1 CORINTIOS 7 - Mam of Todos Santos -- Guatemala Unicode

Jun xnakꞌtzbil tiꞌj mejoblenel

1Key hermano, ya pon t-xel wuꞌna tiꞌ nimcꞌa cykanbila tuj cyuꞌja o tzul wuyena. O tzaj cykanena weya ka baꞌn tuꞌn miꞌn chi majey. Cxeꞌl nkꞌumena cyey mas baꞌn jaꞌlewe tuꞌn miꞌn chi majey tuya xuuj, cuma cyiw taꞌ twitz txꞌotxꞌ jaꞌlewe.

2Pero at nim niyꞌbebl cyxol xjal tuꞌn cyxiꞌ tiꞌ pajbaj. Juꞌ tzunj mas baꞌn tuꞌn tten t-xuꞌl juun xinak, bix tuꞌn tten tchmil juun xuuj.

3Yaltzen jun xuuj at tchmil, oj taj xuuj tzꞌoc ipan tchmil tiꞌj, il tiꞌj tuꞌn tcuyante xinak. Juꞌxsen jun xinak, ka taj tzꞌoc ipan tiꞌ t-xuꞌl, il tiꞌj tuꞌn tcuyante xuuj.

4Jun xuuj yaaꞌn jax taaw t-xumlal. Mintiiꞌ tuꞌn tel t-xooꞌn tchmil tuj wetbil oj taj tchmil. Jax juꞌx xinak, yaaꞌn xinak taaw t-xumlal. Yaaꞌn baꞌn tuꞌn t-xiꞌ tkbaꞌn ka tcyꞌi oj taj t-xuꞌl.

5Juꞌ tzunj miꞌn cub t-xqꞌueyen tiib jun te juntl. Pero katzen at jun moj najlel cyaj cyniman jun chꞌin tyem tuꞌntzen cynaꞌn Dios tiꞌ jun cypena, baꞌnte. Pero miꞌn cub cypaꞌn cyiib nim kꞌij, tuꞌn miꞌn chi cub caman tuꞌn taaw il tuꞌn t-xiꞌ cyjyoꞌn juntl pajbaj tuꞌnj mlay cypa.

6Entonces baꞌn tuꞌn cymajey. Yaaꞌn lojoꞌnkey tiꞌj tuꞌn cymajey, sino nuk jun tumel ma txiꞌ nkꞌumena cyey ka cyaja chi majey.

7Pero tuj nwitza baꞌnxitle cykil xjal min-al cyxuꞌl, tisen inayena min-al nxuꞌla. Pero n-el nniꞌya tiꞌj min o takꞌ Dios te cykilca tuꞌn cypante min-al cymoj.

8Entonces jtumel nxiꞌ nkꞌoꞌna cyej xjal sortelx bix cyej xjal viuda, mas baꞌn tuꞌn cycyaj min-al cymoj, tisen inayena.

9Pero ka mlay cypa, mas baꞌn tuꞌn cymaje, cuma mas baꞌn at cymoj twitzj nchi kꞌaꞌbac tiꞌ juntl pero mlay bint cyuꞌn.

10Yaltzen cyej xjal najlel bix ocslalke, cxeꞌltzen nkꞌumena mas tumel cye. Pero yaaꞌn nuk wexwe nyol, sino te te Kaaw tyol. Jun xuuj miꞌn cyaj tcyeꞌyen tchmil.

11Pero katzen ma cyaj tcyeꞌyen jun xuuj tchmil, ya miꞌn majetl tuya juntl xinak. Baꞌn tuꞌn tcub ten tjunal, bix baꞌn tuꞌn tcub tnincꞌun tiib tuya tchmil juntl maj. Jax juꞌx te xinak, mintiiꞌ tuꞌn tex tlojoꞌn t-xuꞌl.

12Ja tzunkej xjal najlel bix at jun yaaꞌn ocslal, mlay chin n-oc ten kꞌumlte ti toc tuꞌn Kaaw tiꞌj, pero jacꞌa t-xiꞌ nkꞌumena cyey jun tumel. Ka at jun xinak ocslal pero yaaꞌn ocslal t-xuꞌlxin, bix taj xuuj weꞌ tuyaxin, miꞌn tuꞌn tcub tpaꞌn tiibxin tuyaxuj.

