1Maatkxsen eteꞌ Pablo tuya Bernabé tuj tnom te Antioquía, bix e pon jun clojxin xjal judío, te ttxꞌotxꞌ Judeakexin. Bixsen akꞌkexin kbal cye ocslal ka tuꞌn cycoꞌpja tuj il, il tiꞌj cbinel cyuꞌna tisenx tten tcostumbre Moisés e cyaj ttzꞌiꞌben. Tz̈i tzunkexin:
—Te tzun kej kꞌij ootxa ke cye xjal il tiꞌj el cpette ttzꞌumel twiꞌ cytzꞌalbil te techel ka te Dios ke t-xjal. Juꞌx ley jaꞌlewe ke cyey ejeeꞌy judío, il tiꞌj cxeꞌl cyiiꞌna ja costumbrewa, bixsen ke cyey xjal yaaꞌn judío, juꞌxa il tiꞌj cycuyey ja costumbre te ootxa. Ka min, mlay chi coꞌpja―tz̈itzen ke judío te Judea cye ocslal.
2Pero te Pablo tuya Bernabé, min el baꞌn tuj cywitzxin tiꞌj cyxnakꞌatzxin, bix e jaw jun kꞌoj. Pero tuꞌntzen tbaj twiꞌ ja kꞌoja, bix aj cysmaꞌn ke ocslal ja Pablo tuya Bernabé bixsen cabtl xjal tuj tnom te Jerusalén, tuꞌn cyiikꞌen texin mas txolen tiꞌj cykꞌoj tiꞌj tley Moisés cye t-xel Jesús bix cye tij.
3Entonces bixsen e xiꞌ bintkexin tuj tnom te Jerusalén. Tuꞌn cyponxin, il tiꞌj iyꞌkexin tuj txꞌotxꞌ te Fenicia bix Samaria. Tejtzen cybet-xin cyuj ja txꞌotxꞌa, bix e cyaj cykꞌoꞌnxin tuj chicꞌaj cyej xjal judío tiiꞌn ke xjal yaaꞌn judío otk cyaj cykꞌoꞌn cycostumbre tuꞌn cyoc lpe tiꞌ Dios. N-ocxetzen cybiꞌn ocslal juꞌwa, nchi jawxe tzalaj.
4Cwax cypon Pablo tuya ke tuya tuj tnom te Jerusalén, bix e kꞌijkexin cyuꞌn t-xel Jesús twitz txꞌotxꞌ bix cyuꞌn cawel tuj tja Dios, bix cyuꞌn cykil xjal tuj tja Dios. Bix e xiꞌ cykbaꞌn Pablo cyexin tikꞌch otk bint tuꞌn Dios cyuj juntl lugar, bix ti tten otk tonen Dios ejeeꞌxin.
5Pero cyxoltzen ocslal tocxe cabxin cyiw cykꞌoꞌna cyiib tuya tley Moisés. Bix e jaw weꞌkexin, bix akꞌkexin yolel cyjulu:
—Baꞌnte tiꞌj kej xjal yaaꞌn judío ma chi akꞌ ocslal tcoꞌpbil Jesús. Pero il tiꞌj chi oquel kchkꞌoꞌn tuꞌn cycuyante tikꞌchj e tkba Moisés, tuꞌn toc cyechel tiꞌ twiꞌ cytzꞌalbil tisenx tten cyxol xjal judío―tz̈i tzun kej xin ocslal cyiw cykꞌona cyiib tuj cyley. Ejeeꞌ ke fariseo.
6Tbajlenxitl tzunj yola, cykil ke t-xel Jesús cyuya ke cawel tuj tja Dios bix oc cychmon cyiibxin te cyeyꞌlte, bix te nincꞌulte ti chi temela jxjal yaaꞌn judío ka tuꞌn cyoc lmet tiꞌj tuꞌn tel keset ttzꞌumel twiꞌ cytzꞌalbil bix ka min, tuꞌntzen tbint cyuꞌnxin tixix ctemela.
7Nimxsen tyem e yolenkexin tibaj juꞌwa. Nimxsen jun yol otk jaw. Pero cwa tjaw weꞌ Pedro, bix e xiꞌ tkbaꞌnxin:
—Key hermano, cytzkiꞌntl tzuna at-xe tyem tscyꞌoꞌn kena tuꞌn Dios tuꞌn t-xiꞌ nkbaꞌna jbaꞌn tpocbal kej xjal yaaꞌn judío tuꞌn cyocslaꞌn.
