2 CORINTIOS 5 - Mam of Todos Santos -- Guatemala Unicode

1Amale tuꞌnt taakꞌen Dios chin cwel byeta, pero min chin xyutꞌena tiꞌj, cuma ktzkiꞌn oj tbaj twiꞌ kxumlal, kcaman jun acꞌaj kxumlal. Cjawel bint, yaaꞌn cyuꞌn xjal, sino tuꞌn Dios, bix cꞌajbel te junx maj tuj cyaꞌj.

2Tej tiꞌj lux koꞌ etoꞌ tuj kxumlal te jaꞌlewe, nim qꞌuixcꞌaj at kiꞌj. Juꞌ tzunj kaj tuꞌn kocx tuj juntl kxumlal acꞌaj tuj cyaꞌj.

3Jaxxixte ko oquel tuj jun acꞌaj kxumlal, tuꞌntzen yaaꞌn ẍbikl kanem.

4Tej tiꞌj lux kxumlal at jaꞌlewe, nim qꞌuixcꞌaj niyꞌx tuꞌn, bix nim bisbajil toc kiꞌj. Pero amale atet qꞌuixcꞌaj, ja te kaj, yaaꞌn tuꞌn kcyim, sino tuꞌn kocx tuj juntl kxumlal acꞌaj. Kaj tuꞌn toc jmiꞌn baj te t-xel jpjel.

5Ja te Dios o binchante ke tuꞌn at juntl acꞌaj kxumlal, bix o tzaj tkꞌoꞌnxin Espíritu Santo tuꞌn tten kuya, te techel il tiꞌj cbinel tuꞌnxin tuꞌn at acꞌaj kxumlal te junx maj.

6Juꞌ tzunj, key hermano, ma cywix ncꞌuꞌja. Ntzkiꞌna ntiinxa tuya kxumlal te jaꞌlewe, bix minaꞌx npona tuya Kaaw.

7Amale minaꞌxet toc ncyeꞌyena twitzxin, pero cnlaꞌya twitzxin tuꞌnj o tzꞌoc ke ncꞌuꞌja tiꞌ Dios.

8N-el nniꞌya tiꞌj ti pjel wiꞌja, bix nchin ayona tuꞌn wexa tuj nxumlala at jaꞌlewe, tuꞌntzen npona tuya Kaaw.

9Juꞌ tzunj waja tuꞌn wela baꞌn tuj twitz Kaaw. Katzenle tuꞌnj taakꞌen Kaaw chin cymela, bix ka min, pero cꞌoquelx wipena tiꞌj tuꞌn wela baꞌn tuj twitzxin,

10cuma cykilca ke ocslal ko pomel twitz Cristo laꞌ alcye jun kꞌij, tuꞌntzen toc tcyeꞌyenxin cykilcaj e bint kuꞌn twitz txꞌotxꞌ. Ka baꞌn e bint kuꞌn, kcaman jun kcotz tiꞌj. Pero ka min e bint baꞌn kuꞌn, cxeꞌl kxooꞌn kcotz.

Nkbaꞌn Pablo cye xjal tuꞌn tbint cyten tuya Dios

11N-el nniꞌya tiꞌj cꞌoquel tcyeꞌyen Kaaw ti tten in akꞌanana tuj taakꞌenxin. Juꞌ tzunj nimxix cnnimiya, bix juꞌ tzunj n-oc wipena tiꞌj tuꞌn tcub cyiꞌ xjal tuꞌn cyocslan tiꞌj Cristo. Ttzkiꞌn Dios nchin kꞌumena tyol tuj tumelxix, bix nuket juꞌx cyey tzꞌelxit cyniꞌya tiꞌj nchin kꞌumena tyolxin tuj tumel.