13Bix jax juꞌx ka at jun xuuj ocslal pero yaaꞌn ocslal tchmilxuj, bix tajxin tnajleꞌnxin tuya t-xuꞌlxin ocslalxuj, jax miꞌn tuꞌn tcub tpaꞌn tiibxuj tuyaxin,

14cuma oj tnajanxin tuya jun t-xuꞌlxin ocslal, ntkꞌoꞌn Dios t-xtalbil cyibaj nuk tuꞌnj ocslal t-xuꞌlxin, amale yaaꞌnt ocslal xinak. Jax juꞌx jun xuuj yaaꞌn ocslal, ntkꞌoꞌn Dios t-xtalbil cyibaj nuk tuꞌnj ocslal tchmilxuj. Katzen ma cub cypaꞌn cyiib, yaltzen ke cycwal matzen cheꞌx cyxol ke xjal yaaꞌn ocslal, bix mas chi xeꞌl tuj il.

15Jatzen jun najlel yaaꞌn ocslal bix taj tuꞌn tcub tpaꞌn tiib tuya tmoj ocslal, baꞌn tuꞌn t-xiꞌ tzakpet. Min-al nkꞌon il tiꞌj tuꞌnxix tweꞌ tuyaj tmoj. Ka tuj fuerzal ctemela tuya jun tmoj ocslal, nuk kꞌoj taj, bix yaaꞌn baꞌn tuj twitz Dios, cuma te Dios taj tuꞌn knajan tuj ttz̈yal.

16Tuj cywitza, ka jun xjal yaaꞌn ocslal at tuya tmoj ocslal, chebe cꞌoquel ocslal. Pero at maj yaaꞌn juꞌwa. Key hermano, mintiiꞌ tumel ka cꞌoquel tmoja ocslal, amale tent tmoja tuyey cykil tyem ojxe tcyim.

17Entonces, key hermano, mintiiꞌ il tiꞌj tuꞌn tbaj cychꞌixben cyiiba tuꞌn cyxiꞌ lpey tiꞌj Kaaw. Ka najlelkey, cyiiꞌnx cynajleꞌna. Bix ka sortelkey, cyiiꞌnx sortelxkey. Ja yol lu nxiꞌ nkꞌumena, inayena Pablo, tuj cykilca tja Dios. Chi tenxixa tuj ttxubtxjal tuya alcye kꞌoꞌn tuꞌn Dios cyey tej cyocslana.

18Ka judíokey tej cyocslana, miꞌn chi labta ejeeꞌy xinak tuꞌnj ttzꞌumel el cpet twiꞌ cytzꞌalbila te yecꞌbil judíokey. Bix ka yaaꞌn judíokey tej cyocslana, yaaꞌntzen il tiꞌj tuꞌn toc jtechel judío cyiꞌja.

19Tuj twitz Dios yaaꞌn il tiꞌj ka jun xjal kꞌiꞌnx techel judío tuꞌn, bix ka min. Ja te mas il tiꞌj ka ma txiꞌ cyocslaꞌna Dios.

20Jaca juun xjal tuꞌn tten tisex tten tej toc ocslal.

21Ka akꞌanankey tuj jun cyiw taakꞌen cypatróna tej cyocslana, miꞌn baj cycꞌuꞌja tiꞌj. Pero ka ma ttzakpi cypatróna ejeeꞌy, cycuyam.

22Ka akꞌanankey tjakꞌ tcawbil cypatróna tej cyocslana, mintiiꞌ nbaj tuꞌn, cuma o chi etza tuj tkꞌab taaw il. Pero ka min-al cypatróna tej cyocslana, yal te jaꞌlewe ya attzen cypatróna, ja Kaaw Cristo. Ke cyey yaaꞌn ejeeꞌy taaw tibaj ti taj cyxumlala. Juꞌ tzunj, tuj tcwent Cristo, tzakpiꞌn koꞌ bix tzyuꞌn koꞌ.

23Tzyuꞌn koꞌ, cuma o ko tlokꞌ Kaaw tuya jun nim chojbilte. Juꞌ tzunj miꞌn cyaj kkꞌoꞌn Kaaw nuk tuꞌnj kkꞌon kiib alcye cyaj xjal.

24Entonces, key hermano, mintiiꞌ il tiꞌj tuj twitz Dios ti cytena tej cyocslana. Ja te mas il tiꞌj, jaj tuꞌn kxiꞌ lpe tiꞌ Dios, bix tuꞌn kten tuj ttz̈yal.

25Bueno, e tzaj cykanena weya cyiꞌj txin xuuj minaꞌn cymajeꞌ, ka baꞌn tuꞌn cymajetxin. Amale minttiiꞌxix o tzaj tkꞌumen Kaaw weya tiꞌj lu, pero cxeꞌl nkꞌumena jun tumel cyey. Tzꞌoc kex cycꞌuꞌja tiꞌ jun nyola, cuma tuꞌn t-xtalbil Dios wibaja, n-oc ke tcꞌuꞌj Kaaw wiꞌja.

26Ya cytzkiꞌntla at nim yajbil tzul. Juꞌ tzunj, baꞌnxittzele tuꞌn miꞌn maje jun xjal.

