1 TESALONICENSES 2 - Mam of Todos Santos -- Guatemala Unicode

Jun taakꞌen Pablo e bint tuj tnom Tesalónica

1Key ocslal, ejeeꞌxa cytzkiꞌna nim ajben kyola cyey tuꞌn cyxiꞌ lpey tiꞌ Cristo. Yaaꞌn nuk kajxa iyꞌx qꞌuixcꞌaj kuꞌna tuꞌn t-xiꞌ kkꞌumena tpocbal Cristo cyey.

2Cytzkiꞌna tej mitknaꞌx kpona cyxola, otk tziyꞌx nim qꞌuixcꞌaj kuꞌna tuj tnom te Filipos, bix nim otk chi yasen xjal kiꞌja. Pero min e cyaj kcyeꞌyena akꞌuntl, sino e tcyiwsa Dios kcꞌuꞌja tuꞌn t-xiꞌ kkꞌumentla jbaꞌn tyolxin tuj cytanema, amale e jawet cykꞌoj xjal kiꞌja juntl maj.

3Bix cytzkiꞌna jyol e xiꞌ kkꞌoꞌna cyey yaaꞌn nuk jun tzpetpajlenel, bix yaaꞌn tuꞌn kcamana cypwaka, bix yaaꞌn tuꞌn cyxiꞌ tzꞌaka tuj jun ẍtakꞌbil yol.

4Yaaꞌn juꞌwa, sino jaxxix yol tiꞌj colbil ke tzin kkꞌumena, cuma e jaw tscyꞌoꞌn Dios ejooꞌya tuꞌn t-xiꞌ kpocbaꞌna. Bix nko kꞌumena yaaꞌn tuꞌn kela baꞌn cywitz xjal, sino oꞌcx tuꞌn kela baꞌn twitz Dios, jxin n-el tniyꞌ tiꞌj ti niyꞌ tuj kcꞌuꞌj.

5Cytzkiꞌna, bix jax juꞌx ttzkiꞌn Dios, mi nuket jun maj e kbinchaya xmoxbil cyey tuya cyeca kyola tuya jun kajbila eꞌwen taꞌ kuꞌna tuꞌn tel kiiꞌna cypwaka.

6Bix bajx o kajbeꞌya tuꞌn kjaw nimsaꞌna cyuꞌna, mi nuk cyuꞌn mastl xjal. Amale atet koclena tuꞌn kjaw nimsaꞌna, cuma t-xel Cristo koꞌya,

7pero min e kajbeꞌya jlu. Nuk e kajbeꞌya tuꞌn kcꞌojlana ejeeꞌy tuya jun tkꞌakꞌbil kcꞌuꞌja cyiꞌja, tisen jun txuybaj ncꞌojlan cye tal cuma at tkꞌakꞌbil tcꞌuꞌjxuj tiꞌj.

8Tuꞌn tzunj tkꞌakꞌbil kcꞌuꞌja cyiꞌja, e xiꞌ kkꞌoꞌna jyol lu cyey tiꞌj ti tten tuꞌn cycleta. Bix yaaꞌn nuk jaj lu, pero tuya cykil kcꞌuꞌja e xiꞌ kkꞌon kiiba tuꞌn konena cyiꞌja, cuma il cyiꞌja tuj kwitza.

9Key hermano, naꞌnx cyuꞌna ti tten akꞌanan koꞌya tuꞌn kitzꞌja. Te koniyan bix te kꞌij akꞌanan koꞌya, tuꞌntzen miꞌn cub kkꞌoꞌna jun gast cyibaja. Nim e sict koꞌya nuk tuꞌn tabij tyol Dios cyuꞌna tiꞌj colbil cyey.

10Cytzkiꞌna, bix ttzkiꞌn Dios, ti tten e xiꞌ kiiꞌna knaabla cyxola, ejeeꞌy ocslal. Sakxix bix jiquenxix bix mintiiꞌ kpaltela e cyila.

11Jax juꞌx cytzkiꞌna ti tten e xiꞌ kkbaꞌna cyey tuꞌn t-xiꞌ cyiiꞌna cychunkꞌlala tuj tumel, bix ti tten e xiꞌ kcyiwsaꞌna cycꞌuꞌja, bix ti tten e xiꞌ kkbaꞌna cyey tuꞌn tcyaj cykꞌoꞌna cyila. E kbinchaya cyey tisen nbinchan jun mambaj te jaca juun tcwal.

