1 CORINTIOS 4 - Mam of Todos Santos -- Guatemala Unicode

Nuk ajbelel koꞌya te Cristo

1Juꞌ tzunj, key hermano, keya nuk te kajbelela te Cristo tuꞌn t-xiꞌ kxnakꞌtzaꞌna cyey alcye tumelj eꞌwen taꞌ tuꞌn Dios ootxa pero ya chicꞌaj jaꞌlewe.

2Apolos bix inayena nuk t-akꞌanal Cristo, bix cytzkiꞌna te jun akꞌanal il tiꞌj tuꞌn tbint taakꞌen kꞌoꞌn tuꞌn taaw, tuꞌntzen baꞌn toc ke tcꞌuꞌj tpatrón tiꞌj.

3Yaltzen weya, yaaꞌn il tiꞌj tuj nwitza ti niyꞌ tuj cycꞌuꞌja tiꞌ waakꞌena. Bix jax mintiiꞌ il tiꞌj tuj nwitza tuꞌn toc tcꞌuꞌj juntl xjal tiꞌ waakꞌena, ka baꞌn bix ka min. Mi nuket inayena mlay tzꞌoc nwitza tiꞌ waakꞌena.

4Tuj nwitza baꞌn nbint waakꞌena wuꞌna, pero mintiiꞌ il tiꞌj tuꞌn t-xiꞌ nkbaꞌna ka baꞌn waakꞌena, cuma nuk ja te Kaaw kbalte ka baꞌn.

5Juꞌ tzunj yaaꞌn tumel tuꞌn cyoc tena te cyeyꞌlte ti tten waakꞌena. Tzul tej kꞌij oj tul Kaaw te cyeyꞌlte cykil akꞌuntl, tuꞌn tchicꞌajax tiiꞌn taakꞌen jaca juun xjal. Bix oj tulxin, te cyeyꞌlte ti niyꞌ tuj tcꞌuꞌj jaca juun xjal. Bix kej xjal e binchan baꞌn cycꞌmaꞌn jun baꞌn yol cyibaj tuꞌn Dios.

6Key hermano, cykil t-akꞌanal Dios at tuꞌn cyajben cyey, yaaꞌn nuk inayena tuya Apolos. Pero najben jkbiꞌya tuj j-uꞌj lu te cyey, cuma ejooꞌya te jun yecꞌbil ti tten tuꞌn tajben jun xjal te Dios. Nxiꞌ ntzꞌiꞌbena nuk oꞌcx kajbelela te Cristo tuꞌn kajbena te cyey, tuꞌntzen tbint cyuꞌna tuꞌn taajtz tiꞌ cynaabla, tisentzen tkbaꞌn tyol Dios, bix tuꞌntzen miꞌn chi jaw tz̈ꞌiya oj cyxiꞌ lpey tiꞌ jun xnakꞌtzal mas baꞌn tuꞌn tuj cywitza.

7Cxeꞌl nkanena cyey, ¿tikentzen nchi jaw tz̈ꞌiya twitz cabtl? ¿Titzen mastl at cyuyey tecꞌaxtlpa tzunj e tzaj tkꞌoꞌn Dios te cyey? Pero katzen o cyiikꞌa cykilca te Dios, jeyꞌ, ¿tikentzen nchi jaw tz̈ꞌiya jaacꞌaca tej ejeeꞌxa o chi jyonte cyuꞌnxa?

8Key ocslal tuj Corinto, tuj cywitza cykilca baꞌn cyuꞌna bix ya mintiiꞌ juntl il tiꞌj te cyey. Tuj cywitza cawelkey. Tuj cywitza mintiiꞌ baꞌn wuꞌna bix yaaꞌn il wiꞌja. Lastim ken weya yaaꞌn cawelkey. Nukettzen juꞌ otk pon kꞌij te cawel, tuꞌntzen in cawenttzen loya cyuyey.

9Pero yaaꞌn juꞌwa, sino tisencꞌa ja Dios o cub yeecꞌante keya t-xel Jesús cywitz xjal tuꞌntzen nuk chi tzeꞌl xjal kiꞌja. Ejooꞌya tisen jun pres tuꞌn tcub byet bix nim nbaj xmucchet. O ko oca te cycyeꞌybil cywitz cykilca ke ángel cyuyax ke xjal, tuꞌntzen cyxmucchan kiꞌja.

10Oj kakꞌanana tuj taakꞌen Cristo, tuj cywitz xjal tisen otk jaw tuj kwiꞌya. Yaltzen cyey, oj cyakꞌanana tuj taakꞌen Cristo, jawnex ejeeꞌy tuj cywitz xjal. Keya, mintiiꞌ kipemala tuj cywitz xjal. Cyey, nim cyipemala at tuj cywitz xjal. Keya t-xel Jesús, nuk jun chꞌixbajil koꞌya. Cyey, nintzajkey tuj cywitza bix tuj cywitz xjal.

