ROMANOS 14 - Mam of Todos Santos -- Guatemala Unicode

Yaaꞌn baꞌn cyyolena kaꞌ tiꞌ juntl ocslal tiꞌj alcye wik twa

1At juun ocslal tuj cywitz at il tiꞌj tuꞌn cyniman nim ley tuꞌn cyel baꞌn twitz Dios. Ncub cykꞌoꞌn pablte cywa cychiꞌ cycꞌaꞌ, bix nchi niman kꞌij te nimbil, amale yaaꞌntl il cyiꞌj lu tuj twitz Dios. Cyiikꞌemke cyxola kej ocslal lu minaꞌx tel cyniyꞌ tiꞌj, pero yaaꞌn te cyiilbila tiꞌj cynaabl kꞌiꞌn cyuꞌn juꞌwa.

2Ja tzunkej ocslal n-el cyniyꞌ tiꞌj, cytzkiꞌn baꞌn tuꞌn t-xiꞌ cyniyꞌbeꞌn cykilca wikan chiꞌpj. Pero kej ocslal min tzꞌel cyniyꞌ tiꞌj tzin cykbaꞌn kaꞌx tej lu, bix juꞌ tzunj jacꞌa nuk itzaaj jacꞌa txiꞌ kuꞌn.

3Jatzen ke cyey n-el cyniyꞌ tiꞌj baꞌn tuꞌn t-xiꞌ cyniyꞌbeꞌna cykilca wikan waabj, miꞌn tzꞌel cyiiqꞌuena kej ncub cybisen yaaꞌn baꞌn tuꞌn t-xiꞌ cyuꞌn. Bix jatzen ke cyey ncub cybisena kaꞌ tuꞌn t-xiꞌ cyniyꞌbeꞌna cykilca kej lu, miꞌn chi yolena cyiꞌkej nxiꞌ cyuꞌn, cuma o tiikꞌ te Dios ejeeꞌ te t-xjal.

4¿Ejeeꞌpa tzuna at cyoclen tuꞌn cykbantey ka ma tzꞌel jun ocslal baꞌn twitz Dios bix ka min? Min, cuma j-ocslal lu te Dios, bix nuk ja te Dios kbalte ka ma tzꞌel baꞌn bix ka min. Pero miꞌn chi labta cyibaj cyuyey, cuma chi elelcye baꞌn, cuma te te Dios taakꞌen tuꞌn cyel baꞌn, bix cbinel taakꞌenxin tuꞌnxin.

5Kej ocslal min tzꞌel cyniyꞌ tiꞌj tzin cykbaꞌn at kꞌij mas jawnex te nimbil twitz Dios. At juuntl ocslal tzin cykbaꞌn cykil kꞌij juniyꞌ taꞌ twitz Dios. Cyiꞌj tzunj lu, miꞌn tzꞌoc cybiꞌna ka at xjal cyaj baj cynincꞌuꞌn alcye baꞌn te cyey, sino ejeeꞌ cyey kbalte ka cyaja cynimana jun kꞌij bix ka min.

6Kej ocslal tzin cyniman kej kꞌij mas jawnex tuj cywitz, nbinttzen cyuꞌn tuꞌntzen cyniman twitz Kaaw. Jax juꞌx kej ocslal min cyniman jun kꞌij, jax nbint cyuꞌn tuꞌn cyniman twitz Kaaw. Jax juꞌx kej ocslal nchi chyon chiꞌpj, pero yaaꞌn tuꞌn n-el cyiiqꞌuen Kaaw, sino cuma baꞌn tuj twitz Kaaw tuj cywitz. Tuj cywitz ja Dios nkꞌonte. Juꞌtzen nxaꞌ cykꞌoꞌn chjonte te Dios. Bix kej ocslal min txiꞌ cychyoꞌn chiꞌpj, jax juꞌxe cyaj cyniman Kaaw, bix jax nxiꞌ cykꞌoꞌn chjonte te Dios tiꞌj ntzaj kꞌoꞌn cye.

7Cykilca koꞌ at tzalu tuꞌn kajben te Kaaw. Yaaꞌn etoꞌ tzalu te kajbelel kwitzx. Kchunkꞌlal yaaꞌn te kex, bix hasta tuyax kcyamecy yaaꞌn te kex.

8Tuj cykilca, kchunkꞌlal-le, kcyamecyle, te texin. Ka iꞌtzx koꞌ bix ka cyimnen koꞌ, tuj tcwent-xin etoꞌ.

9Nuk tuꞌn tocxxin te Kaaw cykilca koꞌ, iꞌtzle, cyimnele, e cyimxin bix e jatz itzꞌjxin juntl maj tuj cyamecy.

10Juꞌ tzunj, ¿tumelpa oj nuk nchi txololona tiꞌj ti nbint cyuꞌn ke cyuyey? ¿Bix tumelpa oj n-el cyiiqꞌuena kej ocslal min tzꞌel cyniyꞌ tiꞌj? Min, cuma cykilca koꞌ ko pomel baj twitz Cristo tuꞌntzen toc tcyeꞌyenxin ejooꞌ ka baꞌn e bint kuꞌn bix ka kaꞌ.