8Ttzkiꞌnte Dios alj baꞌn taj, bix e xiꞌ tkꞌoꞌnxin Espíritu Santo cye tisenx tten tzaj tkꞌoꞌnxin Espíritu Santo ke. Juꞌtzen tten tkbamlente Dios ka tuꞌn tiikꞌen texin kej xjal yaaꞌn judío tisenxj kewa.
9Yaaꞌntzen ti elpenina ja lu jaj min tzꞌoc tcyeꞌyente Dios ka tecꞌax xjal koꞌ. Min-alte jun mas achen twitz juntl. Cuma o chi ocslan, cykilkecye o tzꞌel ttxjoꞌn Dios il tiꞌ cyanem.
10Katzen juꞌwa, ka nuk tuꞌncꞌa Jesús taꞌ coꞌpbil, ¿tikentzen eteꞌqꞌuey cyakwusalecte Dios? ¿Tikentzen n-oca cykꞌoꞌna cykilj tley Moisés cyej xjal yaaꞌn judío? Tej tley Moisés tisen jun iktz te ja kibaj, mitetpe ejooꞌke mitetpe ke ootxa xjal mix ebina tjaw cyiken, bix ya cyajtltzen cyey tzꞌoc cychkꞌoꞌna cabtl te ikjawte.
11¡Min, key taat! Min chi oc cylomoꞌna tiꞌ tley Moisés. Ktzkiꞌntl tej coꞌpbil ke tuꞌn a tanem Kman Jesús, bix juꞌxsen ke xjal yaaꞌn judío, jax coꞌpl te cye tuꞌn Kman Jesús. Mintiiꞌtl juntl mas. Mintiiꞌtl menos. Oꞌcx Jesús―tz̈i Pedro cye niyꞌtl xjal.
12Tbajlenxitl tzunj juꞌwa, mintzentiiꞌtl yol e baj. Bix akꞌ Pablo tuya Bernabé yolel. Cykil xjal oc ebinte cyexin tej cyyolenxin tiꞌ, tikꞌch tcyecayil bixsen techlal e bint tuꞌn Dios cyuꞌnxin te yecꞌbil ka ncyꞌiwlan Dios cyiꞌj xjal yaaꞌn judío tisenx cyej xjal judío.
13Tejtzen cybaj yolen Pablo tuya Bernabé, bix akꞌ Jacobo yolel, titzꞌen Jesús, bix jaxin tneel cawel cyibaj ocslal. Tz̈i tzunxin cyjulu:
—Key hermano, cybintz nyol, nuksama.
14Otzen tzꞌoc cybiꞌna tiꞌj tyol jxin Simón Pedro. Ma tzaj tyolenxin ke ti tten tscyꞌonte Dios ke xjal yaaꞌn judío tuꞌn cyoc te ocslal bix tuꞌn cyoc te t-xjal Dios.
15Kej tyol Pedro lu junxcꞌake tuyaj tuꞌl cyyol tyolel Dios twitz txꞌotxꞌ jatxe nejl. Cybintzney ti tten tyol ktzan tyolel Dios Amós. Tz̈itzen cyjulu:
16“Tz̈itzen Kman Dios cyjulu: ‘Cyuj tzunj kꞌij chi ul, inayena Dios chi oquel ncꞌojlaꞌna juntl maj kej xjal el itzꞌj tiꞌ cawel David. Ya cycawbil t-xeꞌchel David ma tzakꞌ pjel twiꞌ, tisenxj nintzaj tja Dios e bint tuꞌn David mintiiꞌtl tipemal. Pero tzul jun kꞌij oj tjaw ntz̈ꞌiysaꞌn tcawbil jun t-xeꞌchel David, tisen jun jaaꞌ ma cub xitj pero cjawel cybinchaꞌn juntl maj.
17Cbinel ja lu wuꞌn tuꞌntzen cykil ke tnom twitz txꞌotxꞌ yaaꞌn judío tuꞌn t-xiꞌ cyjyoꞌn Taaw entera twitz txꞌotxꞌ, tuꞌn cyoc te nxjal,’
18juꞌtzen toc tuꞌn Kaawa,” tz̈itzen Amós. Entonces o cyaj tkꞌoꞌn Dios tuj chicꞌaj at-xe tyem ka tajxin kej xjal yaaꞌn judío.
