1 CORINTIOS 16 - Mam of Todos Santos -- Guatemala Unicode

Jun cotz cye ocslal mebe

1Cxeꞌltzen ntzakꞌbeꞌna cyey tiꞌj cykanbila tiꞌ pwak nbaj cychmoꞌna cyxol ejeeꞌy ocslal tuj Corinto tuꞌn t-xiꞌ cysmaꞌna cye mebe ocslal tuj Jerusalén. Tisenj e xiꞌ nkbaꞌna cye ocslal tuj tnom te Galacia, juꞌx cxeꞌl nkbaꞌna cyey.

2Oj cychmeta jaca tneel kꞌij te smant, jaca juun cyey qꞌuelel cyiiꞌna chꞌin tiꞌj pwak ma cycamey tuj smant, tuꞌn tcub cykꞌoꞌna te ofrenda. Ka nim chꞌin ma cycamey, jaxle baꞌn tuꞌn nim chꞌin cwel cykꞌoꞌna, bix ka yaaꞌn nim ma cycamey, jax yaaꞌn nim chꞌin cy-ofrendey. Juꞌtzen cychmetel cy-ofrendey nim. Ka nchi ayona ojxe npona cyxola tuꞌntzen tcub cykꞌoꞌna cy-ofrendey nuk te jun kꞌij, yaaꞌnxix nim pwak cychmetel.

3Oj npon cyxola, bix cyjoya cab xinak baꞌnxix tuꞌn t-xiꞌ cyiiꞌn jcy-ofrendey maa tuj Jerusalén. Bix cxeꞌl nkꞌoꞌna cyuꞌj tzin cykbaꞌn alcyekexin bix ti cysanlalxin, tuꞌntzen mintiiꞌ chi oc iyꞌkꞌanxin tuj be tiꞌ pwak.

4Bix ka at amleꞌn wiꞌja, chin xeꞌl tzuna cyuyaxin.

Tej tcub tbisen Pablo tiꞌj tuꞌn t-xiꞌ tuj tnom Corinto

5Ojtzen nxiꞌy cyuyey, chin iꞌyel tzuna tuj Macedonia te cyeyꞌlcye ke ocslal jatzewe. Bix yajtltzen chin pomela cyuyey.

6Kape chin cyjela cyxola nim kꞌij. Kape enterax jbalel chin temela. Bix yajtltzen chin cyonena tzuna tuꞌn ttzyet nbeꞌya, laꞌ alcye be cxeꞌl wiiꞌna.

7Ka ma takꞌ Dios, waja chin tena cyxola nim tyem. Yaaꞌn nuk chin xeꞌl aalxe te cab kꞌij.

8Pero te jaꞌlewe chin cyjela tzalu tuj tnom te Efeso hasta ojxe tbaj jninkꞌij Pentecostés,

9cuma tzalu ma tzaj tkꞌoꞌn Dios weya tuꞌn nkꞌumena tyol Dios nim, bix at nim xjal n-oc ebinte, amale atet nim xjal nkꞌojlec wiꞌja.

10Pero cpomel nej Timoteo nwitza cyuyey. Jakꞌa nakꞌanan tuj taakꞌen Kaaw tisen inayena. Pero attzen chꞌin ttz̈i. Juꞌ tzunj, oj tponkꞌa cyxola, ccyiikꞌel chꞌin kꞌey tuj tumel, tuꞌntzen tel ttz̈i tiꞌjkꞌa.

11Miꞌn tzꞌel cyiiqꞌuen chꞌina, sino bix chi onen chꞌina tiꞌjkꞌa, tuꞌntzen tul meltzꞌajkꞌa wiꞌja tuj ttz̈yal. Cnyoꞌkꞌa tzalu tuyax cabtl ocslal hasta ojxe tul meltzꞌajkꞌa.

12Yaltzen te Apolos, nim ma chin cubsan nwitza te tuꞌn t-xiꞌ tjunen tiib cyuyaj xjal tuꞌn tpon cyiiꞌn ja uꞌj lu cyey, pero tcyꞌixin t-xiꞌxin jaꞌlewe. Pero kape ponxin mas yaj oj ttzaj amleꞌn tiꞌjxin.

Jun kꞌolbebl tuꞌn Pablo cye ocslal tuj tnom Corinto

13Mancꞌbiltzen, key hermano, tuꞌn tbaj twiꞌ nyola cyuyey, cxeꞌl nkbaꞌna cyey tuꞌn cyitzꞌlente cyiiba, bix tuꞌn chi weꞌbilxixa tuj kocslabl tiꞌ Cristo, bix miꞌn chi cub yutꞌpaja tuꞌn ttz̈i, sino cyiw chi oqueley, bix tuꞌn toc cyipey,

14bix cykilca ti pjel cybinchama, tuyaxix tkꞌakꞌbil cycꞌuꞌja.

15Wajtzen tuꞌn tel cyniꞌya tiꞌ Estéfanas bix tiꞌ ke te tja. Cytzkiꞌntl tzuna tuj enterax txꞌotxꞌ te Acaya, Estéfanas cyuya ke te tja ejeeꞌtzen tneel ocslalja, bix nim o chi akꞌanan tuꞌn cyajben cye niyꞌtl ocslal.

16Juꞌ tzunj nchin cubsana nwitza cyey tuꞌn cyxiꞌ lpey tiꞌ tnaablxin, bix tuꞌn t-xiꞌ cyiiꞌna tisen kej xjal nchi onen cyiꞌ cabtl xjal tisenxsen jaxin.

17Yal te weya, junxe chꞌin njunala tzalu, cuma min-al key wuyena. Pero nchin tzalaja o chi ulj oxe xjal te cytanema wuyena tzalu, jatzen Estéfanas tuya Fortunato bix tuya Acaico.

18Ejeeꞌ tzunxin o tzaj nimsante ncꞌuꞌja, bix oj cypon meltzꞌaj cyxola, juꞌx cxeꞌl cynimsaꞌn cycꞌuꞌja. Juꞌ tzunj cꞌoquel cybiꞌna bix cyocslay cyyol.

19Yaltzen ke ocslal cye ke tja Dios tzalu tuj txꞌotxꞌ te Asia, nxiꞌ cykꞌoꞌn jun kꞌolbebl te cyey jatzewe. Bix kej ocslal nchi chmet tuj culto tuj cyja Aquila bix Priscila nxiꞌ cykꞌoꞌn tuya cykil cycꞌuꞌj jun kꞌolbebl te cyey.

20Bix nxiꞌ cykꞌoꞌn jun kꞌolbebl te cyey cykil ocslal tzalu tuj tnom te Efeso. Bix juꞌx cyey, cykꞌolbem cyiiba tuya nim tkꞌakꞌbil cycꞌuꞌja.

21Jax juꞌx inayena, Pablo, nxiꞌ nkꞌoꞌna jun kꞌolbebl te cyey, pero yaaꞌn jun ntzꞌiꞌbila ncub tzꞌiꞌbente nkꞌolbebla, sino inayena.

22Ka at jun xjal mintiiꞌ chꞌin tkꞌakꞌbil tcꞌuꞌj tiꞌ Kaaw, sbuꞌnxittzen taꞌ.

Tzulxit Kaaw Jesús.

23Cyiikꞌaxita t-xtalbil Kaaw Jesús.

24Te cykilca tzunkey n-oc ke cycꞌuꞌja tiꞌ Cristo Jesús, nxiꞌ nsmaꞌna wanema cyibaja.

Oꞌcx nyolja.