SANTIAGO 5 - Mam of Todos Santos -- Guatemala Unicode

Jaj jun tkꞌoj Dios cwel cyibaj xjal kꞌine ka miꞌn nxiꞌ cybiꞌn tyol Dios

1Jaꞌlewe at jun nyola te cyej xjal nuk ma tzꞌoc cykꞌon cyiib tuꞌn tchmet cykꞌinemal. Chi ookꞌela bix chi s̈-ila, cuma cwel tkꞌoj Dios cyibaja.

2Pjel cykꞌinemala bix cyxbalena tbanel, tisen tzunj oj nkꞌey at cyey bix oj nbaj twaaꞌn pocꞌ cyxbalena.

3Pjel cypwaka, tisen oj nbaj acumax jun xcbil. Bix oj tbaj cypwaka, cꞌajbeltzen jlu te jun yecꞌbil jax juꞌx cyey chi pjela, cuma chi xeꞌla tuj kꞌakꞌ. Cyuj kꞌij jaꞌlewe te ja mitknaꞌx tul meltzꞌaj Kaaw, nuk oꞌcx n-oc tilel cyuꞌna tuꞌn tchmet cykꞌinemala.

4Jeyꞌ, ¿ti min e xiꞌ cykꞌoꞌna twiꞌ cycꞌuꞌj kej akꞌanal e jaw chmonte twitz cyawala? Nchi s̈-in, bix tkꞌajkꞌajel cywiꞌ ma canan tuj tẍquin Dios, ja Taaw cykilca.

5Ma tzꞌoc cykꞌon cyiiba nuk tiꞌj tuꞌn tiyꞌ cyninkꞌija twitz txꞌotxꞌ bix tiꞌj jawnexsen tbel cyway. Pero tisen jun wacẍ nwaaꞌn bix ncub laaꞌnexjil nuk tuꞌn tcub byetjil tuꞌn qꞌuey chiꞌpj, jax juꞌx cyey, chꞌixcꞌa tul canan jkꞌij tuꞌn Dios tuꞌn tcub tkꞌoj cyibaja.

6Kej xjal mintiiꞌ cyil bix mlay bint tuꞌn cycoꞌpante cyiib cywitza, ma cheꞌx cyiiꞌna cywitz juez tuꞌn cycub byet.

Il tiꞌj tuꞌn tten kpasensya bix tuꞌn knaꞌn Dios

7Juꞌ tzunj, key ocslal, ten cypasensyey. Tzul meltzꞌaj Kaaw. Juꞌ tzunj, cykꞌoꞌnc cyipena tiꞌj tuꞌn tiyꞌx qꞌuixcꞌaj cyuꞌna ojxe tulxin. Cꞌoquel cycꞌuꞌja tiꞌj jun awaal. At tpasensya tuꞌn nayon alcye kꞌij tuꞌn tul canan ttzi jbalel, bix oj ttzaj jbal, nayontzen tiꞌj jaatxꞌen cꞌajbel te te.

8Jax juꞌx cyey, ten cypasensyey, bix tuꞌn tke cycꞌuꞌja, cuma cpomel kꞌij tuꞌn tul meltzꞌaj Kaaw.

9Ejeeꞌy ocslal, miꞌn chi yolena yaaꞌn baꞌn cyiꞌ juntl cyxola, tuꞌntzen miꞌn cub castiwa cyibaja tuꞌn Kaaw. Yaaꞌn ja cyey cyaakꞌena tuꞌn cyoc xjal tuj xkelbil cywitza. Cpomel tej kꞌij tuꞌn tul Kaaw, bix oj tulxin, jaxin kbalte ka baꞌn bix ka yaaꞌn baꞌn tbinchben cykilca juun ocslal.

10Ejeeꞌy ocslal, chi lpecꞌa tiꞌj yecꞌbil e cyaj cykꞌoꞌn kej tyolel Dios te ootxa. Nim pena oc cyiꞌjxin tuj cyaakꞌenxin te t-xel Dios, pero iyꞌx cykilca cyuꞌnxin tuya cypasensyaxin.

11Jeyꞌ, cyꞌiwlaꞌn tuj kwitz kej xjal ma chi xcye oj n-oc pena cyiꞌj. N-ul tuj cycꞌuꞌja jyecꞌbil te ktzan kiyꞌjil Job. Nimxsen qꞌuixcꞌaj iyꞌ twitzxin, pero o cybiy ti e baj texin te mancꞌbil. Nimxsen xtalbil e tzaj tkꞌoꞌn Kaaw texin, cuma n-oc cyꞌixbe tcꞌuꞌj Kaaw kiꞌj, bix ntzaj tkꞌoꞌnxin lastim ke.

12Ejeeꞌy ocslal, ilxsen tiꞌj tuꞌn cyyolena tuya jun cyyola jaxxix. Miꞌn txiꞌ cykbaꞌna “tzkinn Dios” tuꞌn tcywix cyyola. Miꞌn txiꞌ cykbaꞌna “jax tuꞌn Dios tuj cyaꞌj” bix ka jax tuꞌn juntl biybaj twitz txꞌotxꞌ, tuꞌn tcywix cyyola. Ka oc, nuk oꞌcx cykbay ka oc. Pero ka min, nuk oꞌcx cykbay ka min. Cybinchama juꞌwa, tuꞌntzen miꞌn cub castiwa cyibaja.

13Pero ka ma tzꞌoc qꞌuixcꞌaj cyiꞌja, baꞌntzen tuꞌn ttzaj cynaꞌna tbi Dios. Bix ka at cytzalajebla, baꞌntzen tuꞌn cybitzena.

14Ka at jun yaab cyxola, baꞌn tuꞌn ttzaj ttxcoꞌn kej nejenel cyxol ocslal, tuꞌn tcub cykꞌoꞌn aseyt te olivo tibaj, bix tuꞌn cynaꞌn Dios tiꞌj yaab, tuꞌntzen tkꞌanj tuꞌn Kaaw.

15Bix oj cynaꞌn Dios tiꞌ yaab, ka ma tzꞌoc ke cycꞌuꞌj tiꞌ Dios, ckꞌanjeltzen tuꞌn Kaaw, bix ka otk binchan il, cnajsetel til.

16Cykbanx cyila cyxolxa, bix chi naꞌna Dios cyiꞌja cyxolxa, tuꞌntzen cycyaja baꞌn. Nimxsen nbaj oj nnaꞌn jun xjal jiquen twitz Dios tuya cykil tcꞌuꞌj.

17Cꞌoquel cycꞌuꞌja tiꞌj Elías, ja tyolel Dios te ootxa. Nuk xjalxin tisen ke. Pero e naꞌn Dios tuya cykil tcꞌuꞌj tuꞌn miꞌn tzaj jbal tuj ttanem, bix mintiiꞌ jbal e tzaj tuj oxe jnabkꞌi tuya wukak xjaw.

18Bix lwewa juntl maj e naꞌn Dios, tuꞌn ttzaj jbal. Bix e tzajtzen jbal, bix e takꞌ txꞌotxꞌ twitz tawal.

19Key ocslal, ka at jun cyxola ma cyaj tcyeꞌyen jyol jaxxix, bix ka ma tzajtz meltzꞌaj tuꞌn tonbil juntl ocslal,

20tzꞌelxix cyniꞌya tiꞌj jlu, oj ntzaj tonen jun ocslal juntl ocslal tuꞌn tcyaj tkꞌoꞌn jbe yaaꞌn baꞌn, ccleteltzen ja ocslal binchal il lu twitz cyamecy te junx maj, bix cnajsetel cykilca til.

Oꞌcx nyolja.