11Jaxte cykilca koꞌ ko oquel tuj xkela, cuma tzin tkbaꞌn Dios tuj tyol cyjulu: “Jaxte inayena Dios iꞌtz, bix jaxte cykil xjal il tiꞌj chi oquel nwitza bix chi cwel maje nwitza, bix cykbaꞌ weya cyjulu: ‘Jay Dios,’ tz̈i cybel xjal weya,” tz̈i Dios tuj tyol Dios.

12Juꞌ tzunj, qꞌuelel kniyꞌ tiꞌj te te Dios kkꞌaꞌ kcwent tiꞌj kchunkꞌlal, yaaꞌn cye ocslal.

Miꞌn cub cyxitena jtaakꞌen Dios tuj cyanem ocslal

13Juꞌ tzunj, miꞌn tzꞌoc kcyeꞌyentl cyiꞌ cabtl ocslal laꞌ ka nbint baꞌn cyuꞌn tuj twitz Dios, sino ejooꞌj n-el kniyꞌ tiꞌj cꞌoquel tilel kuꞌn tuꞌn miꞌn bint kuꞌn j-il n-eꞌla tuj cywitzj ocslal min tzꞌel cyniyꞌ tiꞌj, tuꞌntzen miꞌn cheꞌx tuj il.

14Ntzkiꞌna mintiiꞌ chiꞌpj kaꞌ tuꞌn t-xiꞌ chyet, bix tiꞌj tzunj lu junx taꞌ nyola tuya tyol Kaaw Jesús. Pero ka at jun ocslal nkꞌumente at jun wik chiꞌpj yaaꞌn baꞌn tuꞌn t-xiꞌ chyet, bix ma txiꞌ tchyoꞌn, nbinttzen til tuꞌn.

15Ka ma txiꞌ cychyoꞌna jchiꞌpj mixbe t-xiꞌ chyet tuj twitz juntl ocslal, bix nbinttzen il tuꞌn tuꞌnj nbint cyuꞌna, ntyeecꞌantzen min tzꞌoc takꞌ j-ocslala cyey. Miꞌn txiꞌ cytzpetsaꞌna j-ocslal tuꞌn tlaj cychiꞌy tuꞌn t-xiꞌ tuj il tuꞌnj cychiꞌy nxiꞌ cyuꞌna, cuma e cyim te Cristo te te.

16Amale n-elet kniyꞌ tiꞌj cykilca wik chiꞌpj baꞌn, miꞌn txiꞌ cychyoꞌna cywitzj ocslal min tzꞌel cyniyꞌ tiꞌj, cuma ka ma bint il tuꞌn jun ocslal tuꞌnj nbint cyuꞌna, ckbajeltzen kaꞌ e bint cyuꞌna.

17Miꞌn txiꞌ cychyoꞌna jkaꞌ tuj cywitz kej ocslal min tzꞌel cyniyꞌ tiꞌj, cuma tuj tcawbil Dios yaaꞌn ja te chiꞌpj bix cꞌaꞌbj il tiꞌj, sino ja te il tiꞌj, jaj tuꞌn t-xiꞌ kiiꞌn kchunkꞌlal jiquenxix, bix tuꞌn kten tuj ttz̈yal, bix tuꞌn at tzalajebl ke tzin tkꞌoꞌn Espíritu Santo.

18Katzen juꞌ nbint kuꞌn, nko ajbentzen te Cristo, bix ctzalajtzen Dios kiꞌj, bix ko elel baꞌn tuj cywitz xjal.

19Juꞌ tzunj, cꞌoquel kipen tiꞌj tuꞌn junx ko eꞌla kxol tuj ttz̈yal bix tuꞌn t-xiꞌ knimsaꞌn cyanem ke kuya ocslal.

20Miꞌn cub cyxitena jtaakꞌen Dios tuj cyanem ocslal tuꞌnj nxiꞌ cyuꞌna. Jaxte mintiiꞌte waabj xjan t-xiꞌ kwaaꞌn jaꞌlewe, pero ka at juun ocslal chi cwel tzpet tuꞌnj nxiꞌ cyuꞌna, miꞌntzen txiꞌ cywaaꞌna cywitz.

21Mas baꞌn tuꞌn miꞌn txiꞌ cychyoꞌna chiꞌpj, bix mas baꞌn tuꞌn miꞌn txiꞌ cycꞌaꞌna vino, bix mas baꞌn tuꞌn miꞌn txiꞌ cywaaꞌna alcye juntl wik waabj, twitzj tuꞌn t-xiꞌ jun ocslal tuj il tuꞌnj cyway.

22Ja tzunkey n-el cyniyꞌ tiꞌj cykilca baꞌn tuꞌn t-xiꞌ cyuꞌna, miꞌn chi cub tena txꞌolbalte cywitz xjal tiꞌ cyway, cuma nuk cyex cyey tuya Dios. Jnbint cyuꞌna, ka yaaꞌn jun il tuj cywitza, tuj tzalajebl chi temeley.

23Pero ka tuj cywitza xjan jnxiꞌ cyuꞌna tuj twitz Dios, iltzen, cuma nchi binchana jtzin tkbaꞌn cycꞌuꞌja kaꞌ tuꞌn t-xiꞌ cyuꞌna. Ka tzin tkbaꞌn cynaabla tuꞌn miꞌn bint jun cyuꞌna, pero nbint, bix jatzen ilj.