1 CORINTIOS 15 - Mam of Todos Santos -- Guatemala Unicode

Oj cyjatz itzꞌj ke cyimne

1Key hermano, at juun cyey tzin cykbaꞌn mlay jatz itzꞌj kxumlal juntl maj. Cꞌulel tuj cycꞌuꞌja nyola tej t-xiꞌ nkꞌumena cyey nejl tpocbal coꞌpbil ke. E cyiikꞌ tzunja jyol lu. Ja tzunj baꞌn yol jatzen tloqꞌuel cyocslabla,

2bix tuꞌnj tzunj baꞌn yol chi copjela, ka kꞌiꞌnxix cyuꞌna bix ka min xcyaj cyiiqꞌuena. Katzen ma cyaj cyiiqꞌuena, nuktzen ocslankey nuk cyajxa.

3Jbaꞌn yol e xiꞌ nkꞌumena cyey, yaaꞌn inayena binchalte, sino e wiikꞌa te Dios. Bix tuj tpocbal coꞌpbil ke, jmas il tiꞌj jaj e cyim Cristo twitz cruz tiꞌ kil, tisen otk tkba tyol Dios nejl at tuꞌn tcyim,

4bix e cuꞌx maket, bix te toxen kꞌij tej tjatz itzꞌj tuj cyamecy, tisen otk tkba tyol Dios at tuꞌn tjatz.

5Bix e til jxin Pedro ja Jesús mas yaj, bix mas yaj e cyitl cykilcatlj t-xel Jesús otk jatz itzꞌjxin.

6Bix mas yaj e jaw jlet Jesús cywitz mas te jweꞌ syent ocslal tuj jun lugar. Ejeeꞌ tzunja baꞌn cyajben te tstiwa tiꞌj e jatz itzꞌj Cristo juntl maj, cuma cyxol tzunj jweꞌ syent xjal lu chꞌixcꞌa yaaꞌn cykilca ke xjal iꞌtzx jaꞌlewe. Nuk cab o cyim.

7Bix mas yaj e jaw jlet Jesús twitz Jacobo, bix mas yajtl e jaw jlet-xin cywitz cykilcatl xjal lepchec tiꞌjxin. Cykilca tzunkej xjal lu e lonte otk jaw itzꞌj Jesús tuj cyamecy juntl maj.

8Mancꞌbiltzen e jaw jlet Jesús nwitza, inayena Pablo. E jaw jlet-xin nwitza, amale inayenta tuj tneel min e najbeꞌna twitzxin. In tena twitzxin tisen jun elsaꞌn cwal mintiiꞌ tajbel oj titzꞌj.

9Tuj nwitza inayena jun t-xel Jesús yaaꞌn nim wajbela cywitzj cabtl t-xel Jesús, hasta minxtiiꞌ wajbela tuꞌn woca te t-xel Jesús. Nxiꞌ ntzꞌiꞌbena juꞌwa cuma tuj tneel inayena in oc lpe te tzulcye ke ocslal tuꞌn cyxiꞌ tuj tzeeꞌ bix tuꞌn cycub.

10Pero amale minttiiꞌ wajbela tuꞌn woca te t-xel Jesús, pero tuꞌn t-xtalbil Dios wibaja o tzꞌoc woclena te t-xel Jesús. Bix yaaꞌn nuk tajx o tzꞌoc tkꞌoꞌn Cristo weya tuꞌn woca te t-xel, cuma o chin najbeꞌna mas tiꞌ tkꞌumj tyol Dios cywitz niyꞌtl t-xel Jesús. Pero min e najbeꞌna tuꞌn wexa wipemala, sino tuꞌn tipemal Dios.

11Pero mintiiꞌxix il tiꞌj al akꞌanan mas, ka inayena bix ka ejeeꞌ cabtl t-xel Jesús. Ja te il tiꞌj jaj tkbaj junx kyola tiꞌj tjatzlen itzꞌj Cristo juntl maj. Bix o tzꞌel jax tuj cywitza.

