ROMANOS 9 - Mam of Todos Santos -- Guatemala Unicode

Scyꞌoꞌn ke aj Israel tuꞌn Dios

1Key hermano, nimxsen bisbajil at wiꞌja cyiꞌj ntanema, kej xjal te Israel. Tiꞌj tzunja bisbajil lu, ttzkiꞌn Cristo nchin yolena jaxxix. Yaaꞌn nchin ẍtakꞌena. Jax juꞌx wanema tzin tkbaꞌn nchin yolena jaxxix, bix mlay ẍtakꞌen wanema tjakꞌ tcawbil Espíritu Santo.

2Nim nchin bisena cyiꞌj ke te ntanema, bix tchyonel nbisa tuj wanema mlay weꞌ.

3Nuket jacꞌa bint tuꞌn cyclet ke ntanema tuꞌnj ojat npaxa tuya Cristo tuꞌn nxiꞌya tuj castiwa te cyxel, jacꞌa bint wuꞌna.

4Aj Israelke, ejeeꞌtzen xjalja e tsicyꞌ Dios tuꞌn cyoc te ttanem. Ja jawnex Dios e ten cyxol, bix e cyaj tkbaꞌnxin nimcꞌa te cye, bix e cyaj tkꞌoꞌnxin tleyxin te cye, bix e cyaj tyeecꞌanxin ti tten tuꞌn tjaw cynimsaꞌn Dios, bix e cyaj tkbaꞌnxin nim xtalbil tuꞌn tkꞌontexin cye.

5Jatzen cyiyꞌjil ja Abraham bix ja Isaac bix ja Jacob, bix cyxoltzen aj Israel etza itzꞌj Cristo tej tocxin te xjal, jaxj xjal scyꞌoꞌn tuꞌn Dios te cawel, jaxj xjal ncawen tibaj cykilca at, jatzen xjalj mero Dios. Cyꞌiwlaꞌnxit te junx maj. Juꞌxit tzuna.

6Amale yaaꞌnt nim aj Israel o clet, ¿cxeꞌlpatzen kkbaꞌn min e japan Dios tiꞌ tyol cye aj Israel tuꞌn cyoc te ttanemxin? Min, cuma yaaꞌn cykilca xjal tiyꞌjil Israel kej mero aj Israelxix tuj twitz Dios.

7Cꞌoquel cycꞌuꞌja tiꞌj yaaꞌn cykilcaj el itzꞌj tiꞌ Abraham tcwalet-xin tuj twitz Dios. Tz̈i Dios te Abraham cyjulu: “Tiꞌj tcwala Isaac qꞌuelel itzꞌj kej tchmana jmero tiyꞌjila tuj nwitza, yaaꞌn tiꞌ tcwala Ismael,” tz̈i Dios.

8Ja yol lu tzin tkbaꞌn yaaꞌn cykilcaj xjal el itzꞌj tiꞌ Abraham jmero t-xjal Dios. Kej mero tiyꞌjil Abraham tuj twitz Dios ejeeꞌj xjalja oc te tiyꞌjil Abraham nuk tuꞌnj e tkbaxin tuꞌn tbint tuꞌnxin.

9Cꞌoquel cycꞌuꞌja tiꞌj Isaac itzꞌj nuk tuꞌn t-xtalbil Dios. E cyaj tkbaꞌn Dios te Abraham cyjulu: “Tuj juntl jnabkꞌi jaꞌlewe otk tzaj itzꞌj jun tal tij t-xuꞌla Sara,” tz̈i Dios.

10Yaaꞌntzen nuk oꞌcx kej tcwal Abraham tzin tyeecꞌan yaaꞌn cykilca ke tiyꞌjil Abraham t-xjal Dioske, sino jax juꞌx ke tal Rebeca tzin tyeecꞌan ja lu mas, cuma oꞌcx nuk jun xinak tuꞌnxuj, ja Isaac, bix e tzaj caꞌba talxuj yoẍke.

11Amale mitknaꞌxet cyitzꞌj yoẍ, bix amale minttiiꞌ otk bint cyuꞌn, mi nuk baꞌn bix mi nuk kaꞌ, pero junx oc te tiyꞌjil Abraham, ja Jacob. E scyꞌet Jacob tuꞌn Dios yaaꞌn tuꞌnj baꞌn e bint tuꞌnxin, sino cuma juꞌ e tajbe Dios. Tuꞌntzen tbint tajbil Dios,

12e xiꞌ tkbaꞌnxin te Rebeca cyjulu: “Jaj tala e tzaj itzꞌj tneel cyjel toclen mas cubnin twitzj te titzꞌen,” tz̈i Dios.

