SANTIAGO 2 - Mam of Todos Santos -- Guatemala Unicode

Min-al jun xjal mas nintzaj twitz juntl

1Key ocslal, tuj cyocslabla tiꞌj jawnex Kaaw Jesucristo, miꞌn txiꞌ cyximana cyiꞌj xjal ka at jun mas nintzaj twitz juntl.

2Ka ma tzꞌocx jun xjal cyxola tuj tja Dios, bix tcub t-xmulkꞌab te oro, bix toc tbanel t-xbalen tiꞌj, bix jax juꞌx ka ma tzꞌocx jun xjal mebe bix toc t-xbalen ttxꞌakan,

3miꞌn tzꞌoc cykꞌoꞌna mas tajbel jxjal kꞌinawe. Ka ma txiꞌ cykbaꞌna tej xjal toc t-xbalen wiꞌyel tiꞌj: “Kequey tzalu tuj jun kꞌukbil tbanelxix,” bix ka ma txiꞌ cykbaꞌna tej xjal mebe: “Kequey tzalu twitz txꞌotxꞌ, bix ka weꞌqꞌuey jatzewe cyiꞌjxe xjal,” ka ma bint cyuꞌna juꞌwa,

4yaaꞌntzen junx taꞌ cycꞌuꞌja cyiꞌ xjal cyxola. Matzen tzꞌoc cykꞌon cyiiba tisen ke juez nuk cyaj tuꞌn cyajben cyej xjal nintzaj, tuꞌn cycaman pwak. Yaaꞌntzen tumel cyuꞌna.

5Key ocslal n-oc cyakꞌa weya, cꞌoquel cycwenta tiꞌj nyola. Kej xjal mebe tuj cywitz xjal te twitz txꞌotxꞌ, ma jaw tscyꞌoꞌn Dios tuꞌn cyoc te kꞌina, cuma tuꞌnj cyocslabl ckꞌojel cye tuꞌn cyoc tuj tcawbil Dios, tisen ma cyaj tkbaꞌn Dios te cye kej xjal n-oc takꞌ Dios cye.

6Pero cyey, nuk n-el cyiiqꞌuena kej xjal mebe. ¿Pero alcye kej xjal nchi binchan kaꞌ cyiꞌja? ¿Yaaꞌmpatzen ejeeꞌx kej xjal kꞌina? ¿Yaaꞌmpatzen cyuꞌn kꞌina tuꞌn cycambil n-el cyiiꞌn tikꞌch cyey tuj juzgado?

7¿Yaaꞌmpatzen jax kej kꞌina nchi xmucchan tiꞌj jawnex tbi Jesús, jxjal Cyaawa?

8Pero ka ma tzꞌoc cyakꞌ ke cyuyey cyey tisenj n-oc cyakꞌ cyiiba cyey, baꞌntzen tzin cybinchaꞌna, cuma nintzaj ja ley lu tuj jawnex tley Dios.

9Pero ka ma txiꞌ cyyeecꞌana mas nimbil cyej xjal kꞌina cywitzj xjal mebe, attzen cyila, bix nchicꞌajax min txiꞌ cybiꞌna tley Dios.

10Ka at jun xjal ma txiꞌ tbiꞌn cykilca tley Dios, pero ma tzpet tuj jun mandamyent te ley, amale nuket jun mandamyent, ya ma cub tzꞌak tuj cykilca ley.

11Ktzkiꞌn juꞌ tten, cuma e tkba Dios tuꞌn miꞌn cyaj cycyeꞌyena cyxuꞌla tuꞌn juntl xuuj, bix jax Dios e kbante tuꞌn miꞌn tzꞌoc cybyoꞌna xjal. Juꞌ tzunj, ka ma tzꞌoc cybyoꞌna jun xjal, amale mint chi wutana tuya juntl xuuj yaaꞌn cyxuꞌla, pero ma bint il cyuꞌna, cuma min ma cynima cykilca yol kꞌoꞌn tuꞌn Dios.

12Chi yolena tuya tkꞌakꞌbil cycꞌuꞌja cyiꞌ xjal, bix cybinchama baꞌn cye xjal, cuma oj toc tcyeꞌyen Dios ejeeꞌy ka ma bint baꞌn cyuꞌna bix ka min, cmloltzen ejeeꞌy tiiꞌnkey tiꞌ ley tzin tkbaꞌn cꞌoquel kkꞌoꞌn lastim cye xjal.

13Ka mintiiꞌ lastim cyuꞌna cye xjal, jax mintiiꞌ lastim tkꞌaꞌ Dios cyey oj cyoca tuj xkel twitzxin. Pero ka ma tzaj kꞌakꞌen cycꞌuꞌja cyiꞌ juntl, tzul kꞌakꞌan tcꞌuꞌj Dios cyiꞌja oj cypona twitzxin.