12Pero katzen cykilca ke t-xel Jesús o ko kbaꞌna o jatz itzꞌj Cristo juntl maj tuj cyamecy, ¿titzen tten at juun cyxola tzin cykbaꞌn min-al jun cjawetz itzꞌj juntl maj tuj cyamecy?

13Kane min-al cjawetz itzꞌj tuj cyamecy, entonces cyimnexnele taꞌ Cristo tuj mukbil te jaꞌlewe.

14Bix kane min e jaw itzꞌj Cristo juntl maj, nuknele kajxa jkyola tiꞌj Cristo, bix juꞌxse loj cyocslabla tiꞌ Cristo jaxsele nuk cyajxa.

15Bix kane juꞌwa, ejooꞌtzen loya t-xel Jesús ẍtakꞌ tiꞌ tyol Dios, cuma nko kꞌumena o jatz titzꞌjsaꞌn Dios ja Cristo tuj cyamecy. Pero ka yaaꞌn jax chi jawetz itzꞌj cyimne juntl maj, entonces yaaꞌn jax kyola tiꞌj o jatz titzꞌjsaꞌn Dios ja Cristo tuj cyamecy,

16cuma ka min-al xjal cjawetz itzꞌj juntl maj, mi nuketnele ja Cristo o jaw itzꞌj tuj cyamecy.

17Kane min e jatz itzꞌj Cristo tuj mukbilte, jaxsele mintiiꞌ tajbel cyocslabla, bix yaaꞌn oꞌcxj, jaxsele eteꞌxa tjakꞌ cyila.

18Bix ka ejooꞌ ocslal iꞌtzx etoꞌ tjakꞌ kil, kej ocslal o chi cyim jax eteꞌ tjakꞌ cyil, bix te junx maj cyimneke. Mintiiꞌ cyitzꞌjeltl.

19Juꞌ tzunj ka o tzꞌoc ke kcꞌuꞌj tiꞌ Cristo nuk tiꞌj kchunkꞌlal te twitz txꞌotxꞌ bix yaaꞌn tiꞌj kchunkꞌlal te junx maj, lastim koꞌ, cuma niyꞌx qꞌuixcꞌaj kuꞌn tiꞌj jun kocslabl mintiiꞌ cꞌoquela.

20Pero jaxte o jatz itzꞌj te Cristo tuj cyamecy juntl maj. Bix tej tjatz itzꞌjxin juntl maj, e tyeecꞌaxin chi jawel itzꞌj cykilcatl xjal tuj cyamecy juntl maj.

21Cykilca xjal twitz txꞌotxꞌ il tiꞌj chi cymel tuꞌn il cuma oc il twitz txꞌotxꞌ tej tcub tzꞌak tneel kxeꞌchel tuj il. Juꞌtzen tuꞌn jun xjal e tzyet cyamecy twitz txꞌotxꞌ. Pero jax tuꞌn jun xjal tzul coꞌpbil ke tuj cyamecy laꞌ alcye jun kꞌij.

22Juꞌ tzunj, nko cyim, cuma tiyꞌjil Adán koꞌ. Pero tuꞌntzen kkꞌon kiib tuya Cristo, ko itzꞌjel juntl maj.

23Pero yaaꞌn junx ko jawetz itzꞌj tuya Cristo. Texin il tiꞌj e jatz itzꞌjxin te tneel. Yaltzen ke, ko jawel itzꞌj mas yaj ojxe tulxin. Oj tul meltzꞌajxin twitz txꞌotxꞌ, cykilca t-xjalxin chi itzꞌjel juntl maj.

24Bix yajxitl cpomeltzen baj twiꞌ tuꞌn tbaj twitz txꞌotxꞌ. Bix tuj mancꞌbil kꞌij, pjeltzen twiꞌ kej cykilca aj kꞌoj tiꞌjxin, bix ojtzen tbaj bint tcawbilxin tuj tumel, cxeꞌltzen tkꞌoꞌnxin te Kman Dios.

25Maxetzen cxeꞌl tkꞌoꞌnxin tcawbilxin te tmanxin, il tiꞌj ccawelxin, cuma mlay txiꞌ tkꞌoꞌnxin tcawbilxin te tmanxin te mitknaꞌx tcamanxin tibaj cykil kej nchi kꞌojl tiꞌjxin.