19Juꞌ tzunj, key taat, weya tuj nwitz min tzꞌoc kyajlaꞌn ke xjal yaaꞌn judío tuyaj cycostumbre judío, cuma ya ma cyaj cykꞌoꞌn cycostumbre nuk tuꞌn ma tzꞌoc lpe cyanem tiꞌ Dios.
20Nuk cab yol tiꞌj yaaꞌn baꞌn cxeꞌl kkbaꞌn tuj jun uꞌj, nuk jaj ti jilelj n-el cyxooꞌn xjal judío. Min-al jun ocslal cxeꞌl chyonte jchiꞌpj otk txiꞌ oyet cye sant, kej mintiiꞌ cyanem. Min-al juntl xuuj tajbe xinak, bix min-al juntl xinak tajbe xuuj. Nuk ja t-xuꞌl, nuk ja tchmil. Min-al jun toclen tiꞌj chyoj jun alimaj nuk otk jaw jtzꞌet, cuma min ma tzꞌel ttz̈iyꞌ, bix tuꞌn miꞌn txiꞌ cycꞌaꞌn tz̈iyꞌ. Oꞌcx xsunj.
21Jatzen cyaja tumel lu cxeꞌl kkbaꞌn cye, tuꞌntzen mintiiꞌ takꞌ tiꞌ cyanem ocslal judío, cuma eteꞌ tuj cykil kej tnoma, bix tzinx n-oc cybiꞌn tyol Moisés, nxiꞌ cyeyette jaca sábado, jaca smant at-xe kꞌij. Cyuya tzunja yol cxeꞌl kkbaꞌn cbinela cye cyuꞌn. Juꞌtzen ko temel chꞌin cyuyey tuj ttz̈yal―tz̈itzen Jacobo te cabtl.
22Cykilxsen ke t-xel Jesús, ke cawel, bixsen ke ocslal el tyol Jacobo baꞌn tuj cywitz, bixsen etz cyscyꞌoꞌnxin caꞌba xjal te tuya Pablo bix Bernabé, tuꞌn cyxiꞌxin cyuya ocslal tuj tnom te Antioquía. Nintzaj kꞌil txolen xsunkexin cyxol ocslal te Jerusalén. Judasxin, juntl tbixin Barsabás, bixsen Silas.
23Cycyaal tzunj xin xjal lu e xiꞌ kꞌonte jun uꞌj cyej ocslal yaaꞌn judío. Tz̈itzen uꞌj cyjulu: “Achenkey ocslal te Antioquía, bixsen cykil ke ocslal yaaꞌn judío te ttxꞌotxꞌ Siria bix Silicia. Jun kꞌolbebl cyey. Keya ejooꞌya t-xel Jesús, bix cawel tuj tja Dios, bix cykilj cabtl ocslal tuj Jerusalén ma txiꞌ kkꞌoꞌna ja uꞌj lu cyey.
24O kbiya at cab xjal e xiꞌ tzalu bix o chi pon cyuyey. Pero mintiiꞌ tumel o txiꞌ kkꞌoꞌna, bix o chi oc ten yajlalec cyey tuya cyxnakꞌatz, bix o chi cub tzpeta. Tz̈itzenke ka te cyey, il tiꞌj tuꞌn cyoc lpey tiꞌ tley Moisés. Tisen tzunj, kej xinak il tiꞌj qꞌuelel cpet ttzꞌumel twiꞌ cytzꞌalbil tisenj cye xjal judío.
25Juꞌ tzunj ma baj knincꞌuꞌn ke tiꞌj tzalu. Matzen cub kuꞌna tuꞌn tetz kscyꞌoꞌna cab xjal te kej kcloja tuꞌn cyxiꞌ tuya Bernabé bix Pablo. Ejeeꞌtzen xjalja n-oc nim kakꞌa cye.
26N-oc ke ke kcꞌuꞌj tiꞌ Bernabé bix tiꞌ Pablo, cuma nuk tuꞌncꞌa Jesús ma txaꞌ cykꞌoꞌn cychunkꞌlal tuj t-xobiyil.
27Ja tzunj caꞌbaxin kyolela ma txiꞌ ksmaꞌna, jatzen Judas tuya Silas. Cꞌoquel cymojbaꞌn cyyol tuya Pablo bix Bernabé, tuꞌntzen t-xiꞌ cykbaꞌn cyey ti jilel ma baj knincꞌuꞌna tiꞌj.
