ROMANOS 13 - Mam of Todos Santos -- Guatemala Unicode

1Entera key il tiꞌj cxeꞌl cynimana kej cawel te twitz txꞌotxꞌ, cuma ja Dios o cyaj kꞌonte tuꞌn at cawbil twitz txꞌotxꞌ, bix ja Dios o cyaj kꞌonte tuꞌn at kej nchi cawen cyibaj xjal.

2Juꞌ tzunj, ka min txiꞌ cyniman xjal kej cawel, nchi kꞌojltzen tiꞌj cawbil o tzaj tkꞌoꞌn Dios bix ckꞌojeltzen cycastiwa cyuꞌn cawel,

3cuma o kꞌoj cye cawel yaaꞌn tuꞌn cykꞌonte castiwa te cyej xjal nchi binchan baꞌn, sino nuk oꞌcx te cyej xjal nchi binchan kaꞌ. Ka cycyꞌiy tzaj ttz̈i ke cawel cyiꞌja, jaj baꞌn cybinchama, bix baꞌn chi eleley tuj cywitz.

4Cxeꞌl cybiꞌna ke cawel, cuma ja Dios o cyaj kꞌonte cycawbil tuꞌn cycawen te jun baꞌn te cyey. Pero ka kaꞌ nbint cyuꞌna, nuktzen eteꞌqꞌuey tz̈iyel cywitz, cuma yaaꞌn nuk cyajx at cawbil cyuya. Ja te Dios o kꞌonte cycawbil tuꞌn cykꞌonte cycastiwa kej nchi binchan kaꞌ.

5Juꞌ tzunj il tiꞌj cxeꞌl cynimana ke cawel. Pero yaaꞌn nuk oꞌcx tuꞌn miꞌn chi cuba tuj castiwa, sino cuma taj Dios tuꞌn t-xiꞌ cynimana ke cawel.

6Bix chi choola alcyej tzin cykanen cawel, cuma Dios o cyaj kꞌonte ke cawel tuꞌn cycawen, bix tiꞌj nchi cawen, nchi ajben te Dios.

7Juꞌ tzunj chi choola alcyej il tiꞌj tuꞌn cykꞌontey cye cawel, jaaꞌxja tumel tuꞌn tchjet. Cxeꞌl cynimana alcyekej at cyoclen tuꞌn cynimj, bix ctemel chꞌin cynaabla cywitz kej at tuꞌn cyiikꞌente cynaabla.

8Ka cꞌasbenelkey, miꞌn tzꞌel tuj cycꞌuꞌja tuꞌn cychjontey. Pero ja tzunj tkꞌakꞌbil cycꞌuꞌja cyxola tisen cycꞌasbena mlay tweꞌ. Juꞌ tzunj cucx tzꞌoc cyakꞌ cyuyey cyey. Ka n-oc cyakꞌ cabtl cyuyey cyey, nbinttzen cykilcaj tzin tkbaꞌn ley cyuꞌna.

9Tzin tkbaꞌn ley cyjulu: “Miꞌn tzꞌel cyiiꞌna t-xuꞌl cyuyey. Miꞌn cub cybyoꞌna xjal. Miꞌn chi alkꞌana. Miꞌn tzꞌoc cyachena tikꞌch at,” tz̈i ley, bix at mastl tzin tkbaꞌn. Jax juꞌx tzin tkbaꞌn tyol Dios cyjulu: “Tisenx cycꞌojlan cyey cyiiba, juꞌxsen cꞌoquel cyakꞌ cyuyey cyey,” tz̈i tyol Dios. Ka juꞌ nbint cyuꞌna, nchi niman tzuna cykilcaj tzin tkbaꞌn ley.

10Ka n-oc cyakꞌ xjal cyey, mintzentiiꞌ kaꞌ n-oc cybinchena cyiꞌj juꞌwa. Juꞌ tzunj nchi niman tzuna alcyej tzin tkbaꞌn ley oj n-oc cyakꞌ cyuyey cyey.

11Cykilca tzunj lu ma txiꞌ nkbaꞌna cyey, iltzen tiꞌj tuꞌn tbint cyuꞌna, cuma ktzkiꞌn ma pon tumel tuꞌn tel kelsaꞌn kwatl. Nimxe tyem o tzꞌex toclen kocslaꞌn Cristo, bix tzajnen ttzaj lkꞌe jkꞌij tuꞌn tulxin te clol ke.

12Cpomel baj twiꞌ jkꞌij tuj kloljil etoꞌ. Jkꞌij te tulel Cristo ma tzakꞌ ulel lkꞌe. Tisencꞌa chꞌix kskix. Juꞌ tzunj cyjel cykꞌoꞌn ja kaꞌ nbint tuj kloljil, bix cybinchama jbaꞌn nbint tuj spiꞌyen.

13Cxeꞌlxix kiiꞌn kchunkꞌlal tuj tumel, yaaꞌn tisen kej eteꞌ tuj kloljil. Miꞌn cybinchay tisen kej xjal nchi bolayin bix nim s̈itz̈ꞌbil eteꞌ. Miꞌn chi binchana tuya pajbaj bix tikꞌch taj cyxumlala. Miꞌn chi jyona kꞌoj cyxola, bix miꞌn chiꞌl cycꞌuꞌja tiꞌ juntl.

14Jcbinel kuꞌn jaj cxeꞌlxix kiiꞌn jun knaabl junx tuya tnaabl Kaaw Jesucristo. Oj taj tnaabla aj il tuꞌn tbinchan il, miꞌn txiꞌ tnimana.