26Bix mancꞌbiltzen ccamalxin tiꞌj mintiiꞌtl cyamecy.

27Tuj tyol Dios tzin tkbaꞌn cyjulu: “Cyjel tkꞌoꞌn Dios cykilca tjakꞌ tken Tcwalxin,” tz̈i tyol Dios. Pero tej tkbante tyol Dios cyjel tkꞌoꞌn Dios cykilca tjakꞌ tcawbil Tcwalxin, pero yaaꞌn jaan Dios tuꞌn tcyaj tjakꞌ tcawbil Tcwalxin.

28Yaaꞌn cꞌoquex Dios tjakꞌ tcawbil Tcwalxin, sino ja Tcwalxin cꞌoquex tjakꞌ tcawbilxin oj t-xiꞌ tkꞌoꞌn Tcwalxin texin cykilcaj otk tzꞌoc tkꞌoꞌnxin tjakꞌ tken Tcwalxin. Juꞌtzen ccawel Dios tibaj cykilca at.

29Key hermano, oj cybautizarja te t-xel cyimne, n-eꞌlatzen tuj cywitza chi jawetz itzꞌj cyimne tuj cyamecy juntl maj. Tuj cywitza najben jlu te cyimne. ¿Pero ti cꞌajbela jlu ka jun cyimne cyimnen taꞌ te junx maj?

30At juntl tumel. Oj t-xiꞌ nkꞌumena tyol Dios, cyaj xjal chin cub byeta. Katzen miꞌn ko jatz itzꞌj tuj cyamecy juntl maj, ¿tikentzen nchin oca tuj qꞌuixcꞌaj tiꞌj?

31Jax wuꞌna mi nuket jun kꞌij mint niyꞌx qꞌuixcꞌaj wuꞌna juꞌwa. Ka n-oc cyocslaꞌna nyola oj tzin nkbaꞌna nchin tzalaja tuꞌnj e cyocslay tiꞌ Kaaw Cristo Jesús tej t-xiꞌ nkꞌumena cyxola, cybiꞌncꞌa nyola tiꞌj chꞌix miꞌn chin cub byeta jaca kꞌij, cuma junelne taꞌ cycaꞌbel nyola.

32Oj nchi akꞌ xjal te Efeso yaslecte weya tisen león tuꞌn t-xiꞌ tchyoꞌn xjal, ¿titzen tajbel weya jqꞌuixcꞌaj n-oc weya ka yaaꞌn jax tuꞌn kitzꞌj juntl maj? Masxetzele baꞌn tuꞌn tbaj kniyꞌbeꞌn tikꞌch at twitz txꞌotxꞌ twitzj tuꞌn niyꞌx qꞌuixcꞌaj kuꞌn, cuma ko cymel naj.

33Pero yaaꞌn juꞌwa. Miꞌn chi oc tzpeta tuꞌn cyyol kej xjal tzin cykbaꞌn miꞌn ko jatz itzꞌj tuj cyamecy, cuma ka n-oc cybiꞌna cyyol, cxeꞌl xitj cynaabla.

34Cycwentem cyiiba tuꞌn miꞌn tzꞌoc cybiꞌna cyyol, cuma min cytzkiꞌn Dios. ¡Nim jun chꞌixbajil te cyey nchin yolena juꞌwa cyiꞌja!

35Yaltzen tiꞌj acꞌaj kxumlal, at juun cyey cꞌoquel kanente weya, ¿ti tten oj cyjatz itzꞌj cyimne juntl maj? ¿Bix tiiꞌn cyxumlal oj cyjatz itzꞌj?

36Tneelxix cꞌaal ntzakꞌbeꞌna tiꞌj tiiꞌn kxumlal oj kjatz itzꞌj. Ka tuj cywitza mintiiꞌ tuꞌn kjatz itzꞌj tuj cyamecy, min tzꞌel cyniꞌya tiꞌj. Cꞌoquel cycyeꞌyena jcjoꞌn nitzꞌj. ¿Jaaꞌ ntzaaꞌ itzꞌj? ¿Mimpatzen tzꞌel cyniꞌya tiꞌj oj ncuꞌx cyiyaja tuj txꞌotxꞌ, njatz pokꞌch awal tuj, bix ncyim iyaj?

