HEBREOS 12 - Mam of Todos Santos -- Guatemala Unicode

Kkꞌoꞌnc kwitz tiꞌ Jesús

1Ejeeꞌtzen kxeꞌchel jlu o cyaj kꞌonte nim tumel te ke ti tten tuꞌn toc ke kcꞌuꞌj tiꞌ Dios. Juꞌ tzunj il tiꞌj tuꞌn miꞌn cyaj kxooꞌn kocslabl tiꞌ Jesús tuꞌn kaj meltzꞌaj tuj kreligión te ootxa, cuma jaja tcub mokonte kwitz tiꞌ Dios. Oꞌcx tumelj, kkꞌaꞌc kipen tuꞌn kxcye tuꞌn kxiꞌx tuj be tzin tkbaꞌn Dios, jaj tuꞌn toc ke kcꞌuꞌj tiꞌ Jesús.

2Il tiꞌj cxeꞌl kwitz tiꞌ Jesús, cuma jaxin nejl kwitz o ponxin tuya Dios, bix jaxin nicꞌulte ke tuꞌn kpon tzꞌakl twitz Dios. Junxse chꞌixbajil tej tjaw jun xjal twitz cruz tuꞌn tcyim, pero te Jesús mas il tiꞌj e xiꞌ tniman alcye e tajbe Dios twitzj tuꞌn tel t-xooꞌnxin jun tchꞌixewxin tej tjawxin twitz cruz tuꞌn kil, cuma ttzkiꞌntlxin at tuꞌn tiikꞌenxin jun tcotzxin. Bix o camanxin, cuma o ponxin tuj tmankꞌab Dios tuj cyaꞌj.

3Juꞌ tzunj cybisecꞌa cyey tiꞌj ti e baj te Jesús. Iyꞌx nim qꞌuixcꞌaj tuꞌnxin cyuꞌn kej xjal e jaw yolen tiꞌjxin. Juꞌ tzunj miꞌn baj cyipena bix miꞌn chi cub xitja ojtzen cycaney tuj jun qꞌuixcꞌaj.

4Pero at juntl wik qꞌuixcꞌaj minaꞌn tul cyiꞌja. Bajx cylaꞌy tisej te Jesús e byet tuꞌn cykꞌab aj il. Minaꞌx cylonte cyey juꞌwa, pero cykꞌoꞌnc cyipena tiꞌj tuꞌn t-xiꞌ cyiiꞌna cyocslabla tiꞌ Dios hasta ojxe cycyima tuꞌn miꞌn chi cub tzꞌaka tuj il.

5Pero cykilcaj qꞌuixcꞌaj cylaꞌy tecꞌax juun tuya takꞌmal, tuꞌntzen cycyaja tzꞌaklxix. ¿Naꞌmpa cyuꞌna ti toc tuꞌn tyol Dios? At jun tumel tuꞌn jun mambaj n-el tniyꞌ tiꞌj ti ctemela tcwal. Tz̈i cyjulu: “Ncwala, miꞌn tzꞌel t-xooꞌna jun cawbil cxeꞌl tkꞌoꞌn Kman Dios tey, bix miꞌn cub baj tcꞌuꞌja oj toc iꞌlena tuꞌnxin.

6Oj toc tcawenxin jay, yaaꞌn tuꞌn n-el tiqꞌuenxin jay, sino cuma n-oc takꞌa texin, bix cuma tajxin jun baꞌn te tey,” tz̈i jun xjal n-el tniyꞌ tiꞌj te tcwal, tz̈i tyol Dios.

7Juꞌ tzunj il tiꞌj qꞌuiyax qꞌuixcꞌaj kuꞌn, cuma tcwal Dios koꞌ. Twitz txꞌotxꞌ min-al jun cwal minttiiꞌ cawbilte tuꞌn tman.

8Yajtzen te Dios, mas baꞌn tcawbil tibaj cykilca tcwal. Katzen mintiiꞌ tcawbil Dios kiꞌj, yaaꞌntzen tcwal Dios koꞌ. Nuktzen tisen sicyꞌbel cwal koꞌ. Min-al kman jaxxix.

9Tejtzen neeꞌ koꞌ, tzintzen kbiꞌn kman oj ntzaj cawen kiꞌj. Juꞌ xsunj te Kman Dios tuj cyaꞌj, masxsen cxeꞌl kbiꞌn tcawbil, tuꞌntzen at kchunkꞌlal tbanelxix.