27Ka najlela, miꞌn cub tpaꞌn tiiba. Pero katzen yaaꞌn najlela, miꞌntzen majey tuj ja kaꞌ tyem jaꞌlewe.

28Pero ka cyaja chi majey, baꞌnte. Bix xsunkej txin sortel oj cymajetxin, yaaꞌn jun il tuj twitz Dios. Oꞌcx cxeꞌl nkꞌumena nimx qꞌuixcꞌaj chi iꞌyela tuj cynajleꞌna tuꞌn tikꞌch ilel tzul, bix waja tuꞌntzen miꞌn cycꞌulbay nim qꞌuixcꞌaj.

29Key hermano, cxeꞌl nkꞌumena cyey juntl maj il tiꞌj cwel kbisen tiꞌj cyuj ja cyiw tyem lu. Ya yaaꞌn nimtl tyem etoꞌ tuj ttz̈yal. Chꞌix t-xiꞌ twitz txꞌotxꞌ tuj il. Juꞌ tzunj il tiꞌj tuꞌn t-xiꞌ kiiꞌn tuꞌn kakꞌanan te Dios. Mas nintzaj tuꞌn kkꞌon kiib tuj taakꞌen Dios twitzj nuk nko ajkel tiꞌ tikꞌch at twitz txꞌotxꞌ, cuma cykilca pjel. Kej at cyxuꞌl, miꞌn nuk cykꞌon cyiib oꞌcx te najlel

30Bix kej at nim bisbajil cyiꞌj, miꞌn cybis tzꞌoc nuk oꞌcx takꞌ cye. Bix kej nuk nchi tzalaj, miꞌn txiꞌ cybisen nuk oꞌcx chi tzalajel. Bix kej nchi lokꞌon, miꞌn txiꞌ cybisen nuk oꞌcx nchi lokꞌon.

31Bix kej nchi tzalaj tiꞌ tikꞌch at twitz txꞌotxꞌ, miꞌn nuk ja tzꞌoc tilel cyuꞌn. Cykilca pjel. Nuk jaj te Dios cyjel.

32Entonces, ncyꞌiwa cykꞌon cyiiba nuk te cykilca at twitz txꞌotxꞌ, sino jaj te Kaaw taakꞌen cꞌoquel cykꞌoꞌna il tiꞌj. Juꞌ tzunj mas baꞌn tuꞌn cytena sortel, tuꞌntzen mas t-xiꞌ cyiiꞌna taakꞌen Kaaw.

33Pero jun xinak najlel mas najkel tuya ti chi itzꞌjela tcwal bix tuꞌntzen aleyre t-xuꞌl. Jatzen xjalja minxix pon tcꞌuꞌj tiꞌ taakꞌen Kaaw.

34Jax juꞌx jun xuuj. Ka yaaꞌn najlel, mas kꞌiꞌn taakꞌen Kaaw tuꞌnxuj. Pero katzen at tchmilxuj, mas juꞌ naj tcꞌuꞌjxuj tiꞌ tchmilxuj tuꞌntzen aleyrexin tuyaxuj.

35Cykilj nyola lu nxiꞌ nkꞌumena cyey tuꞌn tajben cyey. Yaaꞌn tuꞌn nchi oc nlojoꞌna tuꞌn miꞌn chi majey, sino nuk waja tuꞌn cyajbena mas te Kaaw.

36Katzen at juunkꞌa cyajxix n-oc juch cycꞌuꞌj tuꞌn cymaje, bix min tzꞌel cyganakꞌa tuꞌn cymajekꞌa cyuyatxin, baꞌnxitnele tuꞌn cymaje. Baꞌn oj cymajekꞌa cyuyatxin, cuma yaaꞌn kaꞌ oj cymaje.

37Pero ka jun xinak taj tuꞌn tcub ten tjunal, bix katzen baꞌn tuꞌn tpante tuꞌn tiyꞌx tuꞌn tuꞌn miꞌn tajbe xuuj, baꞌntzen tuꞌn miꞌn maje tuya jun xuuj.

38Juꞌ tzunj, jaj xinak cmajebel, baꞌn tbint tuꞌn. Pero ja tzunj miꞌn maje, mas baꞌn cbinel tuꞌn.

39Tuꞌn tpon baj nyola tiꞌj mejoblenel, il tiꞌj tuꞌn tten jun xuuj ocslal tuya tchmil ka iꞌtzx tchmil. Pero katzen ma cyim tchmil, baꞌntzen tuꞌn tmaje xuuj tuya juntl tchmil ka ocslalxin.

40Pero tuj nwitza mas aleyrexuj ka miꞌn ma majexuj juntl maj. Bix tuj nwitza cuyan tuꞌn Espíritu Santo tuyaj yol lu.