13Bix juꞌ e baja. Tz̈i Dios tuj tyol cyjulu: “Jacob oc te nxjala bix oc wachena, pero Esaú el nxooꞌna,” tz̈i Dios tuj tyol.

14Cuma tzin tscyꞌoꞌn Dios jun bix n-el t-xooꞌn Dios juntl, ¿cxeꞌlpa kkbaꞌn yaaꞌn baꞌn Dios? Min.

15Jaxin kbalte tuꞌn tbint alcye tajxin. E xiꞌ tkbaꞌn Dios te Moisés cyjulu: “Ka waja tuꞌn t-xiꞌ nkꞌoꞌna jun xtalbil te jun xjal, cxeꞌltzen nkꞌoꞌna jun xtalbil te. Bix ka waja tzꞌoc nkꞌoꞌna lastim te jun xjal, cꞌoqueltzen nkꞌoꞌna lastim te,” tz̈i Dios te Moisés.

16Juꞌ tzunj tzinen taꞌ nkꞌon Dios lastim te jun xjal yaaꞌn tuꞌn ja xjal kbalte, bix yaaꞌn tuꞌnj n-oc tipen xjal tuꞌn tkꞌon Dios lastim te, sino cuma ja Dios kbalte, jaxj Dios at tkꞌakꞌbil tcꞌuꞌj kiꞌj.

17At juntl tumel tuj tyol Dios tzin tyeecꞌan nbint tuꞌn Dios alcyej taj tuꞌn tbint. E xiꞌ tkbaꞌn Dios te cawel te Egipto cyjulu: “O txiꞌ nkꞌoꞌna jay tuꞌn toca te cawel, tuꞌntzen tchicꞌajax jawnex weya wipemal oj nxcyeya tibaja, bix tuꞌntzen tel tpocbal o chin xcyeya tibaja tuj cykilca twitz txꞌotxꞌ,” tz̈i Dios te cawel te Egipto.

18Juꞌtzen qꞌuelele kniyꞌ tiꞌj ka taj Dios tuꞌn t-xiꞌ tkꞌoꞌn lastim te jun xjal, cxeꞌltzen tkꞌoꞌn lastim te, bix ka tajxin tuꞌn t-xiꞌ tkꞌoꞌnxin amleꞌn te jun aj il tuꞌntzen ttz̈ꞌiy tkꞌoj tiꞌ Dios, cxeꞌltzen ttzakpiꞌn Dios.

19Kape cykbaꞌy weya cyjulu: “Ka mlay tzꞌel t-xooꞌn jun xjal jti taj Dios, entonces jatzen Dios yaaꞌn tzinen tyol oj tkbante at til xjal,” kape tz̈i cybela.

20Ka juꞌ ncub cybisena, ¿tikentzen nchi jaw yolena tiꞌ Dios juꞌwa? Mintiiꞌ cyey cyoclen tuꞌn cyyolena tiꞌ Dios juꞌwa, cuma nuk xjalkey. ¿Baꞌmpa tuꞌn tjaw yolen jun wicyꞌil tuya binchal te cyjulu: “¿Tikentzen o tbinchay inayena juꞌwa?” tz̈ipatzen wicyꞌil? Min, yaaꞌn baꞌn,

21cuma jbinchal wicyꞌil at toclen tuꞌn tjyonte alcyej taj tuꞌn tbint tuꞌn tuya xcab txꞌotxꞌ. Ka tajxin bint jun wicyꞌil cyeca tcyeꞌnc, jaxin kbalte. Bix ka tajxin bint jun wicyꞌil ajnintz tcyeꞌnc, jax juꞌxa at toclenxin tuꞌn tbint tuꞌnxin juꞌwa.

22Tisentzen jun binchal wicyꞌil ja kbalte ti tajxin bint tuya xcab txꞌotxꞌ, jax juꞌxsen te Dios, ja kbalte alcye tajxin bint cyuya aj il. At toclen Dios tuꞌn ttzaj tkꞌojxin cyiꞌj aj il bix baꞌn tuꞌnxin tuꞌn t-xiꞌ tyeecꞌanxin at nim tipemalxin tuꞌn t-xiꞌ tkꞌoꞌnxin cycastiwa. Pero amale e bajet tnincꞌuꞌnxin tuꞌn t-xiꞌ tkꞌoꞌnxin cycastiwa, pero iyꞌx tuꞌnxin tuya nim tpasensyaxin cyiꞌj xjal at cyxiꞌlel tuj cycastiwa. Katzen juꞌwa, ¿tikentzen tzin cykbaꞌna yaaꞌn baꞌn Dios?