10Ke kman te twitz txꞌotxꞌ nchi xnakꞌtzan kiꞌj laꞌ alcye baꞌn tuj cywitz te cye. Yaltzen te Kman Dios, masxsen tzꞌakl tcawbil kibaj, cuma taj te ke jun baꞌn, yaaꞌn nuk te texin. Tajxin tuꞌn kten jiquenxix tisen texin, tuꞌntzen koc sakxix twitzxin.

11Bix jaxsente kcyꞌi jun cawbil, cuma takꞌ tuj kwitz. Pero katzen niyꞌx qꞌuixcꞌaj kuꞌn, kcamantzen jun tbanelxix knaabl bix mas tuj ttz̈yal ko temel.

Jawnex ttz̈i ka ma tzꞌel kxooꞌn t-xtalbil Dios

12Pero at juun cyxola min tpa qꞌuixcꞌaj. Juꞌ tzunj baꞌn tuꞌn t-xiꞌ cyonena, cuma cyocslabl tisen jun cykꞌab o tzꞌel mejtzꞌaj bix tisex jun cychꞌecy mintiiꞌ tipen.

13Tisen jun xjal cox nxiꞌ binchet tbe tuꞌn juntl xjal, juꞌxsen cyiꞌj kej ncub baj cycꞌuꞌj tuj tbe Dios, il tiꞌj chi xeꞌl onet. Bix tisen jun cox chebe tuꞌn tbet bix tuꞌn miꞌn jaw tzꞌak tuj tbe ka at onbil tiꞌj, juꞌxsen tuj tbe Dios cxeꞌl nimset tcꞌuꞌj jun ocslal tuꞌn miꞌn txiꞌ tzpet mas ka at onbil tiꞌj.

14Kjyom tuꞌn mintiiꞌ kꞌoj kxol bix cyuya cykilca niyꞌtl xjal, pero mas jawnex twitzj lu tuꞌn t-xiꞌ kiiꞌn jun kchunkꞌlal jiquenxix, cuma ka min s-el kiin kiib tiꞌ il, mlay kil twitz Dios.

15Cꞌoquel kcꞌuꞌj tiꞌj tuꞌn min-al jun kxol cub tzꞌak tuj yol lu bix cxeꞌl tperdere coꞌpbil te. Ka at jun xjal min tzꞌel tiin tiib tiꞌ il, ja tzunja tisen jun veneno n-ocx tkꞌoꞌn te tyabel cabtl tuya jun tqꞌueyel.

16Jun ocslal min txiꞌ tiiꞌn tbe tuya Jesús sino n-ex balkꞌaj tuj tocslabl tiꞌ Jesús, juꞌx tisentzen jun xjal tzin nachꞌin tuya jun tpaj. Juꞌtzen e baj te kxeꞌchel Esaú. El tiqꞌuexin alcye e tajbe Dios. Tuꞌn min oc tcꞌojlaꞌnxin otk cyaj tkbaꞌn Dios, e xiꞌ tqꞌueyenxin te titzꞌenxin Jacob jun toclenxin te jaxin tneel cwal nuk tuꞌn jun twaxin.

17Bix ktzkiꞌntl yajxitl, tej chꞌitk tcyim tmanxin Isaac bix e pon tumel tuꞌn t-xiꞌ tpaꞌn Isaac cykab tcwalxin, bix e tajbetl Esaú tuꞌn tiikꞌente jtoclen ka ja tneel cwal, pero ya min e kꞌojtl. Bix amale ookꞌet-xin nim tiꞌj tel-len t-xooꞌnxin, mix e binne tuꞌn tchꞌixbenxin tej otk tbinchaxin tuj tneel. Juꞌ tzunj miꞌn tzꞌel kxooꞌn tej o cyaj tkbaꞌn Dios, tisentzen te Esaú e baj te, cuma biꞌx cxeꞌl kxooꞌn te junx maj.