28Jatzen yol ja lu. Te Espíritu Santo bixsen keya, baꞌn ma tzꞌel tuj kwitza tuꞌn miꞌn jaw cyikena jun ley cyiw. Oꞌcx xsun cye ja lu:
29‘Miꞌn txiꞌ cychyoꞌna kej alimaj otk txiꞌ oyet cye sant. Miꞌn txiꞌ cycꞌaꞌna tz̈iyꞌ. Miꞌn txiꞌ cychyoꞌna ke alimaj at-x tz̈iyꞌ tuj t-xumlal. Mintiiꞌ cyoclena tiꞌ juntl xinak ma juntl xuuj yaaꞌn t-xuꞌla ma yaaꞌn tchmila.’ Ka ma cub cycꞌuꞌna kej yola, baꞌntzen chi xeꞌla. Cykꞌoꞌnc cyipena,” tz̈itzen uꞌj.
30Entonces bixsen e xiꞌ cysmaꞌn ocslal ke Pablo, Bernabé, Judas, bixsen Silas maan Antioquía tuyaj uꞌj. Cycyaal tzunxin e xiꞌkexin. Tejtzen cyponxin, bix oc cychmoꞌnxin cykil ke ocslal tuj jun lugar, bixsen e xiꞌ cykꞌoꞌnxin uꞌj.
31Tejtzen t-xiꞌ cycyeꞌyenxin uꞌj, bix e jaw tzalajkexin tuꞌnj baꞌn ocsabl cycꞌuꞌjxin e pon.
32Bix oc cytzakꞌtzaꞌn chꞌintl Judas tuya Silas cabtl yol. At-xix cyexin cyipemal te kbalx tyol Dios. Nimxsen oc cynimsaꞌnxin cycꞌuꞌj ocslal tuya cyyolxin.
33E ten ke Judas tuya Silas cabtl kꞌij. Tel-lenxitl tzunj cab cykꞌijxin tuj Antioquía, bix e kꞌolben ke ocslal cyexin, tuꞌn tuj ttz̈yal chi temelaxin oj cymeltzꞌajxin tuj Jerusalén cyuyaj xjal e xiꞌ chkꞌonte cyexin.
34Pero cwa tcub tuꞌn Silas tuꞌn tcyajxin tuj Antioquía.
35Pablo tuya Bernabé bix e cyajkexin tuj Antioquía. Tuya cabtl xjal bix e xnakꞌtzanxke cye xjal, bix e kbankexin tyol Dios.
Tej tel tpaꞌn tiib Pablo tiꞌ Bernabé36Tel-lenxitltzen cab cykꞌijxin, bix e xiꞌ tkbaꞌn Pablo te Bernabé:
—Nchin ximan cyiꞌj ocslal cyuj tnom jakꞌch o ko iꞌya te kbal tyol Jesús. Titzele min koꞌx te kꞌolbelcye juntl maj te cyeyꞌlcye laꞌ tiiꞌn eteꞌ―tz̈i Pablo te Bernabé.
37Baꞌn eꞌla tuj twitz Bernabé. Pero e tajbe tzunxin tuꞌn t-xiꞌ Juan Marcos cyuyaxin.
38Pero min e tcuya Pablo, cuma jxin Juan Marcos tuj tneel maj cybexin bix otk cyaj tcyeꞌyenxin ejeeꞌ Pablo tuya Bernabé tuj Panfilia, bix min oc lpexin cyiꞌjxin tuj cyaakꞌenxin.
39Mix e cyjaꞌkexin baꞌn. Cwa cycub paxxin tuꞌn mix e bina cytenxin. Bix oc tmojban tiib Bernabé tuya Juan Marcos. Cycaꞌbel tzunxin ocxkexin tuj jun barc tuꞌn cyponxin tuj ttxꞌotxꞌ Chipre, te yolel cyuya xjal tiꞌ tyol Dios.
40Yaltzen te Pablo, bix iyꞌ tiiꞌnxin Silas te tuyaxin tuj tbexin. E naꞌn ke ocslal Dios cyibajxin, tuꞌntzen ttzaj nim tcꞌuꞌj Dios cyibajxin tuj be, bix e tzyet cybexin.
41Bix akꞌkexin betel tuj ttxꞌotxꞌ Siria bix Silicia, bix nuk jakꞌch iꞌyakexin. Oc cynimsaꞌnxin cycꞌuꞌj ocslal cyuj tja Dios.
Who We AreWhat We EelieveWhat We Do
2025 by iamachristian.org,Inc All rights reserved.
