GÁLATAS 1 - Mam of Todos Santos -- Guatemala Unicode

Jun kꞌolbebl tuꞌn Pablo

1Inayena Pablo. Jun t-xel Jesucristo kena. Yaaꞌn xjal e scyꞌonte weya tuꞌn woca te jun t-xel Jesucristo, bix yaaꞌn xjal e smante weya. Scyꞌoꞌn kena bix smaꞌn kena nuk oꞌcx tuꞌn Jesucristo bix tuꞌn Kman Dios e jaw titzꞌjsaꞌn ja Jesucristo tuj cyamecy.

2Nxiꞌ ntzꞌiꞌbena ja uꞌj lu te cykilca cloj ocslal tiꞌ Cristo tuj departamento Galacia. Jax juꞌx kej ocslal at wuyena ma txiꞌ cykꞌoꞌn jun kꞌolbebl te cyey.

3Tzajxit t-xtalbil Kman Dios tuya Kaaw Jesucristo cyibaja, bix cyuꞌnxit-xin chi temey tuj ttz̈yal.

4E xiꞌ tkꞌon tiib Jesucristo tuꞌn tbyet tuꞌn kil, tuꞌntzen kclet tuꞌnxin tiꞌj kaꞌ at jaꞌlewe twitz txꞌotxꞌ. E cyimxin cuma juꞌ e tajbe Kman Dios.

5¡Jawxit nimset Kman Dios te junx maj! Juꞌxit ttena.

Mintiiꞌ juntl xnakꞌtzbil tiꞌj ti tten tuꞌn kclet

6Key ocslal, ma baj ncꞌuꞌja tiꞌj ma bint cyuꞌna. Ma bint nuk cab kꞌij ocslankey tiꞌj jaxxix yol e xiꞌ nkꞌumena cyey. Pero jaꞌlewe ma tzakꞌ cyjel cycyeꞌyena Dios. E tzaj tkꞌoꞌn Dios tuꞌn cycleta nuk tuꞌnj xtalbil kꞌoꞌn cyey tuꞌn Cristo, pero cyaja tuꞌn cyoc lpey tiꞌj junxitl xnakꞌtzbil.

7Mintiiꞌ juntl xnakꞌtzbil tiꞌj ti tten tuꞌn cycleta, pero at juun cyxola nchi chꞌixben nxnakꞌtzbila te tzpetsal cyey. Cyajxin tuꞌn t-xitj jjaxxix xnakꞌtzbil tiꞌ Cristo.

8Junx xnakꞌtzbil tuꞌn cyclet xjal, jaj e xiꞌ nkꞌumena cyey. Ka at jun xjal ma t-xnakꞌtza juntl xnakꞌtzbil tiꞌj ti tten tuꞌn kclet, tzajxit tsbuꞌn Dios ja, amale inayenta bix ka jun tsanjel Dios tuj cyaꞌj.

9Juntl maj cxeꞌl nkbaꞌna jma txiꞌ nkbaꞌna cyey, ka at jun xjal ma t-xnakꞌtza juntl xnakꞌtzbil twitzj xnakꞌtzbil ocslankey tiꞌj, ¡tzajxit tsbuꞌn Dios ja!

10Cyiw chꞌin nyola, pero jeyꞌ, tuꞌnj ja cyiw yol lu, ¿yaaꞌmpa tzinen tuj cywitza ncyꞌiya nuk tuꞌn wela baꞌn tuj cywitz xjal? ¿Wajpiya tuj cywitza nuk tuꞌn cyyolen xjal baꞌn wiꞌja, tisen cykbaꞌn juun cyxola? ¿Yaaꞌmpa tzinen waja nuk tuꞌn wela baꞌn tuj twitz Dios? Nuket oc wipena nuk tuꞌn wela baꞌn tuj cywitz xjal, yaaꞌntzenle jax jun t-akꞌanal Cristo kena.

E yole Pablo tiꞌj ti tten tej toc te t-xel Jesús

11Key ocslal, ilxsen tiꞌj qꞌuelel cyniꞌya tiꞌj jbaꞌn xnakꞌtzbil tiꞌj colbil ke e xiꞌ nkꞌumena cyey, yaaꞌn cyyol xjal.