18Key hermano, nejl nim seyꞌpajlenel cyiꞌ kxeꞌchel tej cypon lkꞌeke twitz xjan witz jaaꞌ etza kꞌajt tyol Dios. Tej cypon t-xeeꞌ witz, oc cycyeꞌyenxin njulen tuya kꞌakꞌ, bix at klolj, bix at nim cykꞌiꞌk,

19bix at tkꞌajkꞌajel twiꞌ jun bocina, bix e xiꞌ cybiꞌnxin jun tkꞌajkꞌajel yol cyibaj jawnexsen tbiꞌnx. Tuꞌn seyꞌpajlenel tuꞌnj yol bix akꞌkexin cubsal cywitzxin tuꞌn miꞌn cybixin mastl tkꞌajkꞌajel yol.

20Min e cypaxin tuꞌn cyoc tenxin ebilte jyol e cub cyibajxin tz̈itzen cyjulu: “Alj xjal cꞌoquel maconte t-xeeꞌ jwitz xjan, biꞌx cwel byet tuya xak bix ma tuya machet, cyuyax ke alimaj oj cypon lkꞌe,” tz̈i tkꞌajkꞌajel yol twitz cyaꞌj.

21Tiꞌj siꞌpuplxsen cykilj lu, tuyax Moisés e jaw luꞌlen.

22Katzen jawnex jun seyꞌpajlenel tej cypon xjal twitz xjan witz nejl, yaltzen jaꞌlewe mas jawnex ttz̈i tuꞌn kpon mero twitzcꞌa Dios ka yaaꞌn jiquenxix etoꞌ. Juꞌ tzunj ilxix tiꞌj tuꞌn ko ten jiquenxix twitz Dios, cuma ko pomel tuj tnom jaaꞌj taꞌ Dios Iꞌtzxix, jaj Witz Sión tbi tnom bix tuyax Jerusalén Tuj Cyaꞌj tbi, bix jaaꞌj at nim cyajlal tsanjel Dios tuj cyaꞌj,

23bix jaaꞌj o chi pona cykil t-xjal Dios bix ya tzꞌaklxixke, bix jaaꞌj taꞌ jax Dios Nintzaj Juez,

24bix jaaꞌj taꞌ jax Jesús, jnicꞌul tiꞌj acꞌaj trat, bix jxjal ocx toyen ttz̈qꞌuel te chojbil kil. Ttz̈qꞌuel Jesús at tipemal te coꞌpbil xjal, yaaꞌn tisenj ttz̈qꞌuel alimaj e xiꞌ toyen Abel nuk ajben te techel ttz̈qꞌuel Jesús.

25Cꞌoquel cycwenta tiꞌj tuꞌn miꞌn tzꞌel cyxooꞌna tyol Dios. Jnejl, tej tyolen Dios twiꞌ jun witz, min-al jun xjal el libre tuj castiwa tej tel cyxooꞌn tyol Dios. Yajtzen ke, ka ma tzꞌel kxooꞌn tyol Dios oj tyolen kiꞌj yaaꞌn nuk twiꞌ witz sino tuj cyaꞌj, masxsen mlay ko ttzokpi tuꞌn kpon tuj castiwa.

26Nejl, tuꞌn tkꞌajkꞌajel tyol e tzaj luꞌlen chꞌin twitz txꞌotxꞌ. Pero jaꞌlewe tz̈i Dios tuj tyol Dios cyjulu: “Juntl maj ctzaal luꞌlen twitz txꞌotxꞌ wuꞌna, pero yaaꞌn nuk twitz txꞌotxꞌ, sino tuyax cyaꞌj,” tz̈i Dios. Juꞌ tzunj cxeꞌl cynimana tyol Dios, cuma tzul jun kꞌij cjawel ttz̈toꞌn Dios cykil at,

27cuma jyol “juntl maj” nyeecꞌan ke oj tjaw ttz̈toꞌn Dios cykil at, cxeꞌl tzꞌak niyꞌ jtikꞌch baꞌn ttz̈toj, bix cyjeljx nuk alcyej mixbe ttz̈toj.

28Jtcawbil Dios tuj kanem mixbe ttz̈toj. Chunkꞌlal o takꞌ Dios, jatzen te junx maj. Juꞌ tzunj kcꞌojlaꞌxix tuꞌn miꞌn cyaj kxooꞌn. Kcꞌojlaꞌxix tuꞌn kajben te Dios tuꞌn knaꞌn Dios bix tuꞌn kniman twitz.

29Nim cꞌoquel kcꞌuꞌj tiꞌj, cuma Kman Dios tisen jun kꞌakꞌ te xitlte entera at.