiꞌj tuꞌnj Tal Carnel, cuma jatzen Cawel cyibaj cykil cawel bix Rey cyibaj cykil rey. Bix tuyaj Tal Carnel oj tcub cyiꞌj tuꞌn, eteꞌ kej t-xjal Dios min e cyaj cykꞌoꞌn cyocslabl tiꞌjxin―tz̈i ángel weya.

15Bix e tzaj tkbaꞌntl weya:

—Kej aꞌ xtila jaaꞌ ncuba kej xuuj aj paj, xjalke. Tzin cyechlaꞌn aꞌ nim xjal bix tnom bix cykilca wik yol.

16Yaltzen kej laaj cache tuyax ja jil jil xtila, qꞌuelel cyiiqꞌuen ja xuuj aj paj, bix qꞌuelel cyiiꞌn tipemal bix t-xbalen wiꞌyelxix. Cxeꞌl cychyoꞌn tchuꞌlxuj, bix cwel cypaten jaxuj tuya kꞌakꞌ.

17Ma takꞌ Dios tuj cyanem tuꞌn cybinchante jtaj Dios tuꞌn tbint cyuꞌn, jatzenj tuꞌn tten jun cynaabl junx bix tuꞌn t-xiꞌ cykꞌoꞌn cycawbil tej jil kaꞌ, ojxe tjapan baj cykilca tyol Dios.

18Yaltzen jxuuj xtila, tzintzen techlaꞌn jawnex tnom ncawen cyibaj cawel eteꞌ twitz txꞌotxꞌ―tz̈i ángel weya.