37Yaaꞌn te iyaj njatz. Ja tej cjawel pokꞌch junxitl twitzj cwelex awet, cjoꞌnle, triwale, bix tiixjale iyajel tiꞌj.

38O bint tuꞌn Dios jaca juun iyaj cjawetz itzꞌj jun awal tiꞌj tuya tecꞌax t-xumlal. Yaaꞌn cykilca awal junx.

39Tecꞌalex juun wik tuya t-xumlal. Ke xjal, tecꞌax cyxumlal. Ke alimaj, tecꞌax cyxumlal. Ke chꞌit, tecꞌax cyxumlal. Bix ke quis̈, tecꞌax cyxumlal.

40Ma chin yolena cyiꞌj alcyekch xumlalbaj te twitz txꞌotxꞌ. Pero jax juꞌx at cabtl te twitz cyaꞌj. Pero yaaꞌn juniyꞌ cycyeꞌyenc cyuyaj te twitz txꞌotxꞌ.

41Tecꞌax juun tuya tcyeꞌyenc. Kꞌij tecꞌax tcyeꞌyenc twitz xjaw. Bix xjaw tecꞌax tcyeꞌyenc cywitz cheꞌw. Bix jax juꞌx ke cheꞌw. At juun nim twitz juntl. Key hermano, katzen o takꞌ Dios jun xumlalbaj tuꞌn tajben te cykil wikan at twitz txꞌotxꞌ bix twitz cyaꞌj, ctkꞌaꞌtzen Dios jun kxumlal tuꞌn tajben ke oj kjaw itzꞌj juntl maj.

42Entonces, key hermano, cykilj at twitz txꞌotxꞌ bix twitz cyaꞌj nyeecꞌan te ke ti pjel oj kjatz itzꞌj tuj cyamecy. Jun iyaj, oj tcuꞌx awet, cwelex kꞌey, pero cjawel itzꞌj jun t-xul. Bix juꞌtzen kten. Ko cymel, bix ko jawetz itzꞌj tuya junxitl kxumlal, bix ja jun kxumlal te junx maj. Miꞌn kꞌey.

43Kxumlal at jaꞌlewe yaaꞌn cyiw, bix ncyim. Pero ja tzunj acꞌaj kxumlal qꞌuitzꞌjel oj kjatz itzꞌj juntl maj, masxsen tbanel bix te junx maj cyiw.

44Kxumlal at jaꞌlewe cwelex kꞌey tisen jun iyaj, pero jun acꞌaj kxumlal ckiikꞌel alcye jun kꞌij. Katzen at kxumlal najben te twitz txꞌotxꞌ, jax juꞌx at jun kxumlal ckiikꞌel tuꞌn tajben te acꞌaj kchunkꞌlal.

45Cycyeꞌyenc ti toc tuꞌn tyol Dios tiꞌj kchunkꞌlal te twitz txꞌotxꞌ. Tz̈i cyjulu: “Tneel xjal Adán e cub bint tuꞌn toc te jun xjal,” tz̈i tyol Dios. Pero Cristo, jaxin kꞌolte kchunkꞌlal cꞌajbel te junx maj.

46Jkxumlal najben nuk te twitz txꞌotxꞌ, jatzen tneelj, bix jkxumlal cꞌajbel te junx maj, jatzen tcabj.

47Adán el itzꞌj tiꞌ txꞌotxꞌ, bix juꞌ tzunj ajben t-xumlalxin te twitz txꞌotxꞌ. Pero te Cristo, amale twitz txꞌotxꞌet itzꞌjaxin, pero texin tuj cyaꞌj tzajninaxin.

48Yal te cykil xjal te twitz txꞌotxꞌ, jaca juun xjal at kxumlal tisenj te Adán, tuꞌn najben te twitz txꞌotxꞌ. Pero kej xjal nchi oc lpe tiꞌ Cristo, ctemel jun cyxumlal tisenj te Cristo e tzaj tuj cyaꞌj.