23Iyꞌx ke aj il tuꞌnxin tuya tpasensyaxin tuꞌntzen t-xiꞌ tkꞌoꞌnxin tkꞌakꞌbil tcꞌuꞌjxin cyibaj. E baj tnincꞌuꞌnxin jatxe ootxa tuꞌn t-xiꞌ tkꞌoꞌnxin jun jawnexsen xtalbil cye bix tuꞌn cyten tuyaxin tuj cyaꞌj.

24Bix kej xjal at tuꞌn cyiikꞌente t-xtalbilxin, ejooꞌtzen. O ko ttxocxin tuꞌn koc te t-xjalxin. Bix o ttxocxin yaaꞌn nuk ejeeꞌ judío, sino cyuyax kej xjal yaaꞌn judío.

25Jax wuꞌna, cuma e tkba Dios tuj tuꞌj tzꞌiꞌben tuꞌn Oseas cyjulu: “Kej xjal yaaꞌn n-xjala nejl, cxeꞌl nkꞌoꞌna cye tuꞌn cyoc te nxjala. Bix jtnom yaaꞌn te weya nejl, ja tzunja cꞌoquel takꞌ weya.

26Cyuj jlugar jaaꞌ e kbaja te cye yaaꞌn nxjalke, cyujxse lugar cꞌoquel cybi te tcwal Dios iꞌtz,” tz̈i Dios.

27Yaltzen cye Israel, cꞌoquel cycꞌuꞌja tiꞌj ti toc tuꞌn Isaías tuj tyol Dios cyiꞌj. Tz̈i cyjulu: “Amale nimet cybaj aj Israel, tisen arena ttziiꞌ mar, pero nuk juun cye chi cletel.

28Tnimal mlay chi clet, cuma cbinel tuꞌn Dios j-e tkba tuꞌn tbint tuꞌn. Cxeꞌl tkꞌoꞌnxin castiwa cyibaj xjal te junx maj bix tuj ajkelbil,” tz̈i Isaías, tyolel Dios.

29Bix jax juꞌx e tkba Isaías cyiꞌj ttanem Dios cyjulu: “Nuket min e cyaj tkꞌoꞌn Dios juun kxol tuꞌn cycyaj itzꞌj, jaj Dios ncawen tibaj cykilca at, ottzele ko baj twitz txꞌotxꞌ te junx maj, tisenxsen tej cycub baj kej xjal te Sodoma bix te Gomorra,” tz̈i Isaías cyiꞌj aj Israel te yecꞌbil yaaꞌn cykilca Israel chi cletel.

Jun xjal tuꞌnj tocslabl tiꞌ Cristo jiquen tten twitz Dios

30Juꞌ tzunj, ¿altzen cye qꞌuelel kniyꞌ tiꞌj? Qꞌuelel kniyꞌ tiꞌj kej xjal min oc cyipen tuꞌn cyoc jiquen twitz Dios nejl, otzen kꞌoj cye tuꞌn cyoc jiquen twitz Dios jaꞌlewe, ejeeꞌj xjal yaaꞌn judío, cuma o tzꞌoc ke cycꞌuꞌj tiꞌ Dios.

31Ja tzunkej aj Israel min e camanke tuꞌn cyoc jiquen, amale oquet cyipen tuꞌn cyxiꞌ lpe tiꞌ jun ley tuꞌn cyoc jiquen twitz Dios.

32¿Tikentzen min e caman ke judío? Min e camanke tuꞌn cyoc jiquen twitz Dios, cuma min oc ke cycꞌuꞌj tiꞌ colbil tzin toyen Dios, sino oꞌcx oc ke cycꞌuꞌj tiꞌj baꞌn e bint cyuꞌn. Pero tuj cywitz judío min ajben colbil e tzaj tkꞌoꞌn Dios cye. Tuj cywitz tisen jun xak tuj be n-oc texpaj twiꞌ cyken tiꞌj. Bix juꞌ tzunj eꞌla cyiiqꞌuen.

33Otk tkba Dios nejl juꞌ tuꞌn tbaja. Tz̈i Dios cyjulu: “Cꞌoquel cycꞌuꞌja tiꞌj cxeꞌl nkꞌoꞌna jun Clol cye te cytanem nxjala. Pero tuj cywitz nuk tisen jun xak tuj be nchi jaw pitcꞌaj xjal tiꞌj bix tisen jun tzlom aꞌbj nchi jaw jilpaj twitz. Pero kej xjal n-oc ke cycꞌuꞌj tiꞌj Clol cye cxeꞌl nkꞌoꞌna, chi cleteltzen te junx maj. Yaaꞌn nuk cyajx cꞌoquel ke cycꞌuꞌj tiꞌ Clol cye,” tz̈i Dios tuj tyol.