1 TESALONICENSES 5 - Mam of Todos Santos -- Guatemala Unicode

1Yaltzen te alcyej kꞌij bix alcyej jnabkꞌi tuꞌn tul meltzꞌaj Kaaw, mintiiꞌ il tiꞌj tuꞌn t-xiꞌ nxnakꞌtzaꞌntla cyey tiꞌj lu.

2Ya cytzkiꞌntla tzul meltzꞌaj Kaaw oj min chi ayon xjal tiꞌj, tisen jun alakꞌ n-ul te koniyan.

3Tuj tzunj kꞌij tzul, cykbaꞌ xjal: “Mintiiꞌ pjel ke. Ko temel tuj ttz̈yal,” tz̈i cybel xjal. Pero jun kꞌij mintiiꞌ tumel cwel tcastiwa Dios cyibaj, bix mlay chi tzokpaj, tisen il tiꞌj qꞌuiyel tchyonex tal jun xuuj tuꞌn oj tpon tumel tuꞌn tul itzꞌj.

4Perotzen cyey, hermano, yaaꞌn atl cynaabla tuj klolj, tisen cynaabl aj il. Juꞌ tzunj, nchi ayona tiꞌj jkꞌij oj tul Cristo juntl maj. Yaaꞌn ejeeꞌy tisen jun taaw jaaꞌ bix chꞌinnchꞌe oj toc jun alakꞌ tuj tja te koniyan, cuma n-el cyniꞌya tiꞌj tzul jkꞌij te Kaaw.

5Cykilca ke cyey tuj spiꞌyen eteꞌy bix te kꞌijl. Yaaꞌn ejooꞌ ocslal tisen tuj klolj bix tuj koniyan.

6Juꞌ tzunj, miꞌn ko wutan tisen ke mastl xjal. Nuk oꞌcx tuꞌn tten knaabl iꞌtz, tuꞌntzen binne kten oj tulxin.

7Miꞌn ko ten tisen kej xjal nuk nchi wutan bix nchi cꞌan kꞌeꞌn te koniyan, bix min tzꞌel cyniyꞌ tiꞌj ti nbaj.

8Pero ke, xjal te kꞌij koꞌ, bix il tiꞌj tuꞌn kten iꞌtz, tisen jun soldado. Tisen n-oc xcbil ttziiꞌ t-xuucꞌ soldado bix njax maksbil twitz tuꞌn binne tten, jax juꞌx ke. Binne ko temel tuꞌnj n-oc ke kcꞌuꞌj tiꞌ Dios, bix tuꞌn toc takꞌ Dios ke, bix tuꞌn kayon tiꞌj jcolbil ke ctkꞌaꞌ Dios.

9Ko ayol tiꞌj colbil ke, cuma min ma baj tnincꞌuꞌn Dios tuꞌn tcub tkꞌoꞌn castiwa kibaj, sino tuꞌn kclet tuꞌn Kaaw Jesucristo.

10E cyimxin te kxel, tuꞌntzen kten tuyaxin te junx maj, ka iꞌtzx koꞌ oj tulxin, bix ka otk ko cyim.

11Juꞌ tzunj, cycyiwsam cycꞌuꞌja cyxolxa tuꞌnj ja yol lu, tisen nbint cyuꞌn nimtl cyxola.

Tej t-xiꞌ tkꞌoꞌn Pablo cynaabl ocslal

12Key ocslal, cxeꞌl kkubsaꞌna kwitza cyey tuꞌn tel cyniꞌya tiꞌj at cꞌajbel kej t-akꞌanal Kaaw cyxola. Nchi cawen cyxola bix nchi kꞌon xnakꞌtzbil cyey tuya cykil cycꞌuꞌj. Juꞌ tzunj, chi nimana cyiꞌjxin.

13Cykꞌonxa cynimbila bix tkꞌakꞌbil cycꞌuꞌja cyexin, cuma t-akꞌanal Kaawkexin. Bix tenx cymojbabl cyiiba cyxolxa.

14Jax cxeꞌl kcubsaꞌna kwitza cyey, key hermano, tuꞌn t-xiꞌ cykbaꞌna cyej xjal cyꞌaj tuꞌn cyakꞌanan, bix tuꞌn cycyiwsantiya cycꞌuꞌj kej xjal at ttz̈i cyiꞌj, bix tuꞌn t-xiꞌ cyonena kej xjal yaaꞌn cyiwxix tuj cyocslabl, bix tuꞌn tten cypasensyey cyiꞌj cykilca ocslal.

15Ka ma tzꞌoc bint jun kaꞌ cyiꞌja, cꞌoquel cycwenta tiꞌj tuꞌn miꞌn xeꞌlen cyuꞌna. Nuk oꞌcx tuꞌn cybinchantiya jbaꞌn cyxolxa bix cye cykil xjal.

16Chi tzalajxa.

17Miꞌn chi weꞌy tuꞌn cynaꞌna Dios.

18Cykꞌonx chjonte te Dios tiꞌ cykilca. Kej lu taj Dios tuꞌn tbint cyuꞌna, ejeeꞌja at cymojbabl cyiiba tuya Cristo Jesús.

19Miꞌn tzꞌoc cymayoꞌna tuꞌn takꞌanan Espíritu Santo.

20Miꞌn tzꞌel cyxooꞌna cyyol kej xjal nchi kꞌumen jma tyeecꞌan Dios cyexin.

21Pero oj nchi kꞌumenxin, cyabinx ti toc cyuꞌnxin, laꞌ ka tumel bix ka min. Katzen jaxxix, cybiꞌnctzen.

22Pero cypaꞌmel cyiiba tiꞌj cykil yol yaaꞌn baꞌn.

23Tzajxittzen tkꞌoꞌn Dios tuꞌn cytena sakxix te junx maj, jaxj Dios kꞌol cyey tuꞌn cytena tuj txubtx. Bix tcꞌojlaꞌxit-xin cychunkꞌlala bix cynaabla bix cyxumlala, tuꞌntzen cycneta mintiiꞌ cyila oj tul meltzꞌaj Kaaw Jesucristo.

24Npon baj Dios tiꞌ cykilca tyol. Ma txconxin cyey tuꞌn cyoca t-xjalxin, bix cbinel tuꞌnxin tuꞌn cycleta.

Jun mancꞌbil yol tuꞌn Pablo

25Key ocslal, chi naꞌna Dios kiꞌja.

26Cykꞌonxa nim kkꞌolbebla cye cykil ocslal tuya jun tzꞌubj witzbaj, tisex tten tuꞌn t-xiꞌ kyeecꞌan tkꞌakꞌbil kcꞌuꞌj kxol.

27Cxeꞌl nkbaꞌna cyey tuꞌn tcyaj cykꞌoꞌna cyyola twitz Kaaw tuya jun jurament tuꞌn tjaw cys̈iꞌna ja uꞌj lu cywitz cykil ocslal.

28Tenxit t-xtalbil Kaaw Jesucristo cyuyey.

Oꞌcx nyolja.