Ka at jun xjal tzin tkbaꞌn at tocslabl tiꞌ Dios, pero ka mintiiꞌ n-oc tonen juntl, mintiiꞌ tajbelel tocslabl

14Key ocslal, cxeꞌl nkanena cyey, ka at jun xjal tzin tkbaꞌn at tocslabl tiꞌ Dios, pero ka mintiiꞌ tonbil nbint tuꞌn tiꞌ juntl, ¿titzen tajbel tocslabl? ¿Jacꞌapa clet ka min tzꞌajben tocslabl?

15Cxeꞌl nkanena cyey, ka at jun ocslal cyxola mintiiꞌ t-xbalen bix mintiiꞌ twa,

16bix ka ma txiꞌ cykbaꞌna te: “Tenxita tuj ttz̈yal. Cutz̈it ka ma cnet t-xbalena bix tway tuꞌna,” ka tz̈ikey te, pero mintiiꞌ onbil ma txiꞌ cykꞌoꞌna te, ¿ti tajbel cyyola te?

17Juꞌ tzunj, min tzꞌajben kocslabl ka nuk nko yolen at kocslabl pero min ma txiꞌ kyeecꞌan ka at-xix kocslabl tuꞌnj baꞌn tzin kbinchaꞌn.

18Pero kape at jun cyxola nbaj tcꞌuꞌj tiꞌj ja yol luwe, bix nxiꞌ tkbaꞌn cyjulu: “At caꞌba wik ocslal. At juun at nim cyocslabl, bix at juuntl at nim cybinchben baꞌn,” tz̈i tzunj xjal yaaꞌn jax tuꞌn. Pero cxeꞌl nkbaꞌna te, ka mintiiꞌ tbinchben baꞌn jun xjal, mintzentiiꞌ tyecꞌbil ka at tocslabl tiꞌ Dios. Pero ka baꞌn nbint tuꞌn, nyeecꞌantzen at tocslabl tiꞌ Dios.

19Nchi ocslana junx Dios at, bix baꞌn ja lu. Pero cꞌoquel cycꞌuꞌja tiꞌj jax juꞌx ke biman ocslaꞌn cyuꞌn junx Dios at. Pero min tzꞌajben cyocslabl, cuma min nchi binchan baꞌn bix juꞌ tzunj nuk nchi luꞌlen tuꞌn ttz̈i cyiꞌj.

20Key xjal min tzꞌel cyniꞌya tiꞌj, min tzꞌajben cyocslabla ka mintiiꞌ baꞌn nbint cyuꞌna.

21Cꞌoquel cycꞌuꞌja tiꞌ kxeꞌchel Abraham. ¿Mimpa e tyeecꞌaxin ka jiquenxin twitz Dios tuꞌnj tbinchbenxin? E tbixin tajbil Dios. At jun maj e xiꞌ toyenxin tcwalxin Isaac te Dios twiꞌ altar, tisen e tkba Dios.

22Tzinenxsen taꞌ junx eteꞌ tbinchbenxin tuya tocslablxin, bix tuꞌnj e bint tuꞌnxin, e tyeecꞌaxin tocslablxin tzꞌaklxix.

23Juꞌtzen e japan baj Dios tiꞌj tyol tzin tkbaꞌn cyjulu: “Oc ke tcꞌuꞌj Abraham tiꞌ Dios, bix juꞌ tzunj e tzaj kꞌoꞌn te Abraham tuꞌn jiquen taꞌ tuj twitz Dios,” tz̈i tyol Dios. Bix cuma e tbincha Abraham j-e tkba Dios, juꞌ tzunj oc tkꞌoꞌn Dios jaxin te tuya Diosxin.

24Juꞌ tzunj, key hermano, il tiꞌj qꞌuelel cyniꞌya tiꞌj ka jiquen eteꞌy twitz Dios ka at yecꞌbil te cyocslabla tuꞌnj cybinchbena, bix yaaꞌn nuk tuꞌnj cyocslabla bix ka mintiiꞌ cyakꞌbila ma bint.

25Juꞌ e cyjaꞌ jxuj xuuj Rahab aj paj jiquen twitz Dios jatxe ootxa. E tyeecꞌaxuj at tocslablxuj tiꞌ Dios tej eꞌwen ke tsanjel Dios tuꞌnxuj tuj tjaxuj, bix e tzaj tonenxuj ejeeꞌxin tuꞌn cyel okxin, tuꞌn tcoꞌpantexuj ejeeꞌxin twitz cawel tuj tnom te Jericó.

26Cytzkiꞌna cyimne taꞌ jun xjal mintiiꞌtl t-xew. Jaxsen juꞌx cyocslabla, cyimne taꞌ ka mintiiꞌ baꞌn ma bint cyuꞌna.