12Yaaꞌn kꞌoꞌn weya cyuꞌn xjal, bix min in xnakꞌtzana tiꞌj. Jax Jesucristo e tzaj tyeecꞌan weya.

13Cxeꞌl nkbaꞌna cyey ti tten e wiikꞌa jxnakꞌtzbila tuꞌn Cristo. O cybiy ti e bint wuꞌna tej nxiꞌ lpeya tiꞌ cyley judío. Nimxsen in kꞌojla cyiꞌj t-xjal Dios tuꞌn cyxiꞌxin tuj tzeeꞌ bix tuꞌn cycubxin, tuꞌntzen tcub xitj cyocslablxin tiꞌ Cristo.

14Bix mas cyiw in tiina tuj cyley judío cywitzj chꞌixcꞌa yaaꞌn cykilcatl ntanema. Nim oc wipena tiꞌj tuꞌn cyniman cykil ntanema kej costumbre otk cyaj cykꞌoꞌn ke wiyꞌjila.

15Pero amale in kꞌojleta tiꞌ Dios, pero tuꞌn t-xtalbilxin weya e takꞌxin weya wajbena texin. Tej mitknaꞌx witzꞌja, ya scyꞌoꞌntl kena tuꞌnxin. Bix tej tpon tumel tuj twitzxin,

16e takꞌxin weya tuꞌn tel nniꞌya tiꞌj Tcwalxin, tuꞌntzen t-xiꞌ nkꞌumena tiꞌ Tcwalxin cyej xjal yaaꞌn judío. Tejtzen tel nniꞌya tiꞌ Tcwalxin, min in xiꞌya cyuya xjal tuꞌn t-xiꞌ nkanena ka iyꞌnen cyilbil tiꞌj.

17Jax min in xiꞌya cyuya kej t-xel Jesús tuj tnom Jerusalén, ejeeꞌj oc te t-xel Jesús nejl nwitza. Nuk oꞌcx in xiꞌya nakch tuj txꞌotxꞌ te Arabia tuꞌn ntena njunala jaaꞌ min-al xjal. Mas yaj, in ajtz meltzꞌaja tuj tnom Damasco.

18Min in xiꞌya tuj Jerusalén tuꞌn nyolena cyuya t-xel Jesús tejxe tbint oxe jnabkꞌi ttzajlen tyeecꞌan Dios Tcwal weya. Mancꞌbiltzen in xiꞌya Jerusalén tuꞌn wlontiya twitz Pedro, pero nuk olaaj kꞌij in tena tuyaxin.

19Bix min-al juntl t-xel Jesús e wila. Nuk oꞌcx t-xelxin Jacobo e wila, jxin titzꞌen Cawel kxol.

20Jnxiꞌ nkbaꞌna cyey, jax wuꞌna. Ttzkiꞌn Dios min nchin ẍtakꞌena.

21Yajxitltzen, bix in xiꞌya cyuj ke departamento Siria bix Cilicia.

22Min in cyaja cyxol niyꞌtl t-xel Jesús cyuj tja Dios tuj departamento Judea. Kej ocslal tiꞌ Cristo eteꞌ tjakꞌ cyxnakꞌtzbil t-xel Jesús, mi nuket cytzkiꞌn nwitza.

23Pero ejeeꞌj ocslal el cyniyꞌ tiꞌj ka jaxxix xnakꞌtzbil e nkꞌumena, cuma e cybixin cyyol kej ocslal otk chi nyajlaya nejl. Tz̈i kej ocslal otk chi yajlet wuꞌna: “Jxin xjal e tyajla ejooꞌya nejl, jaꞌlewe ntkꞌumentlxin kocslabl, jaj kocslabl oc tipenxin tiꞌj nejl tuꞌn t-xitj,” tz̈ikexin.

24Bix tej cybinte ocslal tuj Judea ja yol lu, nimxsen e jaw cynimsaꞌnxin Dios wiꞌja.