49Tisen jaꞌlewe at kxumlal tisen t-xumlal jxjal itzꞌj te twitz txꞌotxꞌ, jax juꞌx at kxumlal laꞌ alcye jun kꞌij tisenj tej xin tzajninxe tuj cyaꞌj.

50Key hermano, cxeꞌltzen ntzakꞌbeꞌna jaꞌlewe tiꞌj ti tten oj kjatz itzꞌj juntl maj. Ja tzunj kxumlal tuya kchuꞌl bix ktz̈qꞌuel at jaꞌlewe twitz txꞌotxꞌ, mlay tzꞌocx tuj tcawbil Dios, cuma tej at tuꞌn tcuꞌx kꞌey, mlay tzꞌajben jaaꞌj mintiiꞌ cyamecy.

51Juꞌ tzunj cxeꞌl nkꞌumena cyey jun tumel o tzaj tyeecꞌan Dios weya. Amale yaaꞌnt cykilca koꞌ ocslal ko cymel, pero cykilca kxumlal cchꞌixpetel.

52Jlu pjel tuj ajkelbil, nuk tisen ncub yutzꞌpaj ttzi kwitz. Tzul jun kꞌij oj tkꞌajt tzunj mancꞌbil tkꞌajkꞌajel xux. Oj tkꞌajt xux, cykilca t-xjal Dios cyimne chi jawetz itzꞌj bix mlay chi cyim juntl maj. Kej ocslal mitknaꞌx cycyim jax ko chꞌixpetel tuya jun acꞌaj kxumlal, pero miꞌn ko cyim. Te tzunj kꞌij tzul cchꞌixpetel cykilca koꞌ ocslal.

53Cyjel kkꞌoꞌn jkxumlal nxiꞌ tuj cyamecy tuꞌntzen kocx tuj jun kxumlal miꞌn kꞌey, acꞌaj, bix mintiiꞌ tbajlel.

54Ojtzen tcyaj kkꞌoꞌn jkxumlal ncuꞌx kꞌey, tuꞌntzen kocx tuj juntl kxumlal mintiiꞌ tbajlel, otktzen bint jun yol tuj tyol Dios tz̈i cyjulu: “Pjeltzen twiꞌ cyamecy kibaj cuma ccamal kchunkꞌlal te junx maj tibaj kcyamecy,” tz̈i tyol Dios.

55Juꞌ tzunj, oj kjatz itzꞌj tuj cyamecy, bixsen ko al meltzꞌaj xmucchal tiꞌ taaw cyamecy. Cxeꞌl kkbaꞌn: “Taaw cyamecy, ¿ti e baj tey? E tajbey tuꞌn ktzyeta tuꞌna, pero min e camana. ¿Tiiꞌn o txiꞌj tipemala tuꞌn toc is̈j kiꞌja?” tz̈i kbel.

56Yaltzen tipemal taaw cyamecy, ¿titzen jilel tipemal taaw cyamecy tuꞌn toc tis̈jsaꞌn ejooꞌ jaꞌlewe? Jaj tuꞌn tbinchaj il kuꞌn, bix j-il nxiꞌ tiiꞌn ejooꞌ tuj cyamecy. Tzin tyeecꞌan tley Dios at nim kil, bix tuꞌn kil, at tuꞌn kxiꞌ tuj cyamecy.

57Pero chjonte te Kman Dios o tzaj tkꞌoꞌn coꞌpbil ke tuꞌn miꞌn koꞌx tuj tkꞌab taaw il tuꞌnj e baj bint tuꞌn Kaaw Jesucristo.

58Entonces, key hermano n-oc cyakꞌa weya, jaxte ko camal tibaj il bix tibaj cyamecy. Yaaꞌn tuꞌn kcyaj tuj cyamecy. Juꞌ tzunj chi weꞌxixa tuj kocslabl tiꞌ Kaaw, tuꞌntzen miꞌn chi cub tzꞌaka. Bix chi akꞌananxa tuya cykil cyanema tuj taakꞌen Kaaw, cuma yaaꞌn nuk kajx nko akꞌanan.