12Cykilcaj lu e bint kuꞌna tuꞌn t-xiꞌ cyiiꞌna cychunkꞌlala tuj tumel twitz Dios, jaj Dios e tzaj txconte cyey tuꞌn cyoca t-xjalxin, bix tajxin tuꞌn cypona tuj tbanel najbil jaaꞌ taꞌxin.

13Key ocslal, jaca kꞌij nxiꞌ kkꞌoꞌna chjonte te Dios yaaꞌn nuk kajxa e xiꞌ kkꞌoꞌna tyol Dios cyey, sino e xiꞌ cyocslaꞌna. Tej t-xiꞌ cyocslaꞌna, cuma yaaꞌn nuk cyyol xjal tuj cywitza. E xiꞌ cyocslaꞌna cuma jaxxix tyol Dios tuj cywitza. Bix cyakꞌanan tyol Dios tuj cyanema tuꞌn tchꞌixpet cynaabla, ejeeꞌy ocslal.

14Nchicꞌajax nchi nimana jaxxix yol, cuma niyꞌx qꞌuixcꞌaj cyuꞌna nuk tuꞌnj cyocslabla. At xjal tuj cytanema nuk nchi kꞌojl cyiꞌja tuꞌnj cyocslabla tiꞌ Cristo, tisenj e baj tuj Judea te cyej judío oc te t-xjal Dios tuꞌnj cyocslabl tiꞌj Cristo Jesús. Kej judío cycyꞌi Cristo nuk e xiꞌ cyyajlaꞌn kej judío otk chi ocslan.

15Bix nejl, e cub cybyoꞌnxin Kaaw Jesús. Bix e cub cybyoꞌn ke tyolel Dios te ootxa. Jax juꞌx keya, etz lojoꞌn koꞌya cyuꞌnxin. Min chi elxin baꞌn tuj twitz Dios, bix nuk kaꞌ nchi binchanxin tiꞌj cykil xjal.

16N-oc cymayoꞌnxin ejooꞌya tuꞌn t-xiꞌ kkꞌumena tyol Dios cyej xjal yaaꞌn judío, cuma cycyꞌixin tuꞌn cyclet. Nimxsen cyil cyiyꞌjilxin, bix tzinx nchi chmonxin il jaca kꞌij jaꞌlewe. Juꞌtzen tten ma cub tkꞌoj Dios cyibajxin, bix tzul tkꞌoꞌnxin jun nintzaj cycastiwaxin.

E tajbe Pablo tuꞌn t-xiꞌ juntl maj kꞌolbelte cye aj Tesalónica

17Perotzen keya, key hermano, tej ketz lojoꞌna tuj cytanema, tuj jun rato e kajbeꞌya tuꞌn ktena cyuyey juntl maj. Etz cyiiꞌn xjal ejooꞌya cyxola, pero mix etze cyiiꞌnxin tkꞌakꞌbil kcꞌuꞌja cyiꞌja, bix nim e kajbeꞌya tuꞌn toc kcyeꞌyena cywitza juntl maj.

18Pero tej toc kipena tiꞌj tuꞌn kpona cyuyey, oc tmayoꞌn taaw il ejooꞌya. Nim maj e wajbeꞌya, inayena, Pablo, tuꞌn nxiꞌya, pero mlay.

19Kaja tuꞌn toc kcyeꞌyena cywitza cuma oj kpon twitz Kaaw Jesucristo, oj tul meltzꞌaj, ¿alcyetzenke cꞌajbel te yecꞌbil cꞌajbel jkaakꞌena twitz txꞌotxꞌ? ¿Alcyetzenke ko tzalajela cyiꞌj? ¿Bix tuꞌnj alcyetzenke ctzaal tkꞌoꞌnxin jun kcotza tuꞌnj akꞌanan koꞌya baꞌn? ¿Yaaꞌmpatzen ejeeꞌy?

20Jax kuꞌna. Ejeeꞌy jyecꞌbil cxeꞌl kyeecꞌana tiꞌj kaakꞌena, bix cyuꞌna ko tzalajela.