12Nxiꞌ nkbaꞌna nchin akꞌanana tuj tumel, yaaꞌn te nimbil wiiba cywitza, sino nxiꞌ nkbaꞌna tuꞌntzen baꞌn cyyola wiꞌja cyej xjal nchi binchan taakꞌen Dios, yaaꞌn tuꞌn cyajxix chi ajben te Dios tuya cykil cyanem, sino nuk te cycyeꞌybil xjal.

13Yal weya, jnbint wuꞌna yaaꞌn tuꞌn toc cyniman xjal nbiꞌya. Ka nchin txꞌujta tuj cywitza, pero nuk tuꞌn wajbela te Dios. Bix ka nxiꞌ nkꞌumena tuj ttxolan, tetzen tajbel te cyey. Pero mintiiꞌ nbint wuꞌna tet weya cꞌabel.

14Tuꞌnj o tbincha Cristo wiꞌja, waja tuꞌn nxiꞌ lpeya tiꞌj ti tten tuꞌnxin, bix yaaꞌn te tajbel weya. N-el kniyꞌ tiꞌj tuꞌnj oc kꞌakꞌen tcꞌuꞌjxin kiꞌj, e cyimxin tiꞌ kil. E cyimxin te kxel. Juꞌ tzunj n-el kniyꞌ tiꞌj tisen e cyim cykilca koꞌ tuyaxin.

15E cyimtzen Cristo tiꞌ cykilca koꞌ tuꞌntzen miꞌn txiꞌ kjyoꞌntl nuk tikꞌch te kex, sino tuꞌntzen kajben tej xjal e cyim te kxel bix e jatz itzꞌjxin tuj cyamecy tuꞌntzen ttzaj tkꞌoꞌnxin kchunkꞌlal te junx maj.

16Ya miꞌntl chin jyona jwexa wajbila, sino nuk jaj tajbil Cristo. Juꞌ tzunj oj toc ncyeꞌyena cynaabl xjal, ya miꞌn chin octla te mlolte cynaabl tisenj tej yaaꞌn ocslal kena. Tej yaaꞌn ocslal kena, tuj nwitza mintiiꞌ tajbel Cristo, pero jaꞌlewe min cub nbisetla juꞌwa.

17Ka at tmojbabl tiib jun xjal tuya Cristo, attzen jun acꞌaj tnaabl. Ya mintl nxiꞌ lpe tiꞌj tnaabl te ootxa, cuma ya kꞌiꞌntl jun tnaabl acꞌaj tuꞌn.

18Cykilcaj lu jatzen jun t-xtalbil Dios kibaj. Nejl aj kꞌoj koꞌ tiꞌ Dios, pero jax Dios e binchante tuꞌn tcyim Cristo twitz cruz, tuꞌntzen tbaj tilel kkꞌoj tuya Dios. Bix o tzaj tkꞌoꞌn Dios jwaakꞌena te kꞌumlte cye cykil xjal tuꞌntzen tweꞌ jcykꞌoj tuya Dios.

19Nxiꞌ nkꞌumena Dios e binchante o tzꞌoc Cristo tuj castiwa nuk tiꞌ cyil xjal. Nuk tuꞌnj tcyimlen Cristo tiꞌ cyil xjal o bint tuꞌn Dios tuꞌn tel ttzakpiꞌn ke xjal tuj castiwa. Jwaakꞌena o tzaj tkꞌoꞌn Dios, jaj tuꞌn t-xiꞌ nkꞌumena ja yol lu cye xjal.

20Juꞌ tzunj inayena jun t-xel Cristo. Tuꞌn nyola, Dios ncubsan twitz cye cykil xjal tuꞌn cyoc tuyaxin. Inayena, t-xel Cristo, nchin kbaꞌna cye xjal: “Tuꞌnxit tweꞌ cykꞌoja tuya Dios,” ntz̈i.

21Kaaw Jesús mintiiꞌ texin til. Pero ja Dios aj kꞌonte cykil kil tibaj Jesús bix o penayinxin te kxel, tuꞌntzen jiquen koꞌ twitz Dios oj at kmojbabl kiib tuya Jesús.