11Cykil tyem hasta jaꞌlewe keya o tziyꞌx weyaj bix takꞌ aꞌ kuꞌna tuj kaakꞌena, bix at maj mintiiꞌxix chꞌin kxbalena. Bix nim xjal o tzꞌoc pjunte keya, bix at maj mintiiꞌ kwetbila ncnet.

12Bix tuj kaakꞌena tiꞌ tyol Dios mintiiꞌ twiꞌ kcꞌuꞌja. Tuꞌn kitzꞌja, at maj sictnin koꞌya tuj cyiw akꞌuntl tuꞌn kkꞌaba. Bix tej tiyꞌx cykilj lu kuꞌna ¿ti kseꞌya? Tejtzen cyoc yasen xjal kiꞌja, nuk e kkaniya t-xtalbil Dios cyibaj. Bix tejtzen toc cypjuꞌn xjal ejooꞌya, nuk e cub kpaꞌna. Mintiiꞌ oc kbincheya cyiꞌ xjal.

13Bix tejtzen tjaw jlet ẍtakꞌbil yol kiꞌja tuꞌn cabtl, aj ktzakꞌbeꞌna tuj tumel. Nejl, bix juꞌx jaꞌlewe, cywitz xjal nuk tisen txꞌajbil twitz lak koꞌya.

14Cykilj lu niyꞌx kuꞌna. Nxiꞌ ntzꞌiꞌbena jlu te cyey, yaaꞌn tuꞌn tcub cychꞌixewa, sino nuk te nimsabl cycꞌuꞌja tuꞌn cytena mas tuj tumel. Nxiꞌ nkbaꞌna juꞌwa cuma n-oc cyakꞌa weya tisen ncwalkey.

15Ejeeꞌy tisen ncwalkey, cuma inayena tisen cymana tuj tyol Dios. Amale atet hasta laaj mil cyxnakꞌtzala tiꞌ tyol Cristo cyxola, nuk junx cymana at tuj tyol Dios. Inayena. Inayena tneel xjal in pona cyxola tuyaj yol tiꞌj colbil cyey tuꞌn Cristo Jesús. Bix tuꞌnj nyola itzꞌja cyocslabla. Juꞌ tzunj inayena tisen cymana tuj cyocslabla.

16Juꞌ tzunj ncub nwitza cywitza tuꞌn t-xiꞌ cyiiꞌna ti tten wuꞌna.

17Tuꞌntzen tel cyniꞌya tiꞌj ti tten wuꞌna, o txiꞌ nchkꞌoꞌn Timoteo tuꞌn tpon cyxola, cuma ya ttzkiꞌntlxin ti tten nnaabla. Tisen cyey, ja Timoteo jun xjal ocslan tiꞌ Kaaw tuꞌn nyola. Juꞌ tzunj tisen ncwalxin tuj kocslabl, bix ja jun ocslal jiquenxix tuj tyol Dios. Oj tponxin cyxola, jatzen ctzaal tnaꞌnxin cyey ti ntena tuj wocslabla tiꞌ Cristo bix ti tten nnaabla, bix junx taꞌ nyola cyxol cykil ocslal.

18Attzen juun cyey tuj cywitza at cytz̈iy wiꞌja tuꞌn npona cyxola tuꞌn woc ilena cyiꞌja, tuꞌn cycyaja tuj tumel, bix juꞌ tzunj nchi jaw tz̈ꞌiya.

19Pero ka ma takꞌ Kaaw weya, chin pomel naj cyxola. Bix oj npona, cꞌoquel ncyeꞌyena bix cꞌoquel nniyꞌbeꞌna cynaabl jxjal nchi jaw tz̈ꞌiy, ka nuk tuya nintzaj yol nchi yolen, bix ka at tipemal cyyol.

20Yaaꞌn nuk tuꞌnj nxiꞌ kkꞌumen baꞌn koꞌ, sino tuꞌnj baꞌn tzin kbinchaꞌn, ejooꞌ ocslal nko yeecꞌan ncawen Dios tuj kanem.

21¿Entonces alcye cyaja? ¿Cyajpey tuꞌn npona tuya iꞌlbil yol, tisen jun mambaj cyiw oj tpon cyxol ke tcwal ka min cybi? ¿Bix ka cyajpey tuꞌn toc kꞌakꞌen ncꞌuꞌja cyiꞌja oj npona cyuyey?